Dhananjaya: Dasarupaka 1

नमस्तस्मै गणेशाय यत्कण्ठः पुष्करायते । मदाभेगघनध्वानो नीलकण्ठस्य ताण्दवे

namastasmai gaṇeśāya yatkaṇṭhaḥ puṣkarāyate / madābhegaghanadhvāno nīlakaṇṭhasya tāṇd.ave

Sanskrit only: no published translation is held for this verse.

दशरूपानुकारेण माद्यन्ति भावकः । नमः सर्वविदे तस्मै विष्णवे भरताय च

daśarūpānukāreṇa mādyanti bhāvakaḥ / namaḥ sarvavide tasmai viṣṇave bharatāya ca

Sanskrit only: no published translation is held for this verse.

कस्यचिदेव कदाचिद् दयया विषयं सरस्वती विदुषः । घटयति कमपि तमन्यो जजति जनो येन वैदग्धीम्

kasyacideva kadācid dayayā viṣayaṃ sarasvatī viduṣaḥ / ghaṭayati kamapi tamanyo jajati jano yena vaidagdhīm

Sanskrit only: no published translation is held for this verse.

उद्धृत्योद्धृत्य सारं यमखिलनिगमान् नाट्यवेदं विरिञ्चिश् चक्रे यस्य प्रयोगं मुनिरपि भरतस्ताण्डवं नीलकण्ठः । शर्वाणी लास्यमस्य प्रतिपदमपरं लक्ष्म कः कर्तुमीष्टे नाट्यानां किन्तु किञ्चित् प्रगुणरचनया लक्षणं सङ्क्षिपामि

uddhṛtyoddhṛtya sāraṃ yamakhilanigamān nāṭyavedaṃ viriñciś cakre yasya prayogaṃ munirapi bharatastāṇḍavaṃ nīlakaṇṭhaḥ / śarvāṇī lāsyamasya pratipadamaparaṃ lakṣma kaḥ kartumīṣṭe nāṭyānāṃ kintu kiñcit praguṇaracanayā lakṣaṇaṃ saṅkṣipāmi

Sanskrit only: no published translation is held for this verse.

व्याकीर्णे मन्दबुद्धीनां जायते मतिविभ्रमः । तस्यार्थस्तत्पदैस्तेन सङ्क्षिप्य क्रियते ऽञ्जसा

vyākīrṇe mandabuddhīnāṃ jāyate mativibhramaḥ / tasyārthastatpadaistena saṅkṣipya kriyate 'ñjasā

Sanskrit only: no published translation is held for this verse.

आनन्दनिस्यन्दिषु रूपकेषु व्युत्पत्तिमात्रं फलमल्पबुद्धिः । योऽपीतिहासादिवदाह साधुस् तस्मै नमः स्वादुपराङ्मुखाय

ānandanisyandiṣu rūpakeṣu vyutpattimātraṃ phalamalpabuddhiḥ / yo'pītihāsādivadāha sādhus tasmai namaḥ svāduparāṅmukhāya

Sanskrit only: no published translation is held for this verse.

अवस्थानुकृतिर्नाट्यं रूपं दृश्यतयोच्यते । रूपकं तत् समारोपाद् दशधैव रसाश्रयम्

avasthānukṛtirnāṭyaṃ rūpaṃ dṛśyatayocyate / rūpakaṃ tat samāropād daśadhaiva rasāśrayam

Sanskrit only: no published translation is held for this verse.

नाटकं सप्रकरणं भाणः प्रहसनं डिमः । व्यायोगसमवकारौ वीथ्यङ्केहामृगा इति

nāṭakaṃ saprakaraṇaṃ bhāṇaḥ prahasanaṃ ḍimaḥ / vyāyogasamavakārau vīthyaṅkehāmṛgā iti

Sanskrit only: no published translation is held for this verse.

अन्यद भावाश्रयं नृत्यं नृत्तं ताललयाश्रयम् । आद्यं पदार्थाभिनयो मार्गो देशो तथा परम्

anyada bhāvāśrayaṃ nṛtyaṃ nṛttaṃ tālalayāśrayam / ādyaṃ padārthābhinayo mārgo deśo tathā param

Sanskrit only: no published translation is held for this verse.

मधुरोद्धतभेदेन तद् द्वयं द्विविधं पुनः । लास्यताण्डवरूपेण नाटकाद्युपकारकम्

madhuroddhatabhedena tad dvayaṃ dvividhaṃ punaḥ / lāsyatāṇḍavarūpeṇa nāṭakādyupakārakam

Sanskrit only: no published translation is held for this verse.

वस्तु नेता रसस्तेषां भेदको वस्तु च द्विधा । तत्राधिकारिकं मुख्यमङ्गं प्रासङ्गिकं विदुः

vastu netā rasasteṣāṃ bhedako vastu ca dvidhā / tatrādhikārikaṃ mukhyamaṅgaṃ prāsaṅgikaṃ viduḥ

Sanskrit only: no published translation is held for this verse.

अधिकारः फलस्वाम्यमधिकारो च तत्प्रभुः । तन्निरवर्त्यमभिव्यापि वृत्तं स्यादाधिकारिकम्

adhikāraḥ phalasvāmyamadhikāro ca tatprabhuḥ / tanniravartyamabhivyāpi vṛttaṃ syādādhikārikam

Sanskrit only: no published translation is held for this verse.

प्रासङ्गिकं परार्थस्य स्वार्थो यस्य प्रसङ्गतः । सानुबन्धं पताकाख्यं प्रकरी च प्रदेशभाक्

prāsaṅgikaṃ parārthasya svārtho yasya prasaṅgataḥ / sānubandhaṃ patākākhyaṃ prakarī ca pradeśabhāk

Sanskrit only: no published translation is held for this verse.

प्रासङ्गिकं परार्थस्य स्वार्थो यस्य प्रसङ्गतः । सानुबन्धं तुल्यसंविधानविशेषणम्

prāsaṅgikaṃ parārthasya svārtho yasya prasaṅgataḥ / sānubandhaṃ tulyasaṃvidhānaviśeṣaṇam

Sanskrit only: no published translation is held for this verse.

प्रख्यातोत्पाद्यमिश्रत्वभेदात् त्रेधापि तत् त्रिधा । प्रख्यातमितिहासादेरुत्पाद्यं कविकल्पितम् । मिश्रं च सङ्करात् ताभ्यां दिव्यनर्त्यादिभेदतः

prakhyātotpādyamiśratvabhedāt tredhāpi tat tridhā / prakhyātamitihāsāderutpādyaṃ kavikalpitam / miśraṃ ca saṅkarāt tābhyāṃ divyanartyādibhedataḥ

Sanskrit only: no published translation is held for this verse.

कार्यं त्रिवर्गस्तत् शुद्धमेकानेकानुबन्धि च । स्वल्पोद्दिष्टस्तु तद्धेतुर्बीजं विस्तार्यनेकधा । अवान्तरार्थविच्छेदे बिन्दुरच्छेदकारणम्

kāryaṃ trivargastat śuddhamekānekānubandhi ca / svalpoddiṣṭastu taddheturbījaṃ vistāryanekadhā / avāntarārthavicchede binduracchedakāraṇam

Sanskrit only: no published translation is held for this verse.

बीजबिन्दुपताकाख्यप्रकरोकार्यलक्षणाः । अर्थप्रकृतयः पञ्च ता एताः परिकीर्तिताः

bījabindupatākākhyaprakarokāryalakṣaṇāḥ / arthaprakṛtayaḥ pañca tā etāḥ parikīrtitāḥ

Sanskrit only: no published translation is held for this verse.

अवस्थाः पञ्च कार्यस्य प्रारब्धस्य फलार्थिभिः । आरम्भयत्नप्राप्त्याशानियताप्तिफलागमाः

avasthāḥ pañca kāryasya prārabdhasya phalārthibhiḥ / ārambhayatnaprāptyāśāniyatāptiphalāgamāḥ

Sanskrit only: no published translation is held for this verse.

औत्सुक्यमात्रमारम्भः फललाभाय भूयसे । प्रयत्नस्तु तदप्राप्तौ व्यापारोऽतित्वरान्वितः

autsukyamātramārambhaḥ phalalābhāya bhūyase / prayatnastu tadaprāptau vyāpāro'titvarānvitaḥ

Sanskrit only: no published translation is held for this verse.

उपायापायशङ्काभ्यां प्राप्त्याशा प्राप्तिसम्भवः । अपायाभावतः प्राप्तिर्नियताप्तिः सुनिश्चिता । समग्रफलसम्पत्तिः फलयोगो यथोदितः

upāyāpāyaśaṅkābhyāṃ prāptyāśā prāptisambhavaḥ / apāyābhāvataḥ prāptirniyatāptiḥ suniścitā / samagraphalasampattiḥ phalayogo yathoditaḥ

Sanskrit only: no published translation is held for this verse.

अर्थप्रकृतयः पञ्च पञ्चावस्थासमन्विताः । यथासङ्ख्येन जायन्ते मुखाद्याः पञ्च सन्धयः

arthaprakṛtayaḥ pañca pañcāvasthāsamanvitāḥ / yathāsaṅkhyena jāyante mukhādyāḥ pañca sandhayaḥ

Sanskrit only: no published translation is held for this verse.

अन्तरैकार्थसम्बन्धः सन्धिरेकान्वये सति । मुखप्रतिमुखे गर्भः सावमर्शोपसंहृतिः

antaraikārthasambandhaḥ sandhirekānvaye sati / mukhapratimukhe garbhaḥ sāvamarśopasaṃhṛtiḥ

Sanskrit only: no published translation is held for this verse.

मुखं बीजसमुत्पत्तिर्नानार्थरससम्भवा । अङ्गानि द्वादशैतस्य बीजारम्भसमन्वयात्

mukhaṃ bījasamutpattirnānārtharasasambhavā / aṅgāni dvādaśaitasya bījārambhasamanvayāt

Sanskrit only: no published translation is held for this verse.

उपक्षेपः परिकरः परिन्यासो विलोभनम् । युक्तिः प्राप्तिः समाधानं विधानं परिभावना । उद्भेदभेदकरणान्यन्वर्थान्यथ लक्षणम्

upakṣepaḥ parikaraḥ parinyāso vilobhanam / yuktiḥ prāptiḥ samādhānaṃ vidhānaṃ paribhāvanā / udbhedabhedakaraṇānyanvarthānyatha lakṣaṇam

Sanskrit only: no published translation is held for this verse.

बीजन्यासस् उपक्षेपः तद्बाहुल्यं परिक्रिया । तन्न्निष्पत्तिः परिन्यासो गुणाख्यानाद् विलोभनम्

bījanyāsas upakṣepaḥ tadbāhulyaṃ parikriyā / tannniṣpattiḥ parinyāso guṇākhyānād vilobhanam

Sanskrit only: no published translation is held for this verse.

सम्प्रधारणमर्थानां युक्तिः प्राप्तिः सुखागमः । बीजागमः समाधानं विधानं सुखदुःखकृत्

sampradhāraṇamarthānāṃ yuktiḥ prāptiḥ sukhāgamaḥ / bījāgamaḥ samādhānaṃ vidhānaṃ sukhaduḥkhakṛt

Sanskrit only: no published translation is held for this verse.

परिभावोद्भुतावेश उद्भेदो गूढभेदनम् । करणं प्रकृतारम्भो भेदः प्रोत्साहना मता

paribhāvodbhutāveśa udbhedo gūḍhabhedanam / karaṇaṃ prakṛtārambho bhedaḥ protsāhanā matā

Sanskrit only: no published translation is held for this verse.

लक्ष्यालक्ष्य इवोद्भेदस्तस्य प्रतिमुखं भवेत् । बिन्दुप्रयत्नानुगमादङ्गान्यस्य त्रयोदश

lakṣyālakṣya ivodbhedastasya pratimukhaṃ bhavet / binduprayatnānugamādaṅgānyasya trayodaśa

Sanskrit only: no published translation is held for this verse.

विलासः परिसर्पश्च विधूतं शमनर्मणो । नर्मद्युतिः प्रगयणं निरोधः पर्युपासनम्

vilāsaḥ parisarpaśca vidhūtaṃ śamanarmaṇo / narmadyutiḥ pragayaṇaṃ nirodhaḥ paryupāsanam

Sanskrit only: no published translation is held for this verse.

वज्रं पुष्पमुपन्याप्तो वर्ण संहार इत्यपि । रत्यर्थेहा विलासः स्याद् दृष्टनष्टानुसर्पणम् । परिसर्पा विधूतं स्यादरतिस्तच्छमः शमः

vajraṃ puṣpamupanyāpto varṇa saṃhāra ityapi / ratyarthehā vilāsaḥ syād dṛṣṭanaṣṭānusarpaṇam / parisarpā vidhūtaṃ syādaratistacchamaḥ śamaḥ

Sanskrit only: no published translation is held for this verse.

परिहासवत्तो नर्म धृतिस्तज्जा द्युतिर्मता । उत्तरा वाक् प्रगयणं हितरोधो निरोधनम्

parihāsavatto narma dhṛtistajjā dyutirmatā / uttarā vāk pragayaṇaṃ hitarodho nirodhanam

Sanskrit only: no published translation is held for this verse.

पर्युपास्तिरनुनयः पुष्पं वाक्यं विशेषवत् । उपन्यासस्तु सोपायं वज्रं प्रत्यक्षनिष्ठुरम् । चातुर्वर्णोपगमनं वर्णसंहार इष्यते

paryupāstiranunayaḥ puṣpaṃ vākyaṃ viśeṣavat / upanyāsastu sopāyaṃ vajraṃ pratyakṣaniṣṭhuram / cāturvarṇopagamanaṃ varṇasaṃhāra iṣyate

Sanskrit only: no published translation is held for this verse.

गर्भस्तु दृष्टनष्टस्य बीजस्यान्वेषणं मुहुः । द्वादशाङ्गः पताका स्यान् न वा स्यात् प्राप्तिसम्भवः

garbhastu dṛṣṭanaṣṭasya bījasyānveṣaṇaṃ muhuḥ / dvādaśāṅgaḥ patākā syān na vā syāt prāptisambhavaḥ

Sanskrit only: no published translation is held for this verse.

अभूताहरणं मार्गा रूपोदाहरणे क्रमः । सङ्गहश्चानुमानं च तोटकाधिवले तथा

abhūtāharaṇaṃ mārgā rūpodāharaṇe kramaḥ / saṅgahaścānumānaṃ ca toṭakādhivale tathā

Sanskrit only: no published translation is held for this verse.

उद्वेगसम्भ्रमाक्षेपा लक्षणं च प्रणीयते । अभूताहरणं छद्म मार्गस्तत्त्वार्थकीर्तनम्

udvegasambhramākṣepā lakṣaṇaṃ ca praṇīyate / abhūtāharaṇaṃ chadma mārgastattvārthakīrtanam

Sanskrit only: no published translation is held for this verse.

रूपं वितर्कवद् वाक्यं सोत्कर्षं स्यादुदाहृतिः । क्रमः सञ्चिन्त्यमानाप्तिर् भावज्ञानमथापरे

rūpaṃ vitarkavad vākyaṃ sotkarṣaṃ syādudāhṛtiḥ / kramaḥ sañcintyamānāptir bhāvajñānamathāpare

Sanskrit only: no published translation is held for this verse.

सङ्ग्रहः सामदानोक्तिर् अभ्यूहो लिङ्गतोऽनुमा । अधिवलमभिसन्धिः संरब्धं तोटकं वचः

saṅgrahaḥ sāmadānoktir abhyūho liṅgato'numā / adhivalamabhisandhiḥ saṃrabdhaṃ toṭakaṃ vacaḥ

Sanskrit only: no published translation is held for this verse.

उद्वेगोऽरिछ(?)ता भीतिः शङ्कात्रासौ च सम्भ्रमः । गर्भबीजसमुद्भेदादाक्षेपः परिकीर्तितः

udvego'richa(?)tā bhītiḥ śaṅkātrāsau ca sambhramaḥ / garbhabījasamudbhedādākṣepaḥ parikīrtitaḥ

Sanskrit only: no published translation is held for this verse.

क्रोधेनावमृशेद् यत्र व्यसनाद् या विलोभनात् । गर्भनिर्भिन्नबीजार्थः सोऽवमर्शोऽङ्गसङ्गहः

krodhenāvamṛśed yatra vyasanād yā vilobhanāt / garbhanirbhinnabījārthaḥ so'vamarśo'ṅgasaṅgahaḥ

Sanskrit only: no published translation is held for this verse.

तत्रापवादसम्फेटौ विद्रवद्रवशक्तयः । द्युतिः प्रसङ्गश्छलनं व्यवसायो विरोधनम् । प्रयोचना विचलनमादानं च तर्योदश

tatrāpavādasampheṭau vidravadravaśaktayaḥ / dyutiḥ prasaṅgaśchalanaṃ vyavasāyo virodhanam / prayocanā vicalanamādānaṃ ca taryodaśa

Sanskrit only: no published translation is held for this verse.

दोषप्रख्यापवादः स्यात् सम्फेटो रोषभाषणम् । विद्रवो वधबन्धादिर् द्रवो गुरुतिरस्कृतिः

doṣaprakhyāpavādaḥ syāt sampheṭo roṣabhāṣaṇam / vidravo vadhabandhādir dravo gurutiraskṛtiḥ

Sanskrit only: no published translation is held for this verse.

विरोधशमनं शक्तिस्तर्जनोद्वेजने द्युतिः । गुरुकीर्तनं प्रसङ्गश्छलनं चावमाननम्

virodhaśamanaṃ śaktistarjanodvejane dyutiḥ / gurukīrtanaṃ prasaṅgaśchalanaṃ cāvamānanam

Sanskrit only: no published translation is held for this verse.

व्यवसायः खशक्त्युक्तिः संरब्धानां विरोधनम् । सिद्धामन्त्रणतो भाविदर्शिका स्यात् प्रयोचना । विकत्थना विचलनम् आदानं कार्यसङ्ग्रहः

vyavasāyaḥ khaśaktyuktiḥ saṃrabdhānāṃ virodhanam / siddhāmantraṇato bhāvidarśikā syāt prayocanā / vikatthanā vicalanam ādānaṃ kāryasaṅgrahaḥ

Sanskrit only: no published translation is held for this verse.

बीजवन्तो मुखाद्यर्था विप्रकीर्णा यथायथम् । ऐकार्थ्यमुपनीयन्ते यत्र निर्वहणं हि तत्

bījavanto mukhādyarthā viprakīrṇā yathāyatham / aikārthyamupanīyante yatra nirvahaṇaṃ hi tat

Sanskrit only: no published translation is held for this verse.

सन्धिर्विबोधो ग्रथनं निर्णयः परिभाषणम् । प्रसादानन्दसमयाः कृतिभाषोपगूहनाः । पूर्वभावोपसंहारौ प्रशस्तिश्च चतुर्दश

sandhirvibodho grathanaṃ nirṇayaḥ paribhāṣaṇam / prasādānandasamayāḥ kṛtibhāṣopagūhanāḥ / pūrvabhāvopasaṃhārau praśastiśca caturdaśa

Sanskrit only: no published translation is held for this verse.

सन्धिर्बीजोपगमनं विबोधः कार्यमार्गणम् । ग्रथनं तदुपक्षेपो ऽनुभूताख्या तु निर्णयः

sandhirbījopagamanaṃ vibodhaḥ kāryamārgaṇam / grathanaṃ tadupakṣepo 'nubhūtākhyā tu nirṇayaḥ

Sanskrit only: no published translation is held for this verse.

परिभाषा मिथो जल्पः प्रसादः पर्युपासनम् । आनन्दो वाञ्छितावाप्तिः समयो दुःखनिर्गमः

paribhāṣā mitho jalpaḥ prasādaḥ paryupāsanam / ānando vāñchitāvāptiḥ samayo duḥkhanirgamaḥ

Sanskrit only: no published translation is held for this verse.

कृतिर्लब्धार्थशमनं मानाद्याप्तिश्च भाषणम् । कार्यदृष्ट्यद्भुतप्राप्तो पूर्वभावोपगूहने । वराप्तिः काव्यसंहारः प्रशस्तिः शुभशंसनम्

kṛtirlabdhārthaśamanaṃ mānādyāptiśca bhāṣaṇam / kāryadṛṣṭyadbhutaprāpto pūrvabhāvopagūhane / varāptiḥ kāvyasaṃhāraḥ praśastiḥ śubhaśaṃsanam

Sanskrit only: no published translation is held for this verse.

इष्टस्यार्थस्य रचना गोप्यगुप्तिः प्रकाशनम् । रागः प्रयोगस्याश्चर्यं वृत्तान्तस्यानुपक्षयः

iṣṭasyārthasya racanā gopyaguptiḥ prakāśanam / rāgaḥ prayogasyāścaryaṃ vṛttāntasyānupakṣayaḥ

Sanskrit only: no published translation is held for this verse.

द्वेधा विभागः कर्तव्यः सर्वस्यापोह वस्तुनः । सूच्यमेव भवेत् किञ्चिद् दृश्यश्रव्यमथापरम्

dvedhā vibhāgaḥ kartavyaḥ sarvasyāpoha vastunaḥ / sūcyameva bhavet kiñcid dṛśyaśravyamathāparam

Sanskrit only: no published translation is held for this verse.

नीरसोऽनुचितस्तत्र संसूच्यो वस्तुविस्तरः । दृश्यस्तु मधुरोदात्तरसभावनिरन्तरः

nīraso'nucitastatra saṃsūcyo vastuvistaraḥ / dṛśyastu madhurodāttarasabhāvanirantaraḥ

Sanskrit only: no published translation is held for this verse.

अर्थोपक्षेपकैः सूच्यं पञ्चभिः प्रतिपादयेत् । विष्कम्भचूलिकाङ्गास्याङ्कावतारप्रवेशकैः

arthopakṣepakaiḥ sūcyaṃ pañcabhiḥ pratipādayet / viṣkambhacūlikāṅgāsyāṅkāvatārapraveśakaiḥ

Sanskrit only: no published translation is held for this verse.

वृत्तवर्तिष्यमाणानां कथांशानां निदर्शकः । सङ्क्षेपार्थस्तु विष्कम्भो मध्यपात्रप्रयोजितः । एकानेककृतः शुद्धः सङ्कीर्णो नीचमध्यमैः

vṛttavartiṣyamāṇānāṃ kathāṃśānāṃ nidarśakaḥ / saṅkṣepārthastu viṣkambho madhyapātraprayojitaḥ / ekānekakṛtaḥ śuddhaḥ saṅkīrṇo nīcamadhyamaiḥ

Sanskrit only: no published translation is held for this verse.

तद्वदेवानुदात्तोक्त्या नीचपात्रप्रयोजितः । प्रवेशोऽङ्कद्वयस्यान्तः शेषार्थस्योपसूचकः

tadvadevānudāttoktyā nīcapātraprayojitaḥ / praveśo'ṅkadvayasyāntaḥ śeṣārthasyopasūcakaḥ

Sanskrit only: no published translation is held for this verse.

अन्तर्यवनिकासंस्थैश्चूलिकार्थस्य सूचना । अङ्कान्तपात्रैरङ्कास्यं छिन्नाङ्कस्यार्थसूचनात्

antaryavanikāsaṃsthaiścūlikārthasya sūcanā / aṅkāntapātrairaṅkāsyaṃ chinnāṅkasyārthasūcanāt

Sanskrit only: no published translation is held for this verse.

अङ्कावतारस्त्वङ्कान्ते पातोऽङ्कस्याविभागतः । एभिः संसूचयेत् सूच्यं दृश्यमङ्कैः प्रदर्शयेत्

aṅkāvatārastvaṅkānte pāto'ṅkasyāvibhāgataḥ / ebhiḥ saṃsūcayet sūcyaṃ dṛśyamaṅkaiḥ pradarśayet

Sanskrit only: no published translation is held for this verse.

नाट्यधर्ममपेक्ष्यैतत् पुनर्वस्तु त्रिधेष्यते । सर्वेषां नियतस्यैव श्राव्यमश्राव्यमेव च

nāṭyadharmamapekṣyaitat punarvastu tridheṣyate / sarveṣāṃ niyatasyaiva śrāvyamaśrāvyameva ca

Sanskrit only: no published translation is held for this verse.

सर्वश्राव्यं प्रकाशं स्यादश्राव्यं स्वगतं मतम् । द्विधान्यन् नाट्यधर्माख्यं जनान्तमपवारितम्

sarvaśrāvyaṃ prakāśaṃ syādaśrāvyaṃ svagataṃ matam / dvidhānyan nāṭyadharmākhyaṃ janāntamapavāritam

Sanskrit only: no published translation is held for this verse.

त्रिपताकाकरेणान्यानपवार्यान्तरा कथाम् । अन्योन्यामन्त्रणं यत् स्याज् जनान्ते तज् जनान्तिकम् । रहस्यं कथ्यते ऽन्यस्य परावृत्त्यापवारितम्

tripatākākareṇānyānapavāryāntarā kathām / anyonyāmantraṇaṃ yat syāj janānte taj janāntikam / rahasyaṃ kathyate 'nyasya parāvṛttyāpavāritam

Sanskrit only: no published translation is held for this verse.

किं ब्रवीष्येवमित्यादि विना पात्रं ब्रवीति यत् । श्रुत्वेवानक्तमप्येकस्तत् स्यादाकाशमापितम्

kiṃ bravīṣyevamityādi vinā pātraṃ bravīti yat / śrutvevānaktamapyekastat syādākāśamāpitam

Sanskrit only: no published translation is held for this verse.

इत्याद्यशेषमिह वस्तुविभेदजातं रामायणादि च विभाव्य बृहत्कथां च । आसूत्रयेत् तदनु नेतृरसानुगुण्याच् चित्रां कथामुचितचारुवचःप्रपञ्चैः

ityādyaśeṣamiha vastuvibhedajātaṃ rāmāyaṇādi ca vibhāvya bṛhatkathāṃ ca / āsūtrayet tadanu netṛrasānuguṇyāc citrāṃ kathāmucitacāruvacaḥprapañcaiḥ

Sanskrit only: no published translation is held for this verse.