Library·Divyāvadāna·101
द्विरपि प्रसेनजित् कौशलस्तीर्थ्यानिदमवोचत्--विदर्शितं भगवता उत्तरे मनुष्यधर्मे रिद्धिप्रातिहार्यम्।
dvirapi prasenajit kauśalastīrthyānidamavocat--vidarśitaṃ bhagavatā uttare manuṣyadharme riddhiprātihāryam/
Sanskrit only: no published translation is held for this verse.
यूयमपि विदर्शयध्वम्। एवमुक्ते तीर्थ्या अन्योन्यं विघट्टयन्त एवाहुः--त्वमुत्तिष्ठ त्वमुत्तिष्ठेति।
yūyamapi vidarśayadhvam/ evamukte tīrthyā anyonyaṃ vighaṭṭayanta evāhuḥ--tvamuttiṣṭha tvamuttiṣṭheti/
Sanskrit only: no published translation is held for this verse.
न कश्चिदप्युत्तिष्ठति॥
na kaścidapyuttiṣṭhati//
Sanskrit only: no published translation is held for this verse.
तेन खलु पुनः समयेन पाञ्चिको महासेनापतिस्तस्यामेव पर्षदि संनिपतितो ऽभूत् संनिपतितः।
tena khalu punaḥ samayena pāñciko mahāsenāpatistasyāmeva parṣadi saṃnipatito 'bhūt saṃnipatitaḥ/
Sanskrit only: no published translation is held for this verse.
अथ पाञ्चिकस्य यक्षसेनापतेरेतदभवत्--चिरमपि ते इमे मोहपुरुषा भगवन्तं विहेठयिष्यन्ति भिक्षुसंघं चेति विदित्वा तुमुलं वातवर्षं संजनय्य महान्तमुत्सृष्टवान्।
atha pāñcikasya yakṣasenāpateretadabhavat--ciramapi te ime mohapuruṣā bhagavantaṃ viheṭhayiṣyanti bhikṣusaṃghaṃ ceti viditvā tumulaṃ vātavarṣaṃ saṃjanayya mahāntamutsṛṣṭavān/
Sanskrit only: no published translation is held for this verse.
तुमुलेन वातवर्षेण तीर्थ्याणां मण्डपा अदर्शनपथे क्षिप्ताः।
tumulena vātavarṣeṇa tīrthyāṇāṃ maṇḍapā adarśanapathe kṣiptāḥ/
Sanskrit only: no published translation is held for this verse.
तीर्थ्या ह्यशनिवर्षेण बाध्यमाना दिशो दिग्भ्यो विचलन्ति।
tīrthyā hyaśanivarṣeṇa bādhyamānā diśo digbhyo vicalanti/
Sanskrit only: no published translation is held for this verse.
अनेकानि प्राणिशतसहस्राण्यतिवर्षेण बाध्यमानानि येन भगवांस्तेनोपसंक्रान्ताः।
anekāni prāṇiśatasahasrāṇyativarṣeṇa bādhyamānāni yena bhagavāṃstenopasaṃkrāntāḥ/
Sanskrit only: no published translation is held for this verse.
उपसंक्रम्य भगवतः पादौ शिरसा वन्दित्वा एकान्ते निषण्णानि। भगवता तथा अधिष्ठितम् यथा तस्यां पर्षद्येकवारिबिन्दुर् न पतितः।
upasaṃkramya bhagavataḥ pādau śirasā vanditvā ekānte niṣaṇṇāni/ bhagavatā tathā adhiṣṭhitam yathā tasyāṃ parṣadyekavāribindur na patitaḥ/
Sanskrit only: no published translation is held for this verse.
एकान्तनिषण्णान्यनेकानि प्राणिशतसहस्राण्युदानमुदानयन्ति--अहो बुद्धः, अहो धर्मः, अहो संघः।
ekāntaniṣaṇṇānyanekāni prāṇiśatasahasrāṇyudānamudānayanti--aho buddhaḥ, aho dharmaḥ, aho saṃghaḥ/
Sanskrit only: no published translation is held for this verse.
अहो धर्मस्य स्वाख्यातता।
aho dharmasya svākhyātatā/
Sanskrit only: no published translation is held for this verse.
पाञ्चिकेन यक्षसेनापतिना तीर्थ्या अभिहिताह्--एते यूयं मोहपुरुषा भगवन्तं शरणं गच्छध्वं धर्मं च भिक्षुसंघं च।
pāñcikena yakṣasenāpatinā tīrthyā abhihitāh--ete yūyaṃ mohapuruṣā bhagavantaṃ śaraṇaṃ gacchadhvaṃ dharmaṃ ca bhikṣusaṃghaṃ ca/
Sanskrit only: no published translation is held for this verse.
ते निष्पलायमानाः कथयन्ति--एते वयं पर्वतं शरणं गच्छामः, वृक्षाणां कुड्यानामारामाणां च शरणं गच्छामः॥
te niṣpalāyamānāḥ kathayanti--ete vayaṃ parvataṃ śaraṇaṃ gacchāmaḥ, vṛkṣāṇāṃ kuḍyānāmārāmāṇāṃ ca śaraṇaṃ gacchāmaḥ//
Sanskrit only: no published translation is held for this verse.
अथ भगवांस्तस्यां वेलायां गाथां भाषते--
atha bhagavāṃstasyāṃ velāyāṃ gāthāṃ bhāṣate--
Sanskrit only: no published translation is held for this verse.
बहवः शरणम् यान्ति पर्वतांश्च वनानि च।
bahavaḥ śaraṇam yānti parvatāṃśca vanāni ca/
Sanskrit only: no published translation is held for this verse.
आरामांश्चैत्यवृक्षांश्च मनुष्या भयतर्जिताः॥६॥
ārāmāṃścaityavṛkṣāṃśca manuṣyā bhayatarjitāḥ//6//
Sanskrit only: no published translation is held for this verse.
न ह्येतच्छरणं श्रेष्ठं नैतच्छरणमुत्तमम्।
na hyetaccharaṇaṃ śreṣṭhaṃ naitaccharaṇamuttamam/
Sanskrit only: no published translation is held for this verse.
नैतच्छरणमागम्य सर्वदुःखात् प्रमुच्यते॥७॥
naitaccharaṇamāgamya sarvaduḥkhāt pramucyate//7//
Sanskrit only: no published translation is held for this verse.
यस्तु बुद्धं च धर्मं च संघं च शरणं गतः।
yastu buddhaṃ ca dharmaṃ ca saṃghaṃ ca śaraṇaṃ gataḥ/
Sanskrit only: no published translation is held for this verse.
आर्यसत्यानि चत्वारि पश्यति प्रज्ञया यदा॥८॥
āryasatyāni catvāri paśyati prajñayā yadā//8//
Sanskrit only: no published translation is held for this verse.
दुःखं दुःखसमुत्पन्नं निरोधं समतिक्रमम्।
duḥkhaṃ duḥkhasamutpannaṃ nirodhaṃ samatikramam/
Sanskrit only: no published translation is held for this verse.
आर्यं चाष्टाङ्गिकं मार्गं क्षेमं निर्वाणगामिनाम्॥९॥
āryaṃ cāṣṭāṅgikaṃ mārgaṃ kṣemaṃ nirvāṇagāminām//9//
Sanskrit only: no published translation is held for this verse.
एत द्वै शरणं श्रेष्ठमेतच्छरणमुत्तमम्।
eta dvai śaraṇaṃ śreṣṭhametaccharaṇamuttamam/
Sanskrit only: no published translation is held for this verse.
एतच्छरणमागम्य सर्वदुःखात्प्रमुच्यते॥१०॥
etaccharaṇamāgamya sarvaduḥkhātpramucyate//10//
Sanskrit only: no published translation is held for this verse.
अथ पूरणस्यैतदभवत्--श्रमणो गौतमो मदीयाञ् श्रावकानन्वावर्तयिष्यति। इति विदित्वा निष्पलायन् कथयति--अहम् युष्माकं शासनसर्वस्वं कथयिष्यामि।
atha pūraṇasyaitadabhavat--śramaṇo gautamo madīyāñ śrāvakānanvāvartayiṣyati/ iti viditvā niṣpalāyan kathayati--aham yuṣmākaṃ śāsanasarvasvaṃ kathayiṣyāmi/
Sanskrit only: no published translation is held for this verse.
यावद् दृष्टिगतान् ग्राहयितुमारब्धः।
yāvad dṛṣṭigatān grāhayitumārabdhaḥ/
Sanskrit only: no published translation is held for this verse.
यदुत अन्तवाम्ल्लोकः, अनन्तः, अन्तवांश्चानन्तवांश्च, नैवान्तवान्नानन्तवान्, स जीवस्तच्छरीरमन्यो जीवो ऽन्यच्छरीरमिति।
yaduta antavāmllokaḥ, anantaḥ, antavāṃścānantavāṃśca, naivāntavānnānantavān, sa jīvastaccharīramanyo jīvo 'nyaccharīramiti/
Sanskrit only: no published translation is held for this verse.
ते कलहजाता विहरन्ति भण्डनजाता विगृहीता विवादमापन्नाः।
te kalahajātā viharanti bhaṇḍanajātā vigṛhītā vivādamāpannāḥ/
Sanskrit only: no published translation is held for this verse.
पूरणो ऽपि भीतो निष्पलायितुमारब्धः। स निष्पलायन् पण्डकेन प्रतिमार्गे दृष्टः।
pūraṇo 'pi bhīto niṣpalāyitumārabdhaḥ/ sa niṣpalāyan paṇḍakena pratimārge dṛṣṭaḥ/
Sanskrit only: no published translation is held for this verse.
पण्डको दृष्ट्वा गाथां भाषते--
paṇḍako dṛṣṭvā gāthāṃ bhāṣate--
Sanskrit only: no published translation is held for this verse.