अथ यद् अग्नीषोमौ प्रथमं देवतानां यजत्य् अग्नीषोमौ वै देवानां मुखम् मुखत एव तद् देवान् प्रीणाति अथ यत् सवितारं यजत्य् असौ वै सविता यो ऽसौ तपति एतम् एव तेन प्रीणाति अथ यत् सरस्वतीं यजति वाग् वै सरस्वती वाचम् एतेन प्रीणाति अथ यन् पूषणं यजत्य् असौ वै पूषा यो ऽसौ तपति एतम् एव तेन प्रीणाति अथ यन् मरुतः स्वतवसो यजति घोरा वै मरुतः स्वतवसस् तान् एव तेन प्रीणाति अथ यद् विश्वान् देवान् यजत्य् एते वै विश्वे देवा यत् सर्वे देवास् तान् एव तेन प्रीणाति अथ यद् द्यावापृथिव्यौ यजति प्रतिष्ठे वै द्यावापृथिव्यौ प्रतिष्ठित्या एव अथ यद् वाजिनो यजति पशवो वै वाजिनः पशून् एव तेन प्रीणाति अथो ऋतवो वै वाजिनः ऋतून् एव तेन प्रीणाति अथो छन्दांसि वै वाजिनः छन्दांस्य् एव तेन प्रीणाति अथो देवाश्वा वै वाजिनः अत्र देवाः साश्वा अभीष्टाः प्रीता भवन्ति अथ यत् परस्तात् पौर्णमासेन यजते तथा हास्य पूर्वपक्षे वैश्वदेवेनेष्टं भवति ॥ २० ॥
atha yad agnīṣomau prathamaṃ devatānāṃ yajaty agnīṣomau vai devānāṃ mukham mukhata eva tad devān prīṇāti atha yat savitāraṃ yajaty asau vai savitā yo 'sau tapati etam eva tena prīṇāti atha yat sarasvatīṃ yajati vāg vai sarasvatī vācam etena prīṇāti atha yan pūṣaṇaṃ yajaty asau vai pūṣā yo 'sau tapati etam eva tena prīṇāti atha yan marutaḥ svatavaso yajati ghorā vai marutaḥ svatavasas tān eva tena prīṇāti atha yad viśvān devān yajaty ete vai viśve devā yat sarve devās tān eva tena prīṇāti atha yad dyāvāpṛthivyau yajati pratiṣṭhe vai dyāvāpṛthivyau pratiṣṭhityā eva atha yad vājino yajati paśavo vai vājinaḥ paśūn eva tena prīṇāti atho ṛtavo vai vājinaḥ ṛtūn eva tena prīṇāti atho chandāṃsi vai vājinaḥ chandāṃsy eva tena prīṇāti atho devāśvā vai vājinaḥ atra devāḥ sāśvā abhīṣṭāḥ prītā bhavanti atha yat parastāt paurṇamāsena yajate tathā hāsya pūrvapakṣe vaiśvadeveneṣṭaṃ bhavati || 20 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.