तद् आहुः किंदेवत्यो यज्ञ इति ऐन्द्र इति ब्रूयात् ऐन्द्रे वाव यज्ञे सति यथाभागम् अन्या देवता अन्वायंस् ताः प्रातःसवने मरुत्वतीये तृतीयसवने च अथ हैतत् केवलम् एवेन्द्रस्य यद् ऊर्ध्वं मरुत्वतीयात् तस्मात् सर्वे निष्केवल्यानि शंसन्ति यद् एव निष्केवल्यानि तत् स्वर्गस्य लोकस्य रूपम् यद् व् एव निष्केवल्यान्य् एकं ह वा अग्रे सवनम् आसीत् प्रातःसवनम् एव अथ हैतं प्रजापतिर् इन्द्राय ज्येष्ठाय पुत्रायैतत् सवनं निरमिमीत यन् माध्यंदिनं सवनम् तस्मान् माध्यंदिने सवने सर्वे निष्केवल्यानि शंसन्ति यद् एव निष्केवल्यानि तत् स्वर्गस्य लोकस्य रूपम् यद् व् एव निष्केवल्यानि या ह वै देवताः प्रातःसवने होता शंसति ताः शस्त्वा होत्राशंसिनो ऽनुशंसन्ति मैत्रावरुणं तृचं प्रऽउगे होता शंसति तद् उभयं मैत्रावरुणं मैत्रावरुणो ऽनुशंसति ऐन्द्रं तृचं प्रऽउगे होता शंसति तद् उभयम् ऐन्द्रम् ऐन्द्रं ब्राह्मणाच्छंस्य् अनुशंसति ऐन्द्राग्नं तृचं प्रऽउगे होता शंसति तद् उभयम् ऐन्द्राग्नाग्नम् अच्छावाको ऽनुशंसति अथ हैतत् केवलम् एवेन्द्रस्य यद् ऊर्ध्वं मरुत्वतीयात् तस्मात् सर्वे निष्केवल्यानि शंसन्ति यद् एव निष्केवल्यानि तत् स्वर्गस्य लोकस्य रूपम् यद् व् एव निष्केवल्यानि <यदेद् अदेवीर् असहिष्ट माया अथाभवत् केवलः सोमो अस्य [ऋव् ७।९८।५, श्स् २०।८७।५]> इत्य् ऋचाभ्यनूक्तम् देवान् ह यज्ञं तन्वानान् असुररक्षांस्य् अजिघांसन् ते ऽब्रुवन् वामदेवं त्वं न इमं यज्ञं दक्षिणतो गोपायेति मध्यतो वसिष्ठम् उत्तरतो भरद्वाजम् सर्वान् अनु विश्वामित्रम् तस्मान् मैत्रावरुणो वामदेवान् न प्रच्यवते वसिष्ठाद् ब्राह्मणाच्छंसी भरद्वाजाअ अच्छावाकः सर्वे विश्वामित्रात् एत एवास्मै तदृषयो ऽहरहर् नमगा अप्रमत्ता यज्ञं रक्षन्ति य एवं वेद य एवं वेद ॥ २३ ॥
tad āhuḥ kiṃdevatyo yajña iti aindra iti brūyāt aindre vāva yajñe sati yathābhāgam anyā devatā anvāyaṃs tāḥ prātaḥsavane marutvatīye tṛtīyasavane ca atha haitat kevalam evendrasya yad ūrdhvaṃ marutvatīyāt tasmāt sarve niṣkevalyāni śaṃsanti yad eva niṣkevalyāni tat svargasya lokasya rūpam yad v eva niṣkevalyāny ekaṃ ha vā agre savanam āsīt prātaḥsavanam eva atha haitaṃ prajāpatir indrāya jyeṣṭhāya putrāyaitat savanaṃ niramimīta yan mādhyaṃdinaṃ savanam tasmān mādhyaṃdine savane sarve niṣkevalyāni śaṃsanti yad eva niṣkevalyāni tat svargasya lokasya rūpam yad v eva niṣkevalyāni yā ha vai devatāḥ prātaḥsavane hotā śaṃsati tāḥ śastvā hotrāśaṃsino 'nuśaṃsanti maitrāvaruṇaṃ tṛcaṃ pra'uge hotā śaṃsati tad ubhayaṃ maitrāvaruṇaṃ maitrāvaruṇo 'nuśaṃsati aindraṃ tṛcaṃ pra'uge hotā śaṃsati tad ubhayam aindram aindraṃ brāhmaṇācchaṃsy anuśaṃsati aindrāgnaṃ tṛcaṃ pra'uge hotā śaṃsati tad ubhayam aindrāgnāgnam acchāvāko 'nuśaṃsati atha haitat kevalam evendrasya yad ūrdhvaṃ marutvatīyāt tasmāt sarve niṣkevalyāni śaṃsanti yad eva niṣkevalyāni tat svargasya lokasya rūpam yad v eva niṣkevalyāni <yaded adevīr asahiṣṭa māyā athābhavat kevalaḥ somo asya [ṚV 7.98.5, ŚS 20.87.5]> ity ṛcābhyanūktam devān ha yajñaṃ tanvānān asurarakṣāṃsy ajighāṃsan te 'bruvan vāmadevaṃ tvaṃ na imaṃ yajñaṃ dakṣiṇato gopāyeti madhyato vasiṣṭham uttarato bharadvājam sarvān anu viśvāmitram tasmān maitrāvaruṇo vāmadevān na pracyavate vasiṣṭhād brāhmaṇācchaṃsī bharadvājāa acchāvākaḥ sarve viśvāmitrāt eta evāsmai tadṛṣayo 'harahar namagā apramattā yajñaṃ rakṣanti ya evaṃ veda ya evaṃ veda || 23 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.