अथ साम गायति ब्रह्मा क्षत्रं वै साम क्षत्रेणैवैनं तद् अभिषिञ्चति अथो साम्राज्यं वै साम साम्राज्येनैवैनं तत् साम्राज्यं गमयति अथो सर्वेषां वा एष वेदानां रसो यत् साम सर्वेषाम् एव तद् वेदानां रसेनाभिषिञ्चति बृहत्यां गायति बृहत्यां वा असाव् आदित्यः श्रियां प्रतिष्ठायां प्रतिष्ठितस् तपति ऐन्द्र्यां बृहत्यां गायति ऐन्द्रो वा एष यज्ञक्रतुर् यत् सौत्रामणिः इन्द्रायतन एष एतर्हि यो यजते स्व एवैनं तद् आयतने प्रीणाति अथ कस्मात् संशानानि नाम एतैर् वै सामभिर् देवा इन्द्रम् इन्द्रियेण वीर्येण समश्यन् तथैवैतद् यजमाना एतैर् एव सामभिर् इन्द्रियेणैव वीर्येण संश्यन्ति [एद्। वीर्येन] संश्रवसे विश्रवसे सत्यश्रवसे श्रवस इति सामानि भवन्ति एष्व् एवैनं लोकेषु प्रतिष्ठापयति चतुर्निधनं भवति चतस्रो वै दिशः दिक्षु तत् प्रतितिष्ठन्ते अथो चतुष्पादः पशवः पशूनाम् आप्त्यै तद् आहुर् यद् एतत् साम गीयते ऽथ क्वैतस्य साम्न उक्थं का प्रतिष्ठा त्रया देवा एकादशेत्य् आहुः एतद् वा एतस्य साम्न उक्थम् एषा प्रतिष्ठा त्रयस्त्रिंशं ग्रहं गृह्णाति साम्नः प्रतिष्ठायै प्रतिष्ठायै ॥ ७ ॥
atha sāma gāyati brahmā kṣatraṃ vai sāma kṣatreṇaivainaṃ tad abhiṣiñcati atho sāmrājyaṃ vai sāma sāmrājyenaivainaṃ tat sāmrājyaṃ gamayati atho sarveṣāṃ vā eṣa vedānāṃ raso yat sāma sarveṣām eva tad vedānāṃ rasenābhiṣiñcati bṛhatyāṃ gāyati bṛhatyāṃ vā asāv ādityaḥ śriyāṃ pratiṣṭhāyāṃ pratiṣṭhitas tapati aindryāṃ bṛhatyāṃ gāyati aindro vā eṣa yajñakratur yat sautrāmaṇiḥ indrāyatana eṣa etarhi yo yajate sva evainaṃ tad āyatane prīṇāti atha kasmāt saṃśānāni nāma etair vai sāmabhir devā indram indriyeṇa vīryeṇa samaśyan tathaivaitad yajamānā etair eva sāmabhir indriyeṇaiva vīryeṇa saṃśyanti [ed. vīryena] saṃśravase viśravase satyaśravase śravasa iti sāmāni bhavanti eṣv evainaṃ lokeṣu pratiṣṭhāpayati caturnidhanaṃ bhavati catasro vai diśaḥ dikṣu tat pratitiṣṭhante atho catuṣpādaḥ paśavaḥ paśūnām āptyai tad āhur yad etat sāma gīyate 'tha kvaitasya sāmna ukthaṃ kā pratiṣṭhā trayā devā ekādaśety āhuḥ etad vā etasya sāmna uktham eṣā pratiṣṭhā trayastriṃśaṃ grahaṃ gṛhṇāti sāmnaḥ pratiṣṭhāyai pratiṣṭhāyai || 7 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.