Harivaṃśa (critical edition) 105

जनमेजय उवाच भूय एव द्विजश्रेष्ठ यदुसिंहस्य धीमतः । कर्माण्य् अपरिमेयानि श्रोतुम् इच्छामि तत्त्वतः

janamejaya uvāca bhūya eva dvijaśreṣṭha yadusiṃhasya dhīmataḥ / karmāṇy aparimeyāni śrotum icchāmi tattvataḥ

Sanskrit only: no published translation is held for this verse.

श्रूयन्ते विविधानि स्म अद्भुतानि महाद्युते । असंख्येयानि दिव्यानि प्राकृतान्य् अपि सर्वशः

śrūyante vividhāni sma adbhutāni mahādyute / asaṃkhyeyāni divyāni prākṛtāny api sarvaśaḥ

Sanskrit only: no published translation is held for this verse.

। यान्य् अहं विविधान्य् अस्य श्रुत्वा प्रीये महामुने । प्रब्रूयाः सर्वशस् तात तानि मे वक्तुम् अर्हसि

. yāny ahaṃ vividhāny asya śrutvā prīye mahāmune / prabrūyāḥ sarvaśas tāta tāni me vaktum arhasi

Sanskrit only: no published translation is held for this verse.

वैशंपायन उवाच बहून्य् आश्चर्यभूतानि केशवस्य महात्मनः । कर्माण्य् उक्तानि वै राजन् भूयश् चैव श्रुतानि ते

vaiśaṃpāyana uvāca bahūny āścaryabhūtāni keśavasya mahātmanaḥ / karmāṇy uktāni vai rājan bhūyaś caiva śrutāni te

Sanskrit only: no published translation is held for this verse.

कथितानि मया साधो नान्तं शक्यं हि कर्मणाम् । गन्तुं भरतशार्दूल विस्तरस्य महात्मनः

kathitāni mayā sādho nāntaṃ śakyaṃ hi karmaṇām / gantuṃ bharataśārdūla vistarasya mahātmanaḥ

Sanskrit only: no published translation is held for this verse.

अवश्यं तु मया वाच्यं लेशमात्रेण भारत । विष्णोर् अतुलवीर्यस्य प्रथितोदारकर्मणः । आनुपूर्व्या प्रवक्ष्यामि शृणुष्वैकमना नृप

avaśyaṃ tu mayā vācyaṃ leśamātreṇa bhārata / viṣṇor atulavīryasya prathitodārakarmaṇaḥ / ānupūrvyā pravakṣyāmi śṛṇuṣvaikamanā nṛpa

Sanskrit only: no published translation is held for this verse.

द्वारवत्यां निवसता यदुसिंहेन धीमता । राष्ट्राणि नृपमुख्यानां क्षोभितानि महीक्षिताम्

dvāravatyāṃ nivasatā yadusiṃhena dhīmatā / rāṣṭrāṇi nṛpamukhyānāṃ kṣobhitāni mahīkṣitām

Sanskrit only: no published translation is held for this verse.

यदूनाम् अन्तरप्रेप्सुर् विचक्रो दानवो हतः

yadūnām antaraprepsur vicakro dānavo hataḥ

Sanskrit only: no published translation is held for this verse.

पुरं प्राग्ज्योतिषं गत्वा पुनस् तेन महात्मना । समुद्रमध्ये दुष्टात्मा नरको दानवो हतः

puraṃ prāgjyotiṣaṃ gatvā punas tena mahātmanā / samudramadhye duṣṭātmā narako dānavo hataḥ

Sanskrit only: no published translation is held for this verse.

वासवं च रणे जित्वा पारिजातो हृतो बलात् । निर्जितश् चैव भगवान् वरुणो लोहितह्रदे

vāsavaṃ ca raṇe jitvā pārijāto hṛto balāt / nirjitaś caiva bhagavān varuṇo lohitahrade

Sanskrit only: no published translation is held for this verse.

दन्तवक्रश् च कारूषो निहतो दक्षिणापथे । शिशुपालश् च संपूर्णे किल्बिषैकशते हतः

dantavakraś ca kārūṣo nihato dakṣiṇāpathe / śiśupālaś ca saṃpūrṇe kilbiṣaikaśate hataḥ

Sanskrit only: no published translation is held for this verse.

गत्वा च शोणितपुरं शंकरेणाभिरक्षितः । बलेः सुतो महावीर्यो बाणो बाहुसहस्रवान् । महामृधे महाराज जित्वा जीवन् विसर्जितः

gatvā ca śoṇitapuraṃ śaṃkareṇābhirakṣitaḥ / baleḥ suto mahāvīryo bāṇo bāhusahasravān / mahāmṛdhe mahārāja jitvā jīvan visarjitaḥ

Sanskrit only: no published translation is held for this verse.

निर्जिताः पावकाश् चैव गिरिमध्ये महात्मना । साल्वश् च विजितः संख्ये सौभश् च विनिपातितः

nirjitāḥ pāvakāś caiva girimadhye mahātmanā / sālvaś ca vijitaḥ saṃkhye saubhaś ca vinipātitaḥ

Sanskrit only: no published translation is held for this verse.

विक्षोभ्य सागरं सर्वं पाञ्चजन्यो वशीकृतः । हयग्रीवश् च निहतो नृपाश् चान्ये महाबलाः

vikṣobhya sāgaraṃ sarvaṃ pāñcajanyo vaśīkṛtaḥ / hayagrīvaś ca nihato nṛpāś cānye mahābalāḥ

Sanskrit only: no published translation is held for this verse.

जरासंधस्य निधने मोक्षिताः सर्वपार्थिवाः । रथेन जित्वा नृपतीन् गान्धारतनया हृता

jarāsaṃdhasya nidhane mokṣitāḥ sarvapārthivāḥ / rathena jitvā nṛpatīn gāndhāratanayā hṛtā

Sanskrit only: no published translation is held for this verse.

भ्रष्टराज्याश् च शोकार्ताः पाण्डवाः परिरक्षिताः । दाहितं च वनं घोरं पुरुहूतस्य खाण्डवम्

bhraṣṭarājyāś ca śokārtāḥ pāṇḍavāḥ parirakṣitāḥ / dāhitaṃ ca vanaṃ ghoraṃ puruhūtasya khāṇḍavam

Sanskrit only: no published translation is held for this verse.

गाण्डीवं चाग्निना दत्तम् अर्जुनायोपपादितम् । दौत्यं च तत्कृतं घोरं विग्रहे जनमेजय

gāṇḍīvaṃ cāgninā dattam arjunāyopapāditam / dautyaṃ ca tatkṛtaṃ ghoraṃ vigrahe janamejaya

Sanskrit only: no published translation is held for this verse.

अनेन यदुमुख्येन यदुवंशश् च वर्धितः । कुन्त्याश् च प्रमुखे प्रोक्ता प्रतिज्ञा पाण्डवान् प्रति । निवृत्ते भारते युद्धे प्रतिदास्यामि ते सुतान्

anena yadumukhyena yaduvaṃśaś ca vardhitaḥ / kuntyāś ca pramukhe proktā pratijñā pāṇḍavān prati / nivṛtte bhārate yuddhe pratidāsyāmi te sutān

Sanskrit only: no published translation is held for this verse.

मोक्षितश् च महातेजा नृगः शापात् सुदारुणात् । यवनश् च हतः संख्ये काल इत्य् अभिविश्रुतः

mokṣitaś ca mahātejā nṛgaḥ śāpāt sudāruṇāt / yavanaś ca hataḥ saṃkhye kāla ity abhiviśrutaḥ

Sanskrit only: no published translation is held for this verse.

वानरौ च महावीर्यौ मैन्दो द्विविद एव च । विजितौ युधि दुर्धर्षौ जाम्बवांश् च पराजितः

vānarau ca mahāvīryau maindo dvivida eva ca / vijitau yudhi durdharṣau jāmbavāṃś ca parājitaḥ

Sanskrit only: no published translation is held for this verse.

सांदीपनेस् तथा पुत्रस् तव चैव पिता नृप । गतौ वैवस्वतवशं जीवितौ तस्य तेजसा

sāṃdīpanes tathā putras tava caiva pitā nṛpa / gatau vaivasvatavaśaṃ jīvitau tasya tejasā

Sanskrit only: no published translation is held for this verse.

संग्रामा बहवश् चैव घोरा नरवरक्षयाः । निहताश् च नृपाः सर्वे कृत्वा तद् रूपम् अद्भुतम् । जनमेजय युद्धेषु यथा ते कथितं पुरा

saṃgrāmā bahavaś caiva ghorā naravarakṣayāḥ / nihatāś ca nṛpāḥ sarve kṛtvā tad rūpam adbhutam / janamejaya yuddheṣu yathā te kathitaṃ purā

Sanskrit only: no published translation is held for this verse.