Library·Harivaṃśa (critical edition)·43
वैशंपायन उवाच ते श्रुत्वा पृथिवीवाक्यं सर्व एव दिवौकसः । तदर्थकृत्यं संचिन्त्य पितामहम् अथाब्रुवन्
vaiśaṃpāyana uvāca te śrutvā pṛthivīvākyaṃ sarva eva divaukasaḥ / tadarthakṛtyaṃ saṃcintya pitāmaham athābruvan
Sanskrit only: no published translation is held for this verse.
भगवन् क्रियताम् अस्या धरण्या भारसंनतिः । शरीरकर्ता लोकानां त्वं हि लोकस्य चेश्वरः
bhagavan kriyatām asyā dharaṇyā bhārasaṃnatiḥ / śarīrakartā lokānāṃ tvaṃ hi lokasya ceśvaraḥ
Sanskrit only: no published translation is held for this verse.
यत् कर्तव्यं महेन्द्रेण यमेन वरुणेन च । यद् वा कार्यं धनेशेन स्वयं नारायणेन वा
yat kartavyaṃ mahendreṇa yamena varuṇena ca / yad vā kāryaṃ dhaneśena svayaṃ nārāyaṇena vā
Sanskrit only: no published translation is held for this verse.
यद् वा चन्द्रमसा कार्यं भास्करेणानिलेन वा । आदित्यैर् वसुभिर् वापि रुद्रैर् वा लोकभावनैः
yad vā candramasā kāryaṃ bhāskareṇānilena vā / ādityair vasubhir vāpi rudrair vā lokabhāvanaiḥ
Sanskrit only: no published translation is held for this verse.
बृहस्पत्युशनोभ्यां वा कालेन कलिनापि वा
bṛhaspatyuśanobhyāṃ vā kālena kalināpi vā
Sanskrit only: no published translation is held for this verse.
महेश्वरेण वा ब्रह्मन् विशाखेन गुहेन वा । यक्षराक्षसगन्धर्वैश् चारणैर् वा महोरगैः
maheśvareṇa vā brahman viśākhena guhena vā / yakṣarākṣasagandharvaiś cāraṇair vā mahoragaiḥ
Sanskrit only: no published translation is held for this verse.
पर्वतैः शैलमुख्यैर् वा सागरैर् वा महोर्मिभिः । गङ्गामुखाभिर् दिव्याभिः सरिद्भिर् वा सुरेश्वर
parvataiḥ śailamukhyair vā sāgarair vā mahormibhiḥ / gaṅgāmukhābhir divyābhiḥ saridbhir vā sureśvara
Sanskrit only: no published translation is held for this verse.
क्षिप्रम् आज्ञापय विभो कथम् अंशः प्रयुज्यताम् । यदि ते पार्थिवं कार्यं कार्यं पार्थिवविग्रहे
kṣipram ājñāpaya vibho katham aṃśaḥ prayujyatām / yadi te pārthivaṃ kāryaṃ kāryaṃ pārthivavigrahe
Sanskrit only: no published translation is held for this verse.
कथम् अंशावतरणं कुर्मः सर्वे पितामह । अन्तरिक्षगता ये च पृथिव्यां ये च पार्थिवाः
katham aṃśāvataraṇaṃ kurmaḥ sarve pitāmaha / antarikṣagatā ye ca pṛthivyāṃ ye ca pārthivāḥ
Sanskrit only: no published translation is held for this verse.
सदस्यानां च विप्राणां पार्थिवानां कुलेषु च । अयोनिजाश् चापि तनूः सृजाम जगतीतले
sadasyānāṃ ca viprāṇāṃ pārthivānāṃ kuleṣu ca / ayonijāś cāpi tanūḥ sṛjāma jagatītale
Sanskrit only: no published translation is held for this verse.
सुराणाम् एककार्याणां श्रुत्वैतन् निश्चितं महत् । देवैः परिवृतः प्राह वाक्यं लोकपितामहः
surāṇām ekakāryāṇāṃ śrutvaitan niścitaṃ mahat / devaiḥ parivṛtaḥ prāha vākyaṃ lokapitāmahaḥ
Sanskrit only: no published translation is held for this verse.
रोचते मे सुरश्रेष्ठा युष्माकम् अपि निश्चयः । सृजध्वं स्वशरीरांशांस् तेजसात्मसमान् भुवि
rocate me suraśreṣṭhā yuṣmākam api niścayaḥ / sṛjadhvaṃ svaśarīrāṃśāṃs tejasātmasamān bhuvi
Sanskrit only: no published translation is held for this verse.
सर्व एव सुरश्रेष्ठास् तेजोभिर् अवरोहत । भावयन्तो भुवं देवीं लब्ध्वा त्रिभुवनश्रियम्
sarva eva suraśreṣṭhās tejobhir avarohata / bhāvayanto bhuvaṃ devīṃ labdhvā tribhuvanaśriyam
Sanskrit only: no published translation is held for this verse.
पार्थिवे भारते वंशे पूर्वम् एव विजानता । पृथिव्यां संभवम् इमं श्रूयतां यन् मया कृतम्
pārthive bhārate vaṃśe pūrvam eva vijānatā / pṛthivyāṃ saṃbhavam imaṃ śrūyatāṃ yan mayā kṛtam
Sanskrit only: no published translation is held for this verse.
समुद्रे ऽहं सुराः पूर्वे वेलाम् आसाद्य पश्चिमाम् । आसे सार्धं तनूजेन कश्यपेन महात्मना
samudre 'haṃ surāḥ pūrve velām āsādya paścimām / āse sārdhaṃ tanūjena kaśyapena mahātmanā
Sanskrit only: no published translation is held for this verse.
कथाभिः पूर्ववृत्ताभिर् लोकवेदानुगामिभिः । इतिवृत्तैश् च बहुभिः पुराणप्रभवैर् गुणैः
kathābhiḥ pūrvavṛttābhir lokavedānugāmibhiḥ / itivṛttaiś ca bahubhiḥ purāṇaprabhavair guṇaiḥ
Sanskrit only: no published translation is held for this verse.
कुर्वतस् तु कथास् तास् ताः समुद्रः सह गङ्गया । समीपम् आजगामाशु युक्तस् तोयदमारुतैः
kurvatas tu kathās tās tāḥ samudraḥ saha gaṅgayā / samīpam ājagāmāśu yuktas toyadamārutaiḥ
Sanskrit only: no published translation is held for this verse.
स वीचिविषमां कुर्वन् गतिं वेगतरङ्गिणीम् । यादोगणविचित्रेण संछन्नस् तोयवाससा
sa vīciviṣamāṃ kurvan gatiṃ vegataraṅgiṇīm / yādogaṇavicitreṇa saṃchannas toyavāsasā
Sanskrit only: no published translation is held for this verse.
शङ्खमुक्तामलतनुः प्रवालमणिभूषणः । युक्तश् चन्द्रमसा पूर्णः साभ्रगम्भीरनिस्वनः
śaṅkhamuktāmalatanuḥ pravālamaṇibhūṣaṇaḥ / yuktaś candramasā pūrṇaḥ sābhragambhīranisvanaḥ
Sanskrit only: no published translation is held for this verse.
स मां परिभवन्न् एव स्वां वेलां समतिक्रमन् । क्लेदयाम् आस चपलैर् लावणैर् अम्बुविस्रवैः
sa māṃ paribhavann eva svāṃ velāṃ samatikraman / kledayām āsa capalair lāvaṇair ambuvisravaiḥ
Sanskrit only: no published translation is held for this verse.
तं च देशं व्यवसितः समुद्रो ऽद्भिर् विमर्दितुम् । उक्तः संरब्धया वाचा शान्तो ऽसीति ततो मया
taṃ ca deśaṃ vyavasitaḥ samudro 'dbhir vimarditum / uktaḥ saṃrabdhayā vācā śānto 'sīti tato mayā
Sanskrit only: no published translation is held for this verse.
शान्तो ऽसीत्य् उक्तमात्रस् तु तनुत्वं सागरो गतः । संहतोर्मितरङ्गौघः स्थितो राजश्रिया ज्वलन्
śānto 'sīty uktamātras tu tanutvaṃ sāgaro gataḥ / saṃhatormitaraṅgaughaḥ sthito rājaśriyā jvalan
Sanskrit only: no published translation is held for this verse.
भूयश् चैव मया शप्तः समुद्रः सह गङ्गया । सकारणां मतिं कृत्वा युष्माकं हितकाम्यया
bhūyaś caiva mayā śaptaḥ samudraḥ saha gaṅgayā / sakāraṇāṃ matiṃ kṛtvā yuṣmākaṃ hitakāmyayā
Sanskrit only: no published translation is held for this verse.
यस्मात् त्वं राजतुल्येन वपुषा समुपस्थितः । गच्छार्णव महीपालो राजैव त्वं भविष्यसि
yasmāt tvaṃ rājatulyena vapuṣā samupasthitaḥ / gacchārṇava mahīpālo rājaiva tvaṃ bhaviṣyasi
Sanskrit only: no published translation is held for this verse.
तत्रापि सहजां लीलां धारयन् स्वेन तेजसा । भविष्यसि नृणां भर्ता भारतानां कुलोद्वहः
tatrāpi sahajāṃ līlāṃ dhārayan svena tejasā / bhaviṣyasi nṛṇāṃ bhartā bhāratānāṃ kulodvahaḥ
Sanskrit only: no published translation is held for this verse.
शान्तो ऽसीति मयोक्तस् त्वं यच् चासि तनुतां गतः । सुतनुर् यशसा लोके शंतनुस् त्वं भविष्यसि
śānto 'sīti mayoktas tvaṃ yac cāsi tanutāṃ gataḥ / sutanur yaśasā loke śaṃtanus tvaṃ bhaviṣyasi
Sanskrit only: no published translation is held for this verse.
रूपिणी वै सरिच् छ्रेष्ठा तत्र त्वाम् उपयास्यति
rūpiṇī vai saric chreṣṭhā tatra tvām upayāsyati
Sanskrit only: no published translation is held for this verse.
एवम् उक्तस् तु मां क्रुद्धः सो ऽभिगम्याऋणवो ऽब्रवीत् । मां प्रभो देवदेवेश किमर्थं शप्तवान् असि
evam uktas tu māṃ kruddhaḥ so 'bhigamyāṛṇavo 'bravīt / māṃ prabho devadeveśa kimarthaṃ śaptavān asi
Sanskrit only: no published translation is held for this verse.
अहं तव विधेयात्मा त्वत्कृतस् त्वत्परायणः । अशपो ऽसदृशैर् वाक्यैर् आत्मजं मां किम् आत्मना
ahaṃ tava vidheyātmā tvatkṛtas tvatparāyaṇaḥ / aśapo 'sadṛśair vākyair ātmajaṃ māṃ kim ātmanā
Sanskrit only: no published translation is held for this verse.
भगवंस् त्वत्प्रसादेन वेगात् पर्वणि वर्धितः । यद्य् अहं चलितो ब्रह्मन् को ऽत्र दोषो ममात्मनः
bhagavaṃs tvatprasādena vegāt parvaṇi vardhitaḥ / yady ahaṃ calito brahman ko 'tra doṣo mamātmanaḥ
Sanskrit only: no published translation is held for this verse.
क्षिप्ताभिः पवनेनाद्भिः स्पृष्टो यद्य् असि पर्वणि । अत्र मे भगवन् किं नु विद्यते शापकारणम्
kṣiptābhiḥ pavanenādbhiḥ spṛṣṭo yady asi parvaṇi / atra me bhagavan kiṃ nu vidyate śāpakāraṇam
Sanskrit only: no published translation is held for this verse.
उद्धूतैश् च महावातैः प्रवृद्धैश् च बलाहकैः । पर्वणा चेन्दुयुक्तेन त्रिभिः क्षुब्धो ऽस्मि कारणैः
uddhūtaiś ca mahāvātaiḥ pravṛddhaiś ca balāhakaiḥ / parvaṇā cenduyuktena tribhiḥ kṣubdho 'smi kāraṇaiḥ
Sanskrit only: no published translation is held for this verse.
एवं यद्य् अपराद्धो ऽहं कारणैस् त्वत्प्रवर्तितैः । क्षन्तुम् अर्हसि मे ब्रह्मञ् शापो ऽयं विनिवर्त्यताम्
evaṃ yady aparāddho 'haṃ kāraṇais tvatpravartitaiḥ / kṣantum arhasi me brahmañ śāpo 'yaṃ vinivartyatām
Sanskrit only: no published translation is held for this verse.
एवं मयि निरालम्बे शापाच् छिथिलतां गते । कारुण्यं कुरु देवेश प्रमाणं यद्य् अवेक्षसे
evaṃ mayi nirālambe śāpāc chithilatāṃ gate / kāruṇyaṃ kuru deveśa pramāṇaṃ yady avekṣase
Sanskrit only: no published translation is held for this verse.
अस्याश् च देव गङ्गाया गां गतायास् तवाज्ञया । मद्दोषात् समदोषायाः प्रसादं कर्तुम् अर्हसि
asyāś ca deva gaṅgāyā gāṃ gatāyās tavājñayā / maddoṣāt samadoṣāyāḥ prasādaṃ kartum arhasi
Sanskrit only: no published translation is held for this verse.
तम् अहं श्लक्ष्णया वाचा महार्णवम् अथाब्रुवम् । अकारणज्ञं देवानां त्रस्तं शापानिलेरितम्
tam ahaṃ ślakṣṇayā vācā mahārṇavam athābruvam / akāraṇajñaṃ devānāṃ trastaṃ śāpānileritam
Sanskrit only: no published translation is held for this verse.
शान्तिं व्रज न भेतव्यं प्रसन्नो ऽस्मि महामते । शापे ऽस्मिन् सरितां नाथ भविष्यं शृणु कारणम्
śāntiṃ vraja na bhetavyaṃ prasanno 'smi mahāmate / śāpe 'smin saritāṃ nātha bhaviṣyaṃ śṛṇu kāraṇam
Sanskrit only: no published translation is held for this verse.
त्वं गच्छ भारते वंशे स्वदेहं स्वेन तेजसा । आधत्स्व सरितां नाथ त्यक्त्वेमां सागरीं तनुम्
tvaṃ gaccha bhārate vaṃśe svadehaṃ svena tejasā / ādhatsva saritāṃ nātha tyaktvemāṃ sāgarīṃ tanum
Sanskrit only: no published translation is held for this verse.
महोदधे महीपालस् तत्र राजश्रिया वृतः । पालयंश् चतुरो वर्णान् रंस्यसे सलिलेश्वर
mahodadhe mahīpālas tatra rājaśriyā vṛtaḥ / pālayaṃś caturo varṇān raṃsyase salileśvara
Sanskrit only: no published translation is held for this verse.
इयं च त्वां सरिच् छ्रेष्ठा बिभ्रती मानुषीं तनुम् । तत् कालरमणीयाङ्गी गङ्गा परिचरिष्यति
iyaṃ ca tvāṃ saric chreṣṭhā bibhratī mānuṣīṃ tanum / tat kālaramaṇīyāṅgī gaṅgā paricariṣyati
Sanskrit only: no published translation is held for this verse.
अनया सह जाह्नव्या मोदमानो ममाज्ञया । इमं सलिलसंक्लेदं विस्मरिष्यसि सागर
anayā saha jāhnavyā modamāno mamājñayā / imaṃ salilasaṃkledaṃ vismariṣyasi sāgara
Sanskrit only: no published translation is held for this verse.
त्वरता चैव कर्तव्यं त्वयेदं देवशासनम् । प्राजापत्येन विधिना गङ्गया सह सागर
tvaratā caiva kartavyaṃ tvayedaṃ devaśāsanam / prājāpatyena vidhinā gaṅgayā saha sāgara
Sanskrit only: no published translation is held for this verse.
वसवः प्रच्युताः स्वर्गात् प्रविष्टाश् च रसातलम् । तेषाम् उत्पादनार्थाय त्वं मया विनियोजितः
vasavaḥ pracyutāḥ svargāt praviṣṭāś ca rasātalam / teṣām utpādanārthāya tvaṃ mayā viniyojitaḥ
Sanskrit only: no published translation is held for this verse.
अष्टौ ताञ् जाह्नवीगर्भान् अपत्यार्थं ददाम्य् अहम् । विभावसोस् तुल्यगुणान् सुराणां प्रीतिवर्धनान्
aṣṭau tāñ jāhnavīgarbhān apatyārthaṃ dadāmy aham / vibhāvasos tulyaguṇān surāṇāṃ prītivardhanān
Sanskrit only: no published translation is held for this verse.
उत्पाद्य त्वं वसूञ् शीघ्रं कृत्वा कुरुकुलं महत् । प्रवेष्टासि तनुं त्यक्त्वा पुनः सागर सागरीम्
utpādya tvaṃ vasūñ śīghraṃ kṛtvā kurukulaṃ mahat / praveṣṭāsi tanuṃ tyaktvā punaḥ sāgara sāgarīm
Sanskrit only: no published translation is held for this verse.
एवम् एतन् मया पूर्वं हितार्थं वः सुरोत्तमाः । भविष्यं पश्यता भारं पृथिव्याः पार्थिवात्मकम्
evam etan mayā pūrvaṃ hitārthaṃ vaḥ surottamāḥ / bhaviṣyaṃ paśyatā bhāraṃ pṛthivyāḥ pārthivātmakam
Sanskrit only: no published translation is held for this verse.
तद् एष शंतनोर् वंशः पृथिव्यां रोपितो मया । वसवो यत्र गङ्गायां उत्पन्नास् त्रिदिवौकसः
tad eṣa śaṃtanor vaṃśaḥ pṛthivyāṃ ropito mayā / vasavo yatra gaṅgāyāṃ utpannās tridivaukasaḥ
Sanskrit only: no published translation is held for this verse.
अद्यापि भुवि गाङ्गेयस् तत्रैव वसुर् अष्टमः । सप्तेमे वसवः प्राप्ताः स एकः परिलम्बते
adyāpi bhuvi gāṅgeyas tatraiva vasur aṣṭamaḥ / sapteme vasavaḥ prāptāḥ sa ekaḥ parilambate
Sanskrit only: no published translation is held for this verse.
द्वितीयायां स्त्रियां सृष्टा द्वितीया शंतनोस् तनुः । विचित्रवीर्यो द्युतिमान् आसीद् राजा प्रतापवान्
dvitīyāyāṃ striyāṃ sṛṣṭā dvitīyā śaṃtanos tanuḥ / vicitravīryo dyutimān āsīd rājā pratāpavān
Sanskrit only: no published translation is held for this verse.
वैचित्रवीर्यौ द्वाव् एव पार्थिवौ भुवि सांप्रतम् । पाण्डुश् च धृतराष्ट्रश् च विख्यातौ पुरुषर्षभौ
vaicitravīryau dvāv eva pārthivau bhuvi sāṃpratam / pāṇḍuś ca dhṛtarāṣṭraś ca vikhyātau puruṣarṣabhau
Sanskrit only: no published translation is held for this verse.
तत्र पाण्डोः श्रिया जुष्टे द्वे भार्ये यौवनस्थिते । शुभे कुन्ती च माद्री च देवयोषोपमे भुवि
tatra pāṇḍoḥ śriyā juṣṭe dve bhārye yauvanasthite / śubhe kuntī ca mādrī ca devayoṣopame bhuvi
Sanskrit only: no published translation is held for this verse.
धृतराष्ट्रस्य राज्ञस् तु भार्यैका तुल्यचारिणी । गान्धारी भुवि विख्याता भर्तुर् नित्यं व्रते स्थिता
dhṛtarāṣṭrasya rājñas tu bhāryaikā tulyacāriṇī / gāndhārī bhuvi vikhyātā bhartur nityaṃ vrate sthitā
Sanskrit only: no published translation is held for this verse.
अत्र वो ऽंशा विभज्यन्तां विपक्षः पक्ष एव च । पुत्राणां हि तयो राज्ञोर् भविता विग्रहो महान्
atra vo 'ṃśā vibhajyantāṃ vipakṣaḥ pakṣa eva ca / putrāṇāṃ hi tayo rājñor bhavitā vigraho mahān
Sanskrit only: no published translation is held for this verse.
तेषां विमर्दे दायाद्ये नृपाणां भविता क्षयः । युगान्तप्रतिमं चैव भविष्यति महद् भयम्
teṣāṃ vimarde dāyādye nṛpāṇāṃ bhavitā kṣayaḥ / yugāntapratimaṃ caiva bhaviṣyati mahad bhayam
Sanskrit only: no published translation is held for this verse.
सबलेषु नरेन्द्रेषु शातयत्स्व् इतरेतरम् । विविक्तपुरराष्ट्रौघा क्षितिः शैथिल्यम् एष्यति
sabaleṣu narendreṣu śātayatsv itaretaram / viviktapurarāṣṭraughā kṣitiḥ śaithilyam eṣyati
Sanskrit only: no published translation is held for this verse.
द्वापरस्य युगस्यान्ते मया दृष्टं पुरातने । क्षयं यास्यन्ति शस्त्रेण पार्थिवाः सह वाहनैः
dvāparasya yugasyānte mayā dṛṣṭaṃ purātane / kṣayaṃ yāsyanti śastreṇa pārthivāḥ saha vāhanaiḥ
Sanskrit only: no published translation is held for this verse.
तत्रावशिष्टान् मनुजान् सुप्तान् निशि विचेतसः । धक्ष्यते शंकरस्यांशः पावकेनास्त्रतेजसा
tatrāvaśiṣṭān manujān suptān niśi vicetasaḥ / dhakṣyate śaṃkarasyāṃśaḥ pāvakenāstratejasā
Sanskrit only: no published translation is held for this verse.
अन्तकप्रतिमे तस्मिन् निवृत्ते क्रूरकर्मणि । समाप्तम् इदम् आख्यास्ये तृतीयं द्वापरं युगम्
antakapratime tasmin nivṛtte krūrakarmaṇi / samāptam idam ākhyāsye tṛtīyaṃ dvāparaṃ yugam
Sanskrit only: no published translation is held for this verse.
महेश्वरांशे ऽपसृते ततो माहेश्वरं युगम् । तिष्यं प्रपत्स्यते पश्चाद् युगं दारुणमानुषम्
maheśvarāṃśe 'pasṛte tato māheśvaraṃ yugam / tiṣyaṃ prapatsyate paścād yugaṃ dāruṇamānuṣam
Sanskrit only: no published translation is held for this verse.
अधर्मप्रायपुरुषं स्वल्पधर्मपरिग्रहम् । उत्सन्नसत्यसंयोगं वर्धितानृतसंचयम्
adharmaprāyapuruṣaṃ svalpadharmaparigraham / utsannasatyasaṃyogaṃ vardhitānṛtasaṃcayam
Sanskrit only: no published translation is held for this verse.
महेश्वरं कुमारं च द्वौ च देवौ समाश्रिताः । भविष्यन्ति नराः सर्वे लोके नस्थविरायुषः
maheśvaraṃ kumāraṃ ca dvau ca devau samāśritāḥ / bhaviṣyanti narāḥ sarve loke nasthavirāyuṣaḥ
Sanskrit only: no published translation is held for this verse.
तद् एष निर्णयः श्रेष्ठः पृथिव्यां पार्थिवान्तकः । अंशावतरणं सर्वे सुराः कुरुत माचिरम्
tad eṣa nirṇayaḥ śreṣṭhaḥ pṛthivyāṃ pārthivāntakaḥ / aṃśāvataraṇaṃ sarve surāḥ kuruta māciram
Sanskrit only: no published translation is held for this verse.
धर्मस्यांशो ऽथ कुन्त्यां वै माद्र्यां च विनियुज्यताम् । विग्रहस्य कलिर् मूलं गान्धार्यां विनियुज्यताम्
dharmasyāṃśo 'tha kuntyāṃ vai mādryāṃ ca viniyujyatām / vigrahasya kalir mūlaṃ gāndhāryāṃ viniyujyatām
Sanskrit only: no published translation is held for this verse.
एतौ पक्षौ भविष्यन्ति राजानः कालचोदिताः । जातरागाः पृथिव्यर्थे सर्वे संग्रामलालसाः
etau pakṣau bhaviṣyanti rājānaḥ kālacoditāḥ / jātarāgāḥ pṛthivyarthe sarve saṃgrāmalālasāḥ
Sanskrit only: no published translation is held for this verse.
गच्छत्व् इयं वसुमती स्वां योनिं लोकधारिणी । सृष्टो ऽयं नैष्ठिको राज्ञाम् उपायो लोकविश्रुतः
gacchatv iyaṃ vasumatī svāṃ yoniṃ lokadhāriṇī / sṛṣṭo 'yaṃ naiṣṭhiko rājñām upāyo lokaviśrutaḥ
Sanskrit only: no published translation is held for this verse.
श्रुत्वा पितामहवचः सा जगाम यथागतम् । पृथिवी सह कालेन वधाय पृथिवीक्षिताम्
śrutvā pitāmahavacaḥ sā jagāma yathāgatam / pṛthivī saha kālena vadhāya pṛthivīkṣitām
Sanskrit only: no published translation is held for this verse.
देवान् अचोदयद् ब्रह्मा निग्रहार्थं सुरद्विषाम् । नरं चैव पुराणर्षिं शेषं च धरणीधरम्
devān acodayad brahmā nigrahārthaṃ suradviṣām / naraṃ caiva purāṇarṣiṃ śeṣaṃ ca dharaṇīdharam
Sanskrit only: no published translation is held for this verse.
सनत्कुमारं साध्यांश् च देवांश् चाग्निपुरोगमान् । वरुणं च यमं चैव सूर्याचन्द्रमसौ तथा । गन्धर्वाप्सरसश् चैव रुद्रादित्यांस् तथाश्विनौ
sanatkumāraṃ sādhyāṃś ca devāṃś cāgnipurogamān / varuṇaṃ ca yamaṃ caiva sūryācandramasau tathā / gandharvāpsarasaś caiva rudrādityāṃs tathāśvinau
Sanskrit only: no published translation is held for this verse.
ततो ऽंशान् अवनिं देवाः सर्व एवावतारयन् । यथा ते कथितं पूर्वम् अंशावतरणं मया
tato 'ṃśān avaniṃ devāḥ sarva evāvatārayan / yathā te kathitaṃ pūrvam aṃśāvataraṇaṃ mayā
Sanskrit only: no published translation is held for this verse.
अयोनिजा योनिजाश् च ते देवाः पृथिवीतले । दैत्यदानवहन्तारः संभूताः पुरुषेश्वराः । क्षीरिकावृक्षसंघाता वज्रसंहननास् तथा
ayonijā yonijāś ca te devāḥ pṛthivītale / daityadānavahantāraḥ saṃbhūtāḥ puruṣeśvarāḥ / kṣīrikāvṛkṣasaṃghātā vajrasaṃhananās tathā
Sanskrit only: no published translation is held for this verse.
नागायुतबलाः केचित् केचिद् ओघबलान्विताः । गदापरिघशक्तीनां सहाः परिघबाहवः । गिरिशृङ्गप्रहर्तारः सर्वे परिघयोधिनः
nāgāyutabalāḥ kecit kecid oghabalānvitāḥ / gadāparighaśaktīnāṃ sahāḥ parighabāhavaḥ / giriśṛṅgaprahartāraḥ sarve parighayodhinaḥ
Sanskrit only: no published translation is held for this verse.
वृष्णिवंशे समुत्पन्नाः शतशो ऽथ सहस्रशः । कुरुवंशे च देवास् ते पाञ्चालेषु च पार्थिवाः
vṛṣṇivaṃśe samutpannāḥ śataśo 'tha sahasraśaḥ / kuruvaṃśe ca devās te pāñcāleṣu ca pārthivāḥ
Sanskrit only: no published translation is held for this verse.
याज्ञिकानां समृद्धानां ब्राह्मणानां च योनिषु । सर्वास्त्रज्ञा महेष्वासा वेदव्रतपरायणाः
yājñikānāṃ samṛddhānāṃ brāhmaṇānāṃ ca yoniṣu / sarvāstrajñā maheṣvāsā vedavrataparāyaṇāḥ
Sanskrit only: no published translation is held for this verse.
आचालयेयुः शैलांस् ते क्रुद्धा भिन्द्युर् महीतलम् । उत्पतेयुर् अथाकाशं क्षोभयेयुर् महोदधिम्
ācālayeyuḥ śailāṃs te kruddhā bhindyur mahītalam / utpateyur athākāśaṃ kṣobhayeyur mahodadhim
Sanskrit only: no published translation is held for this verse.
एवम् आदिश्य तान् ब्रह्मा भूतभव्यभवत्प्रभुः । नारायणे समावेश्य लोकाञ् शान्तिम् उपागमत्
evam ādiśya tān brahmā bhūtabhavyabhavatprabhuḥ / nārāyaṇe samāveśya lokāñ śāntim upāgamat
Sanskrit only: no published translation is held for this verse.
भूयः शृणु यथा विष्णुर् अवतीर्णो महीतलम् । प्रजानां वै हितार्थाय प्रभुः प्राणधनेश्वरः
bhūyaḥ śṛṇu yathā viṣṇur avatīrṇo mahītalam / prajānāṃ vai hitārthāya prabhuḥ prāṇadhaneśvaraḥ
Sanskrit only: no published translation is held for this verse.
ययातिवंशजस्याथ वसुदेवस्य धीमतः । कुले पूज्ये यशस्कामो जज्ञे नारायणः प्रभुः
yayātivaṃśajasyātha vasudevasya dhīmataḥ / kule pūjye yaśaskāmo jajñe nārāyaṇaḥ prabhuḥ
Sanskrit only: no published translation is held for this verse.