Harivaṃśa (critical edition) 64

वैशंपायन उवाच प्रदोषार्धे कदाचित् तु कृष्णे रतिपरायणे । त्रासयन् समदो गोष्ठान् अरिष्टः प्रत्यदृश्यत

vaiśaṃpāyana uvāca pradoṣārdhe kadācit tu kṛṣṇe ratiparāyaṇe / trāsayan samado goṣṭhān ariṣṭaḥ pratyadṛśyata

Sanskrit only: no published translation is held for this verse.

निर्वाणाङ्गारमेघाभस् तीक्ष्णशृङ्गोऽर्कलोचनः । क्षुरतीक्ष्णाग्रचरणः कालः काल इवापरः

nirvāṇāṅgārameghābhas tīkṣṇaśṛṅgo'rkalocanaḥ / kṣuratīkṣṇāgracaraṇaḥ kālaḥ kāla ivāparaḥ

Sanskrit only: no published translation is held for this verse.

लेलिहानः सनिष्पेषं जिह्वयौष्ठौ पुनः पुनः । गर्विताविद्धलाङ्गूलः कठिनस्कन्धबन्धनः

lelihānaḥ saniṣpeṣaṃ jihvayauṣṭhau punaḥ punaḥ / garvitāviddhalāṅgūlaḥ kaṭhinaskandhabandhanaḥ

Sanskrit only: no published translation is held for this verse.

ककुदोदग्रनिर्माणः प्रमाणाद् दुरतिक्रमः । शकृन्मूत्रोपलिप्ताङ्गो गवाम् उद्वेजनो भृशम्

kakudodagranirmāṇaḥ pramāṇād duratikramaḥ / śakṛnmūtropaliptāṅgo gavām udvejano bhṛśam

Sanskrit only: no published translation is held for this verse.

महाकटिः स्थूलमुखो दृढजानुर् महोदरः । विषाणावल्गितगतिर् लम्बता कण्ठचर्मणा

mahākaṭiḥ sthūlamukho dṛḍhajānur mahodaraḥ / viṣāṇāvalgitagatir lambatā kaṇṭhacarmaṇā

Sanskrit only: no published translation is held for this verse.

गवारोहेषु चपलस् तरुघातङ्किताननः । युद्धसञ्जविषाणाग्रो द्विषद्वृषभसूदनः

gavāroheṣu capalas tarughātaṅkitānanaḥ / yuddhasañjaviṣāṇāgro dviṣadvṛṣabhasūdanaḥ

Sanskrit only: no published translation is held for this verse.

अरिष्टो नाम हि गवाम् अरिष्टो दारुणाकृतिः । दैत्यो वृषभरूपेण गोष्ठान् विपरिधावति

ariṣṭo nāma hi gavām ariṣṭo dāruṇākṛtiḥ / daityo vṛṣabharūpeṇa goṣṭhān viparidhāvati

Sanskrit only: no published translation is held for this verse.

पातयानो गवां गर्भान् दृप्तो गच्छत्य् अनार्तवम् । भजमानश् च चपलो गृष्टीः संप्रचचार ह

pātayāno gavāṃ garbhān dṛpto gacchaty anārtavam / bhajamānaś ca capalo gṛṣṭīḥ saṃpracacāra ha

Sanskrit only: no published translation is held for this verse.

शृङ्गप्रहरणो रौद्रः प्रहरन् गोषु दुर्मदः । गोष्ठेषु न रतिं लेभे विना युद्धं स गोवृषः

śṛṅgapraharaṇo raudraḥ praharan goṣu durmadaḥ / goṣṭheṣu na ratiṃ lebhe vinā yuddhaṃ sa govṛṣaḥ

Sanskrit only: no published translation is held for this verse.

एतस्मिन्न् एव काले तु गवाः कृष्णसमीपगाः । त्रासयामास दुष्टात्मा वैवस्वत पथे स्थितः

etasminn eva kāle tu gavāḥ kṛṣṇasamīpagāḥ / trāsayāmāsa duṣṭātmā vaivasvata pathe sthitaḥ

Sanskrit only: no published translation is held for this verse.

सेन्द्राशनिर् इवाम्भोदो नर्दमानो महावृषः । चकार निर्वृषं गोष्ठं निर्वत्सशिशुपुंगवम्

sendrāśanir ivāmbhodo nardamāno mahāvṛṣaḥ / cakāra nirvṛṣaṃ goṣṭhaṃ nirvatsaśiśupuṃgavam

Sanskrit only: no published translation is held for this verse.

तालशब्देन तं कृष्णः सिंहनादैश् च मोहयन् । अभ्यधावत गोविन्दो दैत्यं वृषभरूपिणम्

tālaśabdena taṃ kṛṣṇaḥ siṃhanādaiś ca mohayan / abhyadhāvata govindo daityaṃ vṛṣabharūpiṇam

Sanskrit only: no published translation is held for this verse.

स कृष्णं गोवृषो दृष्ट्वा हृष्टलाङ्गूललोचनः । रुषितस् तलशब्देन युद्धाकाङ्क्षी ननर्द ह

sa kṛṣṇaṃ govṛṣo dṛṣṭvā hṛṣṭalāṅgūlalocanaḥ / ruṣitas talaśabdena yuddhākāṅkṣī nanarda ha

Sanskrit only: no published translation is held for this verse.

तम् आपतन्तम् उद्वृत्तम् दृष्ट्वा वृषभदानवम् । तस्मात् स्थानान् न व्यचलत् कृष्णो गिरिर् इवाचलः

tam āpatantam udvṛttam dṛṣṭvā vṛṣabhadānavam / tasmāt sthānān na vyacalat kṛṣṇo girir ivācalaḥ

Sanskrit only: no published translation is held for this verse.

वृषः कक्षयोर् दृष्टिं प्रणिधाय धृताननः । कृष्णस्य निधनाकाङ्क्षी तूर्णम् अभ्युत्पपात ह

vṛṣaḥ kakṣayor dṛṣṭiṃ praṇidhāya dhṛtānanaḥ / kṛṣṇasya nidhanākāṅkṣī tūrṇam abhyutpapāta ha

Sanskrit only: no published translation is held for this verse.

तम् आपतन्तं प्रमुखे प्रतिजग्राह दुर्धरम् । कृष्णः कृष्णाञ्जननिभं वृषं प्रति वृषोपमः

tam āpatantaṃ pramukhe pratijagrāha durdharam / kṛṣṇaḥ kṛṣṇāñjananibhaṃ vṛṣaṃ prati vṛṣopamaḥ

Sanskrit only: no published translation is held for this verse.

स संसक्तस् तु कृष्णेन वृषेणेव महावृषः । मुमोच वक्त्रजं फेनं नस्ततो ऽथ स शब्दवत्

sa saṃsaktas tu kṛṣṇena vṛṣeṇeva mahāvṛṣaḥ / mumoca vaktrajaṃ phenaṃ nastato 'tha sa śabdavat

Sanskrit only: no published translation is held for this verse.

ताव् अन्योन्याव् अरुद्धाङ्गौ युद्धे कृष्णवृषाव् उभौ । रेजतुर् मेघसमये संसक्ताव् इव तोयदौ

tāv anyonyāv aruddhāṅgau yuddhe kṛṣṇavṛṣāv ubhau / rejatur meghasamaye saṃsaktāv iva toyadau

Sanskrit only: no published translation is held for this verse.

तस्य दर्पबलं हत्वा कृत्वा शृङ्गान्तरे पदम् । अपीडयद् अरिष्टस्य कण्ठं क्लिन्नम् इवाम्बरम्

tasya darpabalaṃ hatvā kṛtvā śṛṅgāntare padam / apīḍayad ariṣṭasya kaṇṭhaṃ klinnam ivāmbaram

Sanskrit only: no published translation is held for this verse.

शृङ्गं चास्य पुनः सव्यम् उत्पाट्य यमदण्डवत् । तेनैव प्राहरद् वक्त्रे स ममार भृशं हतः

śṛṅgaṃ cāsya punaḥ savyam utpāṭya yamadaṇḍavat / tenaiva prāharad vaktre sa mamāra bhṛśaṃ hataḥ

Sanskrit only: no published translation is held for this verse.

विभिन्नशृङ्गो भग्नास्यो भग्नस्कन्धश् च दानवः । पपात रुधिरोद्गारी साम्बुधार इवाम्बुदः

vibhinnaśṛṅgo bhagnāsyo bhagnaskandhaś ca dānavaḥ / papāta rudhirodgārī sāmbudhāra ivāmbudaḥ

Sanskrit only: no published translation is held for this verse.

गोविन्देन हतं दृष्ट्वा दृप्तं वृषभदानवम् । साधु साध्व् इति भूतानि तत्कर्मास्याभितुष्टुवुः

govindena hataṃ dṛṣṭvā dṛptaṃ vṛṣabhadānavam / sādhu sādhv iti bhūtāni tatkarmāsyābhituṣṭuvuḥ

Sanskrit only: no published translation is held for this verse.

स चोपेन्द्रो वृषं हत्वा कान्तवक्त्रो निशामुखे । अरविन्दाभनयनः पुनर् एव रराज ह

sa copendro vṛṣaṃ hatvā kāntavaktro niśāmukhe / aravindābhanayanaḥ punar eva rarāja ha

Sanskrit only: no published translation is held for this verse.