Harivaṃśa (critical edition) 95

वैशंपायन उवाच ततः संपूज्य गरुडं वासुदेवो ऽनुमान्य च । सखिवच् चोपगृह्यैनम् अनुजज्ञे गृहं प्रति

vaiśaṃpāyana uvāca tataḥ saṃpūjya garuḍaṃ vāsudevo 'numānya ca / sakhivac copagṛhyainam anujajñe gṛhaṃ prati

Sanskrit only: no published translation is held for this verse.

सो ऽनुज्ञातो हि सत्कृत्य प्रणम्य च जनार्दनम् । ऊर्ध्वम् आचक्रमे पक्षी यथेष्टं गगनेचरः

so 'nujñāto hi satkṛtya praṇamya ca janārdanam / ūrdhvam ācakrame pakṣī yatheṣṭaṃ gaganecaraḥ

Sanskrit only: no published translation is held for this verse.

स पक्षवातसंक्षुब्धं समुद्रं मकरालयम् । कृत्वा वेगेन महता ययौ पूर्वं महोदधिम्

sa pakṣavātasaṃkṣubdhaṃ samudraṃ makarālayam / kṛtvā vegena mahatā yayau pūrvaṃ mahodadhim

Sanskrit only: no published translation is held for this verse.

कृत्यकाल उपस्थास्य इत्य् उक्त्वा गरुडे गते । कृष्णो ददर्श पितरं वृद्धम् आनकदुंदुभिम्

kṛtyakāla upasthāsya ity uktvā garuḍe gate / kṛṣṇo dadarśa pitaraṃ vṛddham ānakaduṃdubhim

Sanskrit only: no published translation is held for this verse.

उग्रसेनं च राजानं बलदेवं च माधवः । काश्यं सांदीपनिं चैव ब्रह्मगार्ग्यं तथैव च

ugrasenaṃ ca rājānaṃ baladevaṃ ca mādhavaḥ / kāśyaṃ sāṃdīpaniṃ caiva brahmagārgyaṃ tathaiva ca

Sanskrit only: no published translation is held for this verse.

अन्यांश् च वृद्धान् वृष्णीनां तांश् च भोजान्धकांस् तथा । रत्नप्रवेकैर् दाशार्हो वीर्यलब्धैस् तदार्चयत्

anyāṃś ca vṛddhān vṛṣṇīnāṃ tāṃś ca bhojāndhakāṃs tathā / ratnapravekair dāśārho vīryalabdhais tadārcayat

Sanskrit only: no published translation is held for this verse.

हता ब्रह्मद्विशः सर्वे यजन्त्य् अन्धकवृष्णयः । रणात् प्रतिनिवृत्तो ऽयम् अक्षतो मधुसूदनः

hatā brahmadviśaḥ sarve yajanty andhakavṛṣṇayaḥ / raṇāt pratinivṛtto 'yam akṣato madhusūdanaḥ

Sanskrit only: no published translation is held for this verse.

इति चत्वररथ्यासु द्वारवत्यां सुपूजितः । चाक्रिको घोषयाम् आस पुरुषो मृष्टकुण्डलः

iti catvararathyāsu dvāravatyāṃ supūjitaḥ / cākriko ghoṣayām āsa puruṣo mṛṣṭakuṇḍalaḥ

Sanskrit only: no published translation is held for this verse.

ततः सांदीपनिं पूर्वम् उपगम्य जनार्दनः । ववन्दे वृष्णिनृपतिम् आहुकं विनयान्वितः

tataḥ sāṃdīpaniṃ pūrvam upagamya janārdanaḥ / vavande vṛṣṇinṛpatim āhukaṃ vinayānvitaḥ

Sanskrit only: no published translation is held for this verse.

अथाश्रुपरिपूर्णाक्षम् आनन्दगतचेतसम् । ववन्दे सह रामेण पितरं वासवानुजः

athāśruparipūrṇākṣam ānandagatacetasam / vavande saha rāmeṇa pitaraṃ vāsavānujaḥ

Sanskrit only: no published translation is held for this verse.

ततः शेषान् अभिक्रम्य सत्कृत्य च यथार्हतः । सर्वेषां नाम जग्राह दाशार्हाणाम् अधोक्षजः

tataḥ śeṣān abhikramya satkṛtya ca yathārhataḥ / sarveṣāṃ nāma jagrāha dāśārhāṇām adhokṣajaḥ

Sanskrit only: no published translation is held for this verse.

ततः सर्वाणि दिव्यानि सर्वरत्नमयानि च । आसनाग्र्याणि विविशुर् उपेन्द्रप्रमुखास् तदा

tataḥ sarvāṇi divyāni sarvaratnamayāni ca / āsanāgryāṇi viviśur upendrapramukhās tadā

Sanskrit only: no published translation is held for this verse.

ततस् तद् धनम् अक्षय्यं किंकरैर् यत् समाहृतम् । सभां समानयाम् आसुः पुरुषाः कृष्णशासनात्

tatas tad dhanam akṣayyaṃ kiṃkarair yat samāhṛtam / sabhāṃ samānayām āsuḥ puruṣāḥ kṛṣṇaśāsanāt

Sanskrit only: no published translation is held for this verse.

ततः स मानयाम् आस दाशार्हान् यदुसत्तमान् । सर्वान् दुंदुभिशब्देन पूजयिष्यञ् जनार्दनः

tataḥ sa mānayām āsa dāśārhān yadusattamān / sarvān duṃdubhiśabdena pūjayiṣyañ janārdanaḥ

Sanskrit only: no published translation is held for this verse.

ताम् आसनवतीं रम्यां मणिविद्रुमतोरणाम् । सुदाशार्हीं सुदाशार्हा विविशुः कृष्णशासनात्

tām āsanavatīṃ ramyāṃ maṇividrumatoraṇām / sudāśārhīṃ sudāśārhā viviśuḥ kṛṣṇaśāsanāt

Sanskrit only: no published translation is held for this verse.

शुशुभे ऽभ्यधिकं शुभ्रा सिंहैर् गिरिगुहा यथा

śuśubhe 'bhyadhikaṃ śubhrā siṃhair giriguhā yathā

Sanskrit only: no published translation is held for this verse.

रामेण सह गोविन्दः काञ्चनं महद् आसनम् । उग्रसेनं पुरस्कृत्य भेजे वृष्णिपुरस्कृतः

rāmeṇa saha govindaḥ kāñcanaṃ mahad āsanam / ugrasenaṃ puraskṛtya bheje vṛṣṇipuraskṛtaḥ

Sanskrit only: no published translation is held for this verse.

तत्रोपविष्टांस् तान् वीरान् यथाप्रीति यथावयः । समाभाष्य यदुश्रेष्ठान् उवाच मधुसूदनः

tatropaviṣṭāṃs tān vīrān yathāprīti yathāvayaḥ / samābhāṣya yaduśreṣṭhān uvāca madhusūdanaḥ

Sanskrit only: no published translation is held for this verse.