Jayadeva (alias Piyusavarsa): Candraloka 1

श्रीः पीयुषवर्षश्रीजयदेवकविकृतः चन्द्रालोकः उच्चैरस्यति मन्दतामरसतां जाग्रत्कलङ्कैरव-ध्वंसं हस्तयते च या सुमनसाम् उल्लासिनी मानसे । धृष्टोद्यन्मदनाशनार्चिर् अमला लोकत्रयीदर्शिका सा नेत्रत्रितयीव खण्डपरशोर् वाग्देवता दीव्यतु

śrīḥ pīyuṣavarṣaśrījayadevakavikṛtaḥ candrālokaḥ uccairasyati mandatāmarasatāṃ jāgratkalaṅkairava-dhvaṃsaṃ hastayate ca yā sumanasām ullāsinī mānase / dhṛṣṭodyanmadanāśanārcir amalā lokatrayīdarśikā sā netratritayīva khaṇḍaparaśor vāgdevatā dīvyatu

Sanskrit only: no published translation is held for this verse.

हं हो चिन्मयचित्तचन्द्रमणयः संवर्धयध्वं रसान् रे रे स्वैरिणि निर्विचारकविते मास्मत् प्रकाशीभव । उल्लासाय विचारवीचिनिचयालङ्कारवाराम् निधेश् चन्द्रालोकमयं स्वयं वितनुते पीयूषवर्षः कृती

haṃ ho cinmayacittacandramaṇayaḥ saṃvardhayadhvaṃ rasān re re svairiṇi nirvicārakavite māsmat prakāśībhava / ullāsāya vicāravīcinicayālaṅkāravārām nidheś candrālokamayaṃ svayaṃ vitanute pīyūṣavarṣaḥ kṛtī

Sanskrit only: no published translation is held for this verse.

युक्त्यास्वाद्यलसद्रसैकवसतिः साहित्यसारस्वत-क्षीराम्भोधिर् अगाधताम् उपदधत् सेव्यः समाश्रीयताम् । श्रीर् अस्माद् उपदेशकौशलमयं पीयूषम् अस्माज्जगज् जाग्रद्भासुरपद्मकेशरयशःशीतांशुर् अस्माद् बुधाः

yuktyāsvādyalasadrasaikavasatiḥ sāhityasārasvata-kṣīrāmbhodhir agādhatām upadadhat sevyaḥ samāśrīyatām / śrīr asmād upadeśakauśalamayaṃ pīyūṣam asmājjagaj jāgradbhāsurapadmakeśarayaśaḥśītāṃśur asmād budhāḥ

Sanskrit only: no published translation is held for this verse.

तं पूर्वाचार्यसूर्योक्ति-ज्योतिः स्तोमोद्गमं स्तुमः । यं प्रस्तूय प्रकाशन्ते मद्गुणास् त्रसरेणवः

taṃ pūrvācāryasūryokti-jyotiḥ stomodgamaṃ stumaḥ / yaṃ prastūya prakāśante madguṇās trasareṇavaḥ

Sanskrit only: no published translation is held for this verse.

नाशङ्कनीयम् एतेषां मतम् एतेन दूष्यते । किं तु चक्षुर् मृगाक्षीणां कज्जलेनेव भूष्यते

nāśaṅkanīyam eteṣāṃ matam etena dūṣyate / kiṃ tu cakṣur mṛgākṣīṇāṃ kajjaleneva bhūṣyate

Sanskrit only: no published translation is held for this verse.

प्रतिभैव श्रुताभ्यास-सहिता कवितां प्रति । हेतुर् मृदम्बुसम्बद्धा बीजमाला लतामिव

pratibhaiva śrutābhyāsa-sahitā kavitāṃ prati / hetur mṛdambusambaddhā bījamālā latāmiva

Sanskrit only: no published translation is held for this verse.

निर्दोषा लक्षणवती सरीतिर् गुणभूषणा । सालंकाररसानेक-वृत्तिर् वाक् काव्यनामभाक्

nirdoṣā lakṣaṇavatī sarītir guṇabhūṣaṇā / sālaṃkārarasāneka-vṛttir vāk kāvyanāmabhāk

Sanskrit only: no published translation is held for this verse.

अङ्गीकरोति यः काव्यं शब्दार्थाव् अनलंकृती । असौ न मन्यते कस्माद् अनुष्णम् अनलं कृती

aṅgīkaroti yaḥ kāvyaṃ śabdārthāv analaṃkṛtī / asau na manyate kasmād anuṣṇam analaṃ kṛtī

Sanskrit only: no published translation is held for this verse.

विभक्त्युत्पत्तये योग्यः शास्त्रीयः शब्द इष्यते । रूढयौगिकतन्मिश्रैः प्रभेदैः स पुनस् त्रिधा

vibhaktyutpattaye yogyaḥ śāstrīyaḥ śabda iṣyate / rūḍhayaugikatanmiśraiḥ prabhedaiḥ sa punas tridhā

Sanskrit only: no published translation is held for this verse.

अव्यक्तयोगनिर्योग-योगाभासैस् त्रिधादिमः । ते च वृक्षादिभूवादि-मण्डपाद्या यथाक्रमम्

avyaktayoganiryoga-yogābhāsais tridhādimaḥ / te ca vṛkṣādibhūvādi-maṇḍapādyā yathākramam

Sanskrit only: no published translation is held for this verse.

शुद्धतन्मूलसंभिन्न-प्रभेदैर् यौगिकस् त्रिधा । ते च भ्रान्तिस्फुरत्कान्ति-कौन्तेयादिस्वरूपिणः

śuddhatanmūlasaṃbhinna-prabhedair yaugikas tridhā / te ca bhrāntisphuratkānti-kaunteyādisvarūpiṇaḥ

Sanskrit only: no published translation is held for this verse.

तन्मिश्रो ऽन्योन्यसामान्य-विशेषपरिवर्तनात् । नीरधिः पङ्कजं सौधः सागरो भूरुहः शशी

tanmiśro 'nyonyasāmānya-viśeṣaparivartanāt / nīradhiḥ paṅkajaṃ saudhaḥ sāgaro bhūruhaḥ śaśī

Sanskrit only: no published translation is held for this verse.

क्षीरनीरधिर् आकाश-पङ्कजं तेन सिद्धयति । विभक्त्यन्तं पदं वाक्यं तद्व्यूहो ऽर्थसमाप्तितः

kṣīranīradhir ākāśa-paṅkajaṃ tena siddhayati / vibhaktyantaṃ padaṃ vākyaṃ tadvyūho 'rthasamāptitaḥ

Sanskrit only: no published translation is held for this verse.

युक्तार्थतां तां च विना खण्डवाक्यं स इष्यते । वाक्यं च खण्डवाक्यं च पदम् एकम् अपि क्वचित्

yuktārthatāṃ tāṃ ca vinā khaṇḍavākyaṃ sa iṣyate / vākyaṃ ca khaṇḍavākyaṃ ca padam ekam api kvacit

Sanskrit only: no published translation is held for this verse.

धूमवत्त्वाद् इति यथा देवेत्य् आमन्त्रणं यथा । वाक्यान्य् एकार्थविश्रान्तान्य् आहुर् वाक्यकदम्बकम्

dhūmavattvād iti yathā devety āmantraṇaṃ yathā / vākyāny ekārthaviśrāntāny āhur vākyakadambakam

Sanskrit only: no published translation is held for this verse.

महादेवः सत्रप्रमुखमखविद्यैकचतुरः सुमित्रा तद्भक्तिप्रणिहितमतिर् यस्य पितरौ । अनेनासाव् आद्यः सुकविजयदेवेन रचिते चिरं चन्द्रालोके सुखयतु मयूखः सुमनसः

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau / anenāsāv ādyaḥ sukavijayadevena racite ciraṃ candrāloke sukhayatu mayūkhaḥ sumanasaḥ

Sanskrit only: no published translation is held for this verse.