तम् आपतन्तम् आलोक्य पलायन्त पुरौकसः ॥ ज्र्त् ब्।१७१ ॥ बद्धाः पलायिनस् तेन मान्त्रिकेणेव पन्नगाः । केचित् पलायिता भीत्या प्रविष्टा गिरिगह्वरम् ॥ ज्र्त् ब्।१७२ ॥ राजापि क्वापि सञ्छन्नो भीत्या घूकवद् आस्त सः । इतरेषां तु लोकानां का कथा तत्र वासिनाम् ॥ ज्र्त् ब्।१७३ ॥ विप्रशापो नरेन्द्राणां वृथा जातो न जातुचित् । सलक्ष्मा राजयक्ष्मा हि नाहत्वा विनिवर्तते ॥ ज्र्त् ब्।१७४ ॥ गूढार्थं दापिताः पूर्वं गाढया बन्धपीडया । विक्रीता वाजिभिः पश्चात् तुरुष्कैर् हस्तगा जनाः ॥ ज्र्त् ब्।१७५ ॥ विद्धाः केचित् परे बद्धा विराद्धास् तेन केचन । प्लोषं केचित् परे शोषं दोषं यान्त्य् अनलाद् द्रुमाः ॥ ज्र्त् ब्।१७६ ॥ जत्रुवेधेन बद्धानाम् एकया चर्मवध्रया । तेषां दुरापम् अप्य् आसीद् अन्योऽन्यमुखदर्शनम् ॥ ज्र्त् ब्।१७७ ॥ घासेन्धनादिसम्भारढौकनाय क्षणं क्षणम् । बद्धा म्लेच्छैर् अमुच्यन्त बिडालैर् इव मूषकाः ॥ ज्र्त् ब्।१७८ ॥ येषाम् अन्ने जुगुप्साभूद् बिडालस्पर्शदोषतः । म्लेच्छोच्छिष्टं गवांश् चास्थि तैर् बद्धैर् भक्षितं क्षुधा ॥ ज्र्त् ब्।१७९ ॥ वैतस्तम् अपि ये वारि न पपुः पङ्कसङ्कुलम् । बद्धैर् मरुषु तैर् नीतैर् मूत्रं पीतं भृशं तृषा ॥ ज्र्त् ब्।१८० ॥ क्व म्लेच्छान्नं क्व वंशो नो दुस्सहा क्षुच् छ्रुतेन किम् । निद्रा नाद्यापि मार्गेण ते ऽन्तर् एवम् अचिन्तयन् ॥ ज्र्त् ब्।१८१ ॥ गच्छतां तिष्ठतां तेषाम् अश्नतां जल्पताम् अपि । सो ऽभून् नैव क्षणो यत्र न ते कार्यम् असाधयन् ॥ ज्र्त् ब्।१८२ ॥ म्लेच्छैः केचित् खशैः केचिद् दरद्भिर् अपरे तथा । भोट्टैः केचित् तुरुष्कैश् च केचिद् बन्दीकृता जनाः ॥ ज्र्त् ब्।१८३ ॥ अन्नं गृहे वने वित्तं मार्गे बन्धून् विहाय च । पलायाम् आसुर् अपरे तुरुष्कभयसम्भ्रमात् ॥ ज्र्त् ब्।१८४ ॥ करुणागौरवघृणा द्रुतं गन्तुम् अशक्तिषु । बालवृद्धाबलास्व् एते त्यक्तवन्तः पलायिनः ॥ ज्र्त् ब्।१८५ ॥ न भुक्तं क्षुधितैर् मार्गे न पीतं तृषितैर् अपि । किम् अन्यद् भयसंभ्रान्तैः पश्चात् तैर् नापि वीक्षितम् ॥ ज्र्त् ब्।१८६ ॥ क्षुधा केचित् तृषा केचिद् भिया केचित् परे ह्रिया । भयाद् बिलदरीष्व् एव प्रविश्यान्तर् विपेदिरे ॥ ज्र्त् ब्।१८७ ॥ बिलप्रविष्टांस् ताञ् छ्रुत्वा ततो निष्कासनेच्छवः । निष्कारुण्यास् तुरुष्कास् ते धूमं बिलमुखे ददुः ॥ ज्र्त् ब्।१८८ ॥ धूमेनान्तर् विपन्नानां नराणाम् अस्थिराशयः । दृश्यन्ते ऽद्यापि धूमोत्थं मालिन्यं च गुहामुखे ॥ ज्र्त् ब्।१८९ ॥ राजापचारम् अकरोत् प्रजासु फलितस् तु सः । नारीणां चपला दृष्टिर् दन्तैर् गण्डस् तु खण्ड्यते ॥ ज्र्त् ब्।१९० ॥ नाशिताशेषदेशो ऽथ स्फीतशीतभयाकुलः । डल्चः कश्मीरतस् तारबलमार्गेण निर्ययौ
tam āpatantam ālokya palāyanta puraukasaḥ // JRt B.171 // baddhāḥ palāyinas tena māntrikeṇeva pannagāḥ / kecit palāyitā bhītyā praviṣṭā girigahvaram // JRt B.172 // rājāpi kvāpi sañchanno bhītyā ghūkavad āsta saḥ / itareṣāṃ tu lokānāṃ kā kathā tatra vāsinām // JRt B.173 // vipraśāpo narendrāṇāṃ vṛthā jāto na jātucit / salakṣmā rājayakṣmā hi nāhatvā vinivartate // JRt B.174 // gūḍhārthaṃ dāpitāḥ pūrvaṃ gāḍhayā bandhapīḍayā / vikrītā vājibhiḥ paścāt turuṣkair hastagā janāḥ // JRt B.175 // viddhāḥ kecit pare baddhā virāddhās tena kecana / ploṣaṃ kecit pare śoṣaṃ doṣaṃ yānty analād drumāḥ // JRt B.176 // jatruvedhena baddhānām ekayā carmavadhrayā / teṣāṃ durāpam apy āsīd anyo'nyamukhadarśanam // JRt B.177 // ghāsendhanādisambhāraḍhaukanāya kṣaṇaṃ kṣaṇam / baddhā mlecchair amucyanta biḍālair iva mūṣakāḥ // JRt B.178 // yeṣām anne jugupsābhūd biḍālasparśadoṣataḥ / mlecchocchiṣṭaṃ gavāṃś cāsthi tair baddhair bhakṣitaṃ kṣudhā // JRt B.179 // vaitastam api ye vāri na papuḥ paṅkasaṅkulam / baddhair maruṣu tair nītair mūtraṃ pītaṃ bhṛśaṃ tṛṣā // JRt B.180 // kva mlecchānnaṃ kva vaṃśo no dussahā kṣuc chrutena kim / nidrā nādyāpi mārgeṇa te 'ntar evam acintayan // JRt B.181 // gacchatāṃ tiṣṭhatāṃ teṣām aśnatāṃ jalpatām api / so 'bhūn naiva kṣaṇo yatra na te kāryam asādhayan // JRt B.182 // mlecchaiḥ kecit khaśaiḥ kecid daradbhir apare tathā / bhoṭṭaiḥ kecit turuṣkaiś ca kecid bandīkṛtā janāḥ // JRt B.183 // annaṃ gṛhe vane vittaṃ mārge bandhūn vihāya ca / palāyām āsur apare turuṣkabhayasambhramāt // JRt B.184 // karuṇāgauravaghṛṇā drutaṃ gantum aśaktiṣu / bālavṛddhābalāsv ete tyaktavantaḥ palāyinaḥ // JRt B.185 // na bhuktaṃ kṣudhitair mārge na pītaṃ tṛṣitair api / kim anyad bhayasaṃbhrāntaiḥ paścāt tair nāpi vīkṣitam // JRt B.186 // kṣudhā kecit tṛṣā kecid bhiyā kecit pare hriyā / bhayād biladarīṣv eva praviśyāntar vipedire // JRt B.187 // bilapraviṣṭāṃs tāñ chrutvā tato niṣkāsanecchavaḥ / niṣkāruṇyās turuṣkās te dhūmaṃ bilamukhe daduḥ // JRt B.188 // dhūmenāntar vipannānāṃ narāṇām asthirāśayaḥ / dṛśyante 'dyāpi dhūmotthaṃ mālinyaṃ ca guhāmukhe // JRt B.189 // rājāpacāram akarot prajāsu phalitas tu saḥ / nārīṇāṃ capalā dṛṣṭir dantair gaṇḍas tu khaṇḍyate // JRt B.190 // nāśitāśeṣadeśo 'tha sphītaśītabhayākulaḥ / ḍalcaḥ kaśmīratas tārabalamārgeṇa niryayau
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.