Jaiminīya Upaniṣad Brāhmaṇa (Sāmaveda) 1.40

चत्वारि वाक् परिमिता पदानि तानि विदुर् ब्राह्मणा ये मनीषिणः गुहा त्रीणि निहिता नेङ्गयन्ति तुरीयं वाचो मनुष्या वदन्तीति

catvāri vāk parimitā padāni tāni vidur brāhmaṇā ye manīṣiṇaḥ guhā trīṇi nihitā neṅgayanti turīyaṃ vāco manuṣyā vadantīti

Sanskrit only: no published translation is held for this verse.

वाग् एव साम वाचा हि साम गायति वाग् एवोक्थम् वाचा ह्य् उक्थं शंसति वाग् एव यजुः वाचा हि यजुर् अनुवर्तते

vāg eva sāma vācā hi sāma gāyati vāg evoktham vācā hy ukthaṃ śaṃsati vāg eva yajuḥ vācā hi yajur anuvartate

Sanskrit only: no published translation is held for this verse.

तद् यत् किं चार्वाचीनम् ब्रह्मणस् तद् वाग् एव सर्वम् अथ यद् अन्यत्र ब्रह्मोपदिश्यते नैव हि तेनार्त्विज्यं करोति परोक्षेणैव तु कृतम् भवति

tad yat kiṃ cārvācīnam brahmaṇas tad vāg eva sarvam atha yad anyatra brahmopadiśyate naiva hi tenārtvijyaṃ karoti parokṣeṇaiva tu kṛtam bhavati

Sanskrit only: no published translation is held for this verse.

तस्या एतस्यै वाचो मनः पादश् चक्षुः पादः श्रोत्रम् पादो वाग् एव चतुर्थः पादः

tasyā etasyai vāco manaḥ pādaś cakṣuḥ pādaḥ śrotram pādo vāg eva caturthaḥ pādaḥ

Sanskrit only: no published translation is held for this verse.

तद् यद् वै मनसा ध्यायति तद् वाचा वदति यच् चक्षुषा पश्यति तद् वाचा वदति यच् छ्रोत्रेण शृणोति तद् वाचा वदति

tad yad vai manasā dhyāyati tad vācā vadati yac cakṣuṣā paśyati tad vācā vadati yac chrotreṇa śṛṇoti tad vācā vadati

Sanskrit only: no published translation is held for this verse.

तद् यद् एतत् सर्वं वाचम् एवाभिसमयति तस्माद् वाग् एव साम स ह वै सामवित् स साम वेद य एवं वेद

tad yad etat sarvaṃ vācam evābhisamayati tasmād vāg eva sāma sa ha vai sāmavit sa sāma veda ya evaṃ veda

Sanskrit only: no published translation is held for this verse.

तस्या एतस्यै वाचः प्राणा एवासुः एषु हीदं सर्वम् असूतेति

tasyā etasyai vācaḥ prāṇā evāsuḥ eṣu hīdaṃ sarvam asūteti

Sanskrit only: no published translation is held for this verse.