Kurma-Purana 2.11

ज्ञातं भवद्भिरमलं प्रसादात् परमेष्ठिनः । साक्षादेव महेशस्य ज्ञानं संसारनाशनम्

jñātaṃ bhavadbhiramalaṃ prasādāt parameṣṭhinaḥ / sākṣādeva maheśasya jñānaṃ saṃsāranāśanam

Sanskrit only: no published translation is held for this verse.

गच्छध्वं विज्वराः सर्वे विज्ञानं परमेष्ठिनः । प्रवर्तयध्वं शिष्येभ्यो धार्मिकेभ्यो मुनीश्वराः

gacchadhvaṃ vijvarāḥ sarve vijñānaṃ parameṣṭhinaḥ / pravartayadhvaṃ śiṣyebhyo dhārmikebhyo munīśvarāḥ

Sanskrit only: no published translation is held for this verse.

इदं भक्ताय शान्ताय धार्मिकायाहिताग्नये । विज्ञानमैश्वरं देयं ब्राह्मणाय विशेषतः

idaṃ bhaktāya śāntāya dhārmikāyāhitāgnaye / vijñānamaiśvaraṃ deyaṃ brāhmaṇāya viśeṣataḥ

Sanskrit only: no published translation is held for this verse.

एवमुक्त्वा स विश्वात्मा योगिनां योगवित्तमः । नारायणो महायोगी जगामादर्शनं स्वयम्

evamuktvā sa viśvātmā yogināṃ yogavittamaḥ / nārāyaṇo mahāyogī jagāmādarśanaṃ svayam

Sanskrit only: no published translation is held for this verse.

ते ऽपि देवादिदेवेशं नमस्कृत्य महेश्वरम् । नारायणं च भूतादिं स्वानि स्थानानि भेजिरे

te 'pi devādideveśaṃ namaskṛtya maheśvaram / nārāyaṇaṃ ca bhūtādiṃ svāni sthānāni bhejire

Sanskrit only: no published translation is held for this verse.

सनत्कुमारो भगवान् संवर्ताय महामुनिः । दत्तवानैश्वरं ज्ञानं सो ऽपि सत्यव्रताय तु

sanatkumāro bhagavān saṃvartāya mahāmuniḥ / dattavānaiśvaraṃ jñānaṃ so 'pi satyavratāya tu

Sanskrit only: no published translation is held for this verse.

सनन्दनो ऽपि योगीन्द्रः पुलहाय महर्षये । प्रददौ गौतमायाथ पुलहो ऽपि प्रजापतिः

sanandano 'pi yogīndraḥ pulahāya maharṣaye / pradadau gautamāyātha pulaho 'pi prajāpatiḥ

Sanskrit only: no published translation is held for this verse.

अङ्गिरा वेदविदुषे भरद्वाजाय दत्तवान् । जैगीषव्याय कपिलस्तथा पञ्चशिखाय च

aṅgirā vedaviduṣe bharadvājāya dattavān / jaigīṣavyāya kapilastathā pañcaśikhāya ca

Sanskrit only: no published translation is held for this verse.

पराशरो ऽपि सनकात् पिता मे सर्वतत्त्वदृक् । लेभेतत्परमं ज्ञानं तस्माद् वाल्मीकिराप्तवान्

parāśaro 'pi sanakāt pitā me sarvatattvadṛk / lebhetatparamaṃ jñānaṃ tasmād vālmīkirāptavān

Sanskrit only: no published translation is held for this verse.

ममोवाच पुरा देवः सतीदेहभवाङ्गजः । वामदेवो महायोगी रुद्रः किल पिनाकधृक्

mamovāca purā devaḥ satīdehabhavāṅgajaḥ / vāmadevo mahāyogī rudraḥ kila pinākadhṛk

Sanskrit only: no published translation is held for this verse.

नारायणो ऽपि भगवान् देवकीतनयो हरिः । अर्जुनाय स्वयं साक्षात् दत्तवानिदमुत्तमम्

nārāyaṇo 'pi bhagavān devakītanayo hariḥ / arjunāya svayaṃ sākṣāt dattavānidamuttamam

Sanskrit only: no published translation is held for this verse.

यदहं लब्धवान् रुद्राद् वामदेवादनुत्तमम् । विशेषाद् गिरिशे भक्तिस्तस्मादारभ्य मे ऽभवत्

yadahaṃ labdhavān rudrād vāmadevādanuttamam / viśeṣād giriśe bhaktistasmādārabhya me 'bhavat

Sanskrit only: no published translation is held for this verse.

शरण्यं शरणं रुद्रं प्रपन्नो ऽहं विशेषतः । भूतेशं गिरशं स्थाणुं देवदेवं त्रिशूलिनम्

śaraṇyaṃ śaraṇaṃ rudraṃ prapanno 'haṃ viśeṣataḥ / bhūteśaṃ giraśaṃ sthāṇuṃ devadevaṃ triśūlinam

Sanskrit only: no published translation is held for this verse.

भवन्तो ऽपि हि तं देवं शंभुं गोवृषवाहनम् । प्रपद्यध्वं सपत्नीकाः सपुत्राः शरणं शिवम्

bhavanto 'pi hi taṃ devaṃ śaṃbhuṃ govṛṣavāhanam / prapadyadhvaṃ sapatnīkāḥ saputrāḥ śaraṇaṃ śivam

Sanskrit only: no published translation is held for this verse.

वर्तध्वं तत्प्रसादेन कर्मयोगेन शङ्करम् । पूजयध्वं महादेवं गोपतिं भूतिभूषणम्

vartadhvaṃ tatprasādena karmayogena śaṅkaram / pūjayadhvaṃ mahādevaṃ gopatiṃ bhūtibhūṣaṇam

Sanskrit only: no published translation is held for this verse.

एवमुक्ते ऽथ मुनयः शौनकाद्या महेश्वरम् । प्रणेमुः शाश्वतं स्थाणुं व्यासं सत्यवतीसुतम्

evamukte 'tha munayaḥ śaunakādyā maheśvaram / praṇemuḥ śāśvataṃ sthāṇuṃ vyāsaṃ satyavatīsutam

Sanskrit only: no published translation is held for this verse.

अब्रुवन् हृष्टमनसः कृष्णद्वैपायनं प्रभुम् । साक्षादेव हृषीकेशं सर्वलोकमहेश्वरम्

abruvan hṛṣṭamanasaḥ kṛṣṇadvaipāyanaṃ prabhum / sākṣādeva hṛṣīkeśaṃ sarvalokamaheśvaram

Sanskrit only: no published translation is held for this verse.

भवत्प्रसादादचला शरण्ये गोवृषध्वजे । इदानीं जायते भक्तिर्या देवैरपि दुर्लभा

bhavatprasādādacalā śaraṇye govṛṣadhvaje / idānīṃ jāyate bhaktiryā devairapi durlabhā

Sanskrit only: no published translation is held for this verse.

कथयस्व मुनिश्रेष्ठ कर्मयोगमनुत्तमम् । येनासौ भगवानीशः समाराध्यो मुमुक्षुभिः

kathayasva muniśreṣṭha karmayogamanuttamam / yenāsau bhagavānīśaḥ samārādhyo mumukṣubhiḥ

Sanskrit only: no published translation is held for this verse.

त्वत्संनिधावेष सूतः शृणोतु भगवद्वचः । तद्वदाखिललोकानां रक्षणं धर्मसंग्रहम्

tvatsaṃnidhāveṣa sūtaḥ śṛṇotu bhagavadvacaḥ / tadvadākhilalokānāṃ rakṣaṇaṃ dharmasaṃgraham

Sanskrit only: no published translation is held for this verse.

यदुक्तं देवदेवेन विष्णुना कूर्मरूपिणा । पृष्टेन मुनिभिः पूर्वं शक्रेणामृतमन्थने

yaduktaṃ devadevena viṣṇunā kūrmarūpiṇā / pṛṣṭena munibhiḥ pūrvaṃ śakreṇāmṛtamanthane

Sanskrit only: no published translation is held for this verse.

श्रुत्वा सत्यवतीसूनुः कर्मयोगं सनातनम् । मुनीनां भाषितं कृष्णः प्रोवाच सुसमाहितः

śrutvā satyavatīsūnuḥ karmayogaṃ sanātanam / munīnāṃ bhāṣitaṃ kṛṣṇaḥ provāca susamāhitaḥ

Sanskrit only: no published translation is held for this verse.

य इमं पठते नित्यं संवादं कृत्तिवाससः । सनत्कुमारप्रमुखैः सर्वपापैः प्रमुच्यते

ya imaṃ paṭhate nityaṃ saṃvādaṃ kṛttivāsasaḥ / sanatkumārapramukhaiḥ sarvapāpaiḥ pramucyate

Sanskrit only: no published translation is held for this verse.

श्रावयेद् वा द्विजान् शुद्धान् ब्रह्मचर्यपरायणान् । यो वा विचारयेदर्थं स याति परमां गतिम्

śrāvayed vā dvijān śuddhān brahmacaryaparāyaṇān / yo vā vicārayedarthaṃ sa yāti paramāṃ gatim

Sanskrit only: no published translation is held for this verse.

यश्चैतच्छृणुयान्नित्यं भक्तियुक्तो दृढव्रतः । सर्वपापविनिर्मुक्तो ब्रह्मलोके महीयते

yaścaitacchṛṇuyānnityaṃ bhaktiyukto dṛḍhavrataḥ / sarvapāpavinirmukto brahmaloke mahīyate

Sanskrit only: no published translation is held for this verse.

तस्मात् सर्वप्रयत्नेन पठितव्यो मनीषिभिः । श्रोतव्यश्चाथ मन्तव्यो विशेषाद् ब्राह्मणैः सदा

tasmāt sarvaprayatnena paṭhitavyo manīṣibhiḥ / śrotavyaścātha mantavyo viśeṣād brāhmaṇaiḥ sadā

Sanskrit only: no published translation is held for this verse.