Ksemendra: Avadanakalpalata 13

यः संकल्पपथा सदैव चरति प्रोज्जृम्भमाणाद्भुतं स्वप्नैर्यस्य न संगतिः परिचयो यस्मिन्नपूर्वक्रमः । वाणी मौनवती च यत्र हि नृणां यः श्रोत्रनेत्रातिथिस् तं निर्व्याजजनप्रभावविभवं मनौरमेयं नुमः

yaḥ saṃkalpapathā sadaiva carati projjṛmbhamāṇādbhutaṃ svapnairyasya na saṃgatiḥ paricayo yasminnapūrvakramaḥ / vāṇī maunavatī ca yatra hi nṛṇāṃ yaḥ śrotranetrātithis taṃ nirvyājajanaprabhāvavibhavaṃ manaurameyaṃ numaḥ

Sanskrit only: no published translation is held for this verse.

पुरे राजगृहाभिख्ये बिम्बिरासेण भूभुजा । पूज्यमानं जिन दृष्ट्वा स्थितं वेणुवनाश्रमे

pure rājagṛhābhikhye bimbirāseṇa bhūbhujā / pūjyamānaṃ jina dṛṣṭvā sthitaṃ veṇuvanāśrame

Sanskrit only: no published translation is held for this verse.

मात्सर्यविषसंतप्ता मूर्खाः सर्व्ज्ञमानिनः । न सेहिरे तदुत्कर्षं प्रकाशमिव कौशिकाः

mātsaryaviṣasaṃtaptā mūrkhāḥ sarvjñamāninaḥ / na sehire tadutkarṣaṃ prakāśamiva kauśikāḥ

Sanskrit only: no published translation is held for this verse.

मलिनैः स्वविनाशाय परभागोदितैः सदा । क्रियते वासरस्पर्धा शार्वरैस्तिमिरोत्करैः

malinaiḥ svavināśāya parabhāgoditaiḥ sadā / kriyate vāsaraspardhā śārvaraistimirotkaraiḥ

Sanskrit only: no published translation is held for this verse.

मस्करी संजयी वैरैरजितः ककुदस्तथा । पूरणज्ञातिपुत्राद्या मूर्खाः क्षपणकाः परे

maskarī saṃjayī vairairajitaḥ kakudastathā / pūraṇajñātiputrādyā mūrkhāḥ kṣapaṇakāḥ pare

Sanskrit only: no published translation is held for this verse.

ऊचुर्नृपतिमभ्येत्य मारमायाविमोहिताः । संघर्षद्वेषदोषेण धूमेनेवान्धकारिताः

ūcurnṛpatimabhyetya māramāyāvimohitāḥ / saṃgharṣadveṣadoṣeṇa dhūmenevāndhakāritāḥ

Sanskrit only: no published translation is held for this verse.

एष सर्वज्ञतामानी वने यः श्रमणः स्थितः । ऋद्धिप्रभावो भवता तस्यास्माकं च दृश्यताम्

eṣa sarvajñatāmānī vane yaḥ śramaṇaḥ sthitaḥ / ṛddhiprabhāvo bhavatā tasyāsmākaṃ ca dṛśyatām

Sanskrit only: no published translation is held for this verse.

ऋद्धिप्रभावाद्यत्किंचित् जनव्यावर्जनोर्जितम् । द्र्श्यते महदाश्चर्यं प्रातिहार्यं तदुच्यते

ṛddhiprabhāvādyatkiṃcit janavyāvarjanorjitam / drśyate mahadāścaryaṃ prātihāryaṃ taducyate

Sanskrit only: no published translation is held for this verse.

शक्तिः संसदि यस्यास्ति प्रतिहार्यस्य दर्शने । अस्माकं तस्य वा राजन् पूजाः सन्तु जगत्र्त्रये

śaktiḥ saṃsadi yasyāsti pratihāryasya darśane / asmākaṃ tasya vā rājan pūjāḥ santu jagatrtraye

Sanskrit only: no published translation is held for this verse.

इति तेषाम् वचः श्रुत्वा तद्दर्पविमुखो नृपः । उवाच वाञ्छा केयं वः पङ्गूनां गिरिलङ्घने

iti teṣām vacaḥ śrutvā taddarpavimukho nṛpaḥ / uvāca vāñchā keyaṃ vaḥ paṅgūnāṃ girilaṅghane

Sanskrit only: no published translation is held for this verse.

असमञ्जसमेवैतत् का स्पर्धाग्नेः पतङ्गकैः । नैतद्वाच्यं पुनर्वादी मया निष्कास्यते पुरात्

asamañjasamevaitat kā spardhāgneḥ pataṅgakaiḥ / naitadvācyaṃ punarvādī mayā niṣkāsyate purāt

Sanskrit only: no published translation is held for this verse.

इति राज्ञा गुणज्ञेन प्रत्याख्यातोद्यमाः खलाः । प्रययुस्ते निरालम्बे लम्बमाना इवाम्बरे

iti rājñā guṇajñena pratyākhyātodyamāḥ khalāḥ / prayayuste nirālambe lambamānā ivāmbare

Sanskrit only: no published translation is held for this verse.

बिम्बिसारो नरपतिर्मूर्खतापक्षपातवान् । अन्यं व्रजामो भूपालमिति ते समचिन्तयन्

bimbisāro narapatirmūrkhatāpakṣapātavān / anyaṃ vrajāmo bhūpālamiti te samacintayan

Sanskrit only: no published translation is held for this verse.

अत्राण्तरे भगवति श्रावस्तीमभितः पुरीम् । प्राप्ते तेजवनारामं दिगन्तानेव ते ययुः

atrāṇtare bhagavati śrāvastīmabhitaḥ purīm / prāpte tejavanārāmaṃ digantāneva te yayuḥ

Sanskrit only: no published translation is held for this verse.

ते प्रसेनजितं तत्र प्राप्य कोसलभूपतिम् । प्रातिहार्यकृतस्पर्धां तामेवास्मै न्यवेदयन्

te prasenajitaṃ tatra prāpya kosalabhūpatim / prātihāryakṛtaspardhāṃ tāmevāsmai nyavedayan

Sanskrit only: no published translation is held for this verse.

गुणान्तरज्ञो नृपतिस्तेषाम् दर्पक्षयेच्छया । ऋद्धिसंदर्शनोत्साहाद्ययौ भगवतो ऽन्तिकम्

guṇāntarajño nṛpatisteṣām darpakṣayecchayā / ṛddhisaṃdarśanotsāhādyayau bhagavato 'ntikam

Sanskrit only: no published translation is held for this verse.

स समभ्येत्य विनयात् प्रणिपत्य तमब्रवीत् । भगवन् दर्पबलनं तीर्थ्यानां कर्तुमर्हसि

sa samabhyetya vinayāt praṇipatya tamabravīt / bhagavan darpabalanaṃ tīrthyānāṃ kartumarhasi

Sanskrit only: no published translation is held for this verse.

ऋद्धिस्पर्धानुबन्धेन त्वत्प्रभावदिदृक्षया । स्वगुणश्लाघयास्माकं तैः कर्णौ बधिरीकृतौ

ṛddhispardhānubandhena tvatprabhāvadidṛkṣayā / svaguṇaślāghayāsmākaṃ taiḥ karṇau badhirīkṛtau

Sanskrit only: no published translation is held for this verse.

प्रकाशय निजं तेजः सज्जनावर्जनम् विभो । तीर्थ्याभिधानामखिलं प्रयातु प्रलयं तमः

prakāśaya nijaṃ tejaḥ sajjanāvarjanam vibho / tīrthyābhidhānāmakhilaṃ prayātu pralayaṃ tamaḥ

Sanskrit only: no published translation is held for this verse.

इति राजवचः श्रुत्वा निर्विकारो महाशयः । भगवान् विरतामर्षः सहर्षस्तमभाषतः

iti rājavacaḥ śrutvā nirvikāro mahāśayaḥ / bhagavān viratāmarṣaḥ saharṣastamabhāṣataḥ

Sanskrit only: no published translation is held for this verse.

राजन्नान्योपमर्दाय विवादाय मदाय वा । विवेकाभरणार्हो ऽयं क्रियते गुणसंग्रहः

rājannānyopamardāya vivādāya madāya vā / vivekābharaṇārho 'yaṃ kriyate guṇasaṃgrahaḥ

Sanskrit only: no published translation is held for this verse.

मात्सर्यमलिनैः किं तैर्विचारविगुणैर्गुणैः । ये हरन्ति परोत्कर्षं स्पर्धाबन्धप्रसारिताः

mātsaryamalinaiḥ kiṃ tairvicāraviguṇairguṇaiḥ / ye haranti parotkarṣaṃ spardhābandhaprasāritāḥ

Sanskrit only: no published translation is held for this verse.

गुणाच्छादनमन्यस्य स्वगुणेन करोति यः । धर्मस्तेनाप्रशस्तेन स्वयमेव निघातितः

guṇācchādanamanyasya svaguṇena karoti yaḥ / dharmastenāpraśastena svayameva nighātitaḥ

Sanskrit only: no published translation is held for this verse.

सद्गुणानां परिक्षैव परवैलक्ष्यकारिणी । उचिता न हि शुद्धानां तुलारोहविडम्बना

sadguṇānāṃ parikṣaiva paravailakṣyakāriṇī / ucitā na hi śuddhānāṃ tulārohaviḍambanā

Sanskrit only: no published translation is held for this verse.

गुणवानपि नायाति यः परेषु प्रसन्नताम् । स दीपहस्तस्तत्पात्रच्छायया मलिनीकृतः

guṇavānapi nāyāti yaḥ pareṣu prasannatām / sa dīpahastastatpātracchāyayā malinīkṛtaḥ

Sanskrit only: no published translation is held for this verse.

लोक त एव सर्वज्ञा विद्मः किमधिकं वयम् । पराभिमानाभिभवप्रागल्भ्यं स्वपराभवः

loka ta eva sarvajñā vidmaḥ kimadhikaṃ vayam / parābhimānābhibhavaprāgalbhyaṃ svaparābhavaḥ

Sanskrit only: no published translation is held for this verse.

इति श्रुत्वा भगवतः प्रशमाभिमतं वचः । भृशमभ्यर्थनां राजा चकाराश्चर्यदर्शने

iti śrutvā bhagavataḥ praśamābhimataṃ vacaḥ / bhṛśamabhyarthanāṃ rājā cakārāścaryadarśane

Sanskrit only: no published translation is held for this verse.

ततः दृच्छ्राद्भगवता कृताभ्युपगमो नृपः । राजधानीं ययौ हृष्टः सप्ताहावधिसंविदा

tataḥ dṛcchrādbhagavatā kṛtābhyupagamo nṛpaḥ / rājadhānīṃ yayau hṛṣṭaḥ saptāhāvadhisaṃvidā

Sanskrit only: no published translation is held for this verse.

अस्मिन्नवसरे भ्राता भूमिभर्तुरसोदरः । चचारान्तःपुरोपान्ते प्रासादतलवर्त्मना

asminnavasare bhrātā bhūmibharturasodaraḥ / cacārāntaḥpuropānte prāsādatalavartmanā

Sanskrit only: no published translation is held for this verse.

सलीलं व्रजतस्तस्य कर्मवातैरिवेरिता । कुसुमस्रक् पपातांसे राजपत्नीकराच्च्युता

salīlaṃ vrajatastasya karmavātairiveritā / kusumasrak papātāṃse rājapatnīkarāccyutā

Sanskrit only: no published translation is held for this verse.

तस्य विज्ञातदोषस्य दोषं संभाव्य साक्षिभिः । पिशुनाः किंवदन्तीं ताम् चक्रिरे राजगामिनीम्

tasya vijñātadoṣasya doṣaṃ saṃbhāvya sākṣibhiḥ / piśunāḥ kiṃvadantīṃ tām cakrire rājagāminīm

Sanskrit only: no published translation is held for this verse.

छिद्रमल्पमपि प्राप्य क्षुद्राः सर्वापकारिणः । द्विजिह्वाः प्रविशन्त्याशु प्रभूनां शून्यमाशयम्

chidramalpamapi prāpya kṣudrāḥ sarvāpakāriṇaḥ / dvijihvāḥ praviśantyāśu prabhūnāṃ śūnyamāśayam

Sanskrit only: no published translation is held for this verse.

पिशुनप्रेतिरो राजा भ्रातुरीर्ष्याविषोल्बणः । छेदमस्यादिदेशाशु पाणिपादस्य मूर्च्छितः

piśunapretiro rājā bhrāturīrṣyāviṣolbaṇaḥ / chedamasyādideśāśu pāṇipādasya mūrcchitaḥ

Sanskrit only: no published translation is held for this verse.

निकृत्तपाणिचरणः कुमारः कर्मविप्लवात् । स वध्यवसुधाशायी विवेश विषमापदम्

nikṛttapāṇicaraṇaḥ kumāraḥ karmaviplavāt / sa vadhyavasudhāśāyī viveśa viṣamāpadam

Sanskrit only: no published translation is held for this verse.

तीव्रव्यथापरिवृतं शोचद्भिर्मातृबन्धुभिः । ददृशुस्तं क्षपणकाः क्षणं नयनचालने

tīvravyathāparivṛtaṃ śocadbhirmātṛbandhubhiḥ / dadṛśustaṃ kṣapaṇakāḥ kṣaṇaṃ nayanacālane

Sanskrit only: no published translation is held for this verse.

तान् समभ्येत्य शोकार्तास्ते राजसुतबान्धवाः । जगदुस्तत्परित्राणसंलिप्ताः सर्वप्राणिनह्

tān samabhyetya śokārtāste rājasutabāndhavāḥ / jagadustatparitrāṇasaṃliptāḥ sarvaprāṇinah

Sanskrit only: no published translation is held for this verse.

दोषं निगृहीतो ऽयं कालनामा नृपात्मजम् । सर्वज्ञवादिनो यूयं प्रसादो ऽस्य विधीयताम्

doṣaṃ nigṛhīto 'yaṃ kālanāmā nṛpātmajam / sarvajñavādino yūyaṃ prasādo 'sya vidhīyatām

Sanskrit only: no published translation is held for this verse.

इति तै प्रसरद्बाष्पैरर्थ्यमानाह् प्रलापिभिः । ते मौनिनो निष्प्रतिभा वैलक्ष्यादन्यतो ययुः

iti tai prasaradbāṣpairarthyamānāh pralāpibhiḥ / te maunino niṣpratibhā vailakṣyādanyato yayuḥ

Sanskrit only: no published translation is held for this verse.

अथ तेन यथायातो भिक्षुः सुगतशासनात् । आनन्दो विदधे ऽङ्गानि तस्य सत्योपयाचनात्

atha tena yathāyāto bhikṣuḥ sugataśāsanāt / ānando vidadhe 'ṅgāni tasya satyopayācanāt

Sanskrit only: no published translation is held for this verse.

राजपुत्रस्तु संजातपाणिपादः प्रसन्नधीः । जिनं शरणमभ्येत्य तदुपस्थायको ऽभवत्

rājaputrastu saṃjātapāṇipādaḥ prasannadhīḥ / jinaṃ śaraṇamabhyetya tadupasthāyako 'bhavat

Sanskrit only: no published translation is held for this verse.

सप्तरत्रे व्यतीते ऽथ श्रान्तिहार्यं गृहं महत् । ऋद्धिं भगवतो द्रष्टुं महीपतिरकारयत्

saptaratre vyatīte 'tha śrāntihāryaṃ gṛhaṃ mahat / ṛddhiṃ bhagavato draṣṭuṃ mahīpatirakārayat

Sanskrit only: no published translation is held for this verse.

उपविष्टे नृपे तत्र सह क्षपणकादिभिः । कल्पवृक्षीकृता भूमिरभवत् सुगतेच्छया

upaviṣṭe nṛpe tatra saha kṣapaṇakādibhiḥ / kalpavṛkṣīkṛtā bhūmirabhavat sugatecchayā

Sanskrit only: no published translation is held for this verse.

ततः प्राप्तेषु देवेषु द्रष्टुं भगवतः प्रभाम् । रत्नप्रदीपं भगवान् भेजे सिंहासनम् महत्

tataḥ prāpteṣu deveṣu draṣṭuṃ bhagavataḥ prabhām / ratnapradīpaṃ bhagavān bheje siṃhāsanam mahat

Sanskrit only: no published translation is held for this verse.

तेजोधातुं प्रपन्नस्य तस्य गण्डसमुद्गतैः । व्याप्तं पावकसंघातैरभूद्भुवनमण्डलम्

tejodhātuṃ prapannasya tasya gaṇḍasamudgataiḥ / vyāptaṃ pāvakasaṃghātairabhūdbhuvanamaṇḍalam

Sanskrit only: no published translation is held for this verse.

शान्ते शनैः कमलकाननसंनिकाशे वह्नौ समस्तभुवनस्थितिभङ्गभीत्या । देहात्ततो भगवतः करुणाम्बुराशेः पूर्णामृतोर्मिविमला रुचयः प्रसस्रुः

śānte śanaiḥ kamalakānanasaṃnikāśe vahnau samastabhuvanasthitibhaṅgabhītyā / dehāttato bhagavataḥ karuṇāmburāśeḥ pūrṇāmṛtormivimalā rucayaḥ prasasruḥ

Sanskrit only: no published translation is held for this verse.

लावण्यसारमतिचन्द्रसहस्रकान्तिं तेजः प्रतानविफलीकृतसूर्यचक्रम् । तं नागनायकनिकायविलोचनानि प्रीत्या पपुः सुकृतलब्धमपूर्वहर्षम्

lāvaṇyasāramaticandrasahasrakāntiṃ tejaḥ pratānaviphalīkṛtasūryacakram / taṃ nāganāyakanikāyavilocanāni prītyā papuḥ sukṛtalabdhamapūrvaharṣam

Sanskrit only: no published translation is held for this verse.

वैदूर्यनालविपुलारुणरत्नपात्रकान्तोल्लसत्कनककेसरकर्णिकानि । अभ्युद्ययुः क्षितितलादथ तत्समीपे पद्मानि सौरभभराहृतषट्पदानि

vaidūryanālavipulāruṇaratnapātrakāntollasatkanakakesarakarṇikāni / abhyudyayuḥ kṣititalādatha tatsamīpe padmāni saurabhabharāhṛtaṣaṭpadāni

Sanskrit only: no published translation is held for this verse.

तेषूपविष्टमथ काञ्चनचारुकान्तिं स्निग्धेक्षस्णं सुगतचक्रमदृश्यतारात् । पीयूषपेशलशशिद्युतिशीतलेन यस्योदयेन सहसा सुखमाप लोकः

teṣūpaviṣṭamatha kāñcanacārukāntiṃ snigdhekṣasṇaṃ sugatacakramadṛśyatārāt / pīyūṣapeśalaśaśidyutiśītalena yasyodayena sahasā sukhamāpa lokaḥ

Sanskrit only: no published translation is held for this verse.

तेषां प्रभावविभवं बह्गवान् बभार मध्ये ऽधिकं कनकशैल इवाचलानाम् । सुस्कन्धबन्धुरघनद्युतिसंनिवेशः प्रांशुः सुरक्षितिरुहामिव पारिजातः

teṣāṃ prabhāvavibhavaṃ bahgavān babhāra madhye 'dhikaṃ kanakaśaila ivācalānām / suskandhabandhuraghanadyutisaṃniveśaḥ prāṃśuḥ surakṣitiruhāmiva pārijātaḥ

Sanskrit only: no published translation is held for this verse.

स्वर्गाङ्गनाकरकुशेशयकीर्यमाणैरम्लानमाल्यवलयैः कलितोत्तमाङ्गाः । तस्याननाम्बुजविलोकननिर्निमेषे मर्त्या अपि क्षणमवापुरमर्त्यभावम्

svargāṅganākarakuśeśayakīryamāṇairamlānamālyavalayaiḥ kalitottamāṅgāḥ / tasyānanāmbujavilokananirnimeṣe martyā api kṣaṇamavāpuramartyabhāvam

Sanskrit only: no published translation is held for this verse.

व्योमाङ्गणेषु सुरदुन्दुभिशङ्खतूर्यघोषावृतः कुसुमवर्षमहाट्टहासः । गन्धर्वकिन्नरमुनीश्वरचारणानां स्फीटश्चचार भगवत्स्तुतिवादनादः

vyomāṅgaṇeṣu suradundubhiśaṅkhatūryaghoṣāvṛtaḥ kusumavarṣamahāṭṭahāsaḥ / gandharvakinnaramunīśvaracāraṇānāṃ sphīṭaścacāra bhagavatstutivādanādaḥ

Sanskrit only: no published translation is held for this verse.

तत्रारुणाधरदलाद्दशनांशुशुभ्राद् व्याकीर्णकेशरकुलाद्दशनारविन्दात् । सत्सौरभं भगवतः स्वरसंनिवृत्तं धन्याः पपुर्मधुरवाङ्भधु पुण्यसूतम्

tatrāruṇādharadalāddaśanāṃśuśubhrād vyākīrṇakeśarakulāddaśanāravindāt / satsaurabhaṃ bhagavataḥ svarasaṃnivṛttaṃ dhanyāḥ papurmadhuravāṅbhadhu puṇyasūtam

Sanskrit only: no published translation is held for this verse.

पापं विमुञ्चत निषिञ्चत पुण्यबीजं वैरं परित्यजत साम्यसुखं भजध्वम् । ज्ञानामृतं पिबतं मृत्युविषापहारि नेयं तनुः कुशलकर्मसखी चिराय

pāpaṃ vimuñcata niṣiñcata puṇyabījaṃ vairaṃ parityajata sāmyasukhaṃ bhajadhvam / jñānāmṛtaṃ pibataṃ mṛtyuviṣāpahāri neyaṃ tanuḥ kuśalakarmasakhī cirāya

Sanskrit only: no published translation is held for this verse.

लक्ष्मीश्चला तरुणता च जरानुयाता कायो ऽप्यपायनिचयस्य निवास एव । प्राणाः शरीरककुटिषु मुहूर्तपान्था नित्योदये कुरुत धर्ममये प्रयत्नम्

lakṣmīścalā taruṇatā ca jarānuyātā kāyo 'pyapāyanicayasya nivāsa eva / prāṇāḥ śarīrakakuṭiṣu muhūrtapānthā nityodaye kuruta dharmamaye prayatnam

Sanskrit only: no published translation is held for this verse.

इत्यादिभिर्भगवतः प्रविभक्तदीप्तज्ञानैर्विवेकविमलैः कुशलोपदेशैः । वज्रैरिवाशु दलनं प्रययौ जनानां सत्कायदृष्टिसमविंशतिशृङ्गशैलः

ityādibhirbhagavataḥ pravibhaktadīptajñānairvivekavimalaiḥ kuśalopadeśaiḥ / vajrairivāśu dalanaṃ prayayau janānāṃ satkāyadṛṣṭisamaviṃśatiśṛṅgaśailaḥ

Sanskrit only: no published translation is held for this verse.

ऋद्धिप्रभां भगवतः प्रविभाव्य तीर्थ्या मन्त्रहता विषधरा इव भग्नदर्पाः । दीपा इवार्ककिरणप्रतिभाभिभूताश्चित्रार्पिता इव ययुश्चिरनिश्चलत्वम्

ṛddhiprabhāṃ bhagavataḥ pravibhāvya tīrthyā mantrahatā viṣadharā iva bhagnadarpāḥ / dīpā ivārkakiraṇapratibhābhibhūtāścitrārpitā iva yayuściraniścalatvam

Sanskrit only: no published translation is held for this verse.

अत्रान्तरे भगवतः सततं विपक्षः सर्वात्मना क्षपणको नवधर्मयक्षः । क्षिप्तश्रवान् स वृतवर्षवरैश्चकार विद्रव्य रन्ध्रशरणान् भुवि वज्रपाणिः

atrāntare bhagavataḥ satataṃ vipakṣaḥ sarvātmanā kṣapaṇako navadharmayakṣaḥ / kṣiptaśravān sa vṛtavarṣavaraiścakāra vidravya randhraśaraṇān bhuvi vajrapāṇiḥ

Sanskrit only: no published translation is held for this verse.

अद्दिश्य तानथ कृपार्द्रभयाशरण्यः सर्वोपदेशविषयान् भगवान् बभाषे । भूभृद्वनाबनिमणिर्विवरादि सर्वं तेने भयेषु शरणं किल कातराणाम्

addiśya tānatha kṛpārdrabhayāśaraṇyaḥ sarvopadeśaviṣayān bhagavān babhāṣe / bhūbhṛdvanābanimaṇirvivarādi sarvaṃ tene bhayeṣu śaraṇaṃ kila kātarāṇām

Sanskrit only: no published translation is held for this verse.

बुद्धिं प्रबोध मम धाम्बि निधाय बुद्धिं धर्मं ससंघमपि ये शरणं प्रपन्नाः । तेषा जगत्क्षयभयेष्वपि निर्भयाणां नैवान्यतः शरणदैन्यपरिग्रहो ऽस्ति

buddhiṃ prabodha mama dhāmbi nidhāya buddhiṃ dharmaṃ sasaṃghamapi ye śaraṇaṃ prapannāḥ / teṣā jagatkṣayabhayeṣvapi nirbhayāṇāṃ naivānyataḥ śaraṇadainyaparigraho 'sti

Sanskrit only: no published translation is held for this verse.

दुर्वारे परलोकतीव्रतिमिरे धर्मः प्रवृद्धो ऽशुमान् दानं दुःसहपापतापविपदामभ्युद्गमे वारिदः । प्रज्ञा मोहमहाप्रपातविषमश्वभ्रे करालम्बनं दैन्याक्रान्तमहीनमेव शरणं सर्वत्र पुण्यं नृणाम्

durvāre paralokatīvratimire dharmaḥ pravṛddho 'śumān dānaṃ duḥsahapāpatāpavipadāmabhyudgame vāridaḥ / prajñā mohamahāprapātaviṣamaśvabhre karālambanaṃ dainyākrāntamahīnameva śaraṇaṃ sarvatra puṇyaṃ nṛṇām

Sanskrit only: no published translation is held for this verse.

इति तिमिरवृताक्ष्णां चक्षुरुन्मीलनार्हं दशनमणिमरीचिव्यज्यमानप्रकाशम् । सदसि सुगतचन्द्रः शुद्धधर्मोपदेशं स्थिरपदमिव कृत्वा काननं स्वं जगाम

iti timiravṛtākṣṇāṃ cakṣurunmīlanārhaṃ daśanamaṇimarīcivyajyamānaprakāśam / sadasi sugatacandraḥ śuddhadharmopadeśaṃ sthirapadamiva kṛtvā kānanaṃ svaṃ jagāma

Sanskrit only: no published translation is held for this verse.