Ksemendra: Avadanakalpalata 28

दौर्जन्यदुःसहविशालखलापकारैर्नैवाशये विकृतिरस्ति महाशयानाम् । व्यालोल्वणक्षितिभृदाकुलितो ऽपि सिन्धुर्नैवोत्ससर्ज हृदयादमृतस्वभावम्

daurjanyaduḥsahaviśālakhalāpakārairnaivāśaye vikṛtirasti mahāśayānām / vyālolvaṇakṣitibhṛdākulito 'pi sindhurnaivotsasarja hṛdayādamṛtasvabhāvam

Sanskrit only: no published translation is held for this verse.

पुरे पुरा राजगृहे बह्गवान् वेणुकानने । कलन्दकनिवासाख्ये विजहार मनोहरे

pure purā rājagṛhe bahgavān veṇukānane / kalandakanivāsākhye vijahāra manohare

Sanskrit only: no published translation is held for this verse.

तत्र वित्रासितानेकशत्रिनिस्त्रिंशबान्धवः । अजातशत्रुनामाभूद् बिम्बिसारसुतो नृपः

tatra vitrāsitānekaśatrinistriṃśabāndhavaḥ / ajātaśatrunāmābhūd bimbisārasuto nṛpaḥ

Sanskrit only: no published translation is held for this verse.

शाक्यवंश्यः सुहृत्तस्य देवदत्ताभिधो ऽभवत् । क्षुद्रमन्त्रेण यस्यासीत् स वेताल इवोत्कटः

śākyavaṃśyaḥ suhṛttasya devadattābhidho 'bhavat / kṣudramantreṇa yasyāsīt sa vetāla ivotkaṭaḥ

Sanskrit only: no published translation is held for this verse.

स कदाचित्सुखासीनं रहः प्राह महीपतिम् । न राजन् फलितो ऽद्यापि ममापि त्वत्समाश्रयः

sa kadācitsukhāsīnaṃ rahaḥ prāha mahīpatim / na rājan phalito 'dyāpi mamāpi tvatsamāśrayaḥ

Sanskrit only: no published translation is held for this verse.

निथोपचाररहितः सुखनिर्यन्त्रतन्त्रयोः । मिथो मनोरथत्राणान्मित्रशब्दः प्रवर्तते

nithopacārarahitaḥ sukhaniryantratantrayoḥ / mitho manorathatrāṇānmitraśabdaḥ pravartate

Sanskrit only: no published translation is held for this verse.

य एष शाक्यश्रमणः सुखे वेणुवने स्थितः । तं हत्वा प्राप्तुमिच्छामि तत्पदं देववन्दितम्

ya eṣa śākyaśramaṇaḥ sukhe veṇuvane sthitaḥ / taṃ hatvā prāptumicchāmi tatpadaṃ devavanditam

Sanskrit only: no published translation is held for this verse.

क्षीयते न यया शत्रुर्लभ्यते न यया यशः । वर्धते न यया मानः किं तया मित्रसंपदा

kṣīyate na yayā śatrurlabhyate na yayā yaśaḥ / vardhate na yayā mānaḥ kiṃ tayā mitrasaṃpadā

Sanskrit only: no published translation is held for this verse.

महाधनाभिधानेन तत्पौरेण निमन्त्रितः । स पुरं प्रातरागन्ता दाम्भिकः सह भिक्षुभिः

mahādhanābhidhānena tatpaureṇa nimantritaḥ / sa puraṃ prātarāgantā dāmbhikaḥ saha bhikṣubhiḥ

Sanskrit only: no published translation is held for this verse.

राजमार्गं प्रविशतः स तस्य व्यालकुञ्जरः । उत्सृज्यतामभिमुखः क्रोधान्धो धनपालकः

rājamārgaṃ praviśataḥ sa tasya vyālakuñjaraḥ / utsṛjyatāmabhimukhaḥ krodhāndho dhanapālakaḥ

Sanskrit only: no published translation is held for this verse.

इत्युक्ते देवदत्तेन नृपतिर्मित्रवत्सलः । बुद्धप्रभावं संचिन्त्य नाह किंचिदवाङ्भुखः

ityukte devadattena nṛpatirmitravatsalaḥ / buddhaprabhāvaṃ saṃcintya nāha kiṃcidavāṅbhukhaḥ

Sanskrit only: no published translation is held for this verse.

देवदत्तो ऽपि निर्गत्य राजसौहार्ददुर्मदः । प्राह हस्तिमहामात्रं हारं दत्वास्य तोषणम्

devadatto 'pi nirgatya rājasauhārdadurmadaḥ / prāha hastimahāmātraṃ hāraṃ datvāsya toṣaṇam

Sanskrit only: no published translation is held for this verse.

श्रमणः प्रातरागन्ता पुरं भिक्षुशतैर्वृतः । प्रेरणीयस्त्वया तस्मै गज इत्याह भूपतिः

śramaṇaḥ prātarāgantā puraṃ bhikṣuśatairvṛtaḥ / preraṇīyastvayā tasmai gaja ityāha bhūpatiḥ

Sanskrit only: no published translation is held for this verse.

देवदत्तवचः श्रुत्वा तथेत्युचे द्विपाधिपः । श्रेणी हि मेषमूर्खाणामेकयातानुपातिनी

devadattavacaḥ śrutvā tathetyuce dvipādhipaḥ / śreṇī hi meṣamūrkhāṇāmekayātānupātinī

Sanskrit only: no published translation is held for this verse.

ज्ञात्वापि तमभिप्रायं सर्वज्ञः पापचेतसाम् । प्रातः समाययौ सार्धं भिक्षूणां पञ्चभि शतैः

jñātvāpi tamabhiprāyaṃ sarvajñaḥ pāpacetasām / prātaḥ samāyayau sārdhaṃ bhikṣūṇāṃ pañcabhi śataiḥ

Sanskrit only: no published translation is held for this verse.

अथ हस्तिपकोत्सृष्टः कृष्टप्रासादपादपः । तमभ्यधावदाविद्धः क्रोधान्धः क्रूरकुञ्जरः

atha hastipakotsṛṣṭaḥ kṛṣṭaprāsādapādapaḥ / tamabhyadhāvadāviddhaḥ krodhāndhaḥ krūrakuñjaraḥ

Sanskrit only: no published translation is held for this verse.

अनायत्तः परिचयादङ्कुशस्य गुरोरपि । खलविद्धानिव द्वेषी मदेन मलिनीकृतः

anāyattaḥ paricayādaṅkuśasya gurorapi / khalaviddhāniva dveṣī madena malinīkṛtaḥ

Sanskrit only: no published translation is held for this verse.

सेवव्यसनसक्तानामसकृत्कर्णचापलात् । प्राणापहारी भृङ्गाणां भृत्यानामिव दुष्पतिः

sevavyasanasaktānāmasakṛtkarṇacāpalāt / prāṇāpahārī bhṛṅgāṇāṃ bhṛtyānāmiva duṣpatiḥ

Sanskrit only: no published translation is held for this verse.

मन्दरोपद्रवे तस्मिन् द्रुमद्रोहिण्यभिद्रुते । विद्रुते सहसा लोके हाहाकारो महानभूत्

mandaropadrave tasmin drumadrohiṇyabhidrute / vidrute sahasā loke hāhākāro mahānabhūt

Sanskrit only: no published translation is held for this verse.

तस्याञ्चत्कर्णतालानिलतुलितसरत्सान्द्रसिन्दूरपूरैः संपूर्णे राजमार्गे च्युतचकितवधूरक्तवस्त्रासमानैः । उद्दण्डोच्चण्डशुण्डभ्रमणरवलसत्साध्वसायासिताशा व्यालोलालकाभभ्रमरमिलद्विभ्रमः संभ्रमो ऽभूत्

tasyāñcatkarṇatālānilatulitasaratsāndrasindūrapūraiḥ saṃpūrṇe rājamārge cyutacakitavadhūraktavastrāsamānaiḥ / uddaṇḍoccaṇḍaśuṇḍabhramaṇaravalasatsādhvasāyāsitāśā vyālolālakābhabhramaramiladvibhramaḥ saṃbhramo 'bhūt

Sanskrit only: no published translation is held for this verse.

पुरप्रमाथव्यथिते जने कोलाहलाकुले । आरुरोह महाहर्म्यं देवदत्तः प्रमत्तधीः

purapramāthavyathite jane kolāhalākule / āruroha mahāharmyaṃ devadattaḥ pramattadhīḥ

Sanskrit only: no published translation is held for this verse.

भगवद्ग्रहणं द्रष्टुं सो ऽभवद्भृशमुत्सुकः । उन्मूलनेन गुणिनां मातङ्गः परितुष्यति

bhagavadgrahaṇaṃ draṣṭuṃ so 'bhavadbhṛśamutsukaḥ / unmūlanena guṇināṃ mātaṅgaḥ parituṣyati

Sanskrit only: no published translation is held for this verse.

विद्रुतेषु गजत्रासात् तेषु सर्वेषु भिक्षुषु । आनन्द एक एवाभूद् भिक्षुर्भगवतो ऽन्तिके

vidruteṣu gajatrāsāt teṣu sarveṣu bhikṣuṣu / ānanda eka evābhūd bhikṣurbhagavato 'ntike

Sanskrit only: no published translation is held for this verse.

तत्र पञ्चाननाह् पञ्च निर्ययुर्भगवत्करात् । करालकेसरसटास्तन्नखांशुचिता इव

tatra pañcānanāh pañca niryayurbhagavatkarāt / karālakesarasaṭāstannakhāṃśucitā iva

Sanskrit only: no published translation is held for this verse.

द्विपस्तद्गन्धमाग्राय पर्दापस्मारवारणम् । अभूत् स्रुतशकृन्मूत्रः सहसैव पराङ्मुखः

dvipastadgandhamāgrāya pardāpasmāravāraṇam / abhūt srutaśakṛnmūtraḥ sahasaiva parāṅmukhaḥ

Sanskrit only: no published translation is held for this verse.

जवेन विद्रुतस्तत्र दन्ती दर्पदरिद्रताम् । प्राप्तः प्रदीपदहनाः स ददर्श दिशो दश

javena vidrutastatra dantī darpadaridratām / prāptaḥ pradīpadahanāḥ sa dadarśa diśo daśa

Sanskrit only: no published translation is held for this verse.

स विलोक्य जालवह्निज्वलज्ज्वालाकुलं जगत् । पादपद्मान्तिकं शास्तुः शीतलं समुपाययौ

sa vilokya jālavahnijvalajjvālākulaṃ jagat / pādapadmāntikaṃ śāstuḥ śītalaṃ samupāyayau

Sanskrit only: no published translation is held for this verse.

संकोचाभिरुचेः सचिन्तमनसः प्रध्वस्तवक्त्रद्युतेर् दैन्यापन्नविहीनदानमधुपप्रारब्धकोलाहलः । लोभान्धस्य महाव्ययोत्सव इव क्लेशोष्मनिश्वासिनस् तस्याभूत्परितापनिश्लथगतेर्भारायमाणः करः

saṃkocābhiruceḥ sacintamanasaḥ pradhvastavaktradyuter dainyāpannavihīnadānamadhupaprārabdhakolāhalaḥ / lobhāndhasya mahāvyayotsava iva kleśoṣmaniśvāsinas tasyābhūtparitāpaniślathagaterbhārāyamāṇaḥ karaḥ

Sanskrit only: no published translation is held for this verse.

तं पादमूलमायान्तं भीतं कारुण्यसागरः । शास्ता करेण पस्पर्श चक्रस्वस्तिकलक्ष्मणा

taṃ pādamūlamāyāntaṃ bhītaṃ kāruṇyasāgaraḥ / śāstā kareṇa pasparśa cakrasvastikalakṣmaṇā

Sanskrit only: no published translation is held for this verse.

कुम्भविन्यस्तहस्तस्तं प्रोवाच भगवान् जिनः । पुत्र स्वकर्मणैनेमां प्राप्तो ऽसि त्वमिमां दशाम्

kumbhavinyastahastastaṃ provāca bhagavān jinaḥ / putra svakarmaṇainemāṃ prāpto 'si tvamimāṃ daśām

Sanskrit only: no published translation is held for this verse.

विवेकालोकहलदः कायो ऽयं मांसभूधरः । भारस्ते मोहसंभारः पापादुपनतः परः

vivekālokahaladaḥ kāyo 'yaṃ māṃsabhūdharaḥ / bhāraste mohasaṃbhāraḥ pāpādupanataḥ paraḥ

Sanskrit only: no published translation is held for this verse.

इत्युक्ते करुणर्द्रेण भितो भगवता गजः । स लब्धश्चासमालानलीनो निश्चलताम् ययौ

ityukte karuṇardreṇa bhito bhagavatā gajaḥ / sa labdhaścāsamālānalīno niścalatām yayau

Sanskrit only: no published translation is held for this verse.

देवदत्तस्य संकल्पे कुञ्जरे च महोत्कटे । भग्ने निर्विघ्नहर्षो ऽभूत्समुद्गताद्भुतो जनः

devadattasya saṃkalpe kuñjare ca mahotkaṭe / bhagne nirvighnaharṣo 'bhūtsamudgatādbhuto janaḥ

Sanskrit only: no published translation is held for this verse.

ततः कृत्वा गृहपतेर्गृहे भोज्यप्रतिग्रहम् । भगवान् भिक्षुभिः सार्धं काननं गन्तुमुद्ययौ

tataḥ kṛtvā gṛhapatergṛhe bhojyapratigraham / bhagavān bhikṣubhiḥ sārdhaṃ kānanaṃ gantumudyayau

Sanskrit only: no published translation is held for this verse.

अभिसृत्य गजेन्द्रो ऽपि जिनस्य चरणाब्जयोः । कृत्वा करेण संस्पर्शं वपुस्तत्याज कौञ्जरम्

abhisṛtya gajendro 'pi jinasya caraṇābjayoḥ / kṛtvā kareṇa saṃsparśaṃ vapustatyāja kauñjaram

Sanskrit only: no published translation is held for this verse.

चातुर्महाराजिकेषु देवेषु विशदद्युतिः । उपपन्नः स सहसा सुगतं द्रष्टुमाययौ

cāturmahārājikeṣu deveṣu viśadadyutiḥ / upapannaḥ sa sahasā sugataṃ draṣṭumāyayau

Sanskrit only: no published translation is held for this verse.

स्वमाश्रमपदं प्राप्तं भगवन्तमुपेत्य सः । प्रणनामार्कसंकाशं प्रदीप्तमणिकुण्डलः

svamāśramapadaṃ prāptaṃ bhagavantamupetya saḥ / praṇanāmārkasaṃkāśaṃ pradīptamaṇikuṇḍalaḥ

Sanskrit only: no published translation is held for this verse.

तस्य केयूरमुकुटप्रभापल्लवपूरिताः । शक्रचापैरिव व्याप्ता विरेजुर्घनराजयः

tasya keyūramukuṭaprabhāpallavapūritāḥ / śakracāpairiva vyāptā virejurghanarājayaḥ

Sanskrit only: no published translation is held for this verse.

विनयादुपविश्याग्रे स शास्तुः स्रस्तकल्मषः । तं दिव्यपुष्पैराकीर्य सत्त्व शुभ्रैरभाषतः

vinayādupaviśyāgre sa śāstuḥ srastakalmaṣaḥ / taṃ divyapuṣpairākīrya sattva śubhrairabhāṣataḥ

Sanskrit only: no published translation is held for this verse.

भगवन् भवतः पादपद्मसंस्पर्शनेन मे । दुर्दशादुःखसंतापः शान्तः संतोषशालिनः

bhagavan bhavataḥ pādapadmasaṃsparśanena me / durdaśāduḥkhasaṃtāpaḥ śāntaḥ saṃtoṣaśālinaḥ

Sanskrit only: no published translation is held for this verse.

शमश्लाघ्या कापि व्यसनविषदोषोष्मशमनी सुधावृष्टिर्दृष्टिर्बत भगवतः स्निग्धमधुरा । यया स्पृष्टस्पृष्टं खरतरविकारव्यतिकरं विमुत्यान्तःशान्तिं श्रयति हतमोह पशुरपि

śamaślāghyā kāpi vyasanaviṣadoṣoṣmaśamanī sudhāvṛṣṭirdṛṣṭirbata bhagavataḥ snigdhamadhurā / yayā spṛṣṭaspṛṣṭaṃ kharataravikāravyatikaraṃ vimutyāntaḥśāntiṃ śrayati hatamoha paśurapi

Sanskrit only: no published translation is held for this verse.

इति तस्य ब्रुवाणस्य भगवान् भवशान्तये । सत्यदर्शनसंशुद्धां विदधे धर्मदेशनाम्

iti tasya bruvāṇasya bhagavān bhavaśāntaye / satyadarśanasaṃśuddhāṃ vidadhe dharmadeśanām

Sanskrit only: no published translation is held for this verse.

मौलिमुक्तांशुशुभ्रेण शिरसा चरणद्वयम् । स शास्तुः प्रययौ नत्वा हसन्निव भवभ्रमम्

maulimuktāṃśuśubhreṇa śirasā caraṇadvayam / sa śāstuḥ prayayau natvā hasanniva bhavabhramam

Sanskrit only: no published translation is held for this verse.

गते तस्मिन् मुखशशिप्रकाशितनभस्तले । भगवान् भिक्षुभिः पृष्टस्तद्वृत्तान्तमभाषत

gate tasmin mukhaśaśiprakāśitanabhastale / bhagavān bhikṣubhiḥ pṛṣṭastadvṛttāntamabhāṣata

Sanskrit only: no published translation is held for this verse.

पूर्वकल्पान्तरे शास्तुः काश्यपाख्यस्य शासने । अभूत्प्रव्रजितो ऽप्येष शिक्षापदनिरादरः

pūrvakalpāntare śāstuḥ kāśyapākhyasya śāsane / abhūtpravrajito 'pyeṣa śikṣāpadanirādaraḥ

Sanskrit only: no published translation is held for this verse.

अनादरात्कुञ्जरताभोगः संघोपसेवनात् । सत्यदृष्टिबलेनान्ते संप्राप्तः शासनग्रहः

anādarātkuñjaratābhogaḥ saṃghopasevanāt / satyadṛṣṭibalenānte saṃprāptaḥ śāsanagrahaḥ

Sanskrit only: no published translation is held for this verse.

प्राग्जन्मविहितं कर्म कस्यचिन्न निवर्तते । कर्मोपदिष्टसंबन्धभक्तिभोगैः सचेतसः

prāgjanmavihitaṃ karma kasyacinna nivartate / karmopadiṣṭasaṃbandhabhaktibhogaiḥ sacetasaḥ

Sanskrit only: no published translation is held for this verse.

तस्मिन् व्यतिकरे घोरे सर्वैस्त्यक्रो ऽस्मि भिक्षिभिः । न त्वानन्देन तत्रापि श्रूयताम् पूर्वसंगतिः

tasmin vyatikare ghore sarvaistyakro 'smi bhikṣibhiḥ / na tvānandena tatrāpi śrūyatām pūrvasaṃgatiḥ

Sanskrit only: no published translation is held for this verse.

शशाङ्कशीतसरसि भ्रातरौ रुचिरौ पुरा । पूर्णमुखः शुखश्चेति राजहंसौ बभूवतुः

śaśāṅkaśītasarasi bhrātarau rucirau purā / pūrṇamukhaḥ śukhaśceti rājahaṃsau babhūvatuḥ

Sanskrit only: no published translation is held for this verse.

कदाचिद्ब्रह्मदत्तस्य वाराणस्यां महीपतेः । ब्रहममतीं पुष्करिणीं रम्यां पूर्णमुखो ययौ

kadācidbrahmadattasya vārāṇasyāṃ mahīpateḥ / brahamamatīṃ puṣkariṇīṃ ramyāṃ pūrṇamukho yayau

Sanskrit only: no published translation is held for this verse.

स तस्यां लोलकमलकिञ्जल्कपरिपिञ्जरः । विजहार सरोजिन्यां हंसानां पञ्चभिः शतैः

sa tasyāṃ lolakamalakiñjalkaparipiñjaraḥ / vijahāra sarojinyāṃ haṃsānāṃ pañcabhiḥ śataiḥ

Sanskrit only: no published translation is held for this verse.

पूर्वपुण्यानुभावेन तं रूपातिशयोज्ज्वलम् । ददर्शं कार्याण्युत्सृज्य जनो निश्चललोचनह्

pūrvapuṇyānubhāvena taṃ rūpātiśayojjvalam / dadarśaṃ kāryāṇyutsṛjya jano niścalalocanah

Sanskrit only: no published translation is held for this verse.

तं श्रुत्वा भूपतिस्तत्र स्थितं तद्दर्शनोत्सुकः । कुशलान् ग्रहणे तस्य व्यसृजज्जालजीविनः

taṃ śrutvā bhūpatistatra sthitaṃ taddarśanotsukaḥ / kuśalān grahaṇe tasya vyasṛjajjālajīvinaḥ

Sanskrit only: no published translation is held for this verse.

तस्मिन् गृहीते नलीनीलीलास्मितसितत्विषि । शतानि पञ्च हंसानां त्यक्त्वा तं प्रययुर्जवात्

tasmin gṛhīte nalīnīlīlāsmitasitatviṣi / śatāni pañca haṃsānāṃ tyaktvā taṃ prayayurjavāt

Sanskrit only: no published translation is held for this verse.

एकस्तु तस्य सौजन्यादबद्धो ऽपि सुबद्धवत् । तदर्थं व्यथितस्तस्थौ प्रेमपाशवशीकृतः

ekastu tasya saujanyādabaddho 'pi subaddhavat / tadarthaṃ vyathitastasthau premapāśavaśīkṛtaḥ

Sanskrit only: no published translation is held for this verse.

ततस्तैः प्रापितं राजा राजहंसं विलोक्य तम् । स्नेहबद्धं द्वितीयं च विस्मितस्ताववलोकयत्

tatastaiḥ prāpitaṃ rājā rājahaṃsaṃ vilokya tam / snehabaddhaṃ dvitīyaṃ ca vismitastāvavalokayat

Sanskrit only: no published translation is held for this verse.

हंसः पूर्णमुखः सो ऽहमानन्दस्तस्य चानुगः । गतास्तदद्य च त्यक्त्वा मां गंसा एव भिक्षवः

haṃsaḥ pūrṇamukhaḥ so 'hamānandastasya cānugaḥ / gatāstadadya ca tyaktvā māṃ gaṃsā eva bhikṣavaḥ

Sanskrit only: no published translation is held for this verse.

पूर्वस्मिन्नबह्वत्काले वाराणस्यां महीपतिः । तुत्तुर्नाम मनःपट्टे लिखितं यद्यशः परैः

pūrvasminnabahvatkāle vārāṇasyāṃ mahīpatiḥ / tutturnāma manaḥpaṭṭe likhitaṃ yadyaśaḥ paraiḥ

Sanskrit only: no published translation is held for this verse.

सहस्रयोधस्तस्याभूद् दाक्षिणात्यो निरत्ययः । करदण्डीति विख्यातः संग्रामाग्रेसरः प्रियः

sahasrayodhastasyābhūd dākṣiṇātyo niratyayaḥ / karadaṇḍīti vikhyātaḥ saṃgrāmāgresaraḥ priyaḥ

Sanskrit only: no published translation is held for this verse.

कदाचिद् घोरसमरे पञ्चामात्यशतानि तम् । नृपं त्यक्त्वा ययुर्भीत्या करदण्डी तु नात्यजत्

kadācid ghorasamare pañcāmātyaśatāni tam / nṛpaṃ tyaktvā yayurbhītyā karadaṇḍī tu nātyajat

Sanskrit only: no published translation is held for this verse.

अहमेव स भूपालः सचिवास्ते च भिक्षवः । करदण्डी स एवायमानन्दो न जहाति माम्

ahameva sa bhūpālaḥ sacivāste ca bhikṣavaḥ / karadaṇḍī sa evāyamānando na jahāti mām

Sanskrit only: no published translation is held for this verse.

जन्मान्तरे ऽपि सिंहो ऽहं मासं कूपे निपातितः । उपेक्षितः क्षणाद्भृत्यैः शृगालैर्ये ऽद्य भिक्षवः

janmāntare 'pi siṃho 'haṃ māsaṃ kūpe nipātitaḥ / upekṣitaḥ kṣaṇādbhṛtyaiḥ śṛgālairye 'dya bhikṣavaḥ

Sanskrit only: no published translation is held for this verse.

एकेन च नखैः खातं दीर्घं कृत्वास्मि मोक्षितः । जम्बुकेन स एवायमानन्दो ऽद्य ममानुगः

ekena ca nakhaiḥ khātaṃ dīrghaṃ kṛtvāsmi mokṣitaḥ / jambukena sa evāyamānando 'dya mamānugaḥ

Sanskrit only: no published translation is held for this verse.

कूटपाशनिबद्धस्य मृगयूथपतेः पुरा । लुब्धकागमने एव जग्मुस्तदनुगा मृगाः

kūṭapāśanibaddhasya mṛgayūthapateḥ purā / lubdhakāgamane eva jagmustadanugā mṛgāḥ

Sanskrit only: no published translation is held for this verse.

अनुरक्ता न तत्याज तं मृगी साश्रुलोचना । प्रीतिशृङ्खलया बद्धा याता निस्पन्दतामिव

anuraktā na tatyāja taṃ mṛgī sāśrulocanā / prītiśṛṅkhalayā baddhā yātā nispandatāmiva

Sanskrit only: no published translation is held for this verse.

अथ लुब्धकमायान्तं दृष्ट्वा मृगवधोद्यतम् । सावदन्मम बाणेन प्रथमं हर जीवितम्

atha lubdhakamāyāntaṃ dṛṣṭvā mṛgavadhodyatam / sāvadanmama bāṇena prathamaṃ hara jīvitam

Sanskrit only: no published translation is held for this verse.

इति स्पष्टगिरा तस्याः स्नेहेन च स विस्मितः । मुमोच लुब्धकः प्रीत्या हरिणं हरिणीसखम्

iti spaṣṭagirā tasyāḥ snehena ca sa vismitaḥ / mumoca lubdhakaḥ prītyā hariṇaṃ hariṇīsakham

Sanskrit only: no published translation is held for this verse.

मॄगयूथपतिः सो ऽहमानन्दः सा कुरङ्गिका । इत्येष प्रीतिसंबन्धः प्राग्वृत्तमनुवर्तते

mṝgayūthapatiḥ so 'hamānandaḥ sā kuraṅgikā / ityeṣa prītisaṃbandhaḥ prāgvṛttamanuvartate

Sanskrit only: no published translation is held for this verse.

श्रुत्वेति वाक्यं सुगतस्य सर्वे लज्जानिलीना इव भिक्षवस्ते । सानन्दमानन्दमुखारविन्दं प्रभाभिरामं ददृशुः स्पृहार्द्राः

śrutveti vākyaṃ sugatasya sarve lajjānilīnā iva bhikṣavaste / sānandamānandamukhāravindaṃ prabhābhirāmaṃ dadṛśuḥ spṛhārdrāḥ

Sanskrit only: no published translation is held for this verse.