Library·Ksemendra: Avadanakalpalata·37
आकिंचन्यसुखाय निःस्पृहतया वैराग्यलक्ष्मीजुषः सर्वं यान्ति विहाय कायसचिवाः सन्तः प्रशान्त्यै वनम् । तत्रापि व्रतडम्बरे परिकरारम्भाय चेत् संचयस् तत्कः कोशपरिच्छदोपकरणैर्गेहे ऽपराधः कृतः
ākiṃcanyasukhāya niḥspṛhatayā vairāgyalakṣmījuṣaḥ sarvaṃ yānti vihāya kāyasacivāḥ santaḥ praśāntyai vanam / tatrāpi vrataḍambare parikarārambhāya cet saṃcayas tatkaḥ kośaparicchadopakaraṇairgehe 'parādhaḥ kṛtaḥ
Sanskrit only: no published translation is held for this verse.
जिने जेतवनारामविहाराभिरते पुरा । शाक्यराजकुमाराणां प्रव्रज्यासंजुषां पुरः
jine jetavanārāmavihārābhirate purā / śākyarājakumārāṇāṃ pravrajyāsaṃjuṣāṃ puraḥ
Sanskrit only: no published translation is held for this verse.
चित्रचीवरसत्पात्रयोगपट्टादिसंचयम् । प्रभूततरमालोक्य भगवान् समचिन्तयत्
citracīvarasatpātrayogapaṭṭādisaṃcayam / prabhūtataramālokya bhagavān samacintayat
Sanskrit only: no published translation is held for this verse.
अहो बतैषां नाद्यापि बन्धहेतुर्निवर्तते । अभिमानमयः काये प्रियः परिकरग्रहः
aho bataiṣāṃ nādyāpi bandhaheturnivartate / abhimānamayaḥ kāye priyaḥ parikaragrahaḥ
Sanskrit only: no published translation is held for this verse.
काये कायपरिष्कारस्तस्योपकरणावली । तस्याः परिकरादानमहो नु बन्धशृन्खला
kāye kāyapariṣkārastasyopakaraṇāvalī / tasyāḥ parikarādānamaho nu bandhaśṛnkhalā
Sanskrit only: no published translation is held for this verse.
इति संचिन्त्य भगवान् नैकान्तविहितस्थितिः । कारुण्यादुपसन्नानां कुशलाय समुद्यतः
iti saṃcintya bhagavān naikāntavihitasthitiḥ / kāruṇyādupasannānāṃ kuśalāya samudyataḥ
Sanskrit only: no published translation is held for this verse.
मासत्रयमुपस्थानं कर्तव्यं येन केनचित् । अदर्शनाय भिक्षूणामकरोदिति संविदम्
māsatrayamupasthānaṃ kartavyaṃ yena kenacit / adarśanāya bhikṣūṇāmakaroditi saṃvidam
Sanskrit only: no published translation is held for this verse.
प्रवृत्ते नियमे तस्मिन् भिक्षुरारण्यकव्रतः । आययावुपसेनाख्यः कार्यार्थं तनुचीवरः
pravṛtte niyame tasmin bhikṣurāraṇyakavrataḥ / āyayāvupasenākhyaḥ kāryārthaṃ tanucīvaraḥ
Sanskrit only: no published translation is held for this verse.
प्रवारितः स संप्राप्य धन्यः सुगतदर्शनम् । कृतकृत्यः क्षस्णं स्थित्वा प्रतस्थे प्रणिपत्य तम्
pravāritaḥ sa saṃprāpya dhanyaḥ sugatadarśanam / kṛtakṛtyaḥ kṣasṇaṃ sthitvā pratasthe praṇipatya tam
Sanskrit only: no published translation is held for this verse.
व्रजन्तमेत्य पप्रच्छुर्भिक्षवः परिवार्य तम् । तवार्य दर्शनमहो दत्तं भगवता कथम्
vrajantametya papracchurbhikṣavaḥ parivārya tam / tavārya darśanamaho dattaṃ bhagavatā katham
Sanskrit only: no published translation is held for this verse.
मासत्रयं दर्शने ऽस्य नियमः शासनेन यः । स कथं भवता भग्नः संघस्योन्मार्गगामिना
māsatrayaṃ darśane 'sya niyamaḥ śāsanena yaḥ / sa kathaṃ bhavatā bhagnaḥ saṃghasyonmārgagāminā
Sanskrit only: no published translation is held for this verse.
श्रुत्वा तद्वचनं तेषामुपसेनः स्मितोत्तरम् । तानुचे न् अमया कश्चित् कृतः समयविप्लवः
śrutvā tadvacanaṃ teṣāmupasenaḥ smitottaram / tānuce n amayā kaścit kṛtaḥ samayaviplavaḥ
Sanskrit only: no published translation is held for this verse.
अहमुक्तो भगवता दर्शनावसरे स्वयम् । आरण्यकस्य मे भिक्षोर्निषेधो नास्ति दर्शने
ahamukto bhagavatā darśanāvasare svayam / āraṇyakasya me bhikṣorniṣedho nāsti darśane
Sanskrit only: no published translation is held for this verse.
परिच्छदोपकरणत्यागनिर्मुक्तबन्धनाः । अवार्यदर्शना वृक्षमूलिकाः पांशुकूलिकाः
paricchadopakaraṇatyāganirmuktabandhanāḥ / avāryadarśanā vṛkṣamūlikāḥ pāṃśukūlikāḥ
Sanskrit only: no published translation is held for this verse.
इदमद्य परं प्रातरिति ये संचये रताः । पात्रवीचरवर्गेषु तेषां नास्तीह दर्शनम्
idamadya paraṃ prātariti ye saṃcaye ratāḥ / pātravīcaravargeṣu teṣāṃ nāstīha darśanam
Sanskrit only: no published translation is held for this verse.
पाथोभिः प्रसरत्तुषारशिशिरैस्तृष्णातुरास्ते परं ते नित्यं च निधानधाम्नि विवृते ऽप्यन्यादलं दुर्गताः । तेषां चन्दनपादपादुपनतः संतापकः पावको यैरेष प्रशमव्रतोपकरणे बद्धो ऽभिमानग्रहः
pāthobhiḥ prasarattuṣāraśiśiraistṛṣṇāturāste paraṃ te nityaṃ ca nidhānadhāmni vivṛte 'pyanyādalaṃ durgatāḥ / teṣāṃ candanapādapādupanataḥ saṃtāpakaḥ pāvako yaireṣa praśamavratopakaraṇe baddho 'bhimānagrahaḥ
Sanskrit only: no published translation is held for this verse.
इत्युक्तमुपसेनेन श्रुत्वा ते शाक्यभिक्षवः । वैलक्ष्यक्षयितोत्साहाः सहसैव व्यचिन्तयन्
ityuktamupasenena śrutvā te śākyabhikṣavaḥ / vailakṣyakṣayitotsāhāḥ sahasaiva vyacintayan
Sanskrit only: no published translation is held for this verse.
एतद्भगवतादिष्टमस्मानुद्धिश्य नापरान् । विचित्रचीवरचयप्रावारा वयमेव यत्
etadbhagavatādiṣṭamasmānuddhiśya nāparān / vicitracīvaracayaprāvārā vayameva yat
Sanskrit only: no published translation is held for this verse.
विरतेच्छाः प्रियाह् शास्तुर्महेच्छा वयमप्रियाः । तस्मादिच्छां परित्यज्य भवामस्तस्य संमताः
viratecchāḥ priyāh śāsturmahecchā vayamapriyāḥ / tasmādicchāṃ parityajya bhavāmastasya saṃmatāḥ
Sanskrit only: no published translation is held for this verse.
इति संचिन्त्य ते सर्वे चारुचीवरसंचयम् । प्रावृत्याभ्यधिकं त्यक्त्वा ययुर्भगवतो ऽन्तिकम्
iti saṃcintya te sarve cārucīvarasaṃcayam / prāvṛtyābhyadhikaṃ tyaktvā yayurbhagavato 'ntikam
Sanskrit only: no published translation is held for this verse.
इच्छाविरामे भगवान् व्यधात्तेषामनुग्रहम् । ज्ञानवज्रेण सत्कायदृष्टिशैलं बिभेद यः
icchāvirāme bhagavān vyadhātteṣāmanugraham / jñānavajreṇa satkāyadṛṣṭiśailaṃ bibheda yaḥ
Sanskrit only: no published translation is held for this verse.
शाक्यराजकुमाराणां श्रोतःप्राप्तिफलस्पृशाम् । भिक्षुभिः पूर्ववृत्तान्तं पृष्टः प्राह तथागतः
śākyarājakumārāṇāṃ śrotaḥprāptiphalaspṛśām / bhikṣubhiḥ pūrvavṛttāntaṃ pṛṣṭaḥ prāha tathāgataḥ
Sanskrit only: no published translation is held for this verse.
वाराणस्यामभूत्पूर्वं ब्रह्मदत्तो महीपतिः । दानार्द्रहस्तो यद्बाहुः क्ष्मामधाद्दिग्द्विपोपमः
vārāṇasyāmabhūtpūrvaṃ brahmadatto mahīpatiḥ / dānārdrahasto yadbāhuḥ kṣmāmadhāddigdvipopamaḥ
Sanskrit only: no published translation is held for this verse.
तस्य ब्रह्मावती मुक्तालतेव गुणशालिनी । कीर्तिः सत्पुरुषस्येव विश्रुता वनिताभवत्
tasya brahmāvatī muktālateva guṇaśālinī / kīrtiḥ satpuruṣasyeva viśrutā vanitābhavat
Sanskrit only: no published translation is held for this verse.
प्रतिबिम्बोपमं पत्युः सा सुतं विमलाशया । जलक्रीडागता काले सुषुवे दिव्यलक्षणम्
pratibimbopamaṃ patyuḥ sā sutaṃ vimalāśayā / jalakrīḍāgatā kāle suṣuve divyalakṣaṇam
Sanskrit only: no published translation is held for this verse.
उदकाख्यः स बालो ऽभूत् संजातः सलिलान्तरे । वर्धमानः पितुस्तुल्यं यौवराज्यानोरथैः
udakākhyaḥ sa bālo 'bhūt saṃjātaḥ salilāntare / vardhamānaḥ pitustulyaṃ yauvarājyānorathaiḥ
Sanskrit only: no published translation is held for this verse.
शतानि पञ्चामात्यानां तस्य जन्मदिनं समम् । अवापुस्तुल्यरूपाणां पुत्राणाम् शतपञ्चकम्
śatāni pañcāmātyānāṃ tasya janmadinaṃ samam / avāpustulyarūpāṇāṃ putrāṇām śatapañcakam
Sanskrit only: no published translation is held for this verse.
निजं जातिस्मरः स्मृत्वा प्राग्वृत्तं स शिशुः शनैः । अचिन्तयत् प्राप्तकालं हितं सुकृतमात्मनः
nijaṃ jātismaraḥ smṛtvā prāgvṛttaṃ sa śiśuḥ śanaiḥ / acintayat prāptakālaṃ hitaṃ sukṛtamātmanaḥ
Sanskrit only: no published translation is held for this verse.
षष्टिवर्षाणि कृत्वा तु यौवराज्यमहं पुरा । अभवं कृच्छ्रसंतप्तश्चिरं नरकसंकटे
ṣaṣṭivarṣāṇi kṛtvā tu yauvarājyamahaṃ purā / abhavaṃ kṛcchrasaṃtaptaściraṃ narakasaṃkaṭe
Sanskrit only: no published translation is held for this verse.
जन्मन्यस्मिन्नपि पुनर्यौवराज्यमुपस्थितम् । सर्वथा प्रार्थ्यमानो ऽपि न करिष्यामि पातकम्
janmanyasminnapi punaryauvarājyamupasthitam / sarvathā prārthyamāno 'pi na kariṣyāmi pātakam
Sanskrit only: no published translation is held for this verse.
इति संचिन्त्य स चिरं राजभोगपराङ्मुखः । पितुरुद्वेगजननीमग्रहीत् पङ्गुमूकताम्
iti saṃcintya sa ciraṃ rājabhogaparāṅmukhaḥ / piturudvegajananīmagrahīt paṅgumūkatām
Sanskrit only: no published translation is held for this verse.
सर्वलक्षणयुक्तो ऽपि राजवृत्तेरभाजनम् । स मूकपङ्गुर्नामाभूद् बन्धूनां दुःखवर्धनः
sarvalakṣaṇayukto 'pi rājavṛtterabhājanam / sa mūkapaṅgurnāmābhūd bandhūnāṃ duḥkhavardhanaḥ
Sanskrit only: no published translation is held for this verse.
प्राप्तेषु मन्त्रिपुत्रेषु शस्त्रशास्त्रबलोदयम् । राजपुत्रः प्रवृद्धो ऽपि नोदतिष्ठन्न चावदत्
prāpteṣu mantriputreṣu śastraśāstrabalodayam / rājaputraḥ pravṛddho 'pi nodatiṣṭhanna cāvadat
Sanskrit only: no published translation is held for this verse.
पृष्टस्ततः क्षितीशेन वैद्यास्तद्दोषभेषजम् । अवदन् वैकल्यं राजन् राजसूनोर्न दृश्यते
pṛṣṭastataḥ kṣitīśena vaidyāstaddoṣabheṣajam / avadan vaikalyaṃ rājan rājasūnorna dṛśyate
Sanskrit only: no published translation is held for this verse.
अभ्यासाद्यदि जातो ऽस्य दोषो ऽपि सुखसेविनः । तदेष भयसंवेगादुत्तिष्ठति च वक्ति च
abhyāsādyadi jāto 'sya doṣo 'pi sukhasevinaḥ / tadeṣa bhayasaṃvegāduttiṣṭhati ca vakti ca
Sanskrit only: no published translation is held for this verse.
इति वैद्यैरभिहितं तथेत्युक्त्वा क्षितीश्वरः । मिथ्यैव वध्यवसुधां भयाय व्यसृजत्सुतम्
iti vaidyairabhihitaṃ tathetyuktvā kṣitīśvaraḥ / mithyaiva vadhyavasudhāṃ bhayāya vyasṛjatsutam
Sanskrit only: no published translation is held for this verse.
स भर्त्स्यमानह् पुरुषैस्तमुवाच रथस्थितम् । अपि कश्चिद्वसत्यस्यां वाराणस्यां न वा जनः
sa bhartsyamānah puruṣaistamuvāca rathasthitam / api kaścidvasatyasyāṃ vārāṇasyāṃ na vā janaḥ
Sanskrit only: no published translation is held for this verse.
इति तद्वचनं श्रुत्वा तैर्नीतः स नृपान्तिकम् । तत्र पित्रार्थ्यमानो ऽपि मूक एवाभवत् पुनः
iti tadvacanaṃ śrutvā tairnītaḥ sa nṛpāntikam / tatra pitrārthyamāno 'pi mūka evābhavat punaḥ
Sanskrit only: no published translation is held for this verse.
पुनर्वध्यभुवं नीतः शवं दृष्ट्वा जगाद् सः । अस्त्येष जीवति शवः किं वा सर्वात्मना मृतः
punarvadhyabhuvaṃ nītaḥ śavaṃ dṛṣṭvā jagād saḥ / astyeṣa jīvati śavaḥ kiṃ vā sarvātmanā mṛtaḥ
Sanskrit only: no published translation is held for this verse.
श्रुत्वैतत् तैः पितुः पार्श्वे न्यस्तो मौनं व्यधात्पुनः । पुनर्वधभयाच्चैव नीतः प्रोवाच तान् पथि
śrutvaitat taiḥ pituḥ pārśve nyasto maunaṃ vyadhātpunaḥ / punarvadhabhayāccaiva nītaḥ provāca tān pathi
Sanskrit only: no published translation is held for this verse.
राशिर्य एष धान्यस्य स हि भुक्तो ऽनुभुज्यते । इत्युक्तवाक्यो ऽपि पुनर्नोचे किंचित् पितु परः
rāśirya eṣa dhānyasya sa hi bhukto 'nubhujyate / ityuktavākyo 'pi punarnoce kiṃcit pitu paraḥ
Sanskrit only: no published translation is held for this verse.
ततः ख्यातप्रतिक्षेपे तस्यादिष्टे महीभुजा । सो ऽवदद्वरदानेन वच्मि प्रद्भ्यां व्रजामि च
tataḥ khyātapratikṣepe tasyādiṣṭe mahībhujā / so 'vadadvaradānena vacmi pradbhyāṃ vrajāmi ca
Sanskrit only: no published translation is held for this verse.
अथास्य राज्ञा हृष्टेन वरदाने प्रतिश्रुते । स पद्भ्यां स्वयमभ्येत्य स्पष्टं पितरमब्रवीत्
athāsya rājñā hṛṣṭena varadāne pratiśrute / sa padbhyāṃ svayamabhyetya spaṣṭaṃ pitaramabravīt
Sanskrit only: no published translation is held for this verse.
नाहं पङ्गुर्न मूको ऽहं नैव चाहं जडाशयः । किंतु जन्मान्तरक्लेशं स्मृत्वा वैह्वल्यमाश्रितः
nāhaṃ paṅgurna mūko 'haṃ naiva cāhaṃ jaḍāśayaḥ / kiṃtu janmāntarakleśaṃ smṛtvā vaihvalyamāśritaḥ
Sanskrit only: no published translation is held for this verse.
यौवराज्यसुखं भुक्त्वा षष्टिवर्षाण्यहं पुरा । षष्टिवर्षसहस्राणि न्यवसं नरकोदरे
yauvarājyasukhaṃ bhuktvā ṣaṣṭivarṣāṇyahaṃ purā / ṣaṣṭivarṣasahasrāṇi nyavasaṃ narakodare
Sanskrit only: no published translation is held for this verse.
राजभीत्या मया तस्मात् कृतेयं मूकपङ्गुता । प्रव्रज्यया ब्रह्मचर्यं चराम्येष वरो मम
rājabhītyā mayā tasmāt kṛteyaṃ mūkapaṅgutā / pravrajyayā brahmacaryaṃ carāmyeṣa varo mama
Sanskrit only: no published translation is held for this verse.
इति तेनोक्तमाकर्ण्य तमुवाच महीपतिः । अमूक इत्याप्तधृतिर्विरक्त इति दुःखितः
iti tenoktamākarṇya tamuvāca mahīpatiḥ / amūka ityāptadhṛtirvirakta iti duḥkhitaḥ
Sanskrit only: no published translation is held for this verse.
धर्ममूलमिदं राज्यं पुत्र न त्यक्तुमर्हसि । यज्ञदानप्रजात्राणैः पुण्यपूर्णा नॄपश्रियः
dharmamūlamidaṃ rājyaṃ putra na tyaktumarhasi / yajñadānaprajātrāṇaiḥ puṇyapūrṇā nṝpaśriyaḥ
Sanskrit only: no published translation is held for this verse.
एकपुत्रस्त्वया पुत्र परित्यागरसादहम् । निद्रादरिद्रताम् नीतः शोकशय्यासमाश्रयः
ekaputrastvayā putra parityāgarasādaham / nidrādaridratām nītaḥ śokaśayyāsamāśrayaḥ
Sanskrit only: no published translation is held for this verse.
संपूर्णचन्द्ररुचिरां व्यक्तमौक्तिकहासिनीम् । कथं संपदमुत्सृज्य प्रव्रज्याभिमता तव
saṃpūrṇacandrarucirāṃ vyaktamauktikahāsinīm / kathaṃ saṃpadamutsṛjya pravrajyābhimatā tava
Sanskrit only: no published translation is held for this verse.
कथं शय्याः परित्यज्य प्राज्यराज्यसुखोचिताः । वनान्तवासव्यसनी सेवसे पांशुलाः स्थलीः
kathaṃ śayyāḥ parityajya prājyarājyasukhocitāḥ / vanāntavāsavyasanī sevase pāṃśulāḥ sthalīḥ
Sanskrit only: no published translation is held for this verse.
कान्तालीलामुकुरमणिमन्मन्दिरीं राजधानीम् एतां त्यक्त्वाननु वनभुवः संपतद्व्याघ्रघोराः । सर्वप्रीत्यै जरदजगराश्वासविप्लुष्टपत्राः क्लिष्टच्छायाह् प्रविरललतास्ताः कथं ते भवन्ति
kāntālīlāmukuramaṇimanmandirīṃ rājadhānīm etāṃ tyaktvānanu vanabhuvaḥ saṃpatadvyāghraghorāḥ / sarvaprītyai jaradajagarāśvāsavipluṣṭapatrāḥ kliṣṭacchāyāh praviralalatāstāḥ kathaṃ te bhavanti
Sanskrit only: no published translation is held for this verse.
पितुः श्रुत्वेति वचनं राजपुत्रस्तमब्रवीत् । दन्तकान्ताधररुचिं वैराग्यं ग्राहयन्निव
pituḥ śrutveti vacanaṃ rājaputrastamabravīt / dantakāntādhararuciṃ vairāgyaṃ grāhayanniva
Sanskrit only: no published translation is held for this verse.
शीतला निर्मलजलाह् संतोषशशिशीतलाः । वने वैराग्यसुभगा भुवः कस्य न वल्लभाः
śītalā nirmalajalāh saṃtoṣaśaśiśītalāḥ / vane vairāgyasubhagā bhuvaḥ kasya na vallabhāḥ
Sanskrit only: no published translation is held for this verse.
परदारा इव क्षिप्रसुखावर्जितदुर्जनाः । नरकप्रत्ययायामे सापाया न प्रियाः प्रियाः
paradārā iva kṣiprasukhāvarjitadurjanāḥ / narakapratyayāyāme sāpāyā na priyāḥ priyāḥ
Sanskrit only: no published translation is held for this verse.
ध्यानं मन्त्रः परिज्ञानमिन्द्रियाणां चनिर्जयः । राज्ञां हिंसाप्रयत्नेन योगो ऽयं नरकप्रदः
dhyānaṃ mantraḥ parijñānamindriyāṇāṃ canirjayaḥ / rājñāṃ hiṃsāprayatnena yogo 'yaṃ narakapradaḥ
Sanskrit only: no published translation is held for this verse.
हसन्त्यः संसारं कुसुमकलिलाः काननभुवः स्वभावेन प्रीतिं विदधति बुधानां शममयीम् । दृढं चिन्ताश्राण्ता व्यजनपवनोच्छ्वासबहुला विभूतिर्भूपानां शिरःसक्तामनित्यताम्
hasantyaḥ saṃsāraṃ kusumakalilāḥ kānanabhuvaḥ svabhāvena prītiṃ vidadhati budhānāṃ śamamayīm / dṛḍhaṃ cintāśrāṇtā vyajanapavanocchvāsabahulā vibhūtirbhūpānāṃ śiraḥsaktāmanityatām
Sanskrit only: no published translation is held for this verse.
अनुजानीहि मां तात व्रजाम्येष तपोवनम् । जानीहि सर्वभावानां शिरःसक्तामनित्यताम्
anujānīhi māṃ tāta vrajāmyeṣa tapovanam / jānīhi sarvabhāvānāṃ śiraḥsaktāmanityatām
Sanskrit only: no published translation is held for this verse.
इति पुत्रवचः श्रुत्वा तत्तथेति विचिन्तयन् । उवाचोपचिताश्चर्यस्तं मनीषी महीपतिः
iti putravacaḥ śrutvā tattatheti vicintayan / uvācopacitāścaryastaṃ manīṣī mahīpatiḥ
Sanskrit only: no published translation is held for this verse.
विवेकविमलं पुत्र त्वमिच्छासि स चेद्वनम् । हित्वामे संशयं तावत् पश्चाद्युक्तिं करिष्यसि
vivekavimalaṃ putra tvamicchāsi sa cedvanam / hitvāme saṃśayaṃ tāvat paścādyuktiṃ kariṣyasi
Sanskrit only: no published translation is held for this verse.
व्रजता बध्यवशुधां तिर्यगुक्तं त्वया वचः । प्रचुरं तदभिप्रायं वक्तुमर्हसि तत्त्वतः
vrajatā badhyavaśudhāṃ tiryaguktaṃ tvayā vacaḥ / pracuraṃ tadabhiprāyaṃ vaktumarhasi tattvataḥ
Sanskrit only: no published translation is held for this verse.
इति क्षितिभुजा पृष्टः सो ऽब्रवीत्तन्मयोदितम् । वसत्यत्र न कश्चित् त्वा मद्वधाद्यो निवर्तयेत्
iti kṣitibhujā pṛṣṭaḥ so 'bravīttanmayoditam / vasatyatra na kaścit tvā madvadhādyo nivartayet
Sanskrit only: no published translation is held for this verse.
सुकृती जीवति शवः स पापस्तु मृतो ऽमृतः । प्राक् पुण्यं भक्ष्यते मूलात् सधनैर्धान्यराशिवत्
sukṛtī jīvati śavaḥ sa pāpastu mṛto 'mṛtaḥ / prāk puṇyaṃ bhakṣyate mūlāt sadhanairdhānyarāśivat
Sanskrit only: no published translation is held for this verse.
इत्याशयान्मया तात तदुक्तं वचनं प्रियम् । * * * * * * * *
ityāśayānmayā tāta taduktaṃ vacanaṃ priyam / * * * * * * * *
Sanskrit only: no published translation is held for this verse.
इति श्रुत्वा क्षितिपतिस्तं परिष्वज्य सादरः । उचितं क्रियताम् पुत्र कुशलायेत्यभाषतः
iti śrutvā kṣitipatistaṃ pariṣvajya sādaraḥ / ucitaṃ kriyatām putra kuśalāyetyabhāṣataḥ
Sanskrit only: no published translation is held for this verse.
ततः स पित्रानुज्ञातः साश्रुनेत्रेण काननम् । प्रययौ मन्त्रिपुत्राणां सहितः पञ्चभिः शतैः
tataḥ sa pitrānujñātaḥ sāśrunetreṇa kānanam / prayayau mantriputrāṇāṃ sahitaḥ pañcabhiḥ śataiḥ
Sanskrit only: no published translation is held for this verse.
महर्षेरन्तिके तत्र प्रव्रज्यां प्राप्य सानुगह् । तेषां कालेन सो ऽपश्यत् कुण्डवल्कलसंचयम्
maharṣerantike tatra pravrajyāṃ prāpya sānugah / teṣāṃ kālena so 'paśyat kuṇḍavalkalasaṃcayam
Sanskrit only: no published translation is held for this verse.
ततःस संचयद्वेषी तददर्शनसंविदा । एकाकी विजने तस्थौ कंचित् कालंमहामतिः
tataḥsa saṃcayadveṣī tadadarśanasaṃvidā / ekākī vijane tasthau kaṃcit kālaṃmahāmatiḥ
Sanskrit only: no published translation is held for this verse.
दर्शनाभाषणे बद्धनियमो ऽपि यदृच्छया । प्राप्तं स्वागतमित्युक्त्वा पप्रच्छ कुशलं मृगम्
darśanābhāṣaṇe baddhaniyamo 'pi yadṛcchayā / prāptaṃ svāgatamityuktvā papraccha kuśalaṃ mṛgam
Sanskrit only: no published translation is held for this verse.
पुनश्च पूजितं दृष्ट्वा मुनिं तेन मृगव्रतम् । अमात्यतनयाः सर्वे विलक्षाः समचिन्तयन्
punaśca pūjitaṃ dṛṣṭvā muniṃ tena mṛgavratam / amātyatanayāḥ sarve vilakṣāḥ samacintayan
Sanskrit only: no published translation is held for this verse.
मृगो मृगव्रतश्चायं पूजितौ निष्परिग्रहौ । एतावनजिनौ दण्डसंब्ःआराडम्बरोज्झितौ
mṛgo mṛgavrataścāyaṃ pūjitau niṣparigrahau / etāvanajinau daṇḍasaṃbḥārāḍambarojjhitau
Sanskrit only: no published translation is held for this verse.
एतदर्थमनेनास्मद्दर्शने नियमः कृतः । व्रतोपकरणव्यग्रान्नूनमस्यापि वारयेत्
etadarthamanenāsmaddarśane niyamaḥ kṛtaḥ / vratopakaraṇavyagrānnūnamasyāpi vārayet
Sanskrit only: no published translation is held for this verse.
इति संचिन्त्य सर्वं ते व्रतोपचारसंचयम् । नद्यां प्रक्षिप्य वारायां ययुः शुद्धास्तदन्तिकम्
iti saṃcintya sarvaṃ te vratopacārasaṃcayam / nadyāṃ prakṣipya vārāyāṃ yayuḥ śuddhāstadantikam
Sanskrit only: no published translation is held for this verse.
त्यक्त्वा गृहभूवं तेषामाशयानुशयोचिताम् । स धातुं प्रकृतिं ज्ञात्वा विदधे धर्मदेशनाम्
tyaktvā gṛhabhūvaṃ teṣāmāśayānuśayocitām / sa dhātuṃ prakṛtiṃ jñātvā vidadhe dharmadeśanām
Sanskrit only: no published translation is held for this verse.
राजपुत्रः स एवाहं शाक्यास्ते मन्त्रिसूनवः । पुनस्त्यागोपदेशो ऽयमद्याप्येषां मया कृतः
rājaputraḥ sa evāhaṃ śākyāste mantrisūnavaḥ / punastyāgopadeśo 'yamadyāpyeṣāṃ mayā kṛtaḥ
Sanskrit only: no published translation is held for this verse.
इति शाक्यकुमारवृत्तमेतत् कथितं भिक्षुगणः स्वयं जिनेन । अवधार्य परामपूजयत् तां करुणामाश्रितवत्सलस्य तस्य
iti śākyakumāravṛttametat kathitaṃ bhikṣugaṇaḥ svayaṃ jinena / avadhārya parāmapūjayat tāṃ karuṇāmāśritavatsalasya tasya
Sanskrit only: no published translation is held for this verse.