Ksemendra: Avadanakalpalata 38

ते जयन्ति धृतिशीलिनः परं निर्विकाररुचिसूचिताद्भुताः । शेषवत् पृथुलभारनिर्व्यथाः ये वहन्ति सुकृतक्षमाः क्षमाम्

te jayanti dhṛtiśīlinaḥ paraṃ nirvikārarucisūcitādbhutāḥ / śeṣavat pṛthulabhāranirvyathāḥ ye vahanti sukṛtakṣamāḥ kṣamām

Sanskrit only: no published translation is held for this verse.

पुरा पुरा पुण्यविपर्ययेण रिपुः प्रजानां जनितप्रकम्पः । उदुन्बनामा निबिडोपतापैर्यक्ष क्षयायैव कृतक्षणो ऽभूत्

purā purā puṇyaviparyayeṇa ripuḥ prajānāṃ janitaprakampaḥ / udunbanāmā nibiḍopatāpairyakṣa kṣayāyaiva kṛtakṣaṇo 'bhūt

Sanskrit only: no published translation is held for this verse.

अकालकालं तमनाथबन्धुर्लोकानुकम्पी भगवान् प्रसह्य । शिक्षोपदेशं शरणं प्रपन्नं शमाभिधायी विनये न्ययुङ्क्त

akālakālaṃ tamanāthabandhurlokānukampī bhagavān prasahya / śikṣopadeśaṃ śaraṇaṃ prapannaṃ śamābhidhāyī vinaye nyayuṅkta

Sanskrit only: no published translation is held for this verse.

तस्मिन् प्रशान्ते भुवनोपतापे द्रष्टुं प्रहृष्टः सुगतं समेत्य । संचारिणं नाकपतिः प्रणम्य तत्कालजातस्मितमित्युवाच

tasmin praśānte bhuvanopatāpe draṣṭuṃ prahṛṣṭaḥ sugataṃ sametya / saṃcāriṇaṃ nākapatiḥ praṇamya tatkālajātasmitamityuvāca

Sanskrit only: no published translation is held for this verse.

कस्मादकस्मात् स्मितचन्द्रलेखा मुखाम्बुजे भाति तवाद्भुतेयम् । अकारणं सत्त्वसुधासमुद्रा न लोकसामान्यतयाम् हसन्ति

kasmādakasmāt smitacandralekhā mukhāmbuje bhāti tavādbhuteyam / akāraṇaṃ sattvasudhāsamudrā na lokasāmānyatayām hasanti

Sanskrit only: no published translation is held for this verse.

श्रुत्वेति वाक्यं त्रिदशेश्वरस्य तत् तं सर्वदर्शी भगवान् बभाषे । अस्मिन् प्रदेशे निजपूर्ववृत्तं स्मृत्वा स्म्तं जातमिदं ममेन्द्रं

śrutveti vākyaṃ tridaśeśvarasya tat taṃ sarvadarśī bhagavān babhāṣe / asmin pradeśe nijapūrvavṛttaṃ smṛtvā smtaṃ jātamidaṃ mamendraṃ

Sanskrit only: no published translation is held for this verse.

पुरा मुनिः क्षानिरतिर्वने ऽस्मिन्नुवास निर्वासितरोषदोषः । यो ऽभूद्भुवो रागरजःस्वभावे विद्वेषवानिन्दुरिवारविन्दे

purā muniḥ kṣāniratirvane 'sminnuvāsa nirvāsitaroṣadoṣaḥ / yo 'bhūdbhuvo rāgarajaḥsvabhāve vidveṣavānindurivāravinde

Sanskrit only: no published translation is held for this verse.

अथोत्तराशाधिपतिर्वसन्ते वनान्तरालोकनकौतुकेन । सान्तःपुरः केलिसुखाय कामी तदाश्रमोपान्तमहीमवाप

athottarāśādhipatirvasante vanāntarālokanakautukena / sāntaḥpuraḥ kelisukhāya kāmī tadāśramopāntamahīmavāpa

Sanskrit only: no published translation is held for this verse.

रागी कलिर्नाम स भूमिपालः पादप्रहारैर्वदनासवैश्च । लेभे विलासेषु नितम्बिनीनामशोकशोभां बकुलश्रियं च

rāgī kalirnāma sa bhūmipālaḥ pādaprahārairvadanāsavaiśca / lebhe vilāseṣu nitambinīnāmaśokaśobhāṃ bakulaśriyaṃ ca

Sanskrit only: no published translation is held for this verse.

दिशस्तपोलोपपृथुप्रकोपभ्रूभङ्गवृन्दैरिव तापसानाम् । तत्र भ्रमद्भिर्भ्रमरैर्बभूवुः कामाग्निधूमैरिव सान्धकाराह्

diśastapolopapṛthuprakopabhrūbhaṅgavṛndairiva tāpasānām / tatra bhramadbhirbhramarairbabhūvuḥ kāmāgnidhūmairiva sāndhakārāh

Sanskrit only: no published translation is held for this verse.

लीलाविलोलाः पवनाकुलालीस्तनावनम्राः स्तबका लतानाम् । रक्ताधराः पाटलपल्लवानाम् प्रापुर्विलासं ललना लतानाम्

līlāvilolāḥ pavanākulālīstanāvanamrāḥ stabakā latānām / raktādharāḥ pāṭalapallavānām prāpurvilāsaṃ lalanā latānām

Sanskrit only: no published translation is held for this verse.

राजाङ्गनाः कौतुकविभ्रमेण वने चरन्त्यस्तमृषिं विलोक्य । अचञ्चलध्यानसमाधिसक्तं विमुक्तरागं परिवार्य तस्थुः

rājāṅganāḥ kautukavibhrameṇa vane carantyastamṛṣiṃ vilokya / acañcaladhyānasamādhisaktaṃ vimuktarāgaṃ parivārya tasthuḥ

Sanskrit only: no published translation is held for this verse.

तद्देशमभ्येत्य नरेश्वरो ऽथ दृष्ट्वा वभूभिः परिवारितं तम् । ईर्ष्याप्रकोपानलदुर्निरीक्ष्यः चिच्छेद तस्याशु स पाणिपादम्

taddeśamabhyetya nareśvaro 'tha dṛṣṭvā vabhūbhiḥ parivāritaṃ tam / īrṣyāprakopānaladurnirīkṣyaḥ ciccheda tasyāśu sa pāṇipādam

Sanskrit only: no published translation is held for this verse.

छिन्नाङ्गवर्गो ऽपि स निर्विकारश्चुकोप भूपाय न नाम धीरः । न्यवारयत् क्रूरतरं च तस्मै गन्धर्वयक्षोरगदेवसंघम्

chinnāṅgavargo 'pi sa nirvikāraścukopa bhūpāya na nāma dhīraḥ / nyavārayat krūrataraṃ ca tasmai gandharvayakṣoragadevasaṃgham

Sanskrit only: no published translation is held for this verse.

ततः प्रयाते नृपतौ पुरं स्वां समेत्य सर्वे मुनयो वनेभ्यः । तं तत्र कृतावयवं विलोक्य क्षान्ता अपि क्रोधधुता बभूवुः

tataḥ prayāte nṛpatau puraṃ svāṃ sametya sarve munayo vanebhyaḥ / taṃ tatra kṛtāvayavaṃ vilokya kṣāntā api krodhadhutā babhūvuḥ

Sanskrit only: no published translation is held for this verse.

शापप्रदानाभिमुखान् निवार्य क्षन्तव्यमित्येव स तानुवाच । क्षामासमालिङ्गितमानसानाम् कोपक्रियाभिः क्रियते न सङ्गः

śāpapradānābhimukhān nivārya kṣantavyamityeva sa tānuvāca / kṣāmāsamāliṅgitamānasānām kopakriyābhiḥ kriyate na saṅgaḥ

Sanskrit only: no published translation is held for this verse.

विकारवेगो ऽपि न पाणिपादच्छेदे ममाभूद् यदि वीतमन्योः । सत्येन तेनाक्षतदेह एव स्यामित्यवादीत् स पुनः प्रसादी

vikāravego 'pi na pāṇipādacchede mamābhūd yadi vītamanyoḥ / satyena tenākṣatadeha eva syāmityavādīt sa punaḥ prasādī

Sanskrit only: no published translation is held for this verse.

ततः क्षणात् संगतपाणिपादं रूढव्रणं प्रेत्य सदोदयेन । अपूजयत् क्षान्तिगुणं स्तवेन तं देवता सत्त्वसितैश्च पुष्पैः

tataḥ kṣaṇāt saṃgatapāṇipādaṃ rūḍhavraṇaṃ pretya sadodayena / apūjayat kṣāntiguṇaṃ stavena taṃ devatā sattvasitaiśca puṣpaiḥ

Sanskrit only: no published translation is held for this verse.

राजापि तत्किल्बिषकालकूटविस्फोटसंघट्टविनष्टचेष्टः । पूरोत्कटावर्तविवर्तमानः संवर्तपाकं नरकं जगाम

rājāpi tatkilbiṣakālakūṭavisphoṭasaṃghaṭṭavinaṣṭaceṣṭaḥ / pūrotkaṭāvartavivartamānaḥ saṃvartapākaṃ narakaṃ jagāma

Sanskrit only: no published translation is held for this verse.

यो ऽभूत्पुरा क्षान्तिरतिर्महर्षिः सो ऽहं कलिर्यश्च स देवदत्तः । अतीतवृत्तस्मरणेन शक्र नाकारणं जातमिदं स्मितं मे

yo 'bhūtpurā kṣāntiratirmaharṣiḥ so 'haṃ kaliryaśca sa devadattaḥ / atītavṛttasmaraṇena śakra nākāraṇaṃ jātamidaṃ smitaṃ me

Sanskrit only: no published translation is held for this verse.

इति भगवतः श्रुत्वा वाक्यं स विस्मयमानसः प्रमदविकचव्यक्तोत्साहा वहन्नयनावलीः । तरणिकिरणस्पर्शेनेव स्फुटः कमलाकरस् त्रिदशवसतिं प्रीतः प्रायात् पतिस्त्रिदिवैकसाम्

iti bhagavataḥ śrutvā vākyaṃ sa vismayamānasaḥ pramadavikacavyaktotsāhā vahannayanāvalīḥ / taraṇikiraṇasparśeneva sphuṭaḥ kamalākaras tridaśavasatiṃ prītaḥ prāyāt patistridivaikasām

Sanskrit only: no published translation is held for this verse.