Ksemendra: Avadanakalpalata 5

दुग्धाब्धिर्विबुधार्थनातिविधुरः क्षुब्धश्चकम्पे चिरं कम्पन्ते च निसर्गतः किल फलोत्सर्गेषु कल्पद्रुमाः । एकः को ऽपि स जायते तनुशतैरभ्यस्तदानस्थितिर् निष्कम्पः पुललोत्करं वहति यः कायं प्रदानेष्वति

dugdhābdhirvibudhārthanātividhuraḥ kṣubdhaścakampe ciraṃ kampante ca nisargataḥ kila phalotsargeṣu kalpadrumāḥ / ekaḥ ko 'pi sa jāyate tanuśatairabhyastadānasthitir niṣkampaḥ pulalotkaraṃ vahati yaḥ kāyaṃ pradāneṣvati

Sanskrit only: no published translation is held for this verse.

अस्ति कौलासहासिन्यामुत्तरस्यामनुत्तरा । दिशि भद्रशिला नाम भुवनाभरणं पुरी

asti kaulāsahāsinyāmuttarasyāmanuttarā / diśi bhadraśilā nāma bhuvanābharaṇaṃ purī

Sanskrit only: no published translation is held for this verse.

यस्यां सितयशःपुष्पाः सफलाः सर्वसंपदः । दानोद्यानलताः प्रीत्यै बभूवुः पुरवासिनाम्

yasyāṃ sitayaśaḥpuṣpāḥ saphalāḥ sarvasaṃpadaḥ / dānodyānalatāḥ prītyai babhūvuḥ puravāsinām

Sanskrit only: no published translation is held for this verse.

यत्र त्रिपुरजिन्नेत्रशिखित्रस्तो मनोभवः । अबलाभिश्चलक्रीडभ्रूभङ्गैरेव रक्ष्यते

yatra tripurajinnetraśikhitrasto manobhavaḥ / abalābhiścalakrīḍabhrūbhaṅgaireva rakṣyate

Sanskrit only: no published translation is held for this verse.

मुक्ताजालोज्ज्वला यत्र् अभाति हेमगृहावली । मेरोः शिखरमालेव विस्फुतत्स्फीततारका

muktājālojjvalā yatr abhāti hemagṛhāvalī / meroḥ śikharamāleva visphutatsphītatārakā

Sanskrit only: no published translation is held for this verse.

तस्यां चन्द्रप्रभः श्रीमानभूद् भूमिभृतां वरः । कौलास इव यः कान्त्या चकार दिनचन्द्रिकाम्

tasyāṃ candraprabhaḥ śrīmānabhūd bhūmibhṛtāṃ varaḥ / kaulāsa iva yaḥ kāntyā cakāra dinacandrikām

Sanskrit only: no published translation is held for this verse.

यस्य देहप्रभापूरैः पूर्णिन्दुद्युतिहारिभिः । निशासु दीपकाभासु नाभूतु स्नेहगुणक्षयः

yasya dehaprabhāpūraiḥ pūrṇindudyutihāribhiḥ / niśāsu dīpakābhāsu nābhūtu snehaguṇakṣayaḥ

Sanskrit only: no published translation is held for this verse.

स्मरज्वरं भजन्ते ऽस्य दर्शनेनैव तारकाः । इति च्छत्रछलादस्य छादितं खमिवेन्दुना

smarajvaraṃ bhajante 'sya darśanenaiva tārakāḥ / iti cchatrachalādasya chāditaṃ khamivendunā

Sanskrit only: no published translation is held for this verse.

प्रदिशत्येष सततं श्रियं सत्कोशसंश्रयाम् । इति तद्दर्शनेनैव संकोचं प्राप पद्मिनी

pradiśatyeṣa satataṃ śriyaṃ satkośasaṃśrayām / iti taddarśanenaiva saṃkocaṃ prāpa padminī

Sanskrit only: no published translation is held for this verse.

सेनाहंकारमुत्सृज्य त्यागशुभ्रश्रिया श्रियः । निर्दिष्टाश्छत्रमुकुटप्रकटाः पुरव्षिनाम्

senāhaṃkāramutsṛjya tyāgaśubhraśriyā śriyaḥ / nirdiṣṭāśchatramukuṭaprakaṭāḥ puravṣinām

Sanskrit only: no published translation is held for this verse.

शुशुभे विभवस्तस्य पुण्यालंकारणोन्नतेः । आरोहति पराम् कोटीं नम्रस्य धनुषो गुणः

śuśubhe vibhavastasya puṇyālaṃkāraṇonnateḥ / ārohati parām koṭīṃ namrasya dhanuṣo guṇaḥ

Sanskrit only: no published translation is held for this verse.

चत्वारिंशत्सहस्राणि वत्सराणां शताणि च । बभूव देहिनामायुस्तस्य काले कलिद्विषः

catvāriṃśatsahasrāṇi vatsarāṇāṃ śatāṇi ca / babhūva dehināmāyustasya kāle kalidviṣaḥ

Sanskrit only: no published translation is held for this verse.

तस्य षष्टिसहस्राणि पुरीणां पूर्णसंपदाम् । बभूवुर्लोकपालस्य लोकपालाध्काश्रियः

tasya ṣaṣṭisahasrāṇi purīṇāṃ pūrṇasaṃpadām / babhūvurlokapālasya lokapālādhkāśriyaḥ

Sanskrit only: no published translation is held for this verse.

यज्वानः कीर्तितिलकास्तस्य पुण्यविभूषणाः । यज्ञधूमलताभङ्गैर्बभुर्लोलालकाः श्रियः

yajvānaḥ kīrtitilakāstasya puṇyavibhūṣaṇāḥ / yajñadhūmalatābhaṅgairbabhurlolālakāḥ śriyaḥ

Sanskrit only: no published translation is held for this verse.

तस्य संपत्कुमुदिनीविकासेन सदोदितः । अभून्मन्त्री महाचन्द्रश्चद्रलोक इवोज्ज्वलः

tasya saṃpatkumudinīvikāsena sadoditaḥ / abhūnmantrī mahācandraścadraloka ivojjvalaḥ

Sanskrit only: no published translation is held for this verse.

येन निश्चललक्ष्येण प्रभोः प्रज्ञापताकया । राज्याब्धिकर्णधारेण पारमुत्तरितं यशः

yena niścalalakṣyeṇa prabhoḥ prajñāpatākayā / rājyābdhikarṇadhāreṇa pāramuttaritaṃ yaśaḥ

Sanskrit only: no published translation is held for this verse.

महीधराभिधश्चासौ बभूवामात्यकुञ्जरः । भूमिभारसहस्तस्य दिङ्गाग इव पञ्चमह्

mahīdharābhidhaścāsau babhūvāmātyakuñjaraḥ / bhūmibhārasahastasya diṅgāga iva pañcamah

Sanskrit only: no published translation is held for this verse.

मन्त्रणाभिन्नमन्त्रस्य यस्य नीतिबृहस्पतेः । त्याजिताः प्रतिसामन्ताः शौर्यं विषमिवाहयः

mantraṇābhinnamantrasya yasya nītibṛhaspateḥ / tyājitāḥ pratisāmantāḥ śauryaṃ viṣamivāhayaḥ

Sanskrit only: no published translation is held for this verse.

तेनामात्येन स नृपः स च राज्ञा विभूषितः । गुणः सत्पुरुषेणेव गुणेनेव च सज्जनः

tenāmātyena sa nṛpaḥ sa ca rājñā vibhūṣitaḥ / guṇaḥ satpuruṣeṇeva guṇeneva ca sajjanaḥ

Sanskrit only: no published translation is held for this verse.

कृतज्ञः सरलः स्वामी सद्भृत्यो भक्तिनिर्भरः । सुकृतप्रभवेणैव भाग्ययोगेन लभ्यते

kṛtajñaḥ saralaḥ svāmī sadbhṛtyo bhaktinirbharaḥ / sukṛtaprabhaveṇaiva bhāgyayogena labhyate

Sanskrit only: no published translation is held for this verse.

इयमेव चिरभ्रान्तिविश्रान्तिः सर्वसंपदाम् । यद्गुणज्ञतया वेत्ति स्वामिसत्पुरुषान्तरम्

iyameva cirabhrāntiviśrāntiḥ sarvasaṃpadām / yadguṇajñatayā vetti svāmisatpuruṣāntaram

Sanskrit only: no published translation is held for this verse.

तौ कदचिद्ददृशतुः स्वप्नमन्ये च मन्त्रिणह् । क्षयो यस्य फलं दानव्यसनेन महीपतेः

tau kadaciddadṛśatuḥ svapnamanye ca mantriṇah / kṣayo yasya phalaṃ dānavyasanena mahīpateḥ

Sanskrit only: no published translation is held for this verse.

तौ दृष्ट्वा दुर्निमित्तानि प्रादुर्भूतानि शङ्कितौ । व्यग्रओ बभूवतुर्नित्यं शान्तिस्वस्तिककर्मसु

tau dṛṣṭvā durnimittāni prādurbhūtāni śaṅkitau / vyagrao babhūvaturnityaṃ śāntisvastikakarmasu

Sanskrit only: no published translation is held for this verse.

निमित्तदर्शनोद्विग्नास्तपिवनगता अपि । विश्वामित्रप्रभृतयः स्वामीत्यूचुर्महर्षयः

nimittadarśanodvignāstapivanagatā api / viśvāmitraprabhṛtayaḥ svāmītyūcurmaharṣayaḥ

Sanskrit only: no published translation is held for this verse.

अत्राण्तरे ब्रह्मबन्धुः प्राग्जन्मब्रह्मराक्षसः । रौद्राक्षो नाम मात्सर्यक्रौर्यदौर्जन्यदुःसहः

atrāṇtare brahmabandhuḥ prāgjanmabrahmarākṣasaḥ / raudrākṣo nāma mātsaryakrauryadaurjanyaduḥsahaḥ

Sanskrit only: no published translation is held for this verse.

श्रुत्वा दानोद्भवाम् कीर्तिं राज्ञः सर्वगुणोज्ज्वलाम् । निर्गुणः स गुणद्वेषि संतप्तः समचिन्तयत्

śrutvā dānodbhavām kīrtiṃ rājñaḥ sarvaguṇojjvalām / nirguṇaḥ sa guṇadveṣi saṃtaptaḥ samacintayat

Sanskrit only: no published translation is held for this verse.

अहो बतास्य नृपतेर्गीयते गगने यशः । अनिशं सिद्धगन्धर्वगीर्वाणललनागणैः

aho batāsya nṛpatergīyate gagane yaśaḥ / aniśaṃ siddhagandharvagīrvāṇalalanāgaṇaiḥ

Sanskrit only: no published translation is held for this verse.

सदा विशन्ति मे कर्णे तद्गुणस्तुतिसूचयः । किं करोमि प्रकृत्यैव सहे नान्यगुणोन्नतिम्

sadā viśanti me karṇe tadguṇastutisūcayaḥ / kiṃ karomi prakṛtyaiva sahe nānyaguṇonnatim

Sanskrit only: no published translation is held for this verse.

तद्गत्वा दानशीलस्य तस्य दानार्जितं यशः । करोम्येष शिरोयाच्ञाप्रतिषेधेन खण्डितम्

tadgatvā dānaśīlasya tasya dānārjitaṃ yaśaḥ / karomyeṣa śiroyācñāpratiṣedhena khaṇḍitam

Sanskrit only: no published translation is held for this verse.

यशस्त्याज्यते दानोत्थं शिरश्चेन्न प्रदास्यति । अथ दास्यति विद्वेषप्रशान्तिर्मे भविष्यति

yaśastyājyate dānotthaṃ śiraścenna pradāsyati / atha dāsyati vidveṣapraśāntirme bhaviṣyati

Sanskrit only: no published translation is held for this verse.

इति संचिन्त्य सुचिरं स कौर्यकठिनः शठः । गन्धमादनपादाण्तवासी भद्रशिलां ययौ

iti saṃcintya suciraṃ sa kauryakaṭhinaḥ śaṭhaḥ / gandhamādanapādāṇtavāsī bhadraśilāṃ yayau

Sanskrit only: no published translation is held for this verse.

इन्द्रजालप्रयोगज्ञः स कृत्वा प्रशमोचितम् । वेषं कलुषसंकल्पः पुरीं प्राप महीपतेः

indrajālaprayogajñaḥ sa kṛtvā praśamocitam / veṣaṃ kaluṣasaṃkalpaḥ purīṃ prāpa mahīpateḥ

Sanskrit only: no published translation is held for this verse.

अस्मिन् भववने नित्यं गुणदोषसमाकुले । कल्पवृक्षाः प्रजायन्ते जायन्ते च विषद्रुमाः

asmin bhavavane nityaṃ guṇadoṣasamākule / kalpavṛkṣāḥ prajāyante jāyante ca viṣadrumāḥ

Sanskrit only: no published translation is held for this verse.

अशेषनाशपिशुनैर्घोरसंत्रासकारिभिः । दुर्निमित्तैरिव खलैः खेदः कस्य न दीयते

aśeṣanāśapiśunairghorasaṃtrāsakāribhiḥ / durnimittairiva khalaiḥ khedaḥ kasya na dīyate

Sanskrit only: no published translation is held for this verse.

गुणिद्वेषः प्रकृत्यैव प्रकाशपरिपन्थिनः । दोषआश्रयस्य को भेदः खलस्य तिमिरस्य च

guṇidveṣaḥ prakṛtyaiva prakāśaparipanthinaḥ / doṣaāśrayasya ko bhedaḥ khalasya timirasya ca

Sanskrit only: no published translation is held for this verse.

स्वच्छन्दघाती साधूनां विद्वेषविषदुःसहः । दीर्घपक्षः खलव्यालकरालः केन निर्मितः

svacchandaghātī sādhūnāṃ vidveṣaviṣaduḥsahaḥ / dīrghapakṣaḥ khalavyālakarālaḥ kena nirmitaḥ

Sanskrit only: no published translation is held for this verse.

तस्मिन् प्रविष्टे नगरं रूपिणी पुरदेवता । उवाचाभ्येत्य भूपालं संत्रासतरलेक्षणा

tasmin praviṣṭe nagaraṃ rūpiṇī puradevatā / uvācābhyetya bhūpālaṃ saṃtrāsataralekṣaṇā

Sanskrit only: no published translation is held for this verse.

शिरोयाचक एष त्वां ब्रह्मबन्धुरुपागतः । वध्यो ऽसौ जीवितोच्छेदी जगतो जीवितस्य ते

śiroyācaka eṣa tvāṃ brahmabandhurupāgataḥ / vadhyo 'sau jīvitocchedī jagato jīvitasya te

Sanskrit only: no published translation is held for this verse.

निरुद्धो नगरद्वारि स मया मलिनाशयः । मम तद्दर्शनत्रस्तं धृतिं न लभते मनः

niruddho nagaradvāri sa mayā malināśayaḥ / mama taddarśanatrastaṃ dhṛtiṃ na labhate manaḥ

Sanskrit only: no published translation is held for this verse.

इति ब्रुवाणां भूपालः प्रोवाच पुरदेवताम् । अर्थिसंरोधसंजातलज्जया नमिताननः

iti bruvāṇāṃ bhūpālaḥ provāca puradevatām / arthisaṃrodhasaṃjātalajjayā namitānanaḥ

Sanskrit only: no published translation is held for this verse.

देवि याच्ञाभियातो ऽसौ प्रविशत्वनिवारितः । दिर्घोच्छ्वासं सहे नाहमाशावैफल्यमर्थिनः

devi yācñābhiyāto 'sau praviśatvanivāritaḥ / dirghocchvāsaṃ sahe nāhamāśāvaiphalyamarthinaḥ

Sanskrit only: no published translation is held for this verse.

याच्ञा प्रणयिनामर्थे पुण्यप्राप्तस्तनुव्ययः । युगसंख्यामपि स्थित्वा विपद्यन्ते हि देहिनः

yācñā praṇayināmarthe puṇyaprāptastanuvyayaḥ / yugasaṃkhyāmapi sthitvā vipadyante hi dehinaḥ

Sanskrit only: no published translation is held for this verse.

एतदेव सुजातानां पूज्यं जगति जीवितम् । यदेषामग्रतो याति नार्थी भग्नमनोरथह्

etadeva sujātānāṃ pūjyaṃ jagati jīvitam / yadeṣāmagrato yāti nārthī bhagnamanorathah

Sanskrit only: no published translation is held for this verse.

क्रियतामानुकूल्यं मे भवत्या कुशलोचितम् । आशाविघाते संतापस्तस्य तूर्णं निवारताम्

kriyatāmānukūlyaṃ me bhavatyā kuśalocitam / āśāvighāte saṃtāpastasya tūrṇaṃ nivāratām

Sanskrit only: no published translation is held for this verse.

इति भूमिभृतः श्रुत्वा वचो निश्चलनिश्चयम् । जगामादर्शनं देवी चिन्तासंतापमानसा

iti bhūmibhṛtaḥ śrutvā vaco niścalaniścayam / jagāmādarśanaṃ devī cintāsaṃtāpamānasā

Sanskrit only: no published translation is held for this verse.

अथाययौ स कुटिलः खलः क्रकचचेष्टितः । दारुणः सरलस्यैव च्छेदाय स्वयमुद्यतः

athāyayau sa kuṭilaḥ khalaḥ krakacaceṣṭitaḥ / dāruṇaḥ saralasyaiva cchedāya svayamudyataḥ

Sanskrit only: no published translation is held for this verse.

तस्मिन्नृपगृहं प्राप्ते विवृतद्वारमर्थिनाम् । भूर्भूपतिक्षयभयाच्चकम्पे सधराधरा

tasminnṛpagṛhaṃ prāpte vivṛtadvāramarthinām / bhūrbhūpatikṣayabhayāccakampe sadharādharā

Sanskrit only: no published translation is held for this verse.

नरेन्द्रचन्द्रमासाद्य स राहुरिच दुर्मुखः । समभ्यधाद्विधाय प्रागशिवार्थामिवाशिषम्

narendracandramāsādya sa rāhurica durmukhaḥ / samabhyadhādvidhāya prāgaśivārthāmivāśiṣam

Sanskrit only: no published translation is held for this verse.

स्वस्ति राजन् द्विजन्मा हि विजने सिद्धिसाधकः । प्रातस्त्वामीप्सितप्राप्त्यै सर्वार्थिसुरपादपम्

svasti rājan dvijanmā hi vijane siddhisādhakaḥ / prātastvāmīpsitaprāptyai sarvārthisurapādapam

Sanskrit only: no published translation is held for this verse.

दृष्टिर्वृष्टिरिवामृतस्य महती सौजन्यमित्रं मनः क्षान्तिः क्रोधरजःप्रमार्जनदी दुःखार्तमाता मतिः । लक्ष्मीर्दानजलाभिषेकविमला सत्योपयुज्क्तं वचः नित्यं यस्य स एक एव हि भवान् जातो जगद्बान्धवः

dṛṣṭirvṛṣṭirivāmṛtasya mahatī saujanyamitraṃ manaḥ kṣāntiḥ krodharajaḥpramārjanadī duḥkhārtamātā matiḥ / lakṣmīrdānajalābhiṣekavimalā satyopayujktaṃ vacaḥ nityaṃ yasya sa eka eva hi bhavān jāto jagadbāndhavaḥ

Sanskrit only: no published translation is held for this verse.

सिद्धये कथितं कैश्चिच्चक्रवर्तिशिरो मम । दीयतां त त्वदन्यो वा दातुं शक्नोति कः परह्

siddhaye kathitaṃ kaiściccakravartiśiro mama / dīyatāṃ ta tvadanyo vā dātuṃ śaknoti kaḥ parah

Sanskrit only: no published translation is held for this verse.

सन्ति स्पष्टार्थदाश्चिन्तामणिकल्पद्रुमादयः । दुर्लभार्थप्रदातारो विरलास्तु भवद्विधाः

santi spaṣṭārthadāścintāmaṇikalpadrumādayaḥ / durlabhārthapradātāro viralāstu bhavadvidhāḥ

Sanskrit only: no published translation is held for this verse.

इत्युक्ते तेन नृपतिर्निष्कम्पविपुलाशयः । अर्थिसंदर्शनानन्दनिर्भरस्तमभाषत

ityukte tena nṛpatirniṣkampavipulāśayaḥ / arthisaṃdarśanānandanirbharastamabhāṣata

Sanskrit only: no published translation is held for this verse.

धन्यो ऽहं यस्य मे ब्रह्मन्नर्थिनामर्थसिद्धये । निर्विकल्पोपकरणं व्ययं याति सुजीवितम्

dhanyo 'haṃ yasya me brahmannarthināmarthasiddhaye / nirvikalpopakaraṇaṃ vyayaṃ yāti sujīvitam

Sanskrit only: no published translation is held for this verse.

कदा प्राणाः परार्थे मे प्रयान्तीति मनोरथः । किमेतानि न पुण्यानि प्रार्थ्यन्ते ते यदि त्वया

kadā prāṇāḥ parārthe me prayāntīti manorathaḥ / kimetāni na puṇyāni prārthyante te yadi tvayā

Sanskrit only: no published translation is held for this verse.

आहोपकरणसिद्ध्यै श्लाघ्यं मे गृह्यतां शिरः । तत्तदेव स्थिरं लोके यद्यदर्थिसमर्पितम्

āhopakaraṇasiddhyai ślāghyaṃ me gṛhyatāṃ śiraḥ / tattadeva sthiraṃ loke yadyadarthisamarpitam

Sanskrit only: no published translation is held for this verse.

इत्युक्ते हर्षयुक्तेन भूभुजा सत्त्वशालिना । तमूचतुर्महामात्यौ महाचन्द्रमहीधरौ

ityukte harṣayuktena bhūbhujā sattvaśālinā / tamūcaturmahāmātyau mahācandramahīdharau

Sanskrit only: no published translation is held for this verse.

निजजीवितरक्षैव धर्मस्ते प्रथमः प्रभो । त्वयि जीवति जीवन्ति सर्वे जगति जन्तवः

nijajīvitarakṣaiva dharmaste prathamaḥ prabho / tvayi jīvati jīvanti sarve jagati jantavaḥ

Sanskrit only: no published translation is held for this verse.

न दातुमर्हसि शिरः सर्वाधारं हि ते वपुः । दीयतां ब्राह्मणायास्मै हेमरत्नमयं शिरः

na dātumarhasi śiraḥ sarvādhāraṃ hi te vapuḥ / dīyatāṃ brāhmaṇāyāsmai hemaratnamayaṃ śiraḥ

Sanskrit only: no published translation is held for this verse.

सर्वार्थैरर्थिसार्थानां पूर्यन्ते यैर्मनोरथाः । तेषां संरक्षणेनैव सर्वं भवति रक्षितम्

sarvārthairarthisārthānāṃ pūryante yairmanorathāḥ / teṣāṃ saṃrakṣaṇenaiva sarvaṃ bhavati rakṣitam

Sanskrit only: no published translation is held for this verse.

संकल्पो ऽयं द्विजस्यास्य क्रूरः कलुषचेतसः । मूलच्छेदोपजीव्यो हि न कल्पतरुरर्थिनाम्

saṃkalpo 'yaṃ dvijasyāsya krūraḥ kaluṣacetasaḥ / mūlacchedopajīvyo hi na kalpatarurarthinām

Sanskrit only: no published translation is held for this verse.

हेमरत्नशिरः प्राप्य यात्वेष शिरसास्य किम् । चिन्तामणिर्विनिष्प्रेक्ष्यो भुज्यते न बुभुक्षितैः

hemaratnaśiraḥ prāpya yātveṣa śirasāsya kim / cintāmaṇirviniṣprekṣyo bhujyate na bubhukṣitaiḥ

Sanskrit only: no published translation is held for this verse.

इत्युक्ते मन्त्रिमुख्याभ्याम् हेमरत्नमयं शिरः । सिद्धो नैवोपयोग्यं तन्ममेति ब्राह्मणो ऽब्रवीत्

ityukte mantrimukhyābhyām hemaratnamayaṃ śiraḥ / siddho naivopayogyaṃ tanmameti brāhmaṇo 'bravīt

Sanskrit only: no published translation is held for this verse.

अथोन्मुमोच नृपतिर्मुकुटं मौक्तिकांषुभिः । श्रिरोविरहदुःखेन साश्रुधारमिवाभितः

athonmumoca nṛpatirmukuṭaṃ mauktikāṃṣubhiḥ / śrirovirahaduḥkhena sāśrudhāramivābhitaḥ

Sanskrit only: no published translation is held for this verse.

मुकुटानि क्षणे तस्मिन्निपेतुः पुरवासिनाम् । दिग्दाहोन्मुखतुल्याभिरुल्काभिः सह भूतले

mukuṭāni kṣaṇe tasminnipetuḥ puravāsinām / digdāhonmukhatulyābhirulkābhiḥ saha bhūtale

Sanskrit only: no published translation is held for this verse.

राज्ञा प्रदाने शिरसः सर्वथा परिकल्पिते । तौ चक्रतुस्तनुत्यागं मन्त्रिणौ द्रष्टुमक्षमौ

rājñā pradāne śirasaḥ sarvathā parikalpite / tau cakratustanutyāgaṃ mantriṇau draṣṭumakṣamau

Sanskrit only: no published translation is held for this verse.

रत्नगर्भमथोद्यानं प्रविश्य पृथिवीपतिः । उत्फुल्लचम्पकस्याधः शिरश्छेत्तुं समुद्ययौ

ratnagarbhamathodyānaṃ praviśya pṛthivīpatiḥ / utphullacampakasyādhaḥ śiraśchettuṃ samudyayau

Sanskrit only: no published translation is held for this verse.

उद्यानदेवता दृष्ट्वा तं शिरश्छेत्तुमुद्यतम् । मा कृथाः साहसं राजन्नित्युवाच शुचाकुला

udyānadevatā dṛṣṭvā taṃ śiraśchettumudyatam / mā kṛthāḥ sāhasaṃ rājannityuvāca śucākulā

Sanskrit only: no published translation is held for this verse.

कम्पमानाः प्रलापिन्यस्तं मत्तालुकुलस्वनैः । न्यवारयन्नवलता लोलपल्लवपाणिभिः

kampamānāḥ pralāpinyastaṃ mattālukulasvanaiḥ / nyavārayannavalatā lolapallavapāṇibhiḥ

Sanskrit only: no published translation is held for this verse.

सो ऽपि निश्चलसंकल्पः प्रसाद्योद्यानदेवताम् । विमलां बोधिमालम्ब्य बभूव प्रणिधानवान्

so 'pi niścalasaṃkalpaḥ prasādyodyānadevatām / vimalāṃ bodhimālambya babhūva praṇidhānavān

Sanskrit only: no published translation is held for this verse.

अस्मिन् रत्नमयोद्याने पुण्यराशिसमुन्नतम् । स्तूपमस्तु प्रशास्तुस्तु सत्त्वसंतारणोचितम्

asmin ratnamayodyāne puṇyarāśisamunnatam / stūpamastu praśāstustu sattvasaṃtāraṇocitam

Sanskrit only: no published translation is held for this verse.

यत्किंचिदर्जितं पुण्यं संकल्पेन मयामुना । भवन्तु तेन संसारे निःसंसाराः शरीरिणः

yatkiṃcidarjitaṃ puṇyaṃ saṃkalpena mayāmunā / bhavantu tena saṃsāre niḥsaṃsārāḥ śarīriṇaḥ

Sanskrit only: no published translation is held for this verse.

ध्यात्वेति चम्पकतरोः शाखायां नृपतिः शिरः । बद्ध्वा कचकलापेन छित्त्वा प्रादाद्द्विजन्मने

dhyātveti campakataroḥ śākhāyāṃ nṛpatiḥ śiraḥ / baddhvā kacakalāpena chittvā prādāddvijanmane

Sanskrit only: no published translation is held for this verse.

अथ नरपते सत्त्वोत्साहस्फुटप्रणिधानतः किमपि विमलैः पुण्यालोकैर्दिगन्तविसारिभिः । विगलितमहामोहौघान्तः श्रितः परिनिर्वृतिं प्रविरतभवाभ्यासायासः क्षणादबह्वज्जनह्

atha narapate sattvotsāhasphuṭapraṇidhānataḥ kimapi vimalaiḥ puṇyālokairdigantavisāribhiḥ / vigalitamahāmohaughāntaḥ śritaḥ parinirvṛtiṃ praviratabhavābhyāsāyāsaḥ kṣaṇādabahvajjanah

Sanskrit only: no published translation is held for this verse.

इति प्राग्जन्मवृत्तान्तकथया भगवान् जिनः । भिक्षूणाम् विदधे शुद्धदानसद्धर्मदेशनाम्

iti prāgjanmavṛttāntakathayā bhagavān jinaḥ / bhikṣūṇām vidadhe śuddhadānasaddharmadeśanām

Sanskrit only: no published translation is held for this verse.