Ksemendra: Avadanakalpalata 6

कूलावाप्तप्रवहणह् सुप्रियस्तद्वियोगजम् । शुचं संस्तभ्य विदधे सुहॄदस्तनुसत्क्रियाम्

kūlāvāptapravahaṇah supriyastadviyogajam / śucaṃ saṃstabhya vidadhe suhṝdastanusatkriyām

Sanskrit only: no published translation is held for this verse.

एतदेवोन्नतं लक्ष्म सत्त्वोत्साहमहात्मनाम् । विच्छिन्नालम्बने काले यत्कर्तव्यदृढं मनः

etadevonnataṃ lakṣma sattvotsāhamahātmanām / vicchinnālambane kāle yatkartavyadṛḍhaṃ manaḥ

Sanskrit only: no published translation is held for this verse.

पुनः प्रवहणारूढः स समुत्तीर्य वारिधिम् । रत्नपर्वतपार्श्वेन विवेश विकटाटवीम्

punaḥ pravahaṇārūḍhaḥ sa samuttīrya vāridhim / ratnaparvatapārśvena viveśa vikaṭāṭavīm

Sanskrit only: no published translation is held for this verse.

न वियोगैर्न चोद्वेगैर्नाभियोगैर्द्विषामपि । न रोगैः क्लेशभोगैर्वा हीयते महतां मतिः

na viyogairna codvegairnābhiyogairdviṣāmapi / na rogaiḥ kleśabhogairvā hīyate mahatāṃ matiḥ

Sanskrit only: no published translation is held for this verse.

स तत्राक्रान्तगगनं निरुद्धाशेषदिक्तटम् । दुरारोहं ददर्शाग्रे मूर्तं विघ्नमिवाचलम्

sa tatrākrāntagaganaṃ niruddhāśeṣadiktaṭam / durārohaṃ dadarśāgre mūrtaṃ vighnamivācalam

Sanskrit only: no published translation is held for this verse.

उपायहीनस्तं दृष्ट्वा गिरिं मूर्खमिवोद्धतम् । अधः पल्लवशय्यायाम् सुप्तः सो ऽचिन्तयत् क्षस्णम्

upāyahīnastaṃ dṛṣṭvā giriṃ mūrkhamivoddhatam / adhaḥ pallavaśayyāyām suptaḥ so 'cintayat kṣasṇam

Sanskrit only: no published translation is held for this verse.

अहो बत कियान् कालः प्रयातः प्रस्थितस्य मे । बदरद्वीपनामापि न नाम श्रूयते क्कचित्

aho bata kiyān kālaḥ prayātaḥ prasthitasya me / badaradvīpanāmāpi na nāma śrūyate kkacit

Sanskrit only: no published translation is held for this verse.

व्यवसायसहायो मे यो ऽभूत्पुण्यपणैः परम् । भग्नप्लव इवाकाले सो ऽपि कर्मोर्मिविप्लवैः

vyavasāyasahāyo me yo 'bhūtpuṇyapaṇaiḥ param / bhagnaplava ivākāle so 'pi karmormiviplavaiḥ

Sanskrit only: no published translation is held for this verse.

नष्टोपाये ऽप्युपाये ऽस्मिन् व्यवसायान्महीयसः । न नाम विनिवर्ते ऽहं सिद्धिर्निधनमस्तु वा

naṣṭopāye 'pyupāye 'smin vyavasāyānmahīyasaḥ / na nāma vinivarte 'haṃ siddhirnidhanamastu vā

Sanskrit only: no published translation is held for this verse.

तदेकं जन्मयात्रासु पूज्यं जन्म जगत्र्त्रये । यस्मिन् परोपक्राराय जायते जीवितव्ययः

tadekaṃ janmayātrāsu pūjyaṃ janma jagatrtraye / yasmin paropakrārāya jāyate jīvitavyayaḥ

Sanskrit only: no published translation is held for this verse.

इति चिन्ताकुलं तत्र तं ज्ञात्वा सत्यसागरम् । नीलो नाम समभ्येत्य यक्षः प्राहाचलाश्रयः

iti cintākulaṃ tatra taṃ jñātvā satyasāgaram / nīlo nāma samabhyetya yakṣaḥ prāhācalāśrayaḥ

Sanskrit only: no published translation is held for this verse.

पूर्वेण योजनं गत्वा त्रीणि शृङ्गाणि भूभृतः । वेत्रसोपाननिश्रेण्या समारुह्याथ गम्यताम्

pūrveṇa yojanaṃ gatvā trīṇi śṛṅgāṇi bhūbhṛtaḥ / vetrasopānaniśreṇyā samāruhyātha gamyatām

Sanskrit only: no published translation is held for this verse.

इति यक्षोपदेशेन स विलङ्घ्य महाचलम् । ददर्शाग्रे समुत्तुङ्गश्रृङ्गं स्फटीकभूधरम्

iti yakṣopadeśena sa vilaṅghya mahācalam / dadarśāgre samuttuṅgaśrṛṅgaṃ sphaṭīkabhūdharam

Sanskrit only: no published translation is held for this verse.

तस्मिन्नेकशिलाश्लक्ष्णे दुर्गमे पक्षिणामपि । मुहूर्तमभवत्तस्य निर्व्यापारो मनोरथः

tasminnekaśilāślakṣṇe durgame pakṣiṇāmapi / muhūrtamabhavattasya nirvyāpāro manorathaḥ

Sanskrit only: no published translation is held for this verse.

अभ्युन्नतम् निरालम्बं स्वसंकल्पमिवाचलम् । स तं विचार्य सुचिरं चित्रन्यस्त इवाभवत्

abhyunnatam nirālambaṃ svasaṃkalpamivācalam / sa taṃ vicārya suciraṃ citranyasta ivābhavat

Sanskrit only: no published translation is held for this verse.

अथ चन्द्रप्रभो नाम यक्षः शैलगुहाशयः । अभ्येत्यः सत्त्वसंपन्नं तमभाषट वुस्मितः

atha candraprabho nāma yakṣaḥ śailaguhāśayaḥ / abhyetyaḥ sattvasaṃpannaṃ tamabhāṣaṭa vusmitaḥ

Sanskrit only: no published translation is held for this verse.

क्रोशमात्रमितो गत्वा पूर्वेणापूर्वविभ्रमम् । दृश्यते चन्दनवनं बालानिलचलल्लतम्

krośamātramito gatvā pūrveṇāpūrvavibhramam / dṛśyate candanavanaṃ bālānilacalallatam

Sanskrit only: no published translation is held for this verse.

तत्रास्ते प्रसरा नाम गुहालीना महौषधिः । लभ्यते देहरक्षायै समुत्तोल्य महाशिलाम्

tatrāste prasarā nāma guhālīnā mahauṣadhiḥ / labhyate deharakṣāyai samuttolya mahāśilām

Sanskrit only: no published translation is held for this verse.

तत्प्रभावकृतालोकं सोपानैः स्फटिकाचलम् । सहसैव समारुह्य गम्यतामीप्सिताप्तये

tatprabhāvakṛtālokaṃ sopānaiḥ sphaṭikācalam / sahasaiva samāruhya gamyatāmīpsitāptaye

Sanskrit only: no published translation is held for this verse.

तत्क्षणात् कृतकार्थेव सा प्रयाति महाउषधिः । न खेदस्तत्कृते कार्यस्तडिल्लोलाः प्रियाप्तयः

tatkṣaṇāt kṛtakārtheva sā prayāti mahāuṣadhiḥ / na khedastatkṛte kāryastaḍillolāḥ priyāptayaḥ

Sanskrit only: no published translation is held for this verse.

इति यक्षोपदिष्टेन विधानेन स भूधरम् । समुत्क्रम्य ददर्शाग्रे नगरं हेममन्दिरम्

iti yakṣopadiṣṭena vidhānena sa bhūdharam / samutkramya dadarśāgre nagaraṃ hemamandiram

Sanskrit only: no published translation is held for this verse.

मेरूकूटैरिवाकीर्णं प्रकाशैरिव निर्मितम् । सवाश्चर्यैरिव कृतं तद् दृष्ट्वा विस्मितो ऽभवत्

merūkūṭairivākīrṇaṃ prakāśairiva nirmitam / savāścaryairiva kṛtaṃ tad dṛṣṭvā vismito 'bhavat

Sanskrit only: no published translation is held for this verse.

महाहेमकपाटाभ्यां रुद्धद्धारम् विलोक्य तत् । निर्जनं वारसंचारं वनान्ते निषसाद सः

mahāhemakapāṭābhyāṃ ruddhaddhāram vilokya tat / nirjanaṃ vārasaṃcāraṃ vanānte niṣasāda saḥ

Sanskrit only: no published translation is held for this verse.

अत्रान्तरे दिनस्यान्ते व्योमानन्तपथाध्वगः । अवापास्ताचलोपान्तं परिश्रान्त इवांशुमान्

atrāntare dinasyānte vyomānantapathādhvagaḥ / avāpāstācalopāntaṃ pariśrānta ivāṃśumān

Sanskrit only: no published translation is held for this verse.

अस्तं गते सहस्रांशौ रजनीरमणी शनैः । तारापतिमिवान्वेष्टुं प्रससाराभिसारिका

astaṃ gate sahasrāṃśau rajanīramaṇī śanaiḥ / tārāpatimivānveṣṭuṃ prasasārābhisārikā

Sanskrit only: no published translation is held for this verse.

अथ प्रकाशविबह्वैः सर्वाशापूरणोन्मुखः । बोधिसत्त्व इव स्वच्छः सुधादीधितिरुद्ययौ

atha prakāśavibahvaiḥ sarvāśāpūraṇonmukhaḥ / bodhisattva iva svacchaḥ sudhādīdhitirudyayau

Sanskrit only: no published translation is held for this verse.

स्फीटा तमः समूहस्य निःशेषप्रशमोचिता । मानसोल्लासिनी ज्योत्स्ना सत्त्ववृत्तिरिवाबभौ

sphīṭā tamaḥ samūhasya niḥśeṣapraśamocitā / mānasollāsinī jyotsnā sattvavṛttirivābabhau

Sanskrit only: no published translation is held for this verse.

तमोमोहं जहारेन्दुर्दिशां दिनवियोगजम् । परोपकारे हि परो दूरारोहो महात्मनाम्

tamomohaṃ jahārendurdiśāṃ dinaviyogajam / paropakāre hi paro dūrāroho mahātmanām

Sanskrit only: no published translation is held for this verse.

सुप्रियश्चन्द्रकिरणैः पूर्यमाणतनुः क्षणम् । निद्रां कार्यसमुद्रोर्मिक्षोभमुद्रामवाप्तवान्

supriyaścandrakiraṇaiḥ pūryamāṇatanuḥ kṣaṇam / nidrāṃ kāryasamudrormikṣobhamudrāmavāptavān

Sanskrit only: no published translation is held for this verse.

क्षपायाम् क्षीयमाणायां गुणदाक्षिण्यसादरा । जगाद देवता स्वप्ने महेशाख्या समेत्य तम्

kṣapāyām kṣīyamāṇāyāṃ guṇadākṣiṇyasādarā / jagāda devatā svapne maheśākhyā sametya tam

Sanskrit only: no published translation is held for this verse.

अहो बत महासत्त्व सत्तत्त्वाभिनिवेशिना । परार्थे विपुलः क्लेशः कृतः सुकृतिना त्वया

aho bata mahāsattva sattattvābhiniveśinā / parārthe vipulaḥ kleśaḥ kṛtaḥ sukṛtinā tvayā

Sanskrit only: no published translation is held for this verse.

अल्पशेषे प्रयासे ऽस्मिन् नोद्वेगं कर्तुमर्हसि । अपर्युषितसत्त्वानां स्वाधीनाः सर्वसिद्धयः

alpaśeṣe prayāse 'smin nodvegaṃ kartumarhasi / aparyuṣitasattvānāṃ svādhīnāḥ sarvasiddhayaḥ

Sanskrit only: no published translation is held for this verse.

हैमं यदेतन्नगरं त्रीणि चान्यान्यतः परम् । सन्ति रत्नपुराण्यत्र विचित्राण्युत्तरोत्तरम्

haimaṃ yadetannagaraṃ trīṇi cānyānyataḥ param / santi ratnapurāṇyatra vicitrāṇyuttarottaram

Sanskrit only: no published translation is held for this verse.

तेभ्यो निर्यान्ति किन्नर्यश्चतश्रो ऽष्टौ च षोडश । द्वात्रिंशच्च क्रमेणैव त्वया द्वारि विघट्टिते

tebhyo niryānti kinnaryaścataśro 'ṣṭau ca ṣoḍaśa / dvātriṃśacca krameṇaiva tvayā dvāri vighaṭṭite

Sanskrit only: no published translation is held for this verse.

जितेन्द्रियस्य भवतस्तत्प्रमादमवेदिनः । किमन्यदचिरेणैव् वाञ्छिताप्तिर्भविष्यति

jitendriyasya bhavatastatpramādamavedinaḥ / kimanyadacireṇaiv vāñchitāptirbhaviṣyati

Sanskrit only: no published translation is held for this verse.

इत्युक्तः सादरं देव्या प्रतिबुद्धो ऽथ सुप्रियः । जघान नगरद्वारं त्रिः समभ्येत्य पाणिना

ityuktaḥ sādaraṃ devyā pratibuddho 'tha supriyaḥ / jaghāna nagaradvāraṃ triḥ samabhyetya pāṇinā

Sanskrit only: no published translation is held for this verse.

ततश्चतस्रः क् इन्नर्यो निर्ययुस्तरलेक्षणाः । आश्चर्यतरुमञ्जर्य इव लीलानिलाकुलाः

tataścatasraḥ k innaryo niryayustaralekṣaṇāḥ / āścaryatarumañjarya iva līlānilākulāḥ

Sanskrit only: no published translation is held for this verse.

मानसिल्लासकारिण्यो नयनामृतवृष्टयः । वदनेन्दुसमुद्योतैर्दिवापि कृतचन्द्रिकाः

mānasillāsakāriṇyo nayanāmṛtavṛṣṭayaḥ / vadanendusamudyotairdivāpi kṛtacandrikāḥ

Sanskrit only: no published translation is held for this verse.

ताः संपूज्य स्मरोदारं सुप्रियं प्रियदर्शनाः । तस्याभिलाषप्रणयैरातिथ्यमिव चक्रिरे

tāḥ saṃpūjya smarodāraṃ supriyaṃ priyadarśanāḥ / tasyābhilāṣapraṇayairātithyamiva cakrire

Sanskrit only: no published translation is held for this verse.

चन्द्रकान्तसमासीनं कृतासनपरिग्रहाः । जीवनौषधयो जाताः स्मरस्येव सविग्रहाः

candrakāntasamāsīnaṃ kṛtāsanaparigrahāḥ / jīvanauṣadhayo jātāḥ smarasyeva savigrahāḥ

Sanskrit only: no published translation is held for this verse.

तास्तमूचुः समुन्मीलद्विलासहसितत्विषः । ददत्य इव कर्पूरं प्रेमोपायनताम् पुरः

tāstamūcuḥ samunmīladvilāsahasitatviṣaḥ / dadatya iva karpūraṃ premopāyanatām puraḥ

Sanskrit only: no published translation is held for this verse.

अहो धन्या वयं यासां सद्गुणालकृताकृतिः । स्वयएम्वाभिगम्यो ऽपि भवानद्यागतो गृहम्

aho dhanyā vayaṃ yāsāṃ sadguṇālakṛtākṛtiḥ / svayaemvābhigamyo 'pi bhavānadyāgato gṛham

Sanskrit only: no published translation is held for this verse.

विधेषः कस्य पीयूषे चन्दने कस्य वारुचिः । इन्दौ मन्दादरः को वा साधुः कस्य न संमतः

vidheṣaḥ kasya pīyūṣe candane kasya vāruciḥ / indau mandādaraḥ ko vā sādhuḥ kasya na saṃmataḥ

Sanskrit only: no published translation is held for this verse.

स्त्रीणां यद्यपि सौभाग्यभङ्गाय प्रणयः स्वयम् । क्रमस्त्वद्दर्शनेनैव तथापि मुखरीकृताः

strīṇāṃ yadyapi saubhāgyabhaṅgāya praṇayaḥ svayam / kramastvaddarśanenaiva tathāpi mukharīkṛtāḥ

Sanskrit only: no published translation is held for this verse.

इदं च किन्नरपुरं वयं च प्रणयार्पिताः । रत्नं च सौभाषणिकं साधो स्वाधीनमेव ते

idaṃ ca kinnarapuraṃ vayaṃ ca praṇayārpitāḥ / ratnaṃ ca saubhāṣaṇikaṃ sādho svādhīnameva te

Sanskrit only: no published translation is held for this verse.

इति तासां वचः श्रुत्वा सुप्रियः प्रणयोचितम् । उवाच सत्त्वधवलां दिशन् दशनचन्द्रिकाम्

iti tāsāṃ vacaḥ śrutvā supriyaḥ praṇayocitam / uvāca sattvadhavalāṃ diśan daśanacandrikām

Sanskrit only: no published translation is held for this verse.

बहुमानास्पदं कस्य नेदं संभाषणामृतम् । आत्मनो ऽप्यादरस्थानम् बह्वतीभिः कृतादरः

bahumānāspadaṃ kasya nedaṃ saṃbhāṣaṇāmṛtam / ātmano 'pyādarasthānam bahvatībhiḥ kṛtādaraḥ

Sanskrit only: no published translation is held for this verse.

श्लाघ्यं दर्शनमेवेदं तत्राप्ययमनुग्रहः । मुक्तालतास्तापहराः किं पुनश्चन्दनोक्षिताः

ślāghyaṃ darśanamevedaṃ tatrāpyayamanugrahaḥ / muktālatāstāpaharāḥ kiṃ punaścandanokṣitāḥ

Sanskrit only: no published translation is held for this verse.

एवं विधानाम् स्वच्छानामैन्दवीनामिव त्विषाम् । आकृतीनाम् समुचिता रुचिरा लोकवृत्तयः

evaṃ vidhānām svacchānāmaindavīnāmiva tviṣām / ākṛtīnām samucitā rucirā lokavṛttayaḥ

Sanskrit only: no published translation is held for this verse.

औचित्यचारुचरितं प्रसादविशदं मनह् । वात्सल्यपेशला वाणी न कस्यादरभूमयः

aucityacārucaritaṃ prasādaviśadaṃ manah / vātsalyapeśalā vāṇī na kasyādarabhūmayaḥ

Sanskrit only: no published translation is held for this verse.

गृहीतो ऽस्माभिराचारः पूजापरिकरोचितह् । आत्मार्पणं कुलान्तं वः परायत्ता हि योषितः

gṛhīto 'smābhirācāraḥ pūjāparikarocitah / ātmārpaṇaṃ kulāntaṃ vaḥ parāyattā hi yoṣitaḥ

Sanskrit only: no published translation is held for this verse.

कन्याभावादपक्रान्ता यूयं परपरिग्रहाः । विश्रम्भेण भगिण्यो मे जनन्यः स्नेहगौरवात्

kanyābhāvādapakrāntā yūyaṃ paraparigrahāḥ / viśrambheṇa bhagiṇyo me jananyaḥ snehagauravāt

Sanskrit only: no published translation is held for this verse.

परवित्तं विषं येषां जनन्यश्चान्ययोषितः । परहिंसात्महिंसौव पक्षास्तेषां निरत्ययाः

paravittaṃ viṣaṃ yeṣāṃ jananyaścānyayoṣitaḥ / parahiṃsātmahiṃsauva pakṣāsteṣāṃ niratyayāḥ

Sanskrit only: no published translation is held for this verse.

पौशुन्यासत्यपारुष्यभिन्नवादोज्झितं वचः । सदैव वदने येषाम् तेषाम् सर्वाशिषा दिशः

pauśunyāsatyapāruṣyabhinnavādojjhitaṃ vacaḥ / sadaiva vadane yeṣām teṣām sarvāśiṣā diśaḥ

Sanskrit only: no published translation is held for this verse.

अभिध्यारहितं चेतो व्यापारपरिवर्जितम् । मिथ्यादृष्टिविहीनं च येषां ते सत्पथं श्रिताः

abhidhyārahitaṃ ceto vyāpāraparivarjitam / mithyādṛṣṭivihīnaṃ ca yeṣāṃ te satpathaṃ śritāḥ

Sanskrit only: no published translation is held for this verse.

दशाकुशलमार्गेभ्यो निर्गतानां निसर्गतः । एते कुशलवर्गस्य मार्गाः स्वर्गे निरर्गलाः

daśākuśalamārgebhyo nirgatānāṃ nisargataḥ / ete kuśalavargasya mārgāḥ svarge nirargalāḥ

Sanskrit only: no published translation is held for this verse.

धीरेव धन्यं धनमुन्नतानां विद्यैव चक्षुर्विजितेन्द्रियाणाम् । दयैव पुण्यं पुरुषोत्तमानां आत्मैव तीर्थं शुचिमानसानाम्

dhīreva dhanyaṃ dhanamunnatānāṃ vidyaiva cakṣurvijitendriyāṇām / dayaiva puṇyaṃ puruṣottamānāṃ ātmaiva tīrthaṃ śucimānasānām

Sanskrit only: no published translation is held for this verse.

एवंविधो ऽयं गुणसंनिवेशः शीलेन वैमल्यमुपैति पुंसाम् । सद्रत्नमुक्तानिकरातिरितं शीलं सतामाभरणं वदन्ति

evaṃvidho 'yaṃ guṇasaṃniveśaḥ śīlena vaimalyamupaiti puṃsām / sadratnamuktānikarātiritaṃ śīlaṃ satāmābharaṇaṃ vadanti

Sanskrit only: no published translation is held for this verse.

इत्युक्तमाकर्ण्य गुणानुरूपं सत्त्वार्थिना तेन जितेन्द्रियेण । तुष्टास्तमूचुर्भुवि चन्द्रलोकं ताः कौतुकायैवमुखैः सृजन्त्यः

ityuktamākarṇya guṇānurūpaṃ sattvārthinā tena jitendriyeṇa / tuṣṭāstamūcurbhuvi candralokaṃ tāḥ kautukāyaivamukhaiḥ sṛjantyaḥ

Sanskrit only: no published translation is held for this verse.

मणेरिवानर्घगुणोज्ज्वलस्य दृष्टैव साधोरुचिता रुचिस्ते । ययैव मौलौ हृदये श्रुतौ च सद्भिः सदैवाभरणीकृतो ऽसि

maṇerivānarghaguṇojjvalasya dṛṣṭaiva sādhorucitā ruciste / yayaiva maulau hṛdaye śrutau ca sadbhiḥ sadaivābharaṇīkṛto 'si

Sanskrit only: no published translation is held for this verse.

मणिर्महार्हः प्रथितप्रभावः प्रगृह्यतामात्मसमस्त्वयायम् । ध्वजार्पितो वर्षति योजनानां सहस्रमेवार्थिसमीहितं यः

maṇirmahārhaḥ prathitaprabhāvaḥ pragṛhyatāmātmasamastvayāyam / dhvajārpito varṣati yojanānāṃ sahasramevārthisamīhitaṃ yaḥ

Sanskrit only: no published translation is held for this verse.

उक्त्वेति रत्नप्रवरं तरुण्यस्तस्मेइ ददुर्मूर्तमिव प्रसादम् । आदाय तं च प्रणयोपचारं सो ऽपि द्वितीयं पुरमाप रौप्यम्

uktveti ratnapravaraṃ taruṇyastasmei dadurmūrtamiva prasādam / ādāya taṃ ca praṇayopacāraṃ so 'pi dvitīyaṃ puramāpa raupyam

Sanskrit only: no published translation is held for this verse.

तत्रादरात्तद्द्विगुणाभिरेव स पूजितह् किन्नरकामिनीभिः । क्रमेण तेनैव विशुद्धबुद्धिर्लेभे मणिं तद्द्विगुणप्रभावम्

tatrādarāttaddviguṇābhireva sa pūjitah kinnarakāminībhiḥ / krameṇa tenaiva viśuddhabuddhirlebhe maṇiṃ taddviguṇaprabhāvam

Sanskrit only: no published translation is held for this verse.

* * * * * * * * * * * * * * * * । * * * * * * * * * * * * * * * *

* * * * * * * * * * * * * * * * / * * * * * * * * * * * * * * * *

Sanskrit only: no published translation is held for this verse.

प्राप्तश्च तं रत्नमयं चतुर्थं पुरं ततः सर्वपुराधिकश्चि । सो ऽभ्यर्थितस्तद्द्विगुणाभिरग्रे गुणाधिकः किन्नरसुन्दरीभिः

prāptaśca taṃ ratnamayaṃ caturthaṃ puraṃ tataḥ sarvapurādhikaści / so 'bhyarthitastaddviguṇābhiragre guṇādhikaḥ kinnarasundarībhiḥ

Sanskrit only: no published translation is held for this verse.

तथैव सद्धर्मकथाप्रसङ्गैस्तातोषितास्तेन सुसंयतेन । उत्फुल्लनीत्पलदामदीर्घकटाक्षविक्षिप्तकरास्तमूचुः

tathaiva saddharmakathāprasaṅgaistātoṣitāstena susaṃyatena / utphullanītpaladāmadīrghakaṭākṣavikṣiptakarāstamūcuḥ

Sanskrit only: no published translation is held for this verse.

भ्रातास्ति नः किन्नरराजवंशरत्नाकरेन्दुर्बदराभिधानः । तस्यास्पदं द्वीपमिदं महार्हं स्वनामचिह्नं प्रथितं समृद्ध्या

bhrātāsti naḥ kinnararājavaṃśaratnākarendurbadarābhidhānaḥ / tasyāspadaṃ dvīpamidaṃ mahārhaṃ svanāmacihnaṃ prathitaṃ samṛddhyā

Sanskrit only: no published translation is held for this verse.

रत्नं चेदम् नियमविधिना पोषधाख्यव्रतेन न्यस्तं भास्वत्किरणनिकरं पुण्यभाजां प्रयत्नात् वर्षत्येव स्थिरपरहितव्याप्तये गृह्यताम् तत्

ratnaṃ cedam niyamavidhinā poṣadhākhyavratena nyastaṃ bhāsvatkiraṇanikaraṃ puṇyabhājāṃ prayatnāt varṣatyeva sthiraparahitavyāptaye gṛhyatām tat

Sanskrit only: no published translation is held for this verse.

इत्युत्पाट्यामरतरुफलं सादरं सुन्दरीभिः प्रेमोद्दामप्रणयसुभगं दत्तमासाद्य रत्नम् । बालाहाख्यं विजितपवनं तं प्रकृष्टं तुरङ्गं सो ऽप्यारुह्य स्वनगरमगाल्लब्धमार्गोपदेशः

ityutpāṭyāmarataruphalaṃ sādaraṃ sundarībhiḥ premoddāmapraṇayasubhagaṃ dattamāsādya ratnam / bālāhākhyaṃ vijitapavanaṃ taṃ prakṛṣṭaṃ turaṅgaṃ so 'pyāruhya svanagaramagāllabdhamārgopadeśaḥ

Sanskrit only: no published translation is held for this verse.

तस्मिन् काले विपुलकुशलैः स्वर्गमार्गं प्रयाते वाराणस्यां विशदयशसि क्ष्मापतौ ब्रह्मदत्ते । श्रीमान् सर्वप्रणयिफलदः सुप्रियः पौरमुख्यैर् लोकत्राणे विनिहितमतिर्धर्मराज्ये ऽभिषिक्तः

tasmin kāle vipulakuśalaiḥ svargamārgaṃ prayāte vārāṇasyāṃ viśadayaśasi kṣmāpatau brahmadatte / śrīmān sarvapraṇayiphaladaḥ supriyaḥ pauramukhyair lokatrāṇe vinihitamatirdharmarājye 'bhiṣiktaḥ

Sanskrit only: no published translation is held for this verse.

ततः शिरःस्नानविधिक्रमेण तत्पञ्चदश्याम् ध्वजमूर्ध्नि रत्नम् । स पोषधोपोषित एव धृत्वा चकार विश्वं परिपूर्णकामम्

tataḥ śiraḥsnānavidhikrameṇa tatpañcadaśyām dhvajamūrdhni ratnam / sa poṣadhopoṣita eva dhṛtvā cakāra viśvaṃ paripūrṇakāmam

Sanskrit only: no published translation is held for this verse.

कृत्वा यात्राम् परहितफलां वत्सराणाम् शतेन स्थित्वा राज्ये महति निखिलं पूरयित्वा च लोकम् । पुत्रं धृत्वा नरपतिपदे प्राप्य सर्वोपशान्तिं तत्त्वज्ञो ऽसौ किमपि परमं ब्रह्मभावं जगाम

kṛtvā yātrām parahitaphalāṃ vatsarāṇām śatena sthitvā rājye mahati nikhilaṃ pūrayitvā ca lokam / putraṃ dhṛtvā narapatipade prāpya sarvopaśāntiṃ tattvajño 'sau kimapi paramaṃ brahmabhāvaṃ jagāma

Sanskrit only: no published translation is held for this verse.

स्युरेते दस्यवः सर्वे पूर्वं ये पूरिता मया । रत्नद्रीपाभिगमने तस्मिन् सुप्रियजन्मनि

syurete dasyavaḥ sarve pūrvaṃ ye pūritā mayā / ratnadrīpābhigamane tasmin supriyajanmani

Sanskrit only: no published translation is held for this verse.

इति शास्ता स्ववृत्तान्तकथया विदधे विभुः । दानवीर्योपदेशेन भिक्षूणामनुशासनम्

iti śāstā svavṛttāntakathayā vidadhe vibhuḥ / dānavīryopadeśena bhikṣūṇāmanuśāsanam

Sanskrit only: no published translation is held for this verse.