Garbhāvakrāntyavadāna 10

चम्पोपान्ते विमलनलिनीतीरपर्यन्तवसी शास्ता पूर्वं सकलभुवनानुग्रहाय प्रवृत्तह् । पृष्टः स्पर्शावगतिरुचिना (?) भिक्षुणानन्दनाम्ना गर्भारम्भात् प्रभृति जनताजन्मवृत्तिं जगाद

campopānte vimalanalinītīraparyantavasī śāstā pūrvaṃ sakalabhuvanānugrahāya pravṛttah / pṛṣṭaḥ sparśāvagatirucinā (?) bhikṣuṇānandanāmnā garbhārambhāt prabhṛti janatājanmavṛttiṃ jagāda

Sanskrit only: no published translation is held for this verse.

शुक्लैः कृष्णैः शबलरुचिभिर् देहिनां कर्मसूत्रैश् चित्रं लोके बहुतरदशं दृश्यते जन्मवस्त्रम् । जीर्णस्यापि व्यसनमलिनस्नेहलीनः प्रयत्नैर् यस्यात्यन्तं चिरपरिणतेर् नैव निर्याति रागः

śuklaiḥ kṛṣṇaiḥ śabalarucibhir dehināṃ karmasūtraiś citraṃ loke bahutaradaśaṃ dṛśyate janmavastram / jīrṇasyāpi vyasanamalinasnehalīnaḥ prayatnair yasyātyantaṃ cirapariṇater naiva niryāti rāgaḥ

Sanskrit only: no published translation is held for this verse.

पुंसः शुक्रं विगलितधृतेर् आर्तवं योषितश् च स्पर्शावेशव्यतिकरजुषोः संगमे संनिपातात् । एकीभूतं व्रजति नियमात् कस्य चिद् बीजभावं यो ऽन्तस् तस्मिन् भवति सहसा संनिकाषे यथाग्निः

puṃsaḥ śukraṃ vigalitadhṛter ārtavaṃ yoṣitaś ca sparśāveśavyatikarajuṣoḥ saṃgame saṃnipātāt / ekībhūtaṃ vrajati niyamāt kasya cid bījabhāvaṃ yo 'ntas tasmin bhavati sahasā saṃnikāṣe yathāgniḥ

Sanskrit only: no published translation is held for this verse.

रागोद्गारः स्फटिकशकलं मेघम् अम्भोधिपाथः पुष्पामोदस् तिलं इव शनैः काञ्चनं वाग्नितापः । सो ऽयं गर्भं विशति नियतैर् अप्य् असंलक्ष्यवृत्तिर् वायुर् गन्धैर् इव बहुविधैः कर्मभिर् वास्यमानः

rāgodgāraḥ sphaṭikaśakalaṃ megham ambhodhipāthaḥ puṣpāmodas tilaṃ iva śanaiḥ kāñcanaṃ vāgnitāpaḥ / so 'yaṃ garbhaṃ viśati niyatair apy asaṃlakṣyavṛttir vāyur gandhair iva bahuvidhaiḥ karmabhir vāsyamānaḥ

Sanskrit only: no published translation is held for this verse.

तस्मिन् सूक्ष्मक्रमपरिणतिर् मीनपर्युष्टके (?) ऽसौ नानाकारप्रचुररचनाचित्ररूपो ऽप्य् अलक्ष्यः । कं चित् कालं वहति विकृतिं निर्विकारायमानो मायूराण्डे जलमय इव व्यक्तभक्तिर् मयूरः

tasmin sūkṣmakramapariṇatir mīnaparyuṣṭake (?) 'sau nānākārapracuraracanācitrarūpo 'py alakṣyaḥ / kaṃ cit kālaṃ vahati vikṛtiṃ nirvikārāyamāno māyūrāṇḍe jalamaya iva vyaktabhaktir mayūraḥ

Sanskrit only: no published translation is held for this verse.

तत्राधानाद् घनकललताशल्यपेश्याद्यवस्थास् त्यक्त्वा तास् ता जठरजनितेनोष्मणा पच्यमानः । पूर्णैर् मासैर् नवभिर् अथवावर्तकर्मक्रमो ऽसौ क्लेशं भुङ्क्ते किम् अपि विषमं दुःखसंज्ञाप्रपन्नः

tatrādhānād ghanakalalatāśalyapeśyādyavasthās tyaktvā tās tā jaṭharajanitenoṣmaṇā pacyamānaḥ / pūrṇair māsair navabhir athavāvartakarmakramo 'sau kleśaṃ bhuṅkte kim api viṣamaṃ duḥkhasaṃjñāprapannaḥ

Sanskrit only: no published translation is held for this verse.

काले वृन्तात् स्वयं इव फलं विच्युतं कर्मपाकात् तत्कालोत्थैर् अविहतजवैः प्रेरितः पूतिवातैः । लक्ष्याभ्यासायतनसचिवैर् आचितः कर्मबन्धैर् निर्यात्य् अन्तः शर इव धनुर्यन्त्रणैर् यन्त्रमुक्तः

kāle vṛntāt svayaṃ iva phalaṃ vicyutaṃ karmapākāt tatkālotthair avihatajavaiḥ preritaḥ pūtivātaiḥ / lakṣyābhyāsāyatanasacivair ācitaḥ karmabandhair niryāty antaḥ śara iva dhanuryantraṇair yantramuktaḥ

Sanskrit only: no published translation is held for this verse.

उत्तानास्यः सरलरसनश् चूचुकाग्रं लिहानः स्तन्यं मातुः पिबति यद् असौ नैव कर्णेन नाक्ष्णा । जन्माभ्यासव्यसनयतनायाससंवासलिना सा तस्याग्रे सकलकलनादेशिनि वासनैव

uttānāsyaḥ saralarasanaś cūcukāgraṃ lihānaḥ stanyaṃ mātuḥ pibati yad asau naiva karṇena nākṣṇā / janmābhyāsavyasanayatanāyāsasaṃvāsalinā sā tasyāgre sakalakalanādeśini vāsanaiva

Sanskrit only: no published translation is held for this verse.

स्यूतैर् अन्तर् विविधविषयस्वादसंपादभेदैर् व्याप्तः सूतैर् (?) बिसलव इव व्यक्ततन्तुप्रतानैः । मूधः सो ऽथ प्रकृतिसचिवैर् इन्द्रियैर् दत्तसम्ज्ञः स्तन्यालापाकृतिपरिमलस्पर्शनैर् वेत्ति धात्रीम्

syūtair antar vividhaviṣayasvādasaṃpādabhedair vyāptaḥ sūtair (?) bisalava iva vyaktatantupratānaiḥ / mūdhaḥ so 'tha prakṛtisacivair indriyair dattasamjñaḥ stanyālāpākṛtiparimalasparśanair vetti dhātrīm

Sanskrit only: no published translation is held for this verse.

हस्ताकर्षैः शयनवसनाघर्षणैः पीड्यमानः स्थाने स्थाने तरलिततनुः कीटकैर् भक्ष्यमाणः । नित्याक्रन्दी वचनविरहात् कायिकीं क्लेशशैलीं कं बोब्रूते विषमविपदाम् आस्पदत्वं प्रयातः

hastākarṣaiḥ śayanavasanāgharṣaṇaiḥ pīḍyamānaḥ sthāne sthāne taralitatanuḥ kīṭakair bhakṣyamāṇaḥ / nityākrandī vacanavirahāt kāyikīṃ kleśaśailīṃ kaṃ bobrūte viṣamavipadām āspadatvaṃ prayātaḥ

Sanskrit only: no published translation is held for this verse.

पीडोद्वान्तैश् छुरितवदनः प्रोच्छलत्क्षीरपूरैर् उत्तानोरस्तलनिपतितैर् उक्षितो लक्ष्यते ऽसौ । मायावध्वाः स्मरणहरणप्रौढकेलीविलासे हासेनेव स्फुरितरुचिना निर्भरव्याप्तकायः

pīḍodvāntaiś churitavadanaḥ procchalatkṣīrapūrair uttānorastalanipatitair ukṣito lakṣyate 'sau / māyāvadhvāḥ smaraṇaharaṇaprauḍhakelīvilāse hāseneva sphuritarucinā nirbharavyāptakāyaḥ

Sanskrit only: no published translation is held for this verse.

सो ऽथ प्राप्ते लिपिपरिचये हेलया दत्तहस्ते संसारे ऽस्मिन्न् अविचलितया बन्धलेख्यक्रियासु । जन्मावर्तं निजं इव लिखन् दीर्घं ॐकारम् आदौ वर्गे वर्गे वितरति मतिं भोगसर्गे निविष्टः

so 'tha prāpte lipiparicaye helayā dattahaste saṃsāre 'sminn avicalitayā bandhalekhyakriyāsu / janmāvartaṃ nijaṃ iva likhan dīrghaṃ oṃkāram ādau varge varge vitarati matiṃ bhogasarge niviṣṭaḥ

Sanskrit only: no published translation is held for this verse.

प्राप्तप्रज्ञः कथम् अपि गलद्बालभावप्रमोहः कामौत्सुक्यात् पुनर् अपि परे यौवने नष्टसंज्ञः । निःसारेषु व्यसनविलसद्मेघसौदामिनीनां बध्नात्य् आस्थां स्थिरतरधिया योषितां विभ्रमेषु

prāptaprajñaḥ katham api galadbālabhāvapramohaḥ kāmautsukyāt punar api pare yauvane naṣṭasaṃjñaḥ / niḥsāreṣu vyasanavilasadmeghasaudāminīnāṃ badhnāty āsthāṃ sthirataradhiyā yoṣitāṃ vibhrameṣu

Sanskrit only: no published translation is held for this verse.

वाचि श्रोत्रं वपुर् अपि चलालिङ्गनेष्व् अङ्गनानां घ्राणं वक्त्रासवपरिमले स्वादनं तद्रसे च । पात्रे कुर्वन् दृशम् अपि मुखे सुप्तसर्वक्रियो ऽसौ धत्ते मात्रं तनुपरिणतांनीव सर्वेन्द्रियाणि

vāci śrotraṃ vapur api calāliṅganeṣv aṅganānāṃ ghrāṇaṃ vaktrāsavaparimale svādanaṃ tadrase ca / pātre kurvan dṛśam api mukhe suptasarvakriyo 'sau dhatte mātraṃ tanupariṇatāṃnīva sarvendriyāṇi

Sanskrit only: no published translation is held for this verse.

द्वेष्टि स्निग्धं परिचितपरिद्वेषशीलः स कामी वाञ्छत्य् अन्यां नवनवरसः सप्रयत्नो ऽन्यकामाम् । इत्य् अन्योन्यानुचितचरितालक्ष्यवैलक्ष्यसाक्षी हास्यायैव प्रकृतिविरसश् चित्रतन्त्रो ऽस्य कामः

dveṣṭi snigdhaṃ paricitaparidveṣaśīlaḥ sa kāmī vāñchaty anyāṃ navanavarasaḥ saprayatno 'nyakāmām / ity anyonyānucitacaritālakṣyavailakṣyasākṣī hāsyāyaiva prakṛtivirasaś citratantro 'sya kāmaḥ

Sanskrit only: no published translation is held for this verse.

अल्पाधारे विषयजलधौ मज्जतः सज्जतश् च भ्रष्टस्यास्य प्रतिहतगतेः कुञ्जरस्येव पङ्के । किंकर्तव्यावगतिरहिता जायते मोहमूर्च्छा नीतस्यान्ध्यं कतिपयदिनस्थायिना यौवनेन

alpādhāre viṣayajaladhau majjataḥ sajjataś ca bhraṣṭasyāsya pratihatagateḥ kuñjarasyeva paṅke / kiṃkartavyāvagatirahitā jāyate mohamūrcchā nītasyāndhyaṃ katipayadinasthāyinā yauvanena

Sanskrit only: no published translation is held for this verse.

यावत्कालं भ्रमति चलति प्रीयते जृम्भते ऽसौ स्मेरं स्मेरं वदति मदनालिङ्गितैर् अङ्गभङ्गैः । तावत् तस्योपरि परिपतर्य् एव कालप्रमुक्ता प्रालेयालीधवलपलितच्छद्मना वध्यमाला

yāvatkālaṃ bhramati calati prīyate jṛmbhate 'sau smeraṃ smeraṃ vadati madanāliṅgitair aṅgabhaṅgaiḥ / tāvat tasyopari paripatary eva kālapramuktā prāleyālīdhavalapalitacchadmanā vadhyamālā

Sanskrit only: no published translation is held for this verse.

काले काले क्षणकलनया मोहनिद्रावशेन प्राप्तं नास्मिन् वपुषि सुकृतं नैव दत्तं न भुक्तं । इत्थं चौरैर् इव स मुषितश् चिन्तयत्य् एव दुःखात् संमूढानां अनुशयफलः सो ऽवसादप्रमादः

kāle kāle kṣaṇakalanayā mohanidrāvaśena prāptaṃ nāsmin vapuṣi sukṛtaṃ naiva dattaṃ na bhuktaṃ / itthaṃ caurair iva sa muṣitaś cintayaty eva duḥkhāt saṃmūḍhānāṃ anuśayaphalaḥ so 'vasādapramādaḥ

Sanskrit only: no published translation is held for this verse.

तस्मिन् याते ललितवनितापुष्पवल्लीवसन्ते दुष्कर्माप्तद्रविणतुलया यौवने स्वप्नकल्पे । नष्टाशेषप्रकृतिर् अखिलैः खेदिताङ्गैर् विरक्तैर् राज्यभ्रंशे नृप इव सुखं सो ऽथ शोचत्य् अतीतं

tasmin yāte lalitavanitāpuṣpavallīvasante duṣkarmāptadraviṇatulayā yauvane svapnakalpe / naṣṭāśeṣaprakṛtir akhilaiḥ kheditāṅgair viraktair rājyabhraṃśe nṛpa iva sukhaṃ so 'tha śocaty atītaṃ

Sanskrit only: no published translation is held for this verse.

आयुर् नीतं न च समुचितं याचकायोपनीतं नाप्य् उन्नीतं दिशि दिशि यशः सत्पथं न प्रतीतं पीतं याच्ञाविषम् अधिगतं स्फीतसंतापशीतं भीतं पापात् किम् अपि न मया यत् तद् एव प्रणीतं

āyur nītaṃ na ca samucitaṃ yācakāyopanītaṃ nāpy unnītaṃ diśi diśi yaśaḥ satpathaṃ na pratītaṃ pītaṃ yācñāviṣam adhigataṃ sphītasaṃtāpaśītaṃ bhītaṃ pāpāt kim api na mayā yat tad eva praṇītaṃ

Sanskrit only: no published translation is held for this verse.

क्वासौ हेमद्रुमरुचिहरा हारिणी यौवनश्रीः कायः क्वायं कृमिहततरुप्रायविच्छायपाकः । दूराद् एताः परिहृतदृशाः कोणलीनं तरुण्यः शुष्कं शीतं तरुम् इव वने वानरं मां वदन्ति

kvāsau hemadrumaruciharā hāriṇī yauvanaśrīḥ kāyaḥ kvāyaṃ kṛmihatataruprāyavicchāyapākaḥ / dūrād etāḥ parihṛtadṛśāḥ koṇalīnaṃ taruṇyaḥ śuṣkaṃ śītaṃ tarum iva vane vānaraṃ māṃ vadanti

Sanskrit only: no published translation is held for this verse.

सो ऽयं कायः श्रयति विलयं नैव मायानिकायः स्रस्ताः सर्वे दशनमणयस् ते च केशाः न दोषाः । गात्रोत्साहे प्रहरति मरुन् नैव मोहप्ररोहे क्षीणस्येयं शयनशरणस्यापि तृष्णाक्षया मे

so 'yaṃ kāyaḥ śrayati vilayaṃ naiva māyānikāyaḥ srastāḥ sarve daśanamaṇayas te ca keśāḥ na doṣāḥ / gātrotsāhe praharati marun naiva mohaprarohe kṣīṇasyeyaṃ śayanaśaraṇasyāpi tṛṣṇākṣayā me

Sanskrit only: no published translation is held for this verse.

संचिन्त्येति प्रसृतविषमश्वासहिक्कार्दितो (?) ऽसौ सद्यस् त्यक्तुं चिरपरिचिताम् उद्यतो लोकयात्राम् । मूकिभूतः स्वजनविरहं ध्यायति ध्वस्तधैर्यः शक्तिच्छेदाद् ऋणं इव महत् प्राप्तकालो दरिद्रः

saṃcintyeti prasṛtaviṣamaśvāsahikkārdito (?) 'sau sadyas tyaktuṃ ciraparicitām udyato lokayātrām / mūkibhūtaḥ svajanavirahaṃ dhyāyati dhvastadhairyaḥ śakticchedād ṛṇaṃ iva mahat prāptakālo daridraḥ

Sanskrit only: no published translation is held for this verse.

भूमिं गेहं वसु परिजनं पुत्रदारादि चान्यत् तावत् तावत् कलयति धिया प्राणपर्यन्तकाले । यावज् जन्मन्य् अपि पुनर् असौ स्नेहमोहानुबन्धैस् तैस् तैर् अन्तः कृतपरिचयस् तन्मयीभावम् एति

bhūmiṃ gehaṃ vasu parijanaṃ putradārādi cānyat tāvat tāvat kalayati dhiyā prāṇaparyantakāle / yāvaj janmany api punar asau snehamohānubandhais tais tair antaḥ kṛtaparicayas tanmayībhāvam eti

Sanskrit only: no published translation is held for this verse.

दुःखं दुःसहपापकर्मजनितं कुम्भीसहस्रान्तरे भुक्त्वा रौरवकालसूत्रनरकेष्व् आवर्तते योनिषु । यद् वा पुण्यकलार्जितं सुखपदं तत् संक्षये दुःखदं सानागामिफलाप्तये विमलधीस् तस्मात् समाधीयतां

duḥkhaṃ duḥsahapāpakarmajanitaṃ kumbhīsahasrāntare bhuktvā rauravakālasūtranarakeṣv āvartate yoniṣu / yad vā puṇyakalārjitaṃ sukhapadaṃ tat saṃkṣaye duḥkhadaṃ sānāgāmiphalāptaye vimaladhīs tasmāt samādhīyatāṃ

Sanskrit only: no published translation is held for this verse.

इति भीमभवाम्भोधिसंतारणकृतव्रतः । समादिदेश भगवान् सत्त्वानां कुशलाप्तये

iti bhīmabhavāmbhodhisaṃtāraṇakṛtavrataḥ / samādideśa bhagavān sattvānāṃ kuśalāptaye

Sanskrit only: no published translation is held for this verse.