Ksemendra: Narmamala 2

मिथ्या महावराहेण दैत्येष्वाडम्बरः कृतः । आस्थानदिविरैर्ग्रस्ता यदियं नोद्धृता क्षितिः

mithyā mahāvarāheṇa daityeṣvāḍambaraḥ kṛtaḥ / āsthānadivirairgrastā yadiyaṃ noddhṛtā kṣitiḥ

Sanskrit only: no published translation is held for this verse.

उत्थाय वेश्याशयनात्प्रभाते मद्यघूर्णितः । धनार्थी दिविरः शस्तमुखं द्रष्टुं प्रतीक्षते

utthāya veśyāśayanātprabhāte madyaghūrṇitaḥ / dhanārthī diviraḥ śastamukhaṃ draṣṭuṃ pratīkṣate

Sanskrit only: no published translation is held for this verse.

नूनं निशि भगापानं करोति दिविरः सदा । प्रातः प्रातर्मृदा वक्त्रं क्षालयत्यन्यथा कथम्

nūnaṃ niśi bhagāpānaṃ karoti diviraḥ sadā / prātaḥ prātarmṛdā vaktraṃ kṣālayatyanyathā katham

Sanskrit only: no published translation is held for this verse.

स्नातो मृद्दर्भतिलभृत्करोति सुचिरं जपम् । दिविरः कूटसंकेतपटीपात्राणि चिन्तयन्

snāto mṛddarbhatilabhṛtkaroti suciraṃ japam / diviraḥ kūṭasaṃketapaṭīpātrāṇi cintayan

Sanskrit only: no published translation is held for this verse.

विप्रं पुरः समायान्तं थूत्कृत्य त्वरितः पुनः । प्रविश्य गेहं निर्याति शङ्कमानः पराभवम्

vipraṃ puraḥ samāyāntaṃ thūtkṛtya tvaritaḥ punaḥ / praviśya gehaṃ niryāti śaṅkamānaḥ parābhavam

Sanskrit only: no published translation is held for this verse.

श्रीकामो गोमयभ्रान्त्या वन्दते श्वशकृत्पथि । पुरश्चाप्तां सिद्धिकामश्चण्डालीं सकरण्डकाम्

śrīkāmo gomayabhrāntyā vandate śvaśakṛtpathi / puraścāptāṃ siddhikāmaścaṇḍālīṃ sakaraṇḍakām

Sanskrit only: no published translation is held for this verse.

सुप्रभाततरायातैः सकष्टशटिलैर्वृतः । आस्थानं याति कलयन्भृष्टमांसं सपानकम्

suprabhātatarāyātaiḥ sakaṣṭaśaṭilairvṛtaḥ / āsthānaṃ yāti kalayanbhṛṣṭamāṃsaṃ sapānakam

Sanskrit only: no published translation is held for this verse.

भूर्ज*पेटलडत्क्लिन्नमषी सुभृतभाजनः । कथयन्निव गन्धेन भाविनीं नरकस्थितिम्

bhūrja*peṭalaḍatklinnamaṣī subhṛtabhājanaḥ / kathayanniva gandhena bhāvinīṃ narakasthitim

Sanskrit only: no published translation is held for this verse.

मषीविषार्द्रया निघ्नन्साधून्कलमदंष्ट्रया । आस्थानजलधेरन्तर्दिविरो मकरायते

maṣīviṣārdrayā nighnansādhūnkalamadaṃṣṭrayā / āsthānajaladherantardiviro makarāyate

Sanskrit only: no published translation is held for this verse.

तन्मषीविप्रुषस्तस्य दृश्यन्ते कलमच्युताः । भुवो विलुण्ठ्यमानायाः साञ्जनाश्रुकणा इव

tanmaṣīvipruṣastasya dṛśyante kalamacyutāḥ / bhuvo viluṇṭhyamānāyāḥ sāñjanāśrukaṇā iva

Sanskrit only: no published translation is held for this verse.

अधोमुखा विमानेभ्यः पतन्तो दिवि रोदनम् । कुर्वन्ति पितरस्तस्य यो भुङ्क्ते दिविरोदनम्

adhomukhā vimānebhyaḥ patanto divi rodanam / kurvanti pitarastasya yo bhuṅkte divirodanam

Sanskrit only: no published translation is held for this verse.

जामातुः श्रीमतो दृष्ट्वा स गृहं हर्षनिर्भरः । अचिन्तयत्कदास्यापि षटिर्दैवाद्भवेदिति

jāmātuḥ śrīmato dṛṣṭvā sa gṛhaṃ harṣanirbharaḥ / acintayatkadāsyāpi ṣaṭirdaivādbhavediti

Sanskrit only: no published translation is held for this verse.

आस्थानदिविरः । तत्सङ्गत्याप्यदृश्यन्त भूर्जभट्टा भयङ्कराः । तद्गृहे कलयन्तो ऽन्तस्तस्य स्थावरविप्लवम्

āsthānadiviraḥ / tatsaṅgatyāpyadṛśyanta bhūrjabhaṭṭā bhayaṅkarāḥ / tadgṛhe kalayanto 'ntastasya sthāvaraviplavam

Sanskrit only: no published translation is held for this verse.

संहरन्ति सदा लोकान्ये सस्थावरजङ्गमान् । तेभ्यः प्रलयकारिभ्यो भट्टेभ्यो ऽस्तु नमो नमः

saṃharanti sadā lokānye sasthāvarajaṅgamān / tebhyaḥ pralayakāribhyo bhaṭṭebhyo 'stu namo namaḥ

Sanskrit only: no published translation is held for this verse.

षटीपाशसमाकृष्टः प्राप्तो ऽधिकरणं भयात् । साधुर्निगीर्यते भट्टैर्मत्स्यैरिव जले बलिः

ṣaṭīpāśasamākṛṣṭaḥ prāpto 'dhikaraṇaṃ bhayāt / sādhurnigīryate bhaṭṭairmatsyairiva jale baliḥ

Sanskrit only: no published translation is held for this verse.

भट्टैर्भट्टैः सदिविरैः शटीनिपतितो जनः । मुच्यते नास्थिशेषो ऽपि रक्तक्षीबैरिव श्वभिः

bhaṭṭairbhaṭṭaiḥ sadiviraiḥ śaṭīnipatito janaḥ / mucyate nāsthiśeṣo 'pi raktakṣībairiva śvabhiḥ

Sanskrit only: no published translation is held for this verse.

ब्राह्मण्याद्ये हता नैव रामेण ब्रह्मराक्षसाः । आस्थानभट्टास्ते मन्ये सदा खादन्ति मानुषान्

brāhmaṇyādye hatā naiva rāmeṇa brahmarākṣasāḥ / āsthānabhaṭṭāste manye sadā khādanti mānuṣān

Sanskrit only: no published translation is held for this verse.

कृतः पराजितो जेता जयी यैश्च पराजितः । तेषां स्वतन्त्रवचसां वचसा केन जीव्यते

kṛtaḥ parājito jetā jayī yaiśca parājitaḥ / teṣāṃ svatantravacasāṃ vacasā kena jīvyate

Sanskrit only: no published translation is held for this verse.

अन्ते नरकपालैर्ये वृता वेतालतां गताः । षट्यन्तःकृतहृद्घण्टा भट्टास्ते कस्य नान्तकाः

ante narakapālairye vṛtā vetālatāṃ gatāḥ / ṣaṭyantaḥkṛtahṛdghaṇṭā bhaṭṭāste kasya nāntakāḥ

Sanskrit only: no published translation is held for this verse.

पश्यन्नन्धो वदन्मूकः शृण्वंश्च बधिरो ऽधमः । उत्कोचेन विना भट्टश्चिरं निद्रायते शठः

paśyannandho vadanmūkaḥ śṛṇvaṃśca badhiro 'dhamaḥ / utkocena vinā bhaṭṭaściraṃ nidrāyate śaṭhaḥ

Sanskrit only: no published translation is held for this verse.

उत्कोचभक्षणं छिद्रशिक्षणं साधुतक्षणम् । षटिसन्धुक्षणं कूटरक्षणं भट्टलक्षणम्

utkocabhakṣaṇaṃ chidraśikṣaṇaṃ sādhutakṣaṇam / ṣaṭisandhukṣaṇaṃ kūṭarakṣaṇaṃ bhaṭṭalakṣaṇam

Sanskrit only: no published translation is held for this verse.

चर्मकृन्नर्तकीभ्राता सङ्गत्या नर्तको ऽभवत् । सो ऽथ गारुडकल्पज्ञः प्रयातः सस्यपालताम्

carmakṛnnartakībhrātā saṅgatyā nartako 'bhavat / so 'tha gāruḍakalpajñaḥ prayātaḥ sasyapālatām

Sanskrit only: no published translation is held for this verse.

सो ऽपि ग्रामगणेशस्य प्राप्तः प्रासादपालताम् । सन्धिविग्रहकायस्थचाक्रिकासेवको ऽधमः

so 'pi grāmagaṇeśasya prāptaḥ prāsādapālatām / sandhivigrahakāyasthacākrikāsevako 'dhamaḥ

Sanskrit only: no published translation is held for this verse.

भट्टत्वमाप्तवान्दूतो *द्रङ्गदेशगतागतात् । तस्य पुत्राश्च पौत्राश्च सर्वे ऽधिकरणद्विजाः

bhaṭṭatvamāptavāndūto *draṅgadeśagatāgatāt / tasya putrāśca pautrāśca sarve 'dhikaraṇadvijāḥ

Sanskrit only: no published translation is held for this verse.

कुतो ऽन्यथा भवत्येषां वचश्चर्मकृतामिव । कक्षे सुमहती भस्त्रा शटिदीनारभाजनम्

kuto 'nyathā bhavatyeṣāṃ vacaścarmakṛtāmiva / kakṣe sumahatī bhastrā śaṭidīnārabhājanam

Sanskrit only: no published translation is held for this verse.