Kesava Kasmiri: Kramadipika 8

अष्टमं पटलम् अथान्तरं वश्यकरः प्रयोगः कथ्यते- अथोच्यते वश्य-विधिः पुरोक्त- दशार्णतो ऽष्टादश-वर्णतश् च । स्मृत्यैव यौ सर्व-जगत् प्रियत्वं मनू मनुज्ञस्य सदा विधत्तः

aṣṭamaṃ paṭalam athāntaraṃ vaśyakaraḥ prayogaḥ kathyate- athocyate vaśya-vidhiḥ purokta- daśārṇato 'ṣṭādaśa-varṇataś ca | smṛtyaiva yau sarva-jagat priyatvaṃ manū manujñasya sadā vidhattaḥ

Sanskrit only: no published translation is held for this verse.

फुल्लैर् वन्य-पसूनैर् अमुम् अरुणतरैर् अर्चयित्वा दिनादौ नित्यं नित्य-क्रियायां रतमथदिनमध्योक्त-क्प्त्या मुकुन्दम् । अष्टोपेतं सहस्रं दश-लिपिम् अनुवर्य जपेद् यः स मन्त्री कुर्याद् वश्यान्य् अवश्यं मुखर-मुख-भुवां मण्डलान् मण्डलानि

phullair vanya-pasūnair amum aruṇatarair arcayitvā dinādau nityaṃ nitya-kriyāyāṃ ratamathadinamadhyokta-kptyā mukundam | aṣṭopetaṃ sahasraṃ daśa-lipim anuvarya japed yaḥ sa mantrī kuryād vaśyāny avaśyaṃ mukhara-mukha-bhuvāṃ maṇḍalān maṇḍalāni

Sanskrit only: no published translation is held for this verse.

क्षत्रिय-वैश्य-शूद्रस्यापि प्रयोग-त्रयं दर्शयति- जाती-प्रसूनैर् वर-गोप-वेषं क्रीडा-रतं रक्त-हयारि-पुष्पैः । नीलोत्पलैर् गीति-रतं पुरोवद् इष्ट्वा नृपादीन् वशयेत् क्रमेण

kṣatriya-vaiśya-śūdrasyāpi prayoga-trayaṃ darśayati- jātī-prasūnair vara-gopa-veṣaṃ krīḍā-rataṃ rakta-hayāri-puṣpaiḥ | nīlotpalair gīti-rataṃ purovad iṣṭvā nṛpādīn vaśayet krameṇa

Sanskrit only: no published translation is held for this verse.

प्रयोगान्तरम् आह- सित-कुसुम-समेतैस् तण्डुलैर् आज्य-सिक्तैर् दश-शतम् अथ हुत्वा नित्यशः सप्त-रात्रम् । कच-भुवि च ललाटे भस्म तद् धारयन्ना वशयति मनुजस् त्रीं सापि नॄंस् तद्वद् एव

prayogāntaram āha- sita-kusuma-sametais taṇḍulair ājya-siktair daśa-śatam atha hutvā nityaśaḥ sapta-rātram | kaca-bhuvi ca lalāṭe bhasma tad dhārayannā vaśayati manujas trīṃ sāpi nṝṃs tadvad eva

Sanskrit only: no published translation is held for this verse.

प्रयोगान्तरम् आह- ताम्बूल-वस्त्र-कुसुमाञ्जन-चन्दनाद्यं जप्तं सहस्र-त्रयम् अन्यतरेण मन्वोः । यस्मै ददाति मनु-वित् सजनो ऽस्य मङ्क्षु स्यात् किङ्करा न खलु तत्र विचारणीयम्

prayogāntaram āha- tāmbūla-vastra-kusumāñjana-candanādyaṃ japtaṃ sahasra-trayam anyatareṇa manvoḥ | yasmai dadāti manu-vit sajano 'sya maṅkṣu syāt kiṅkarā na khalu tatra vicāraṇīyam

Sanskrit only: no published translation is held for this verse.

प्रयोगान्तरम् आह- राज-द्वारे व्यवहारे सभाया द्यूते वादे चाष्ट-युक्तं शतं च । जप्त्वा वाचं प्रथमाम् ईरयेद् यो वर्तेतासौ तत्र तत्रोपविष्टान्

prayogāntaram āha- rāja-dvāre vyavahāre sabhāyā dyūte vāde cāṣṭa-yuktaṃ śataṃ ca | japtvā vācaṃ prathamām īrayed yo vartetāsau tatra tatropaviṣṭān

Sanskrit only: no published translation is held for this verse.

प्रयोगान्तरम् आह- आसीनं मुरमथनं कदम्ब-मूले गायन्तं मधुरतरं व्रजाङ्गनाभिः । स्मृत्वाग्नौ मधु-मिलितैर् मयूरकेध्मैर् हुत्वासौ वशयति मन्त्रवित् त्रिलोकीम्

prayogāntaram āha- āsīnaṃ muramathanaṃ kadamba-mūle gāyantaṃ madhurataraṃ vrajāṅganābhiḥ | smṛtvāgnau madhu-militair mayūrakedhmair hutvāsau vaśayati mantravit trilokīm

Sanskrit only: no published translation is held for this verse.

प्रयोगान्तरम् आह- रास-मध्य-गतम् अच्युतं स्मरन् यो जपेद् दश-शतं दशाक्षरम् । नित्यशो झटिति मासतो नरो वाञ्छिताम् अभिवहेत् स कन्यकाम्

prayogāntaram āha- rāsa-madhya-gatam acyutaṃ smaran yo japed daśa-śataṃ daśākṣaram | nityaśo jhaṭiti māsato naro vāñchitām abhivahet sa kanyakām

Sanskrit only: no published translation is held for this verse.

यो नरः पूर्वोक्त-रास-मध्य-गतं कृष्णं ध्यायन् दशाक्षरं मन्त्रं प्रत्यहं दश-शतं जपेत् स मासैकेन शीघ्रम् एव वाञ्छितां कन्यां प्राप्नोति ॥८॥ -ओ)ओ(- प्रयोगान्तरम् आह- तुङ्ग-कुन्दम् अधिरूढम् अच्युतं वा विचिन्त्य दिनशः सहस्रकम् । साष्टकं जपति सा हि मण्डलाद् वाञ्छितं वरम् उपैति कन्यका

yo naraḥ pūrvokta-rāsa-madhya-gataṃ kṛṣṇaṃ dhyāyan daśākṣaraṃ mantraṃ pratyahaṃ daśa-śataṃ japet sa māsaikena śīghram eva vāñchitāṃ kanyāṃ prāpnoti ||8|| -o)O(- prayogāntaram āha- tuṅga-kundam adhirūḍham acyutaṃ vā vicintya dinaśaḥ sahasrakam | sāṣṭakaṃ japati sā hi maṇḍalād vāñchitaṃ varam upaiti kanyakā

Sanskrit only: no published translation is held for this verse.

समान-फलं प्रयोगान्तरम् आह- नृत्यन्तं व्रज-सुन्दरी-जन-कराम्भोजानि संगृह्य तं ध्यात्वाष्टादश-वर्णकं मनु-वरं लक्षं जपन् मन्त्रवित् । लाजानम् अथवा मधु-प्लुततरैर् हुत्वायुतं चूर्णकैर् उद्धोढुं प्रजपेच् च तावद् अचिराद् आकाङ्क्षितां कन्यकाम्

samāna-phalaṃ prayogāntaram āha- nṛtyantaṃ vraja-sundarī-jana-karāmbhojāni saṃgṛhya taṃ dhyātvāṣṭādaśa-varṇakaṃ manu-varaṃ lakṣaṃ japan mantravit | lājānam athavā madhu-plutatarair hutvāyutaṃ cūrṇakair uddhoḍhuṃ prajapec ca tāvad acirād ākāṅkṣitāṃ kanyakām

Sanskrit only: no published translation is held for this verse.

प्रयोगान्तरम् आह- अष्टादशाक्षरेण द्विज-तरुजैस् त्रिमध्वक्तैर् अयुतम् । कुशैस् तिलैर् वा स-तण्डुलैर् वशयितुं द्विजान् जुहुयात्

prayogāntaram āha- aṣṭādaśākṣareṇa dvija-tarujais trimadhvaktair ayutam | kuśais tilair vā sa-taṇḍulair vaśayituṃ dvijān juhuyāt

Sanskrit only: no published translation is held for this verse.

प्रयोगान्तरम् आह- कृतमाल-भवैर् वशयेन् नृपतीन् मुकुलैश् च कुरुण्टकजैश् च तथा । विशाम् इक्षुर् अकैर् अपि पाटलजैर् इतरान् अपि तद्वद् अथो वशयेत्

prayogāntaram āha- kṛtamāla-bhavair vaśayen nṛpatīn mukulaiś ca kuruṇṭakajaiś ca tathā | viśām ikṣur akair api pāṭalajair itarān api tadvad atho vaśayet

Sanskrit only: no published translation is held for this verse.

प्रयोगान्तरम् आह- अभिनवैः कमलैर् अरुणोत्पलैः समधुरैर् अपि चम्पक-पाटलैः । प्रतिहुनेद् अयुतं क्रमशो ऽचिराद् वशयितुं मुखजादिवराङ्गनाः

prayogāntaram āha- abhinavaiḥ kamalair aruṇotpalaiḥ samadhurair api campaka-pāṭalaiḥ | pratihuned ayutaṃ kramaśo 'cirād vaśayituṃ mukhajādivarāṅganāḥ

Sanskrit only: no published translation is held for this verse.

प्रयोगान्तरम् आह- हयारि-कुसुमैर् नवैस् त्रिमधुराप्लुतैर् नित्यशः सहस्रम् ऋषि-वासरं प्रतिहुनेन् निशीथे बुधः । सुगर्वित-धियं हठात् झटिति वारयोषाम् असौ करोति निज-किङ्करीं स्मर-शिली-मुखैर् अर्दिताम्

prayogāntaram āha- hayāri-kusumair navais trimadhurāplutair nityaśaḥ sahasram ṛṣi-vāsaraṃ pratihunen niśīthe budhaḥ | sugarvita-dhiyaṃ haṭhāt jhaṭiti vārayoṣām asau karoti nija-kiṅkarīṃ smara-śilī-mukhair arditām

Sanskrit only: no published translation is held for this verse.

प्रयोगान्तरम् आह- पटु-संयुतैस् त्रिमधुरार्द्रतरैर् अपि सर्षपैर् दश-शतं त्रितयम् । निशि जुह्वतो ऽस्य हि शची-दयितो ऽप्य् अवशो वशी भवति किं न्व् अपरे

prayogāntaram āha- paṭu-saṃyutais trimadhurārdratarair api sarṣapair daśa-śataṃ tritayam | niśi juhvato 'sya hi śacī-dayito 'py avaśo vaśī bhavati kiṃ nv apare

Sanskrit only: no published translation is held for this verse.

प्रयोगान्तरम् आह- अथ बिल्वजैः फल-समित् प्रसवच्- छदनैर् मधु-द्रुततरैर् हवनात् । कमलैः सिताक्षत-युतैश् च पृथक् कमलां चिराय वशयेद् अचिरात्

prayogāntaram āha- atha bilvajaiḥ phala-samit prasavac- chadanair madhu-drutatarair havanāt | kamalaiḥ sitākṣata-yutaiś ca pṛthak kamalāṃ cirāya vaśayed acirāt

Sanskrit only: no published translation is held for this verse.

प्रयोगान्तरम् आह- अपहृत्य गोप-वनिताम्बराण्यामा हृदयैः कदम्बम् अधिरूढम् अच्युतम् । प्रजपेत् स्मरन् निशि सहस्रम् आनयेद् द्रुतम् उर्वशीम् अपि हठाद् दशाहतः

prayogāntaram āha- apahṛtya gopa-vanitāmbarāṇyāmā hṛdayaiḥ kadambam adhirūḍham acyutam | prajapet smaran niśi sahasram ānayed drutam urvaśīm api haṭhād daśāhataḥ

Sanskrit only: no published translation is held for this verse.

मन्त्रयोर् माहात्म्यम् आह- बहुना किम् अत्र कथितेन मन्त्रयोर् अनयोः सदृक् न हि परो वशी कृतौ । अभिकृष्टि-कर्मणि विदग्ध-योषितां कुसुमायुधास्त्र-मय-वर्ष्मणोर् इह

mantrayor māhātmyam āha- bahunā kim atra kathitena mantrayor anayoḥ sadṛk na hi paro vaśī kṛtau | abhikṛṣṭi-karmaṇi vidagdha-yoṣitāṃ kusumāyudhāstra-maya-varṣmaṇor iha

Sanskrit only: no published translation is held for this verse.

मोक्ष-साधक-प्रयोगान्तरम् आह- वन्दे कुन्देन्दु-गौरं तरुणम् अरुण-पाथोज-पत्राभ-नेत्रं चक्रं शङ्खं गदाब्जे निज-भुज-परिघैर् आयतैर् आदधानम् । दिव्यैर् भूषाङ्ग-रागैर् नव-नलिन-लसन्-मालया च प्रदीप्तं प्रोद्यत्-पीताम्बराढ्यं मुनिभिर् अभिवृतं पद्म-संस्थं मुकुन्दम्

mokṣa-sādhaka-prayogāntaram āha- vande kundendu-gauraṃ taruṇam aruṇa-pāthoja-patrābha-netraṃ cakraṃ śaṅkhaṃ gadābje nija-bhuja-parighair āyatair ādadhānam | divyair bhūṣāṅga-rāgair nava-nalina-lasan-mālayā ca pradīptaṃ prodyat-pītāmbarāḍhyaṃ munibhir abhivṛtaṃ padma-saṃsthaṃ mukundam

Sanskrit only: no published translation is held for this verse.

एवं ध्यात्वा पुमांसं स्फुट-हृदय-सरोजम् आसीनामाद्यं सान्द्राभोज-च्छविं वा द्रुत-कनक-निभं वा जपेद् अर्क-लक्षम् । मन्वोर् एकं द्वितारान्तरितमथहुनेद् अर्क-साहस्रम् इध्मैः क्षीर-द्रुत्यैः पयोक्तैः स-मधु-घृत-सितेनाथवा पायसेन

evaṃ dhyātvā pumāṃsaṃ sphuṭa-hṛdaya-sarojam āsīnāmādyaṃ sāndrābhoja-cchaviṃ vā druta-kanaka-nibhaṃ vā japed arka-lakṣam | manvor ekaṃ dvitārāntaritamathahuned arka-sāhasram idhmaiḥ kṣīra-drutyaiḥ payoktaiḥ sa-madhu-ghṛta-sitenāthavā pāyasena

Sanskrit only: no published translation is held for this verse.

ततो लोकाध्यक्षं धुर्व-चिति-सद्-आनन्द-वपुषं निजे हृत्-पाथोजे भव-तिमिर-सम्भेद-मिहिरम् । निजैक्येन ध्यायन् मनुम् अमल-चेताः प्रतिदिनं त्रि-साहस्रं जप्यात् प्रयजतु सायाह्न-विधिना

tato lokādhyakṣaṃ dhurva-citi-sad-ānanda-vapuṣaṃ nije hṛt-pāthoje bhava-timira-sambheda-mihiram | nijaikyena dhyāyan manum amala-cetāḥ pratidinaṃ tri-sāhasraṃ japyāt prayajatu sāyāhna-vidhinā

Sanskrit only: no published translation is held for this verse.

विधिं यो ऽमुं भक्त्या भजति नियतं सुस्थिर-मतिर् भवाम्भोधिं भीमं विषम-विषय-ग्राह-निकरैः । तरङ्गैर् उत्तुङ्गैर् जनि-मृति-समाख्याइः प्रविततं समुत्तीर्यानन्तं व्रजति परमं धाम स हरेः

vidhiṃ yo 'muṃ bhaktyā bhajati niyataṃ susthira-matir bhavāmbhodhiṃ bhīmaṃ viṣama-viṣaya-grāha-nikaraiḥ | taraṅgair uttuṅgair jani-mṛti-samākhyāiḥ pravitataṃ samuttīryānantaṃ vrajati paramaṃ dhāma sa hareḥ

Sanskrit only: no published translation is held for this verse.

गृणंस् तस्य नामानि शृण्वंस् तदीयाः कथाः संस्मरंस् तस्य रूपाणि नित्यम् । नमंस् तत्-पदाम्भोरुहं भक्ति-नम्रः स पूज्यो बुधैर् नित्य-युक्तः स एव

gṛṇaṃs tasya nāmāni śṛṇvaṃs tadīyāḥ kathāḥ saṃsmaraṃs tasya rūpāṇi nityam | namaṃs tat-padāmbhoruhaṃ bhakti-namraḥ sa pūjyo budhair nitya-yuktaḥ sa eva

Sanskrit only: no published translation is held for this verse.

इदानीं परम-मन्त्र-द्वयं कथयति- वक्ष्ये मनु-द्वमथातिरहस्यम् अन्यत् संक्षेपतो भुवन-मोहन-नाम-धेयम् । ब्रह्मेन्द्र-वामनयनेन्दुभिर् आदिमान्यस् तत्-पूर्वको वियदृषीक-युतेशङे-हृत्

idānīṃ parama-mantra-dvayaṃ kathayati- vakṣye manu-dvamathātirahasyam anyat saṃkṣepato bhuvana-mohana-nāma-dheyam | brahmendra-vāmanayanendubhir ādimānyas tat-pūrvako viyadṛṣīka-yuteśaṅe-hṛt

Sanskrit only: no published translation is held for this verse.

ऋष्य्-आदिकम् आह- मन्वोस् तु संमोहन-नारदो मुनिः छन्दस् तु गायत्रम् उदीरितं बुधैः । त्रैलोक्य-संमोहन-विष्णु-रेतयोः स्याद् देवता वच्म्य् अधुना षड्-अङ्गकम्

ṛṣy-ādikam āha- manvos tu saṃmohana-nārado muniḥ chandas tu gāyatram udīritaṃ budhaiḥ | trailokya-saṃmohana-viṣṇu-retayoḥ syād devatā vacmy adhunā ṣaḍ-aṅgakam

Sanskrit only: no published translation is held for this verse.

अधुना षड्-अङ्गं वदामि- अक्लीब्-अदीर्घैः स-लवैस् तद् अपि च कलासनारूढैः । उक्तं पूर्ववद् आसन-विन्यासान्तं समाचरेद् अथ तु

adhunā ṣaḍ-aṅgaṃ vadāmi- aklīb-adīrghaiḥ sa-lavais tad api ca kalāsanārūḍhaiḥ | uktaṃ pūrvavad āsana-vinyāsāntaṃ samācared atha tu

Sanskrit only: no published translation is held for this verse.

करयोः शाखासु तले न्यस्य षड्-अङ्गानि चाङ्गुलीषु शरान् । मनु-पुटित-मातृकार्णैर् न्यस्याङ्गे ऽङ्गानि विन्यसेच् च शरान्

karayoḥ śākhāsu tale nyasya ṣaḍ-aṅgāni cāṅgulīṣu śarān | manu-puṭita-mātṛkārṇair nyasyāṅge 'ṅgāni vinyasec ca śarān

Sanskrit only: no published translation is held for this verse.

बाण-न्यास-स्थानान्य् आह- कास्य-हृदय-लिङ्गाङ्घ्रिषुकर-शाखाभिर् नमो ऽन्तकान् ङे ऽन्तान् । शोषण-मोहन-सन्दीपन-तापन-मादनान् क्रमशः

bāṇa-nyāsa-sthānāny āha- kāsya-hṛdaya-liṅgāṅghriṣukara-śākhābhir namo 'ntakān ṅe 'ntān | śoṣaṇa-mohana-sandīpana-tāpana-mādanān kramaśaḥ

Sanskrit only: no published translation is held for this verse.

बाण-नामान्य् आह- पञ्चैते सम्प्रोक्ता ह्रां-ह्रीं-क्लीं-क्लूं स आदिका बाणाः । संमोहनम् अथ जगतं ध्यायेत् पुरुषोत्तमं समाहित-धीः

bāṇa-nāmāny āha- pañcaite samproktā hrāṃ-hrīṃ-klīṃ-klūṃ sa ādikā bāṇāḥ | saṃmohanam atha jagataṃ dhyāyet puruṣottamaṃ samāhita-dhīḥ

Sanskrit only: no published translation is held for this verse.

ध्यानम् आह- दिव्य-तरूद्यानोद्यद्-रुचिर-महा-कल्प-पादपाधस्तात् । मणि-मय-भूतल-विलसद्-भद्र-पयो-जन्म-पीठ-निष्ठस्य

dhyānam āha- divya-tarūdyānodyad-rucira-mahā-kalpa-pādapādhastāt | maṇi-maya-bhūtala-vilasad-bhadra-payo-janma-pīṭha-niṣṭhasya

Sanskrit only: no published translation is held for this verse.

विश्व-प्राणस्योद्यत्-प्रद्योतन-सम-द्युतेः सुपर्णस्य । आसीनम् उन्नतांसे विद्रुम-भद्राङ्गम् अङ्गजोन्मथितम्

viśva-prāṇasyodyat-pradyotana-sama-dyuteḥ suparṇasya | āsīnam unnatāṃse vidruma-bhadrāṅgam aṅgajonmathitam

Sanskrit only: no published translation is held for this verse.

चक्र-दराङ्कुश-पाशान् सुमनो-बाणेक्षु-चाप-कमल-गदाः । दधतं स्वदोर्भिर् अरुणायत-विपुल-विघूर्णिताक्षि-युग-नलिनम्

cakra-darāṅkuśa-pāśān sumano-bāṇekṣu-cāpa-kamala-gadāḥ | dadhataṃ svadorbhir aruṇāyata-vipula-vighūrṇitākṣi-yuga-nalinam

Sanskrit only: no published translation is held for this verse.

मणिमय-किरीट-कुण्डल-हाराङ्गद-कङ्कणोर्भिर् असनाद्यैः । अरुणैर् माल्य-विलेपैर् आदीप्तं पीत-वस्त्र-परिधानम्

maṇimaya-kirīṭa-kuṇḍala-hārāṅgada-kaṅkaṇorbhir asanādyaiḥ | aruṇair mālya-vilepair ādīptaṃ pīta-vastra-paridhānam

Sanskrit only: no published translation is held for this verse.

निज-वामोरु-निषण्णां श्लिष्यन्तीं वाम-हस्त-घृत-नलिनाम् । किल्द्यद्-योनिं कमलां मदन-मद-व्याकुलोज्ज्वलाङ्गलताम्

nija-vāmoru-niṣaṇṇāṃ śliṣyantīṃ vāma-hasta-ghṛta-nalinām | kildyad-yoniṃ kamalāṃ madana-mada-vyākulojjvalāṅgalatām

Sanskrit only: no published translation is held for this verse.

सुरुचिर-भूषण-माल्यानुलेपनांसु-सित-वसन-परिवीताम् । निज-मुख-कमल-व्यापृत-चटुलासित-नयन-मधुकरां तरुणीम्

surucira-bhūṣaṇa-mālyānulepanāṃsu-sita-vasana-parivītām | nija-mukha-kamala-vyāpṛta-caṭulāsita-nayana-madhukarāṃ taruṇīm

Sanskrit only: no published translation is held for this verse.

श्लिष्यन्तं वाम-भुजा-दण्डेन दृढं धृतेक्षु-चापेन । तज्-जनित-पर-निर्वृति-निर्भर-हृदयं चराचरैक-गुरुम्

śliṣyantaṃ vāma-bhujā-daṇḍena dṛḍhaṃ dhṛtekṣu-cāpena | taj-janita-para-nirvṛti-nirbhara-hṛdayaṃ carācaraika-gurum

Sanskrit only: no published translation is held for this verse.

सुर-दितिज-भुजग-गुह्यक-गन्धर्वाद्य्-अङ्गना-जन-सहस्रैः । मद-मन्मथालसाङ्गैर् अभिवीतं दिव्य-भूषणोल्लसितैः

sura-ditija-bhujaga-guhyaka-gandharvādy-aṅganā-jana-sahasraiḥ | mada-manmathālasāṅgair abhivītaṃ divya-bhūṣaṇollasitaiḥ

Sanskrit only: no published translation is held for this verse.

आत्माभेदतयेत्थं ध्यात्वैकाक्षरम् अथाष्ट-वर्णं वा । प्रजपेद् दिन-कर-लक्षं त्रिमधुर-सिक्तैस् तु किंशुक-प्रसवैः

ātmābhedatayetthaṃ dhyātvaikākṣaram athāṣṭa-varṇaṃ vā | prajaped dina-kara-lakṣaṃ trimadhura-siktais tu kiṃśuka-prasavaiḥ

Sanskrit only: no published translation is held for this verse.

जुहुआत् तरणि-सहस्रं विमलैः सलिलैश् च तर्पयेत् तावत् । विंशत्य्-अर्णे प्रोक्ते यन्त्रे दिनशो ऽमुम् अर्चयेत् भक्त्या

juhuāt taraṇi-sahasraṃ vimalaiḥ salilaiś ca tarpayet tāvat | viṃśaty-arṇe prokte yantre dinaśo 'mum arcayet bhaktyā

Sanskrit only: no published translation is held for this verse.

पूजा-प्रकारम् आह सार्धं चतुःश्लोकेन । गरुड-मन्त्रम् आह- पीठ-विधौ पक्ष्य्-अन्ते राजाय-शिरो ऽमुनाभि-पूज्याहि-रिपुम् । हरिम् आवाह्य स्कन्धे तस्यार्घाद्यैः समर्च्य भूषान्तै

pūjā-prakāram āha sārdhaṃ catuḥślokena | garuḍa-mantram āha- pīṭha-vidhau pakṣy-ante rājāya-śiro 'munābhi-pūjyāhi-ripum | harim āvāhya skandhe tasyārghādyaiḥ samarcya bhūṣāntai

Sanskrit only: no published translation is held for this verse.

अङ्गानि च बाणांश् च न्यास-क्रमतः किरीटम् अपि शिरसि । श्रवसोश् च कुण्डले ऽरि-प्रमुखानि प्रहरणानि पाणिषु च

aṅgāni ca bāṇāṃś ca nyāsa-kramataḥ kirīṭam api śirasi | śravasoś ca kuṇḍale 'ri-pramukhāni praharaṇāni pāṇiṣu ca

Sanskrit only: no published translation is held for this verse.

श्रीवत्स-कौस्तुभौ च स्तनयोर् ऊर्ध्वे गले च वनमालाम् । पीत-वसनं नितम्बे वामाङ्के श्रियम् अपि स्व-बीजेन

śrīvatsa-kaustubhau ca stanayor ūrdhve gale ca vanamālām | pīta-vasanaṃ nitambe vāmāṅke śriyam api sva-bījena

Sanskrit only: no published translation is held for this verse.

इष्ट्वाथ कर्णिकायाम् अङ्गानि विदिग्दशासु दिक्षु शरान् । कोणेषु पञ्चमं पुनर् अग्न्य्-आदि-दलेषु शक्तयः पूज्याः

iṣṭvātha karṇikāyām aṅgāni vidigdaśāsu dikṣu śarān | koṇeṣu pañcamaṃ punar agny-ādi-daleṣu śaktayaḥ pūjyāḥ

Sanskrit only: no published translation is held for this verse.

शक्ति-वर्णान् आह- लक्ष्मीः सरस्वती स्वर्णाभे अरुणतरे रति-प्रीत्यौ । कीर्तिः कान्तिश् च सिते तुष्टिः पुष्टिश् च मरकत-प्रतिमे

śakti-varṇān āha- lakṣmīḥ sarasvatī svarṇābhe aruṇatare rati-prītyau | kīrtiḥ kāntiś ca site tuṣṭiḥ puṣṭiś ca marakata-pratime

Sanskrit only: no published translation is held for this verse.

एताः शक्तयः किम्भूताः ? दिव्याङ्ग-राग-भूषामाल्य-दुकूलैर् अलङ्कृताङ्ग-लताः । स्मेराननाः स्मारार्ताधृत-चामर-चारु-कर-तला एताः

etāḥ śaktayaḥ kimbhūtāḥ ? divyāṅga-rāga-bhūṣāmālya-dukūlair alaṅkṛtāṅga-latāḥ | smerānanāḥ smārārtādhṛta-cāmara-cāru-kara-talā etāḥ

Sanskrit only: no published translation is held for this verse.

लोकेशा बहिर् अर्च्याः कथितेत्य् अर्चा मनु-द्वयोद्भूता । प्रायः पुरुषोत्तम-विधिर् एवं हि स नोच्यते ऽत्र बहुलत्वात्

lokeśā bahir arcyāḥ kathitety arcā manu-dvayodbhūtā | prāyaḥ puruṣottama-vidhir evaṃ hi sa nocyate 'tra bahulatvāt

Sanskrit only: no published translation is held for this verse.

सम्मोहन-गायत्रीम् आह- त्रैलोक्य-मोहनायेत्य् उक्त्वा विद्मह इति स्मरायेति । तत् धीमहीति तन् नो ऽन्ते विष्णुस् तद् अनु प्रचोदयात्

sammohana-gāyatrīm āha- trailokya-mohanāyety uktvā vidmaha iti smarāyeti | tat dhīmahīti tan no 'nte viṣṇus tad anu pracodayāt

Sanskrit only: no published translation is held for this verse.

प्रभावम् आह- जप्यैषा हि जपादौ दुरित-हरी श्री-करी जपार्चन-हवनैः । प्रोक्षयतु शुद्धि-विधये ऽर्चायाम् अनयात्म-याग-भू-द्रव्याणि

prabhāvam āha- japyaiṣā hi japādau durita-harī śrī-karī japārcana-havanaiḥ | prokṣayatu śuddhi-vidhaye 'rcāyām anayātma-yāga-bhū-dravyāṇi

Sanskrit only: no published translation is held for this verse.

मन्त्र-द्वय-साधारण-तर्पणम् आह- मन्वोर् एकेन शतं तर्पयेन् मोहनी-प्रसून-युतैर् यः । तोयैर् दिनशः प्रातः स तु लभते वाञ्छितान् अयत्नतः कामान्

mantra-dvaya-sādhāraṇa-tarpaṇam āha- manvor ekena śataṃ tarpayen mohanī-prasūna-yutair yaḥ | toyair dinaśaḥ prātaḥ sa tu labhate vāñchitān ayatnataḥ kāmān

Sanskrit only: no published translation is held for this verse.

मन्त्र-द्वय-सम्बन्धि-प्रयोगान्तरम् आह- हुत्वायुतं हुत-शेष-सम्पाताज्येन तावद् अभिजप्तेन । भोजयतु स्वामीकं रमणी-रमणो ऽपि तां स्व-वशतां नेतुम्

mantra-dvaya-sambandhi-prayogāntaram āha- hutvāyutaṃ huta-śeṣa-sampātājyena tāvad abhijaptena | bhojayatu svāmīkaṃ ramaṇī-ramaṇo 'pi tāṃ sva-vaśatāṃ netum

Sanskrit only: no published translation is held for this verse.

अष्टादशार्ण-विहिता विधयः कार्या वश्यत आभ्याम् । मन्वोर् अनयोः सदृग्भ्यो वैन मनुस् त्रैलोक्य-वश्य-कर्मणि जगति

aṣṭādaśārṇa-vihitā vidhayaḥ kāryā vaśyata ābhyām | manvor anayoḥ sadṛgbhyo vaina manus trailokya-vaśya-karmaṇi jagati

Sanskrit only: no published translation is held for this verse.

अत्रैकार्ण-जपादाव् अथवा कृष्णः स-वेणु-गतिर् ध्येयः । अरुण-रुचिराङ्ग-वेशः कन्दर्पो वा सपाश-शृणि-चापेषु

atraikārṇa-japādāv athavā kṛṣṇaḥ sa-veṇu-gatir dhyeyaḥ | aruṇa-rucirāṅga-veśaḥ kandarpo vā sapāśa-śṛṇi-cāpeṣu

Sanskrit only: no published translation is held for this verse.

प्रकृतम् उपसंहरति- यस् त्व् एकतरं मनुम् एतयोर् विमल-धीः सदा भजति मन्त्री । सो ऽमुत्रापि च सिद्धिं विपुलाम् इहातितराम् एति

prakṛtam upasaṃharati- yas tv ekataraṃ manum etayor vimala-dhīḥ sadā bhajati mantrī | so 'mutrāpi ca siddhiṃ vipulām ihātitarām eti

Sanskrit only: no published translation is held for this verse.

अथ रुक्मिणी-वल्लभ-मन्त्रम् उद्धरति- अथ सत्य-शौरि च तृतीय-तुर्यकाः शिखि-वाम-नेत्र-शशि-खण्ड-मण्डिताः । जय-कृष्ण-युग्मक-निरन्तरात्म-भू- शिखि-शक्ति-डास्य-वृत-सक्त-वर्णकाः

atha rukmiṇī-vallabha-mantram uddharati- atha satya-śauri ca tṛtīya-turyakāḥ śikhi-vāma-netra-śaśi-khaṇḍa-maṇḍitāḥ | jaya-kṛṣṇa-yugmaka-nirantarātma-bhū- śikhi-śakti-ḍāsya-vṛta-sakta-varṇakāḥ

Sanskrit only: no published translation is held for this verse.

प्रनिमध्यतो मुदित-चेतसे ततस् त्यपरक्त-दृग्यगुरु-मारुताक्षराः । स-चतुर्थि-कृष्ण-पदम् इक्षु-कार्मुको दश-वर्णकश् च मनुवर्यकस् त्व् असौ

pranimadhyato mudita-cetase tatas tyaparakta-dṛgyaguru-mārutākṣarāḥ | sa-caturthi-kṛṣṇa-padam ikṣu-kārmuko daśa-varṇakaś ca manuvaryakas tv asau

Sanskrit only: no published translation is held for this verse.

सलवाधर्राचल-सुतारमाक्षरैः पुटितः क्रमो क्रम-गतैः समुद्गवत् । इति दन्त-सूर्य-वसु-वर्ण उद्धृतः कवितानुरञ्जन-रमाकरो ऽघ-हृत्

salavādharrācala-sutāramākṣaraiḥ puṭitaḥ kramo krama-gataiḥ samudgavat | iti danta-sūrya-vasu-varṇa uddhṛtaḥ kavitānurañjana-ramākaro 'gha-hṛt

Sanskrit only: no published translation is held for this verse.

मन्त्र-स्वरूपम्-ऐं ह्रीं श्रीं द्रीं ज्रीं झ्रीं जय कृष्ण जय कृष्ण निरन्तर-क्रीडासक्त-प्रमुदित-चेतसे नित्य-प्रियाय कृष्णाय क्रीं गोपी-जन-वल्लभाय स्वाहा श्रीं ह्रीं ऐं ॥ अस्य मन्त्रस्य ऋष्य्-आदिकम् इत्य् आह- मुख-वृत्त-नन्द-युत-नारदो मुनिः छन्द उक्तम् अमृतादिकं विराट् । त्रिजगद् विमोहन-समाह्वयो हरिः खलु देवतास्य मुनिभिः समीरिता

mantra-svarūpam-aiṃ hrīṃ śrīṃ drīṃ jrīṃ jhrīṃ jaya kṛṣṇa jaya kṛṣṇa nirantara-krīḍāsakta-pramudita-cetase nitya-priyāya kṛṣṇāya krīṃ gopī-jana-vallabhāya svāhā śrīṃ hrīṃ aiṃ || asya mantrasya ṛṣy-ādikam ity āha- mukha-vṛtta-nanda-yuta-nārado muniḥ chanda uktam amṛtādikaṃ virāṭ | trijagad vimohana-samāhvayo hariḥ khalu devatāsya munibhiḥ samīritā

Sanskrit only: no published translation is held for this verse.

अङ्ग-विधिं दर्शयति- वसु-मित्र-भूधर-गजात्म-दिङ्मयैर् ममनु-वर्णकैस् त्रिपुट-संस्थितैः पृथक् । निज-जाति-युङ्-निगदितं षड्-अङ्गकं क्रिययैव तत् खलु जनानुरञ्जनम्

aṅga-vidhiṃ darśayati- vasu-mitra-bhūdhara-gajātma-diṅmayair mamanu-varṇakais tripuṭa-saṃsthitaiḥ pṛthak | nija-jāti-yuṅ-nigaditaṃ ṣaḍ-aṅgakaṃ kriyayaiva tat khalu janānurañjanam

Sanskrit only: no published translation is held for this verse.

न्यासम् आह- अथ संविशोध्य तनु-मुक्त-मार्गतः विरचय्य पीठम् अपि च स्व-वर्ष्मणा । करयोर् दशाक्षर-विधि-क्रमान् न्यसेत् स षड्-अङ्ग-सायकम् अनङ्ग-पञ्चकम्

nyāsam āha- atha saṃviśodhya tanu-mukta-mārgataḥ viracayya pīṭham api ca sva-varṣmaṇā | karayor daśākṣara-vidhi-kramān nyaset sa ṣaḍ-aṅga-sāyakam anaṅga-pañcakam

Sanskrit only: no published translation is held for this verse.

इमम् एवार्थं विविच्य दर्शयति- मनुना त्रिशो न्यसतु सर्वतस् तनौ स्मर-सम्पुटैस् तद् अनु मातृकाक्षरैः । दश-तत्त्वकादि-दश-वर्ण-कीर्तितं त्व् अथ मूर्ति-पञ्जर-वसानम् आचरेत्

imam evārthaṃ vivicya darśayati- manunā triśo nyasatu sarvatas tanau smara-sampuṭais tad anu mātṛkākṣaraiḥ | daśa-tattvakādi-daśa-varṇa-kīrtitaṃ tv atha mūrti-pañjara-vasānam ācaret

Sanskrit only: no published translation is held for this verse.

सृजति स्थिती दश-षड्-अङ्ग-सायकान् न्यसतात् ततो ऽन्यद् अखिलं पुरोक्तवत् । प्रविधाय सर्व-भुवनैक-साक्षिणं स्मरतान् मुकुन्दम् अनवद्य-धीर-धीः

sṛjati sthitī daśa-ṣaḍ-aṅga-sāyakān nyasatāt tato 'nyad akhilaṃ puroktavat | pravidhāya sarva-bhuvanaika-sākṣiṇaṃ smaratān mukundam anavadya-dhīra-dhīḥ

Sanskrit only: no published translation is held for this verse.

ध्यानम् आह- अथ भूधरोदधि-परिष्कृते महो- न्नत-शाल-गोपुर-विशाल-वीथिके । घन-चुम्ब्य्-उदग्रसित-सौध-सङ्कुले मणि-हर्म्य-विस्तृत-कपाट-वेदिके

dhyānam āha- atha bhūdharodadhi-pariṣkṛte maho- nnata-śāla-gopura-viśāla-vīthike | ghana-cumby-udagrasita-saudha-saṅkule maṇi-harmya-vistṛta-kapāṭa-vedike

Sanskrit only: no published translation is held for this verse.

पुनः कीदृशे पुरे ? द्विज-भूप-विट्-चरण-जन्मनां गृहैर् विविधैश् च शिल्पि-जन-वेश्मभिस् तथा । इभसप्त्युरभ्रखरधेनुसैर्भच्- छगलालयैश् च लसितैः सहस्रशः

punaḥ kīdṛśe pure ? dvija-bhūpa-viṭ-caraṇa-janmanāṃ gṛhair vividhaiś ca śilpi-jana-veśmabhis tathā | ibhasaptyurabhrakharadhenusairbhac- chagalālayaiś ca lasitaiḥ sahasraśaḥ

Sanskrit only: no published translation is held for this verse.

पुनः कीदृशे ? विवधापणाश्रित-महाजनाहृत- क्रय-विक्रय-द्रविण-सञ्चयाञ्चिते । जनमानसाहृति-विदग्ध-सुन्दरी- जन-मन्दिरैः सुरुचिरैश् च मण्डिते

punaḥ kīdṛśe ? vivadhāpaṇāśrita-mahājanāhṛta- kraya-vikraya-draviṇa-sañcayāñcite | janamānasāhṛti-vidagdha-sundarī- jana-mandiraiḥ suruciraiś ca maṇḍite

Sanskrit only: no published translation is held for this verse.

पुनः कीदृशे पुरे ? पृथु-दीर्घका-विमल-पाथसि स्फुरद्- विकचारविन्द-मकरन्द-लम्पटैः । वर-हंस-सारस्-रथाङ्गनामभिर् विहगैर् विघुष्ट-ककुभि स्वके पुरे

punaḥ kīdṛśe pure ? pṛthu-dīrghakā-vimala-pāthasi sphurad- vikacāravinda-makaranda-lampaṭaiḥ | vara-haṃsa-sāras-rathāṅganāmabhir vihagair vighuṣṭa-kakubhi svake pure

Sanskrit only: no published translation is held for this verse.

पुनः कीदृशे मणि-मण्डपे ? सुरपादपैः सुरभि-पुष्प-लोलुप- भ्रमराकुलैर् विविध-कामदैर् नॄणाम् । शिव-मन्द-मारुत-चलच्-छिखैर् वृते मणि-मण्डपे रवि-सहस्र-प्रभे

punaḥ kīdṛśe maṇi-maṇḍape ? surapādapaiḥ surabhi-puṣpa-lolupa- bhramarākulair vividha-kāmadair nṝṇām | śiva-manda-māruta-calac-chikhair vṛte maṇi-maṇḍape ravi-sahasra-prabhe

Sanskrit only: no published translation is held for this verse.

पुनः कीदृशे ? मणि-दीपिका-निकर-दीपितान्तरे तनु-चित्र-विस्तृत-वितान-शालिनि । ललिते पिकस्वर-विचित्र-दामभिः सुसुगन्धि गन्ध-सलिलोक्षित-स्थले

punaḥ kīdṛśe ? maṇi-dīpikā-nikara-dīpitāntare tanu-citra-vistṛta-vitāna-śālini | lalite pikasvara-vicitra-dāmabhiḥ susugandhi gandha-salilokṣita-sthale

Sanskrit only: no published translation is held for this verse.

पुनः कीदृशे ? प्रमदा-शतैर् मद-विघूर्णितेक्षणैर् मद-जालसैः कर-विलोल-चामरैः । अभिसेविते स्खलित-मञ्जु-भाषितैः स्तन-भार-भङ्गुर-कृशावलग्नकैः

punaḥ kīdṛśe ? pramadā-śatair mada-vighūrṇitekṣaṇair mada-jālasaiḥ kara-vilola-cāmaraiḥ | abhisevite skhalita-mañju-bhāṣitaiḥ stana-bhāra-bhaṅgura-kṛśāvalagnakaiḥ

Sanskrit only: no published translation is held for this verse.

कथम्भूतस्य सुरपादपस्य ? अविराम-धार-मणि-वर्य-वर्षिणः श्रम-हानिदामृत-रस-च्युतो ऽप्य् अधः । सुर-पादपस्य मणि-भूतलोल्लसत् पृथु-सिंह-वक्त्रचरणाम्बुजासने

kathambhūtasya surapādapasya ? avirāma-dhāra-maṇi-varya-varṣiṇaḥ śrama-hānidāmṛta-rasa-cyuto 'py adhaḥ | sura-pādapasya maṇi-bhūtalollasat pṛthu-siṃha-vaktracaraṇāmbujāsane

Sanskrit only: no published translation is held for this verse.

कीदृशम् अच्युतम् ? अभिचिन्तयेत् सुख-निविष्टम् अच्युतं नव-नील-नीर-रुह-कोमल-च्छविम् । कुटिलाग्र-कुन्तल-लसत्-किरीटकं स्मित-पुष्प-रत्न-रचितावतंसकम्

kīdṛśam acyutam ? abhicintayet sukha-niviṣṭam acyutaṃ nava-nīla-nīra-ruha-komala-cchavim | kuṭilāgra-kuntala-lasat-kirīṭakaṃ smita-puṣpa-ratna-racitāvataṃsakam

Sanskrit only: no published translation is held for this verse.

पुनः कीदृशम् ? सुललाटम् उन्नसमुदञ्चित-भ्रुवं विपुलारुणायत-विलोल-लोचनम् । मणि-कुण्डलास्र-परिदीप्त-गण्डकं नव-बन्धु-जीव-कुसुमारुणाधरम्

punaḥ kīdṛśam ? sulalāṭam unnasamudañcita-bhruvaṃ vipulāruṇāyata-vilola-locanam | maṇi-kuṇḍalāsra-paridīpta-gaṇḍakaṃ nava-bandhu-jīva-kusumāruṇādharam

Sanskrit only: no published translation is held for this verse.

पुनः कीदृशं परमेश्वरम् ? स्मित-चन्द्रिकोज्ज्वलित-दिङ्मुखं स्फुरत् पुलक-श्रमाम्बु-कण-मण्डिताननम् । स्फुरद्-अंशु-रत्न-गण-दीप्त-भूषणोत्- तम-हार-दामभिर् उपस्कृतांसकम्

punaḥ kīdṛśaṃ parameśvaram ? smita-candrikojjvalita-diṅmukhaṃ sphurat pulaka-śramāmbu-kaṇa-maṇḍitānanam | sphurad-aṃśu-ratna-gaṇa-dīpta-bhūṣaṇot- tama-hāra-dāmabhir upaskṛtāṃsakam

Sanskrit only: no published translation is held for this verse.

पुनः कीदृशम् ? घन-सार-कुङ्कुम-विलिप्त-विग्रहं पृथु-दीर्घ-षड्-द्वय-भुजा-विराजितम् । तरुणाब्ज-चारु-चरणाब्ज-मङ्गलोन्- मथिताङ्गम् अङ्कग-कराम्बुज-द्वयम्

punaḥ kīdṛśam ? ghana-sāra-kuṅkuma-vilipta-vigrahaṃ pṛthu-dīrgha-ṣaḍ-dvaya-bhujā-virājitam | taruṇābja-cāru-caraṇābja-maṅgalon- mathitāṅgam aṅkaga-karāmbuja-dvayam

Sanskrit only: no published translation is held for this verse.

स्वाङ्क-स्थ-भीष्मक-सुतोरु-युगान्तर-स्थलं तां तप्त-हेम-रुचिम् आत्म-भुजाम्बुजाभ्याम् । श्लिष्यन्तम् आर्द्र-जघनाम् उपगूहमानाम् आत्मानम् आयत-लसत्-कर-पल्लवाभ्याम्

svāṅka-stha-bhīṣmaka-sutoru-yugāntara-sthalaṃ tāṃ tapta-hema-rucim ātma-bhujāmbujābhyām | śliṣyantam ārdra-jaghanām upagūhamānām ātmānam āyata-lasat-kara-pallavābhyām

Sanskrit only: no published translation is held for this verse.

आनन्दोद्रेक-निघ्नां मुकुलित-नयनेन्दीवरां स्रस्त-गात्रीं प्रोद्यद्-रोमाञ्च-सान्द्र-श्रम-जल-कणिका-मौक्तिकालङ्कृताङ्गीम् । आत्मन्य् आलीन-बाह्यान्तर-करण-गणाम् अङ्गकैर् निस्तरङ्गैर् मज्जन्तीं लीन-नाना-मतिम् अतुल-महानन्द-सन्दोह-सिन्धौ

ānandodreka-nighnāṃ mukulita-nayanendīvarāṃ srasta-gātrīṃ prodyad-romāñca-sāndra-śrama-jala-kaṇikā-mauktikālaṅkṛtāṅgīm | ātmany ālīna-bāhyāntara-karaṇa-gaṇām aṅgakair nistaraṅgair majjantīṃ līna-nānā-matim atula-mahānanda-sandoha-sindhau

Sanskrit only: no published translation is held for this verse.

पुनः कीदृशं परमेश्वरम् ? सत्याजाम्बवतीभ्यां दिव्य-दुकूलानुलेपनाभरणाभ्याम् । मन्मथ-शर-मथिताभ्यां मुख-कमल-चञ्चल-लोचन-भ्रमराभ्याम्

punaḥ kīdṛśaṃ parameśvaram ? satyājāmbavatībhyāṃ divya-dukūlānulepanābharaṇābhyām | manmatha-śara-mathitābhyāṃ mukha-kamala-cañcala-locana-bhramarābhyām

Sanskrit only: no published translation is held for this verse.

भुजग-युगलाश्लिष्टाभ्यां श्यामारुण-ललित-कोमलाङ्ग-लताभ्याम् । आश्लिष्ट्म् आत्म-दक्षिण- वाम-गताभ्यां करोल्लसत् कमलाभ्याम्

bhujaga-yugalāśliṣṭābhyāṃ śyāmāruṇa-lalita-komalāṅga-latābhyām | āśliṣṭm ātma-dakṣiṇa- vāma-gatābhyāṃ karollasat kamalābhyām

Sanskrit only: no published translation is held for this verse.

पुनः कीदृशम् ? पृष्टगया कलिन्द-सुतया कर-कमल-युजा सम्परिरब्धम् अञ्जन-रुचा मदन-मथितया । पद्म-गदा-रथाङ्ग-दर-भृद्-भुज-युगलं दोर्-द्वय-सक्त-वंश-विलसन्-मुख-सरसि-रुहम्

punaḥ kīdṛśam ? pṛṣṭagayā kalinda-sutayā kara-kamala-yujā samparirabdham añjana-rucā madana-mathitayā | padma-gadā-rathāṅga-dara-bhṛd-bhuja-yugalaṃ dor-dvaya-sakta-vaṃśa-vilasan-mukha-sarasi-ruham

Sanskrit only: no published translation is held for this verse.

दिक्षु बहिः सुरर्षि-यतिभिः खेचर-परिवृढैर् भक्ति-भरावनम्र-तनुभिः स्तुति-मुखर-मुखैः । सन्तत-सेव्यमानम् अमनोवचन-विषयकम् अर्थ-चतुष्टय-प्रदम् अमुं त्रिभुवन-जनकम्

dikṣu bahiḥ surarṣi-yatibhiḥ khecara-parivṛḍhair bhakti-bharāvanamra-tanubhiḥ stuti-mukhara-mukhaiḥ | santata-sevyamānam amanovacana-viṣayakam artha-catuṣṭaya-pradam amuṃ tribhuvana-janakam

Sanskrit only: no published translation is held for this verse.

सान्द्रानन्द-महाब्धि-मग्नम् अमल-धाम्नि स्वके ऽवस्थितं ध्यात्वैवं परमं पुमांसम् अनघात् सम्प्राप्य दीक्षां गुरोः । लब्ध्वामुं मनुम् आदरेण सित-धीर् लक्षं जपेद् योषितां वार्ताकर्णन-दर्शनादि-रहितो मन्त्री गुरूणाम् अपि

sāndrānanda-mahābdhi-magnam amala-dhāmni svake 'vasthitaṃ dhyātvaivaṃ paramaṃ pumāṃsam anaghāt samprāpya dīkṣāṃ guroḥ | labdhvāmuṃ manum ādareṇa sita-dhīr lakṣaṃ japed yoṣitāṃ vārtākarṇana-darśanādi-rahito mantrī gurūṇām api

Sanskrit only: no published translation is held for this verse.

होमं सेवां चाह- जुहुयाच् च दशांशकं हुताशे ससिताक्षौद्र-घृतेन पायसेन । प्रथमोदित-पीठ-वर्यके ऽमुं पर्यजेन् नित्यम् अनित्यता-विमुक्तये

homaṃ sevāṃ cāha- juhuyāc ca daśāṃśakaṃ hutāśe sasitākṣaudra-ghṛtena pāyasena | prathamodita-pīṭha-varyake 'muṃ paryajen nityam anityatā-vimuktaye

Sanskrit only: no published translation is held for this verse.

आरभ्याथ विभूति-न्यास-क्रमतः शरान्तम् अभ्यर्च्य । मूर्त्य्-आद्य्-अङ्गान्तं चात्मानं विंशत्य्-अर्णोदित-यन्त्र-वरे

ārabhyātha vibhūti-nyāsa-kramataḥ śarāntam abhyarcya | mūrty-ādy-aṅgāntaṃ cātmānaṃ viṃśaty-arṇodita-yantra-vare

Sanskrit only: no published translation is held for this verse.

मध्य-बीजं परितो वरुणेन्दु-यमेन्द्र-दिक्षु संलिख्य । बीज-चतुष्कं तद् अपि चत्वारिंशद्भिर् अक्षरैर् द्व्य्-अधिकैः

madhya-bījaṃ parito varuṇendu-yamendra-dikṣu saṃlikhya | bīja-catuṣkaṃ tad api catvāriṃśadbhir akṣarair dvy-adhikaiḥ

Sanskrit only: no published translation is held for this verse.

शिष्टैः प्रवेष्ट्य शिव-हरि-वस्व्-आद्य्-अश्रिष्व् अथ क्रमाद् विलिखेत् । वाङ्-माया-श्री-मन्त्रास् तद्वद् रक्षो ऽम्बुपानिलाश्रिषु च

śiṣṭaiḥ praveṣṭya śiva-hari-vasv-ādy-aśriṣv atha kramād vilikhet | vāṅ-māyā-śrī-mantrās tadvad rakṣo 'mbupānilāśriṣu ca

Sanskrit only: no published translation is held for this verse.

शेषं पूर्वोदितवद् विधाय पीठं यथावद् अभ्यर्च्य । सङ्कलय्य मूर्तिम् अत्रावाह्याभ्यर्चयतु मध्य-बीजे तम्

śeṣaṃ pūrvoditavad vidhāya pīṭhaṃ yathāvad abhyarcya | saṅkalayya mūrtim atrāvāhyābhyarcayatu madhya-bīje tam

Sanskrit only: no published translation is held for this verse.

मुख-दक्ष-सव्य-पृष्ठग-बीजेष्व् अर्च्यास् तु शक्तयः क्रमशः । रुक्मिण्य्-आद्याः षट्स्व् अथ कोणेष्व् अङ्गानि केशरेषु शरान्

mukha-dakṣa-savya-pṛṣṭhaga-bījeṣv arcyās tu śaktayaḥ kramaśaḥ | rukmiṇy-ādyāḥ ṣaṭsv atha koṇeṣv aṅgāni keśareṣu śarān

Sanskrit only: no published translation is held for this verse.

लक्ष्म्य्-आद्या दल-मध्येष्व् अग्न्य्-आदिषु तद् बहिर् ध्वज-प्रमुखान् । अग्रे केतुं श्याम पृष्ठे विपम् अरुणम् अमल-रक्त-रुची

lakṣmy-ādyā dala-madhyeṣv agny-ādiṣu tad bahir dhvaja-pramukhān | agre ketuṃ śyāma pṛṣṭhe vipam aruṇam amala-rakta-rucī

Sanskrit only: no published translation is held for this verse.

पार्श्व-द्वये निधीशौ सन्तत-धाराभिवृष्ट-धन-पुञ्जौ । हेरम्ब-शास्तृ-दुर्गा-विष्वक्सेनान् विदिक्षु वह्न्य्-आदि

pārśva-dvaye nidhīśau santata-dhārābhivṛṣṭa-dhana-puñjau | heramba-śāstṛ-durgā-viṣvaksenān vidikṣu vahny-ādi

Sanskrit only: no published translation is held for this verse.

विद्रुम-मरकत-दूर्वा-स्वर्णाभान् बहिर् अथेन्द्र-वज्राद्यान् । यजन-विधानम् इतीरितम् आवृति-सप्तक-युतं मुकुन्दस्य

vidruma-marakata-dūrvā-svarṇābhān bahir athendra-vajrādyān | yajana-vidhānam itīritam āvṛti-saptaka-yutaṃ mukundasya

Sanskrit only: no published translation is held for this verse.

इत्य् अर्चयन्न् अच्युतम् आदरेण यो ऽमुं भजेन् मन्त्रवरं जितात्मा । सो ऽभ्यर्च्य दिव्य-जनैर् जनानां हृन्-नेत्र-पङ्केरुह-तिग्म-भानुः

ity arcayann acyutam ādareṇa yo 'muṃ bhajen mantravaraṃ jitātmā | so 'bhyarcya divya-janair janānāṃ hṛn-netra-paṅkeruha-tigma-bhānuḥ

Sanskrit only: no published translation is held for this verse.

सित-शर्करोत्तर-पयः-प्रतिपत्त्या परितर्पयेद् दिन-मुखे दिन-शस्तम् । सलिलैः शतं शत-मख-श्रियम् एष स्व-विभूत्य्-उदन्वति करोत्य् उद-बिन्दुम्

sita-śarkarottara-payaḥ-pratipattyā paritarpayed dina-mukhe dina-śastam | salilaiḥ śataṃ śata-makha-śriyam eṣa sva-vibhūty-udanvati karoty uda-bindum

Sanskrit only: no published translation is held for this verse.

विदल-हलैः सुमनसः सुमनोभिर् घनसार-चन्दन-बहु-द्रव-मग्नैः । मनुनामुना हवनतो ऽयुत-सङ्ख्यं त्रिजगत् प्रियः स मनुवित् कविराट् स्यात्

vidala-halaiḥ sumanasaḥ sumanobhir ghanasāra-candana-bahu-drava-magnaiḥ | manunāmunā havanato 'yuta-saṅkhyaṃ trijagat priyaḥ sa manuvit kavirāṭ syāt

Sanskrit only: no published translation is held for this verse.

ध्यानाद् एवास्य सद्यस् त्रिदश-मृग-दृशोर् वश्यतां यान्त्य् अवश्यं कन्दर्पार्ताजपाद्यैः किम् अथ न सुलभं मन्त्रतो ऽस्मान् नरस्य । स्पर्धाम् उद्धूय चित्रं महद् इदम् अपि नैसर्गिकीं शश्वद् एनं सेवेते मन्त्रि-मुख्यं सरसिज-निलया चापि वाचाम् अधीशा

dhyānād evāsya sadyas tridaśa-mṛga-dṛśor vaśyatāṃ yānty avaśyaṃ kandarpārtājapādyaiḥ kim atha na sulabhaṃ mantrato 'smān narasya | spardhām uddhūya citraṃ mahad idam api naisargikīṃ śaśvad enaṃ sevete mantri-mukhyaṃ sarasija-nilayā cāpi vācām adhīśā

Sanskrit only: no published translation is held for this verse.

आधि-व्याधि-जरापमृत्यु-दुरितैर् भूतैः समस्तैर् विषैर् दौभाग्येन दरिद्रतादिभिर् असौ दूरं विमुक्तश् चिरम् । सत्-पुत्रैः सुसुतासुमित्रनिवहैर् जुष्टोखिलाभिः सदा सम्पद्भिः परिजुष्ट ईडित-यशा जीवेद् अनेकाः समाः

ādhi-vyādhi-jarāpamṛtyu-duritair bhūtaiḥ samastair viṣair daubhāgyena daridratādibhir asau dūraṃ vimuktaś ciram | sat-putraiḥ susutāsumitranivahair juṣṭokhilābhiḥ sadā sampadbhiḥ parijuṣṭa īḍita-yaśā jīved anekāḥ samāḥ

Sanskrit only: no published translation is held for this verse.

मन्त्रान्तरेभ्यो ऽस्यातिशयित्वम् आह- अखिल-मनुषु मन्त्रा वैष्णवा वीर्यवन्तो महिततर-फलाढ्यास् तेषु गोपाल-मन्त्राः । प्रबलतर इहैषो ऽमीषु संमोहनाख्यो मनुर् अनुपम-सम्पत्-कल्पनाकल्प-शाखी

mantrāntarebhyo 'syātiśayitvam āha- akhila-manuṣu mantrā vaiṣṇavā vīryavanto mahitatara-phalāḍhyās teṣu gopāla-mantrāḥ | prabalatara ihaiṣo 'mīṣu saṃmohanākhyo manur anupama-sampat-kalpanākalpa-śākhī

Sanskrit only: no published translation is held for this verse.

मनुम् इमम् अतिहृद्यं यो भजेद् भक्ति-नम्रो जप-हुत-यजनाद्यैर् ध्यानवान् मन्त्रि-मुख्यः । त्रुटित-सकल-कर्म-ग्रन्थिर् उद्बुद्ध-चेताः व्रजति स तु पदं तन् नित्य-शुद्धं मुरारेः

manum imam atihṛdyaṃ yo bhajed bhakti-namro japa-huta-yajanādyair dhyānavān mantri-mukhyaḥ | truṭita-sakala-karma-granthir udbuddha-cetāḥ vrajati sa tu padaṃ tan nitya-śuddhaṃ murāreḥ

Sanskrit only: no published translation is held for this verse.

अथ योगम् आह- अङ्गीकृत्यैकम् एषां मनुम् अथ जप-होमार्चनाद्यैर् मनूनाम् अष्टाङ्गोत्सारितारिः प्रमुदित-परिशुद्ध-प्रसन्नान्तरात्मा । योगी युञ्जीत योगान् समुचित-विहृति-स्वप्न-बोधा हृतिः स्यात् प्रागास्यश् चासने स्वे सुमृदुनि समुखं मीलिताक्षो निविष्टः

atha yogam āha- aṅgīkṛtyaikam eṣāṃ manum atha japa-homārcanādyair manūnām aṣṭāṅgotsāritāriḥ pramudita-pariśuddha-prasannāntarātmā | yogī yuñjīta yogān samucita-vihṛti-svapna-bodhā hṛtiḥ syāt prāgāsyaś cāsane sve sumṛduni samukhaṃ mīlitākṣo niviṣṭaḥ

Sanskrit only: no published translation is held for this verse.

एषां मनूनां मन्त्राणां मध्ये एकं मनुम् मन्त्र-जप-होमादिभिः स्वीकृत्य वशीकृत्य अष्टाङ्गेन यम-नियम-प्राणायाम-प्रत्याहार-ध्यान-धारणा-समाधि-लक्षणेन उत्सारितास् त्यक्ताः काम-क्रोधादयो ऽरयो येन स तथा हर्षित-निर्मल-प्रसन्न-चित्तो योगी प्राग्-वदनः सन् योगान् चित्त-वृत्ति-निरोधादीन् करोतु । कीदृशो योगी ? यथोचित-विहार-निद्रा-प्रबोधाहारः । पुनः स्वकीये सुकोमले आसने समुपविष्टः । पुनः कीदृशः ? सुखेनानायसेन संमीलिते मुद्रिते अक्षिणी येन सः ॥९७॥ विश्वं भूतेन्द्रियान्तःकरण-मयमिनेन्द्व्-अग्नि-रूपं समस्तं वर्णात्मैतत् प्रधाने कल-नयन-मये बीज-रूपे ध्रुवेण । नीत्वा तत्-पुंसि बिन्द्व्-आत्मनि तम् अपि परात्मन्य् अथो काल-तत्त्वे तं वै शक्तौ चिद्-आत्मन्य् अपि नयतु च तां केवले धाम्नि शान्ते

eṣāṃ manūnāṃ mantrāṇāṃ madhye ekaṃ manum mantra-japa-homādibhiḥ svīkṛtya vaśīkṛtya aṣṭāṅgena yama-niyama-prāṇāyāma-pratyāhāra-dhyāna-dhāraṇā-samādhi-lakṣaṇena utsāritās tyaktāḥ kāma-krodhādayo 'rayo yena sa tathā harṣita-nirmala-prasanna-citto yogī prāg-vadanaḥ san yogān citta-vṛtti-nirodhādīn karotu | kīdṛśo yogī ? yathocita-vihāra-nidrā-prabodhāhāraḥ | punaḥ svakīye sukomale āsane samupaviṣṭaḥ | punaḥ kīdṛśaḥ ? sukhenānāyasena saṃmīlite mudrite akṣiṇī yena saḥ ||97|| viśvaṃ bhūtendriyāntaḥkaraṇa-mayaminendv-agni-rūpaṃ samastaṃ varṇātmaitat pradhāne kala-nayana-maye bīja-rūpe dhruveṇa | nītvā tat-puṃsi bindv-ātmani tam api parātmany atho kāla-tattve taṃ vai śaktau cid-ātmany api nayatu ca tāṃ kevale dhāmni śānte

Sanskrit only: no published translation is held for this verse.

कीदृशे ? निर्द्वन्द्वे निर्विशेषे निरतिशय-महानन्द-सान्द्रे ऽवसाना- पेते ऽर्थे कृष्ण-पूर्वमल-रहित-गिरां शाश्वते स्वात्मनीत्थम् । संहृत्याभ्यस्य बीजोत्तमम् अथ शनकैर् लीन-निश्वास-चेताः प्रक्षीणापुण्य-पुण्यो निरुपम-पर-संवित्-स्वरूपः स भूयात्

kīdṛśe ? nirdvandve nirviśeṣe niratiśaya-mahānanda-sāndre 'vasānā- pete 'rthe kṛṣṇa-pūrvamala-rahita-girāṃ śāśvate svātmanīttham | saṃhṛtyābhyasya bījottamam atha śanakair līna-niśvāsa-cetāḥ prakṣīṇāpuṇya-puṇyo nirupama-para-saṃvit-svarūpaḥ sa bhūyāt

Sanskrit only: no published translation is held for this verse.

मूलाधारे त्रि-कोणे तरुणतरणिभाभास्वरे विभ्रमन्तं कामं बालार्क-कालानल-जठर-कुरङ्गाङ्क-कोटि-प्रभासम् । विद्युन्-माला-सहस्र-द्युति-रुचिर-हसद्-बन्धु-जीवाभिरामं त्रैगुण्याक्रान्त-बिन्दुं जगद्-उदय-लयैकान्त-हेतुं विचिन्त्य

mūlādhāre tri-koṇe taruṇataraṇibhābhāsvare vibhramantaṃ kāmaṃ bālārka-kālānala-jaṭhara-kuraṅgāṅka-koṭi-prabhāsam | vidyun-mālā-sahasra-dyuti-rucira-hasad-bandhu-jīvābhirāmaṃ traiguṇyākrānta-binduṃ jagad-udaya-layaikānta-hetuṃ vicintya

Sanskrit only: no published translation is held for this verse.

तस्योर्ध्वे विस्फुरन्तीं स्फुट-रुचिर-तडित्-पुञ्ज-भाभास्वराभाम् उद्गच्छन्तीं सुषुम्णा-सरणिम् अनु-शिखाम् आललाटेन्दु-बिम्बम् । चिन्-मात्रां सूक्ष्म-रूपां कलित-सकल-विश्वां कलां नाद-गम्यां मूलं या सर्व-धाम्नां स्मरतु निरुपमां हुङ्कृतोदञ्चितेरः

tasyordhve visphurantīṃ sphuṭa-rucira-taḍit-puñja-bhābhāsvarābhām udgacchantīṃ suṣumṇā-saraṇim anu-śikhām ālalāṭendu-bimbam | cin-mātrāṃ sūkṣma-rūpāṃ kalita-sakala-viśvāṃ kalāṃ nāda-gamyāṃ mūlaṃ yā sarva-dhāmnāṃ smaratu nirupamāṃ huṅkṛtodañciteraḥ

Sanskrit only: no published translation is held for this verse.

नीत्वा ता शनकैर् अधोमुख-सहस्रारारुणाब्जोदर- द्योतत्-पूर्ण-शशाङ्क-बिम्बम् अमुतः पीयूष-धारा-सृतिम् । रक्तां मन्त्रमयीं निपीय च सुधा-निस्यन्द-रूपां विशेद् भूयो ऽप्य् आत्म-निकेतनं पुनर् अपि प्रोत्थाय पीत्वा विशेत्

nītvā tā śanakair adhomukha-sahasrārāruṇābjodara- dyotat-pūrṇa-śaśāṅka-bimbam amutaḥ pīyūṣa-dhārā-sṛtim | raktāṃ mantramayīṃ nipīya ca sudhā-nisyanda-rūpāṃ viśed bhūyo 'py ātma-niketanaṃ punar api protthāya pītvā viśet

Sanskrit only: no published translation is held for this verse.

एतादृशाभ्यासस्य फलम् आह- यो ऽभ्यस्यत्य् अनुदिनम् एवम् आत्मनो ऽन्तं बीजेशं दुरित-जरापमृत्यु-रोगान् । जित्वासौ स्वयम् इव मूर्तिमान् अनङ्गः संजीवेच् चिर-मलिनीलकेश-पाशः

etādṛśābhyāsasya phalam āha- yo 'bhyasyaty anudinam evam ātmano 'ntaṃ bījeśaṃ durita-jarāpamṛtyu-rogān | jitvāsau svayam iva mūrtimān anaṅgaḥ saṃjīvec cira-malinīlakeśa-pāśaḥ

Sanskrit only: no published translation is held for this verse.

स्फुट-मधुर-पदार्ण-श्रेणिर् अत्यद्भुतार्था झटिति-वदन-पद्माद् विस्फुरत्य् अस्य वाणी । अपि च सकल-मन्त्रास् तस्य सिध्यन्ति मङ्क्षु व्युपरम-घन-सौख्यैकास्पदं वर्तते सः

sphuṭa-madhura-padārṇa-śreṇir atyadbhutārthā jhaṭiti-vadana-padmād visphuraty asya vāṇī | api ca sakala-mantrās tasya sidhyanti maṅkṣu vyuparama-ghana-saukhyaikāspadaṃ vartate saḥ

Sanskrit only: no published translation is held for this verse.

भ्राम्यन्-मूर्तिं मूल-चक्राद् अनङ्ग स्वाभिर् भाभीरक्त-पीयूष-युग्भिः । विश्वाकाशं पूरयन्तं विचिन्त्य प्रत्यावेश्यास् तत्र वश्याय साध्याः

bhrāmyan-mūrtiṃ mūla-cakrād anaṅga svābhir bhābhīrakta-pīyūṣa-yugbhiḥ | viśvākāśaṃ pūrayantaṃ vicintya pratyāveśyās tatra vaśyāya sādhyāḥ

Sanskrit only: no published translation is held for this verse.

नार्यो नरो वा नगरी सभापि वा प्रवेशितास् तत्र निशात-चेतसा । स्युः किङ्करास् तस्य झटित्य् अनारतं चिराय तन् निघ्न-धियो न संशयः

nāryo naro vā nagarī sabhāpi vā praveśitās tatra niśāta-cetasā | syuḥ kiṅkarās tasya jhaṭity anārataṃ cirāya tan nighna-dhiyo na saṃśayaḥ

Sanskrit only: no published translation is held for this verse.

तरणि-दल-सनाथे शक्र-गोपारुणे यो रवि-शशि-शिखि-बिम्ब-प्रस्फुरच्-चारु-मध्ये । हृदय-सरसिजे ऽमुं श्यामलं कोमलाङ्गं सुसुखम् उपनिविष्टं तं स्मरेद् वासुदेवम्

taraṇi-dala-sanāthe śakra-gopāruṇe yo ravi-śaśi-śikhi-bimba-prasphurac-cāru-madhye | hṛdaya-sarasije 'muṃ śyāmalaṃ komalāṅgaṃ susukham upaniviṣṭaṃ taṃ smared vāsudevam

Sanskrit only: no published translation is held for this verse.

पादाम्भोज-द्वये ऽङ्गुल्य्-अमल-किशलयेष्व् आबलौ सन्-नखानां सत्-कूर्मोदार-कान्तौ प्रपद-युजि लसज्-जङ्घिका-दण्डयोश् च । जान्वोर् ऊर्वोः पिशङ्गे नव-वसन-वरे मेखला-दाम्नि नाभौ रोमावल्याम् उदारोदर-भुवि विपुले वक्षसि प्रौढ-हारे

pādāmbhoja-dvaye 'ṅguly-amala-kiśalayeṣv ābalau san-nakhānāṃ sat-kūrmodāra-kāntau prapada-yuji lasaj-jaṅghikā-daṇḍayoś ca | jānvor ūrvoḥ piśaṅge nava-vasana-vare mekhalā-dāmni nābhau romāvalyām udārodara-bhuvi vipule vakṣasi prauḍha-hāre

Sanskrit only: no published translation is held for this verse.

श्रीवत्से कौस्तुभे च स्फुट-कमल-लसद्-बद्ध-हृद्-दाम्नि बाह्वोर् मूले केयूर-दीप्ते जगद्-अवन-पटौ दोर्-द्वये कङ्कणाढ्ये । पाणि-द्वन्द्वाङ्गुलि-स्थे ऽतिमधुर-रव-संलीन-विश्वे च वेणौ कण्ठे सत्-कुण्डलोस्रस्फुट-रुचिर-कपोल-स्थ-द्वन्द्वके च

śrīvatse kaustubhe ca sphuṭa-kamala-lasad-baddha-hṛd-dāmni bāhvor mūle keyūra-dīpte jagad-avana-paṭau dor-dvaye kaṅkaṇāḍhye | pāṇi-dvandvāṅguli-sthe 'timadhura-rava-saṃlīna-viśve ca veṇau kaṇṭhe sat-kuṇḍalosrasphuṭa-rucira-kapola-stha-dvandvake ca

Sanskrit only: no published translation is held for this verse.

कर्ण-द्वन्द्वे च घोणे नयन-नलिनयोर् भ्रू-विलासे ललाटे केशेष्व् आलोल-बर्हेष्व् अतिसुरभि-मनोज्ञ-प्रसूनोज्ज्वलेषु । शोणे विन्यस्त-वेणाव् अधर-किशलये दन्त-पङ्क्त्यां स्मिताख्ये ज्योत्स्नायाम् आदि-पुंसः क्रम इति च शनैः स्वं मनः संनिधत्ताम्

karṇa-dvandve ca ghoṇe nayana-nalinayor bhrū-vilāse lalāṭe keśeṣv ālola-barheṣv atisurabhi-manojña-prasūnojjvaleṣu | śoṇe vinyasta-veṇāv adhara-kiśalaye danta-paṅktyāṃ smitākhye jyotsnāyām ādi-puṃsaḥ krama iti ca śanaiḥ svaṃ manaḥ saṃnidhattām

Sanskrit only: no published translation is held for this verse.

यावन् मनो-विलयम् एति हरेर् उदारे मन्द-स्मिते ऽभ्यसतु तावद् अनङ्ग-बीजम् । अष्टादशार्णम् अथवापि दशार्णकं वा मन्त्री शनैर् अथ समाहित-मातरिश्वा

yāvan mano-vilayam eti harer udāre manda-smite 'bhyasatu tāvad anaṅga-bījam | aṣṭādaśārṇam athavāpi daśārṇakaṃ vā mantrī śanair atha samāhita-mātariśvā

Sanskrit only: no published translation is held for this verse.

आरोप्यारोप्य मनः पदारविन्दादि-मन्द-हसितान्तम् । तत्र विलाप्य क्षीणे चेतसि सुख-चित्-सद्-आत्मको भवति

āropyāropya manaḥ padāravindādi-manda-hasitāntam | tatra vilāpya kṣīṇe cetasi sukha-cit-sad-ātmako bhavati

Sanskrit only: no published translation is held for this verse.

न्यास-जप-होम-पूजा-तर्पण-मन्त्राभिषेक-विनियोगानाम् । दीपिकयैव मयोद्भाषितः क्रमः कृत्स्न-मन्त्र-गण-कथितानाम्

nyāsa-japa-homa-pūjā-tarpaṇa-mantrābhiṣeka-viniyogānām | dīpikayaiva mayodbhāṣitaḥ kramaḥ kṛtsna-mantra-gaṇa-kathitānām

Sanskrit only: no published translation is held for this verse.

संशय-तिमिर-च्छिदुरा सैषा क्रम-दीपिका करेण सद्भिः । कर-दीपिकेव धार्या सस्नेहम् अहर्निशं समस्त-सुखाप्त्यै

saṃśaya-timira-cchidurā saiṣā krama-dīpikā kareṇa sadbhiḥ | kara-dīpikeva dhāryā sasneham aharniśaṃ samasta-sukhāptyai

Sanskrit only: no published translation is held for this verse.

जगद् इदम् अनुबिद्धं येन यस्मात् प्रसूते यद् अनु ततम् अजस्रं पाति चाधिष्ठिता यम् । यद् उरु मह उदर्चिर् यं विधत्ते च गोपी तम् अमृत-सुख-बोध-ज्योतिषं नौमि कृष्णम्

jagad idam anubiddhaṃ yena yasmāt prasūte yad anu tatam ajasraṃ pāti cādhiṣṭhitā yam | yad uru maha udarcir yaṃ vidhatte ca gopī tam amṛta-sukha-bodha-jyotiṣaṃ naumi kṛṣṇam

Sanskrit only: no published translation is held for this verse.

यश् चक्रं निज-केलि-साधनम् अधिष्ठान-स्थितो ऽपि प्रभुर् दत्तं मन्मथ-शत्रुणावन-कृते व्यावृत्त-लोकात्तिकम् । धत्ते दीप्त-नवेन शोभनम् अघापेतात्त-मायं ध्रुवं वन्दे काय-विमर्दनं वध-कृतां भुञ्जद्-द्युकं यादवम्

yaś cakraṃ nija-keli-sādhanam adhiṣṭhāna-sthito 'pi prabhur dattaṃ manmatha-śatruṇāvana-kṛte vyāvṛtta-lokāttikam | dhatte dīpta-navena śobhanam aghāpetātta-māyaṃ dhruvaṃ vande kāya-vimardanaṃ vadha-kṛtāṃ bhuñjad-dyukaṃ yādavam

Sanskrit only: no published translation is held for this verse.