Liṅga Purāṇa 1.1

नमो रुद्राय हरये ब्रह्मणे परमात्मने । प्रधानपुरुषेशाय सर्गस्थित्यन्तकारिणे

namo rudrāya haraye brahmaṇe paramātmane / pradhānapuruṣeśāya sargasthityantakāriṇe

Sanskrit only: no published translation is held for this verse.

नारदो ऽभ्यर्च्य शैलेशे शङ्करं सङ्गमेश्वरे । हिरण्यगर्भे स्वर्लीने ह्य् अविमुक्ते महालये

nārado 'bhyarcya śaileśe śaṅkaraṃ saṅgameśvare / hiraṇyagarbhe svarlīne hy avimukte mahālaye

Sanskrit only: no published translation is held for this verse.

रौद्रे गोप्रेक्षके चैव श्रेष्ठे पाशुपते तथा । विघ्नेश्वरे च केदारे तथा गोमायुकेश्वरे

raudre goprekṣake caiva śreṣṭhe pāśupate tathā / vighneśvare ca kedāre tathā gomāyukeśvare

Sanskrit only: no published translation is held for this verse.

हिरण्यगर्भे चन्द्रेशे ईशान्ये च त्रिविष्टपे । शुक्रेश्वरे यथान्यायं नैमिषं प्रययौ मुनिः

hiraṇyagarbhe candreśe īśānye ca triviṣṭape / śukreśvare yathānyāyaṃ naimiṣaṃ prayayau muniḥ

Sanskrit only: no published translation is held for this verse.

नैमिषेयास्तदा दृष्ट्वा नारदं हृष्टमानसाः । समभ्यर्च्यासनं तस्मै तद्योग्यं समकल्पयन्

naimiṣeyāstadā dṛṣṭvā nāradaṃ hṛṣṭamānasāḥ / samabhyarcyāsanaṃ tasmai tadyogyaṃ samakalpayan

Sanskrit only: no published translation is held for this verse.

सो ऽपि हृष्टो मुनिवरैर् दत्तं भेजे तदासनम् । सम्पूज्यमानो मुनिभिः सुखासीनो वरासने

so 'pi hṛṣṭo munivarair dattaṃ bheje tadāsanam / sampūjyamāno munibhiḥ sukhāsīno varāsane

Sanskrit only: no published translation is held for this verse.

चक्रे कथां विचित्रार्थां लिङ्गमाहात्म्यमाश्रिताम् । एतस्मिन्नेवकाले तु सूतः पौराणिकः स्वयम्

cakre kathāṃ vicitrārthāṃ liṅgamāhātmyamāśritām / etasminnevakāle tu sūtaḥ paurāṇikaḥ svayam

Sanskrit only: no published translation is held for this verse.

जगाम नैमिषं धीमान् प्रणामार्थं तपस्विनाम् । तस्मै साम च पूजां च यथावच्चक्रिरे तदा

jagāma naimiṣaṃ dhīmān praṇāmārthaṃ tapasvinām / tasmai sāma ca pūjāṃ ca yathāvaccakrire tadā

Sanskrit only: no published translation is held for this verse.

नैमिषेयास्तु शिष्याय कृष्णद्वैपायनस्य तु । अथ तेषां पुराणस्य शुश्रूषा समपद्यत

naimiṣeyāstu śiṣyāya kṛṣṇadvaipāyanasya tu / atha teṣāṃ purāṇasya śuśrūṣā samapadyata

Sanskrit only: no published translation is held for this verse.

दृष्ट्वा तम् अतिविश्वस्तं विद्वांसं रोमहर्षणम् । अपृच्छंश्च ततः सूतम् ऋषिं सर्वे तपोधनाः

dṛṣṭvā tam ativiśvastaṃ vidvāṃsaṃ romaharṣaṇam / apṛcchaṃśca tataḥ sūtam ṛṣiṃ sarve tapodhanāḥ

Sanskrit only: no published translation is held for this verse.

पुराणसंहितां पुण्यां लिङ्गमाहात्म्यसंयुताम् । नैमिषेया ऊचुः त्वया सूत महाबुद्धे कृष्णद्वैपायनो मुनिः

purāṇasaṃhitāṃ puṇyāṃ liṅgamāhātmyasaṃyutām / naimiṣeyā ūcuḥ tvayā sūta mahābuddhe kṛṣṇadvaipāyano muniḥ

Sanskrit only: no published translation is held for this verse.

उपासितः पुराणार्थं लब्धा तस्माच्च संहिता । तस्माद्भवन्तं पृच्छामः सूत पौराणिकोत्तमम्

upāsitaḥ purāṇārthaṃ labdhā tasmācca saṃhitā / tasmādbhavantaṃ pṛcchāmaḥ sūta paurāṇikottamam

Sanskrit only: no published translation is held for this verse.

पुराणसंहितां दिव्यां लिङ्गमाहात्म्यसंयुताम् । नारदो ऽप्यस्य देवस्य रुद्रस्य परमात्मनः

purāṇasaṃhitāṃ divyāṃ liṅgamāhātmyasaṃyutām / nārado 'pyasya devasya rudrasya paramātmanaḥ

Sanskrit only: no published translation is held for this verse.

क्षेत्राण्यासाद्य चाभ्यर्च्य लिङ्गानि मुनिपुङ्गवः । इह संनिहितः श्रीमान् नारदो ब्रह्मणः सुतः

kṣetrāṇyāsādya cābhyarcya liṅgāni munipuṅgavaḥ / iha saṃnihitaḥ śrīmān nārado brahmaṇaḥ sutaḥ

Sanskrit only: no published translation is held for this verse.

भवभक्तो भवांश्चैव वयं वै नारदस्तथा । अस्याग्रतो मुनेः पुण्यं पुराणं वक्तुमर्हसि

bhavabhakto bhavāṃścaiva vayaṃ vai nāradastathā / asyāgrato muneḥ puṇyaṃ purāṇaṃ vaktumarhasi

Sanskrit only: no published translation is held for this verse.

सफलं साधितं सर्वं भवता विदितं भवेत् । एवमुक्तः स हृष्टात्मा सूतः पौराणिकोत्तमः

saphalaṃ sādhitaṃ sarvaṃ bhavatā viditaṃ bhavet / evamuktaḥ sa hṛṣṭātmā sūtaḥ paurāṇikottamaḥ

Sanskrit only: no published translation is held for this verse.

अभिवाद्याग्रतो धीमान् नारदं ब्रह्मणः सुतम् । नैमिषेयांश्च पुण्यात्मा पुराणं व्याजहार सः

abhivādyāgrato dhīmān nāradaṃ brahmaṇaḥ sutam / naimiṣeyāṃśca puṇyātmā purāṇaṃ vyājahāra saḥ

Sanskrit only: no published translation is held for this verse.

सूत उवाच नमस्कृत्य महादेवं ब्रह्माणं च जनार्दनम् । मुनीश्वरं तथा व्यासं वक्तुं लिङ्गं स्मराम्यहम्

sūta uvāca namaskṛtya mahādevaṃ brahmāṇaṃ ca janārdanam / munīśvaraṃ tathā vyāsaṃ vaktuṃ liṅgaṃ smarāmyaham

Sanskrit only: no published translation is held for this verse.

शब्दं ब्रह्मतनुं साक्षाच् छब्दब्रह्मप्रकाशकम् । वर्णावयवम् अव्यक्त- लक्षणं बहुधा स्थितम्

śabdaṃ brahmatanuṃ sākṣāc chabdabrahmaprakāśakam / varṇāvayavam avyakta- lakṣaṇaṃ bahudhā sthitam

Sanskrit only: no published translation is held for this verse.

अकारोकारमकारं स्थूलं सूक्ष्मं परात्परम् । ओङ्काररूपम् ऋग्वक्त्रं समजिह्वासमन्वितम्

akārokāramakāraṃ sthūlaṃ sūkṣmaṃ parātparam / oṅkārarūpam ṛgvaktraṃ samajihvāsamanvitam

Sanskrit only: no published translation is held for this verse.

यजुर्वेदमहाग्रीवम् अथर्वहृदयं विभुम् । प्रधानपुरुषातीतं प्रलयोत्पत्तिवर्जितम्

yajurvedamahāgrīvam atharvahṛdayaṃ vibhum / pradhānapuruṣātītaṃ pralayotpattivarjitam

Sanskrit only: no published translation is held for this verse.

तमसा कालरुद्राख्यं रजसा कनकाण्डजम् । सत्त्वेन सर्वगं विष्णुं निर्गुणत्वे महेश्वरम्

tamasā kālarudrākhyaṃ rajasā kanakāṇḍajam / sattvena sarvagaṃ viṣṇuṃ nirguṇatve maheśvaram

Sanskrit only: no published translation is held for this verse.

प्रधानावयवं व्याप्य सप्तधाधिष्ठितं क्रमात् । पुनः षोडशधा चैव षड्विंशकम् अजोद्भवम्

pradhānāvayavaṃ vyāpya saptadhādhiṣṭhitaṃ kramāt / punaḥ ṣoḍaśadhā caiva ṣaḍviṃśakam ajodbhavam

Sanskrit only: no published translation is held for this verse.

सर्गप्रतिष्ठासंहार- लीलार्थं लिङ्गरूपिणम् । प्रणम्य च यथान्यायं वक्ष्ये लिङ्गोद्भवं शुभम्

sargapratiṣṭhāsaṃhāra- līlārthaṃ liṅgarūpiṇam / praṇamya ca yathānyāyaṃ vakṣye liṅgodbhavaṃ śubham

Sanskrit only: no published translation is held for this verse.