Liṅga Purāṇa 1.19

सूत उवाच अथोवाच महादेवः प्रीतो ऽहं सुरसत्तमौ । पश्यतां मां महादेवं भयं सर्वं विमुच्यताम्

sūta uvāca athovāca mahādevaḥ prīto 'haṃ surasattamau / paśyatāṃ māṃ mahādevaṃ bhayaṃ sarvaṃ vimucyatām

Sanskrit only: no published translation is held for this verse.

युवां प्रसूतौ गात्राभ्यां मम पूर्वं महाबलौ । अयं मे दक्षिणे पार्श्वे ब्रह्मा लोकपितामहः

yuvāṃ prasūtau gātrābhyāṃ mama pūrvaṃ mahābalau / ayaṃ me dakṣiṇe pārśve brahmā lokapitāmahaḥ

Sanskrit only: no published translation is held for this verse.

वामे पार्श्वे च मे विष्णुर् विश्वात्मा हृदयोद्भवः । प्रीतो ऽहं युवयोः सम्यग् वरं दद्मि यथेप्सितम्

vāme pārśve ca me viṣṇur viśvātmā hṛdayodbhavaḥ / prīto 'haṃ yuvayoḥ samyag varaṃ dadmi yathepsitam

Sanskrit only: no published translation is held for this verse.

एवमुक्त्वा तु तं विष्णुं कराभ्यां परमेश्वरः । पस्पर्श सुभगाभ्यां तु कृपया तु कृपानिधिः

evamuktvā tu taṃ viṣṇuṃ karābhyāṃ parameśvaraḥ / pasparśa subhagābhyāṃ tu kṛpayā tu kṛpānidhiḥ

Sanskrit only: no published translation is held for this verse.

ततः प्रहृष्टमनसा प्रणिपत्य महेश्वरम् । प्राह नारायणो नाथं लिङ्गस्थं लिङ्गवर्जितम्

tataḥ prahṛṣṭamanasā praṇipatya maheśvaram / prāha nārāyaṇo nāthaṃ liṅgasthaṃ liṅgavarjitam

Sanskrit only: no published translation is held for this verse.

यदि प्रीतिः समुत्पन्ना यदि देयो वरश् च नौ । भक्तिर्भवतु नौ नित्यं त्वयि चाव्यभिचारिणी

yadi prītiḥ samutpannā yadi deyo varaś ca nau / bhaktirbhavatu nau nityaṃ tvayi cāvyabhicāriṇī

Sanskrit only: no published translation is held for this verse.

देवः प्रदत्तवान् देवाः स्वात्मन्यव्यभिचारिणीम् । ब्रह्मणे विष्णवे चैव श्रद्धां शीतांशुभूषणः

devaḥ pradattavān devāḥ svātmanyavyabhicāriṇīm / brahmaṇe viṣṇave caiva śraddhāṃ śītāṃśubhūṣaṇaḥ

Sanskrit only: no published translation is held for this verse.

जानुभ्यामवनीं गत्वा पुनर्नारायणः स्वयम् । प्रणिपत्य च विश्वेशं प्राह मन्दतरं वशी

jānubhyāmavanīṃ gatvā punarnārāyaṇaḥ svayam / praṇipatya ca viśveśaṃ prāha mandataraṃ vaśī

Sanskrit only: no published translation is held for this verse.

आवयोर्देवदेवेश विवादमतिशोभनम् । इहागतो भवान् यस्माद् विवादशमनाय नौ

āvayordevadeveśa vivādamatiśobhanam / ihāgato bhavān yasmād vivādaśamanāya nau

Sanskrit only: no published translation is held for this verse.

तस्य तद्वचनं श्रुत्वा पुनः प्राह हरो हरिम् । प्रणिपत्य स्थितं मूर्ध्ना कृताञ्जलिपुटं स्मयन्

tasya tadvacanaṃ śrutvā punaḥ prāha haro harim / praṇipatya sthitaṃ mūrdhnā kṛtāñjalipuṭaṃ smayan

Sanskrit only: no published translation is held for this verse.

श्रीमहादेव उवाच प्रलयस्थितिसर्गाणां कर्ता त्वं धरणीपते । वत्स वत्स हरे विष्णो पालयैतच्चराचरम्

śrīmahādeva uvāca pralayasthitisargāṇāṃ kartā tvaṃ dharaṇīpate / vatsa vatsa hare viṣṇo pālayaitaccarācaram

Sanskrit only: no published translation is held for this verse.

त्रिधा भिन्नो ह्यहं विष्णो ब्रह्मविष्णुभवाख्यया । सर्गरक्षालयगुणैर् निष्कलः परमेश्वरः

tridhā bhinno hyahaṃ viṣṇo brahmaviṣṇubhavākhyayā / sargarakṣālayaguṇair niṣkalaḥ parameśvaraḥ

Sanskrit only: no published translation is held for this verse.

संमोहं त्यज भो विष्णो पालयैनं पितामहम् । पाद्मे भविष्यति सुतः कल्पे तव पितामहः

saṃmohaṃ tyaja bho viṣṇo pālayainaṃ pitāmaham / pādme bhaviṣyati sutaḥ kalpe tava pitāmahaḥ

Sanskrit only: no published translation is held for this verse.

तदा द्रक्ष्यसि मां चैवं सो ऽपि द्रक्ष्यति पद्मजः । एवमुक्त्वा स भगवांस् तत्रैवान्तरधीयत

tadā drakṣyasi māṃ caivaṃ so 'pi drakṣyati padmajaḥ / evamuktvā sa bhagavāṃs tatraivāntaradhīyata

Sanskrit only: no published translation is held for this verse.

तदाप्रभृति लोकेषु लिङ्गार्चा सुप्रतिष्ठिता । लिङ्गवेदी महादेवी लिङ्गं साक्षान्महेश्वरः

tadāprabhṛti lokeṣu liṅgārcā supratiṣṭhitā / liṅgavedī mahādevī liṅgaṃ sākṣānmaheśvaraḥ

Sanskrit only: no published translation is held for this verse.

लयनाल्लिङ्गमित्युक्तं तत्रैव निखिलं सुराः । यस्तु लैङ्गं पठेन्नित्यम् आख्यानं लिङ्गसन्निधौ

layanālliṅgamityuktaṃ tatraiva nikhilaṃ surāḥ / yastu laiṅgaṃ paṭhennityam ākhyānaṃ liṅgasannidhau

Sanskrit only: no published translation is held for this verse.

स याति शिवतां विप्रो नात्र कार्या विचारणा

sa yāti śivatāṃ vipro nātra kāryā vicāraṇā

Sanskrit only: no published translation is held for this verse.