Liṅga Purāṇa 1.44

शैलादिरुवाच स्मरणादेव रुद्रस्य सम्प्राप्ताश् च गणेश्वराः । सर्वे सहस्रहस्ताश् च सहस्रायुधपाणयः

śailādiruvāca smaraṇādeva rudrasya samprāptāś ca gaṇeśvarāḥ / sarve sahasrahastāś ca sahasrāyudhapāṇayaḥ

Sanskrit only: no published translation is held for this verse.

त्रिनेत्राश् च महात्मानस् त्रिदशैरपि वन्दिताः । कोटिकालाग्निसंकाशा जटामुकुटधारिणः

trinetrāś ca mahātmānas tridaśairapi vanditāḥ / koṭikālāgnisaṃkāśā jaṭāmukuṭadhāriṇaḥ

Sanskrit only: no published translation is held for this verse.

दंष्ट्राकरालवदना नित्या बुद्धाश् च निर्मलाः । कोटिकोटिगणैस्तुल्यैर् आत्मना च गणेश्वराः । असंख्याता महात्मानस् तत्राजग्मुर्मुदा युताः

daṃṣṭrākarālavadanā nityā buddhāś ca nirmalāḥ / koṭikoṭigaṇaistulyair ātmanā ca gaṇeśvarāḥ / asaṃkhyātā mahātmānas tatrājagmurmudā yutāḥ

Sanskrit only: no published translation is held for this verse.

गायन्तश् च द्रवन्तश् च नृत्यन्तश् च महाबलाः । मुखाडम्बरवाद्यानि वादयन्तस्तथैव च

gāyantaś ca dravantaś ca nṛtyantaś ca mahābalāḥ / mukhāḍambaravādyāni vādayantastathaiva ca

Sanskrit only: no published translation is held for this verse.

रथैर्नागैर्हयैश्चैव सिंहमर्कटवाहनाः । विमानेषु तथारूढा हेमचित्रेषु वै गणाः

rathairnāgairhayaiścaiva siṃhamarkaṭavāhanāḥ / vimāneṣu tathārūḍhā hemacitreṣu vai gaṇāḥ

Sanskrit only: no published translation is held for this verse.

भेरीमृदङ्गकाद्यैश् च पणवानकगोमुखैः । वादित्रैर्विविधैश्चान्यैः पटहैरेकपुष्करैः

bherīmṛdaṅgakādyaiś ca paṇavānakagomukhaiḥ / vāditrairvividhaiścānyaiḥ paṭahairekapuṣkaraiḥ

Sanskrit only: no published translation is held for this verse.

भेरीमुरजसंनादैर् आडम्बरकडिण्डिमैः । मर्दलैर्वेणुवीणाभिर् विविधैस्तालनिःस्वनैः

bherīmurajasaṃnādair āḍambarakaḍiṇḍimaiḥ / mardalairveṇuvīṇābhir vividhaistālaniḥsvanaiḥ

Sanskrit only: no published translation is held for this verse.

दर्दुरैस्तलघातैश् च कच्छपैः पणवैरपि । वाद्यमानैर्महायोगा आजग्मुर्देवसंसदम्

darduraistalaghātaiś ca kacchapaiḥ paṇavairapi / vādyamānairmahāyogā ājagmurdevasaṃsadam

Sanskrit only: no published translation is held for this verse.

ते गणेशा महासत्त्वाः सर्वदेवेश्वरेश्वराः । प्रणम्य देवं देवीं च इदं वचनम् अब्रुवन्

te gaṇeśā mahāsattvāḥ sarvadeveśvareśvarāḥ / praṇamya devaṃ devīṃ ca idaṃ vacanam abruvan

Sanskrit only: no published translation is held for this verse.

भगवन्देवदेवेश त्रियंबक वृषध्वज । किमर्थं च स्मृता देव आज्ञापय महाद्युते

bhagavandevadeveśa triyaṃbaka vṛṣadhvaja / kimarthaṃ ca smṛtā deva ājñāpaya mahādyute

Sanskrit only: no published translation is held for this verse.

किं सागराञ्शोषयामो यमं वा सह किङ्करैः । हन्मो मृत्युसुतां मृत्युं पशुवद्धन्म पद्मजम्

kiṃ sāgarāñśoṣayāmo yamaṃ vā saha kiṅkaraiḥ / hanmo mṛtyusutāṃ mṛtyuṃ paśuvaddhanma padmajam

Sanskrit only: no published translation is held for this verse.

बद्ध्वेन्द्रं सह देवैश् च सह विष्णुं च वायुना । आनयामः सुसंक्रुद्धा दैत्यान्वा सह दानवैः

baddhvendraṃ saha devaiś ca saha viṣṇuṃ ca vāyunā / ānayāmaḥ susaṃkruddhā daityānvā saha dānavaiḥ

Sanskrit only: no published translation is held for this verse.

कस्याद्य व्यसनं घोरं करिष्यामस्तवाज्ञया । कस्य वाद्योत्सवो देव सर्वकामसमृद्धये

kasyādya vyasanaṃ ghoraṃ kariṣyāmastavājñayā / kasya vādyotsavo deva sarvakāmasamṛddhaye

Sanskrit only: no published translation is held for this verse.

तांस्तथावादिनः सर्वान् गणेशान् सर्वसंमतान् । उवाच देवः सम्पूज्य कोटिकोटिशतान्प्रभुः

tāṃstathāvādinaḥ sarvān gaṇeśān sarvasaṃmatān / uvāca devaḥ sampūjya koṭikoṭiśatānprabhuḥ

Sanskrit only: no published translation is held for this verse.

शृणुध्वं यत्कृते यूयम् इहाहूता जगद्धिताः । श्रुत्वा च प्रयतात्मानः कुरुध्वं तदशङ्किताः

śṛṇudhvaṃ yatkṛte yūyam ihāhūtā jagaddhitāḥ / śrutvā ca prayatātmānaḥ kurudhvaṃ tadaśaṅkitāḥ

Sanskrit only: no published translation is held for this verse.

नन्दीश्वरो ऽयं पुत्रो नः सर्वेषामीश्वरेश्वरः । विप्रो ऽयं नायकश्चैव सेनानीर् वः समृद्धिमान्

nandīśvaro 'yaṃ putro naḥ sarveṣāmīśvareśvaraḥ / vipro 'yaṃ nāyakaścaiva senānīr vaḥ samṛddhimān

Sanskrit only: no published translation is held for this verse.

तमिमं मम संदेशाद् यूयं सर्वे ऽपि संमताः । सेनान्यम् अभिषिञ्चध्वं महायोगपतिं पतिम्

tamimaṃ mama saṃdeśād yūyaṃ sarve 'pi saṃmatāḥ / senānyam abhiṣiñcadhvaṃ mahāyogapatiṃ patim

Sanskrit only: no published translation is held for this verse.

एवमुक्ता भगवता गणपाः सर्व एव ते । एवमस्त्विति संमन्त्र्य संभारानाहरंस्ततः

evamuktā bhagavatā gaṇapāḥ sarva eva te / evamastviti saṃmantrya saṃbhārānāharaṃstataḥ

Sanskrit only: no published translation is held for this verse.

तस्य सर्वाश्रयं दिव्यं जांबूनदमयं शुभम् । आसनं मेरुसंकाशं मनोहरम् उपाहरन्

tasya sarvāśrayaṃ divyaṃ jāṃbūnadamayaṃ śubham / āsanaṃ merusaṃkāśaṃ manoharam upāharan

Sanskrit only: no published translation is held for this verse.

नैकस्तंभमयं चापि चामीकरवरप्रभम् । मुक्तादामावलम्बं च मणिरत्नावभासितम्

naikastaṃbhamayaṃ cāpi cāmīkaravaraprabham / muktādāmāvalambaṃ ca maṇiratnāvabhāsitam

Sanskrit only: no published translation is held for this verse.

स्तंभैश् च वैडूर्यमयैः किङ्किणीजालसंवृतम् । चारुरत्नकसंयुक्तं मण्डपं विश्वतोमुखम्

staṃbhaiś ca vaiḍūryamayaiḥ kiṅkiṇījālasaṃvṛtam / cāruratnakasaṃyuktaṃ maṇḍapaṃ viśvatomukham

Sanskrit only: no published translation is held for this verse.

कृत्वा विन्यस्य तन्मध्ये तदासनवरं शुभम् । तस्याग्रतः पादपीठं नीलवज्रावभासितम्

kṛtvā vinyasya tanmadhye tadāsanavaraṃ śubham / tasyāgrataḥ pādapīṭhaṃ nīlavajrāvabhāsitam

Sanskrit only: no published translation is held for this verse.

चक्रुः पादप्रतिष्ठार्थं कलशौ चास्य पार्श्वगौ । सम्पूर्णौ परमाम्भोभिर् अरविन्दावृताननौ

cakruḥ pādapratiṣṭhārthaṃ kalaśau cāsya pārśvagau / sampūrṇau paramāmbhobhir aravindāvṛtānanau

Sanskrit only: no published translation is held for this verse.

कलशानां सहस्रं तु सौवर्णं राजतं तथा । ताम्रजं मृन्मयं चैव सर्वतीर्थाम्बुपूरितम्

kalaśānāṃ sahasraṃ tu sauvarṇaṃ rājataṃ tathā / tāmrajaṃ mṛnmayaṃ caiva sarvatīrthāmbupūritam

Sanskrit only: no published translation is held for this verse.

वासोयुगं तथा दिव्यं गन्धं दिव्यं तथैव च । केयूरे कुण्डले चैव मुकुटं हारमेव च

vāsoyugaṃ tathā divyaṃ gandhaṃ divyaṃ tathaiva ca / keyūre kuṇḍale caiva mukuṭaṃ hārameva ca

Sanskrit only: no published translation is held for this verse.

छत्रं शतशलाकं च वालव्यजनमेव च । दत्तं महात्मना तेन ब्रह्मणा परमेष्ठिना

chatraṃ śataśalākaṃ ca vālavyajanameva ca / dattaṃ mahātmanā tena brahmaṇā parameṣṭhinā

Sanskrit only: no published translation is held for this verse.

शङ्खहाराङ्गगौरेण पृष्ठेनापि विराजितम् । व्यजनं चन्द्रशुभ्रं च हेमदण्डं सुचामरम्

śaṅkhahārāṅgagaureṇa pṛṣṭhenāpi virājitam / vyajanaṃ candraśubhraṃ ca hemadaṇḍaṃ sucāmaram

Sanskrit only: no published translation is held for this verse.

ऐरावतः सुप्रतीको गजावेतौ सुपूजितौ । मुकुटं काञ्चनं चैव निर्मितं विश्वकर्मणा

airāvataḥ supratīko gajāvetau supūjitau / mukuṭaṃ kāñcanaṃ caiva nirmitaṃ viśvakarmaṇā

Sanskrit only: no published translation is held for this verse.

कुण्डले चामले दिव्ये वज्रं चैव वरायुधम् । जांबूनदमयं सूत्रं केयूरद्वयमेव च

kuṇḍale cāmale divye vajraṃ caiva varāyudham / jāṃbūnadamayaṃ sūtraṃ keyūradvayameva ca

Sanskrit only: no published translation is held for this verse.

सम्भाराणि तथान्यानि विविधानि बहून्यपि । समन्तान् निन्युर् अव्यग्रा गणपा देवसंमताः

sambhārāṇi tathānyāni vividhāni bahūnyapi / samantān ninyur avyagrā gaṇapā devasaṃmatāḥ

Sanskrit only: no published translation is held for this verse.

ततो देवाश् च सेन्द्राश् च नारायणमुखास् तथा । मुनयो भगवान्ब्रह्मा नवब्रह्माण एव च

tato devāś ca sendrāś ca nārāyaṇamukhās tathā / munayo bhagavānbrahmā navabrahmāṇa eva ca

Sanskrit only: no published translation is held for this verse.

देवैश् च लोकाः सर्वे ते ततो जग्मुर्मुदा युताः । तेष्वागतेषु सर्वेषु भगवान्परमेश्वरः

devaiś ca lokāḥ sarve te tato jagmurmudā yutāḥ / teṣvāgateṣu sarveṣu bhagavānparameśvaraḥ

Sanskrit only: no published translation is held for this verse.

सर्वकार्यविधिं कर्तुम् आदिदेश पितामहम् । पितामहो ऽपि भगवान् नियोगादेव तस्य तु

sarvakāryavidhiṃ kartum ādideśa pitāmaham / pitāmaho 'pi bhagavān niyogādeva tasya tu

Sanskrit only: no published translation is held for this verse.

चकार सर्वं भगवान् अभिषेकं समाहितः । अर्चयित्वा ततो ब्रह्मा स्वयमेवाभ्यषेचयत्

cakāra sarvaṃ bhagavān abhiṣekaṃ samāhitaḥ / arcayitvā tato brahmā svayamevābhyaṣecayat

Sanskrit only: no published translation is held for this verse.

ततो विष्णुस्ततः शक्रो लोकपालास्तथैव च । अभ्यषिञ्चन्त विधिवद् गणेन्द्रं शिवशासनात्

tato viṣṇustataḥ śakro lokapālāstathaiva ca / abhyaṣiñcanta vidhivad gaṇendraṃ śivaśāsanāt

Sanskrit only: no published translation is held for this verse.

ऋषयस्तुष्टुवुश्चैव पिता महपुरोगमाः । स्तुतवत्सु ततस्तेषु विष्णुः सर्वजगत्पतिः

ṛṣayastuṣṭuvuścaiva pitā mahapurogamāḥ / stutavatsu tatasteṣu viṣṇuḥ sarvajagatpatiḥ

Sanskrit only: no published translation is held for this verse.

शिरस्यञ्जलिमादाय तुष्टाव च समाहितः । प्राञ्जलिः प्रणतो भूत्वा जयशब्दं चकार च

śirasyañjalimādāya tuṣṭāva ca samāhitaḥ / prāñjaliḥ praṇato bhūtvā jayaśabdaṃ cakāra ca

Sanskrit only: no published translation is held for this verse.

ततो गणाधिपाः सर्वे ततो देवास्ततो ऽसुराः । एवं स्तुतश्चाभिषिक्तो देवैः सब्रह्मकैस्तदा

tato gaṇādhipāḥ sarve tato devāstato 'surāḥ / evaṃ stutaścābhiṣikto devaiḥ sabrahmakaistadā

Sanskrit only: no published translation is held for this verse.

उद्वाहश् च कृतस्तत्र नियोगात्परमेष्ठिनः । मरुतां च सुता देवी सुयशाख्या बभूव या

udvāhaś ca kṛtastatra niyogātparameṣṭhinaḥ / marutāṃ ca sutā devī suyaśākhyā babhūva yā

Sanskrit only: no published translation is held for this verse.

लब्धं शशिप्रभं छत्रं तया तत्र विभूषितम् । चामरे चामरासक्त- हस्ताग्रैः स्त्रीगणैर्युता

labdhaṃ śaśiprabhaṃ chatraṃ tayā tatra vibhūṣitam / cāmare cāmarāsakta- hastāgraiḥ strīgaṇairyutā

Sanskrit only: no published translation is held for this verse.

सिंहासनं च परमं तया चाधिष्ठितं मया । अलंकृता महालक्ष्म्या मुकुटाद्यैः सुभूषणैः

siṃhāsanaṃ ca paramaṃ tayā cādhiṣṭhitaṃ mayā / alaṃkṛtā mahālakṣmyā mukuṭādyaiḥ subhūṣaṇaiḥ

Sanskrit only: no published translation is held for this verse.

लब्धो हारश् च परमो देव्याः कण्ठगतस् तथा । वृषेन्द्रश् च सितो नागः सिंहः सिंहध्वजस् तथा

labdho hāraś ca paramo devyāḥ kaṇṭhagatas tathā / vṛṣendraś ca sito nāgaḥ siṃhaḥ siṃhadhvajas tathā

Sanskrit only: no published translation is held for this verse.

रथश् च हेमच्छत्रं च चन्द्रबिंबसमप्रभम् । अद्यापि सदृशः कश्चिन् मया नास्ति विभुः क्वचित्

rathaś ca hemacchatraṃ ca candrabiṃbasamaprabham / adyāpi sadṛśaḥ kaścin mayā nāsti vibhuḥ kvacit

Sanskrit only: no published translation is held for this verse.

सान्वयं च गृहीत्वेशस् तथा संबन्धिबान्धवैः । आरुह्य वृषमीशानो मया देव्या गतः शिवः

sānvayaṃ ca gṛhītveśas tathā saṃbandhibāndhavaiḥ / āruhya vṛṣamīśāno mayā devyā gataḥ śivaḥ

Sanskrit only: no published translation is held for this verse.

तदा देवीं भवं दृष्ट्वा मया च प्रार्थयन् गणैः । मुनिदेवर्षयः सिद्धा आज्ञां पाशुपतीं द्विजाः

tadā devīṃ bhavaṃ dṛṣṭvā mayā ca prārthayan gaṇaiḥ / munidevarṣayaḥ siddhā ājñāṃ pāśupatīṃ dvijāḥ

Sanskrit only: no published translation is held for this verse.

अथाज्ञां प्रददौ तेषाम् अर्हाणाम् आज्ञया विभोः । नन्दिको नगजाभर्तुस् तेषां पाशुपतीं शुभाम्

athājñāṃ pradadau teṣām arhāṇām ājñayā vibhoḥ / nandiko nagajābhartus teṣāṃ pāśupatīṃ śubhām

Sanskrit only: no published translation is held for this verse.

तस्माद्धि मुनयो लब्ध्वा तदाज्ञां मुनिपुङ्गवात् । भवभक्तास्तदा चासंस् तस्मादेवं समर्चयेत्

tasmāddhi munayo labdhvā tadājñāṃ munipuṅgavāt / bhavabhaktāstadā cāsaṃs tasmādevaṃ samarcayet

Sanskrit only: no published translation is held for this verse.

नमस्कारविहीनस्तु नाम उद्गिरयेद्भवे । ब्रह्मघ्नदशसंतुल्यं तस्य पापं गरीयसम्

namaskāravihīnastu nāma udgirayedbhave / brahmaghnadaśasaṃtulyaṃ tasya pāpaṃ garīyasam

Sanskrit only: no published translation is held for this verse.

तस्मात्सर्वप्रकारेण नमस्कारादिमुच्चरेत् । आदौ कुर्यान्नमस्कारं तदन्ते शिवतां व्रजेत्

tasmātsarvaprakāreṇa namaskārādimuccaret / ādau kuryānnamaskāraṃ tadante śivatāṃ vrajet

Sanskrit only: no published translation is held for this verse.