Liṅga Purāṇa 1.45

ऋषय ऊचुः सूत सुव्यक्तमखिलं कथितं शङ्करस्य तु । सर्वात्मभावं रुद्रस्य स्वरूपं वक्तुमर्हसि

ṛṣaya ūcuḥ sūta suvyaktamakhilaṃ kathitaṃ śaṅkarasya tu / sarvātmabhāvaṃ rudrasya svarūpaṃ vaktumarhasi

Sanskrit only: no published translation is held for this verse.

सूत उवाच भूर्भुवः स्वर्महश्चैव जनः साक्षात्तपस् तथा । सत्यलोकश् च पातालं नरकार्णवकोटयः

sūta uvāca bhūrbhuvaḥ svarmahaścaiva janaḥ sākṣāttapas tathā / satyalokaś ca pātālaṃ narakārṇavakoṭayaḥ

Sanskrit only: no published translation is held for this verse.

तारकाग्रहसोमार्का ध्रुवः सप्तर्षयस् तथा । वैमानिकास्तथान्ये च तिष्ठन्त्यस्य प्रसादतः

tārakāgrahasomārkā dhruvaḥ saptarṣayas tathā / vaimānikāstathānye ca tiṣṭhantyasya prasādataḥ

Sanskrit only: no published translation is held for this verse.

अनेन निर्मितास्त्वेवं तदात्मानो द्विजर्षभाः । समष्टिरूपः सर्वात्मा संस्थितः सर्वदा शिवः

anena nirmitāstvevaṃ tadātmāno dvijarṣabhāḥ / samaṣṭirūpaḥ sarvātmā saṃsthitaḥ sarvadā śivaḥ

Sanskrit only: no published translation is held for this verse.

सर्वात्मानं महात्मानं महादेवं महेश्वरम् । न विजानन्ति संमूढा मायया तस्य मोहिताः

sarvātmānaṃ mahātmānaṃ mahādevaṃ maheśvaram / na vijānanti saṃmūḍhā māyayā tasya mohitāḥ

Sanskrit only: no published translation is held for this verse.

तस्य देवस्य रुद्रस्य शरीरं वै जगत्त्रयम् । तस्मात्प्रणम्य तं वक्ष्ये जगतां निर्णयं शुभम्

tasya devasya rudrasya śarīraṃ vai jagattrayam / tasmātpraṇamya taṃ vakṣye jagatāṃ nirṇayaṃ śubham

Sanskrit only: no published translation is held for this verse.

पुरा वः कथितं सर्वं मयाण्डस्य यथा कृतिः । भुवनानां स्वरूपं च ब्रह्माण्डे कथयाम्यहम्

purā vaḥ kathitaṃ sarvaṃ mayāṇḍasya yathā kṛtiḥ / bhuvanānāṃ svarūpaṃ ca brahmāṇḍe kathayāmyaham

Sanskrit only: no published translation is held for this verse.

पृथिवी चान्तरिक्षं च स्वर्महर्जन एव च । तपः सत्यं च सप्तैते लोकास्त्वण्डोद्भवाः शुभाः

pṛthivī cāntarikṣaṃ ca svarmaharjana eva ca / tapaḥ satyaṃ ca saptaite lokāstvaṇḍodbhavāḥ śubhāḥ

Sanskrit only: no published translation is held for this verse.

अधस्तादत्र चैतेषां द्विजाः सप्त तलानि तु । महातलादयस्तेषां अधस्तान्नरकाः क्रमात्

adhastādatra caiteṣāṃ dvijāḥ sapta talāni tu / mahātalādayasteṣāṃ adhastānnarakāḥ kramāt

Sanskrit only: no published translation is held for this verse.

महातलं हेमतलं सर्वरत्नोपशोभितम् । प्रासादैश् च विचित्रैश् च भवस्यायतनैस् तथा

mahātalaṃ hematalaṃ sarvaratnopaśobhitam / prāsādaiś ca vicitraiś ca bhavasyāyatanais tathā

Sanskrit only: no published translation is held for this verse.

अनन्तेन च संयुक्तं मुचुकुन्देन धीमता । नृपेण बलिना चैव पातालस्वर्गवासिना

anantena ca saṃyuktaṃ mucukundena dhīmatā / nṛpeṇa balinā caiva pātālasvargavāsinā

Sanskrit only: no published translation is held for this verse.

शैलं रसातलं विप्राः शार्करं हि तलातलम् । पीतं सुतलमित्युक्तं वितलं विद्रुमप्रभम्

śailaṃ rasātalaṃ viprāḥ śārkaraṃ hi talātalam / pītaṃ sutalamityuktaṃ vitalaṃ vidrumaprabham

Sanskrit only: no published translation is held for this verse.

सितं हि अतलं तच्च तलं यच्च सितेतरम् । क्ष्मायास्तु यावद्विस्तारो ह्य् अधस्तेषां च सुव्रताः

sitaṃ hi atalaṃ tacca talaṃ yacca sitetaram / kṣmāyāstu yāvadvistāro hy adhasteṣāṃ ca suvratāḥ

Sanskrit only: no published translation is held for this verse.

तलानां चैव सर्वेषां तावत्संख्या समाहिता । सहस्रयोजनं व्योम दशसाहस्रमेव च

talānāṃ caiva sarveṣāṃ tāvatsaṃkhyā samāhitā / sahasrayojanaṃ vyoma daśasāhasrameva ca

Sanskrit only: no published translation is held for this verse.

लक्षं सप्तसहस्रं हि तलानां सघनस्य तु । व्योम्नः प्रमाणं मूलं तु त्रिंशत्साहस्रकेण तु

lakṣaṃ saptasahasraṃ hi talānāṃ saghanasya tu / vyomnaḥ pramāṇaṃ mūlaṃ tu triṃśatsāhasrakeṇa tu

Sanskrit only: no published translation is held for this verse.

सुवर्णेन मुनिश्रेष्ठास् तथा वासुकिना शुभम् । रसातलमिति ख्यातं तथान्यैश् च निषेवितम्

suvarṇena muniśreṣṭhās tathā vāsukinā śubham / rasātalamiti khyātaṃ tathānyaiś ca niṣevitam

Sanskrit only: no published translation is held for this verse.

विरोचनहिरण्याक्ष- नरकाद्यैश् च सेवितम् । तलातलमिति ख्यातं सर्वशोभासमन्वितम्

virocanahiraṇyākṣa- narakādyaiś ca sevitam / talātalamiti khyātaṃ sarvaśobhāsamanvitam

Sanskrit only: no published translation is held for this verse.

वैनायकादिभिश्चैव कालनेमिपुरोगमैः । पूर्वदेवैः समाकीर्णं सुतलं च तथापरैः

vaināyakādibhiścaiva kālanemipurogamaiḥ / pūrvadevaiḥ samākīrṇaṃ sutalaṃ ca tathāparaiḥ

Sanskrit only: no published translation is held for this verse.

वितलं दानवाद्यैश् च तारकाग्निमुखैस् तथा । महान्तकाद्यैर् नागैश् च प्रह्लादेनासुरेण च

vitalaṃ dānavādyaiś ca tārakāgnimukhais tathā / mahāntakādyair nāgaiś ca prahlādenāsureṇa ca

Sanskrit only: no published translation is held for this verse.

वितलं चात्र विख्यातं कम्बलाश्वनिषेवितम् । महाकुम्भेन वीरेण हयग्रीवेण धीमता

vitalaṃ cātra vikhyātaṃ kambalāśvaniṣevitam / mahākumbhena vīreṇa hayagrīveṇa dhīmatā

Sanskrit only: no published translation is held for this verse.

शङ्कुकर्णेन संभिन्नं तथा नमुचिपूर्वकैः । तथान्यैर् विविधैर् वीरैस् तलं चैव सुशोभितम्

śaṅkukarṇena saṃbhinnaṃ tathā namucipūrvakaiḥ / tathānyair vividhair vīrais talaṃ caiva suśobhitam

Sanskrit only: no published translation is held for this verse.

तलेषु तेषु सर्वेषु चाम्बया परमेश्वरः । स्कन्देन नन्दिना सार्धं गणपैः सर्वतो वृतः

taleṣu teṣu sarveṣu cāmbayā parameśvaraḥ / skandena nandinā sārdhaṃ gaṇapaiḥ sarvato vṛtaḥ

Sanskrit only: no published translation is held for this verse.

तलानां चैव सर्वेषाम् ऊर्ध्वतः सप्तसप्तमाः । क्ष्मातलानि धरा चापि सप्तधा कथयामि वः

talānāṃ caiva sarveṣām ūrdhvataḥ saptasaptamāḥ / kṣmātalāni dharā cāpi saptadhā kathayāmi vaḥ

Sanskrit only: no published translation is held for this verse.