Library·Liṅga Purāṇa·1·1.47
सूत उवाच आग्नीध्रं ज्येष्ठदायादं काम्यपुत्रं महाबलम् । प्रियव्रतो ऽभ्यषिञ्चद्वै जंबूद्वीपेश्वरं नृपः
sūta uvāca āgnīdhraṃ jyeṣṭhadāyādaṃ kāmyaputraṃ mahābalam / priyavrato 'bhyaṣiñcadvai jaṃbūdvīpeśvaraṃ nṛpaḥ
Sanskrit only: no published translation is held for this verse.
सो ऽतीव भवभक्तश् च तपस्वी तरुणः सदा । भवार्चनरतः श्रीमान् गोमान्धीमान्द्विजर्षभाः
so 'tīva bhavabhaktaś ca tapasvī taruṇaḥ sadā / bhavārcanarataḥ śrīmān gomāndhīmāndvijarṣabhāḥ
Sanskrit only: no published translation is held for this verse.
तस्य पुत्रा बभूवुस्ते प्रजापतिसमा नव । सर्वे माहेश्वराश्चैव महादेवपरायणाः
tasya putrā babhūvuste prajāpatisamā nava / sarve māheśvarāścaiva mahādevaparāyaṇāḥ
Sanskrit only: no published translation is held for this verse.
ज्येष्ठो नाभिर् इति ख्यातस् तस्य किंपुरुषो ऽनुजः । हरिवर्षस्तृतीयस्तु चतुर्थो वै त्विलावृतः
jyeṣṭho nābhir iti khyātas tasya kiṃpuruṣo 'nujaḥ / harivarṣastṛtīyastu caturtho vai tvilāvṛtaḥ
Sanskrit only: no published translation is held for this verse.
रम्यस्तु पञ्चमस् तत्र हिरण्मान् षष्ठ उच्यते । कुरुस्तु सप्तमस्तेषां भद्राश्वस्त्वष्टमः स्मृतः
ramyastu pañcamas tatra hiraṇmān ṣaṣṭha ucyate / kurustu saptamasteṣāṃ bhadrāśvastvaṣṭamaḥ smṛtaḥ
Sanskrit only: no published translation is held for this verse.
नवमः केतुमालस्तु तेषां देशान्निबोधत । नाभेस्तु दक्षिणं वर्षं हेमाख्यं तु पिता ददौ
navamaḥ ketumālastu teṣāṃ deśānnibodhata / nābhestu dakṣiṇaṃ varṣaṃ hemākhyaṃ tu pitā dadau
Sanskrit only: no published translation is held for this verse.
हेमकूटं तु यद्वर्षं ददौ किंपुरुषाय सः । नैषधं यत्स्मृतं वर्षं हरये तत्पिता ददौ
hemakūṭaṃ tu yadvarṣaṃ dadau kiṃpuruṣāya saḥ / naiṣadhaṃ yatsmṛtaṃ varṣaṃ haraye tatpitā dadau
Sanskrit only: no published translation is held for this verse.
इलावृताय प्रददौ मेरुर्यत्र तु मध्यमः । नीलाचलाश्रितं वर्षं रम्याय प्रददौ पिता
ilāvṛtāya pradadau meruryatra tu madhyamaḥ / nīlācalāśritaṃ varṣaṃ ramyāya pradadau pitā
Sanskrit only: no published translation is held for this verse.
श्वेतं यदुत्तरं तस्मात् पित्रा दत्तं हिरण्मते । यदुत्तरं शृङ्गवर्षं पिता तत्कुरवे ददौ
śvetaṃ yaduttaraṃ tasmāt pitrā dattaṃ hiraṇmate / yaduttaraṃ śṛṅgavarṣaṃ pitā tatkurave dadau
Sanskrit only: no published translation is held for this verse.
वर्षं माल्यवतं चापि भद्राश्वस्य न्यवेदयत् । गन्धमादनवर्षं तु केतुमालाय दत्तवान्
varṣaṃ mālyavataṃ cāpi bhadrāśvasya nyavedayat / gandhamādanavarṣaṃ tu ketumālāya dattavān
Sanskrit only: no published translation is held for this verse.
इत्येतानि महान्तीह नव वर्षाणि भागशः । आग्नीध्रस्तेषु वर्षेषु पुत्रांस्तानभिषिच्य वै
ityetāni mahāntīha nava varṣāṇi bhāgaśaḥ / āgnīdhrasteṣu varṣeṣu putrāṃstānabhiṣicya vai
Sanskrit only: no published translation is held for this verse.
यथाक्रमं स धर्मात्मा ततस्तु तपसि स्थितः । तपसा भावितश्चैव स्वाध्यायनिरतस्त्वभूत्
yathākramaṃ sa dharmātmā tatastu tapasi sthitaḥ / tapasā bhāvitaścaiva svādhyāyaniratastvabhūt
Sanskrit only: no published translation is held for this verse.
स्वाध्यायनिरतः पश्चाच् छिवध्यानरतस् त्वभूत् । यानि किंपुरुषाद्यानि वर्षाण्यष्टौ शुभानि च
svādhyāyanirataḥ paścāc chivadhyānaratas tvabhūt / yāni kiṃpuruṣādyāni varṣāṇyaṣṭau śubhāni ca
Sanskrit only: no published translation is held for this verse.
तेषां स्वभावतः सिद्धिः सुखप्राया ह्ययत्नतः । विपर्ययो न तेष्वस्ति जरामृत्युभयं न च
teṣāṃ svabhāvataḥ siddhiḥ sukhaprāyā hyayatnataḥ / viparyayo na teṣvasti jarāmṛtyubhayaṃ na ca
Sanskrit only: no published translation is held for this verse.
धर्माधर्मौ न तेष्वास्तां नोत्तमाधममध्यमाः । न तेष्वस्ति युगावस्था क्षेत्रेष्वष्टसु सर्वतः
dharmādharmau na teṣvāstāṃ nottamādhamamadhyamāḥ / na teṣvasti yugāvasthā kṣetreṣvaṣṭasu sarvataḥ
Sanskrit only: no published translation is held for this verse.
रुद्रक्षेत्रे मृताश्चैव जङ्गमाः स्थावरास् तथा । भक्ताः प्रासंगिकाश्चापि तेषु क्षेत्रेषु यान्ति ते
rudrakṣetre mṛtāścaiva jaṅgamāḥ sthāvarās tathā / bhaktāḥ prāsaṃgikāścāpi teṣu kṣetreṣu yānti te
Sanskrit only: no published translation is held for this verse.
तेषां हिताय रुद्रेण चाष्टक्षेत्रं विनिर्मितम् । तत्र तेषां महादेवः सान्निध्यं कुरुते सदा
teṣāṃ hitāya rudreṇa cāṣṭakṣetraṃ vinirmitam / tatra teṣāṃ mahādevaḥ sānnidhyaṃ kurute sadā
Sanskrit only: no published translation is held for this verse.
दृष्ट्वा हृदि महादेवम् अष्टक्षेत्रनिवासिनः । सुखिनः सर्वदा तेषां स एवेह परा गतिः
dṛṣṭvā hṛdi mahādevam aṣṭakṣetranivāsinaḥ / sukhinaḥ sarvadā teṣāṃ sa eveha parā gatiḥ
Sanskrit only: no published translation is held for this verse.
नाभेर्निसर्गं वक्ष्यामि हिमाङ्के ऽस्मिन्निबोधत । नाभिस्त्वजनयत्पुत्रं मेरुदेव्यां महामतिः
nābhernisargaṃ vakṣyāmi himāṅke 'sminnibodhata / nābhistvajanayatputraṃ merudevyāṃ mahāmatiḥ
Sanskrit only: no published translation is held for this verse.
ऋषभं पार्थिवश्रेष्ठं सर्वक्षत्रस्य पूजितम् । ऋषभाद्भरतो जज्ञे वीरः पुत्रशताग्रजः
ṛṣabhaṃ pārthivaśreṣṭhaṃ sarvakṣatrasya pūjitam / ṛṣabhādbharato jajñe vīraḥ putraśatāgrajaḥ
Sanskrit only: no published translation is held for this verse.
सो ऽभिषिच्याथ ऋषभो भरतं पुत्रवत्सलः । ज्ञानवैराग्यमाश्रित्य जित्वेन्द्रियमहोरगान्
so 'bhiṣicyātha ṛṣabho bharataṃ putravatsalaḥ / jñānavairāgyamāśritya jitvendriyamahoragān
Sanskrit only: no published translation is held for this verse.
सर्वात्मनात्मनि स्थाप्य परमात्मानमीश्वरम् । नग्नो जटी निराहारश् चीरी ध्वान्तगतो हि सः
sarvātmanātmani sthāpya paramātmānamīśvaram / nagno jaṭī nirāhāraś cīrī dhvāntagato hi saḥ
Sanskrit only: no published translation is held for this verse.
निराशस्त्यक्तसंदेहः शैवमाप परं पदम् । हिमाद्रेर्दक्षिणं वर्षं भरताय न्यवेदयत्
nirāśastyaktasaṃdehaḥ śaivamāpa paraṃ padam / himādrerdakṣiṇaṃ varṣaṃ bharatāya nyavedayat
Sanskrit only: no published translation is held for this verse.
तस्मात्तु भारतं वर्षं तस्य नाम्ना विदुर्बुधाः । भरतस्यात्मजो विद्वान् सुमतिर्नाम धार्मिकः
tasmāttu bhārataṃ varṣaṃ tasya nāmnā vidurbudhāḥ / bharatasyātmajo vidvān sumatirnāma dhārmikaḥ
Sanskrit only: no published translation is held for this verse.
बभूव तस्मिंस्तद्राज्यं भरतः संन्यवेशयत् । पुत्रसंक्रामितश्रीको वनं राजा विवेश सः
babhūva tasmiṃstadrājyaṃ bharataḥ saṃnyaveśayat / putrasaṃkrāmitaśrīko vanaṃ rājā viveśa saḥ
Sanskrit only: no published translation is held for this verse.