Liṅga Purāṇa 1.78

सूत उवाच वस्त्रपूतेन तोयेन कार्यं चैवोपलेपनम् । शिवक्षेत्रे मुनिश्रेष्ठा नान्यथा सिद्धिरिष्यते

sūta uvāca vastrapūtena toyena kāryaṃ caivopalepanam / śivakṣetre muniśreṣṭhā nānyathā siddhiriṣyate

Sanskrit only: no published translation is held for this verse.

आपः पूता भवन्त्येता वस्त्रपूताः समुद्धृताः । अफेना मुनिशार्दूला नादेयाश् च विशेषतः

āpaḥ pūtā bhavantyetā vastrapūtāḥ samuddhṛtāḥ / aphenā muniśārdūlā nādeyāś ca viśeṣataḥ

Sanskrit only: no published translation is held for this verse.

तस्माद्वै सर्वकार्याणि दैविकानि द्विजोत्तमाः । अद्भिः कार्याणि पूताभिः सर्वकार्यप्रसिद्धये

tasmādvai sarvakāryāṇi daivikāni dvijottamāḥ / adbhiḥ kāryāṇi pūtābhiḥ sarvakāryaprasiddhaye

Sanskrit only: no published translation is held for this verse.

जन्तुभिर् मिश्रिता ह्यापः सूक्ष्माभिस्तान्निहत्य तु । यत्पापं सकलं चाद्भिर् अपूताभिश्चिरं लभेत्

jantubhir miśritā hyāpaḥ sūkṣmābhistānnihatya tu / yatpāpaṃ sakalaṃ cādbhir apūtābhiściraṃ labhet

Sanskrit only: no published translation is held for this verse.

संमार्जने तथा नॄणां मार्जने च विशेषतः । अग्नौ कण्डनके चैव पेषणे तोयसंग्रहे

saṃmārjane tathā nṝṇāṃ mārjane ca viśeṣataḥ / agnau kaṇḍanake caiva peṣaṇe toyasaṃgrahe

Sanskrit only: no published translation is held for this verse.

हिंसा सदा गृहस्थानां तस्माद्धिंसां विवर्जयेत् । अहिंसेयं परो धर्मः सर्वेषां प्राणिनां द्विजाः

hiṃsā sadā gṛhasthānāṃ tasmāddhiṃsāṃ vivarjayet / ahiṃseyaṃ paro dharmaḥ sarveṣāṃ prāṇināṃ dvijāḥ

Sanskrit only: no published translation is held for this verse.

तस्मात्सर्वप्रयत्नेन वस्त्रपूतं समाचरेत् । तद्दानमभयं पुण्यं सर्वदानोत्तमोत्तमम्

tasmātsarvaprayatnena vastrapūtaṃ samācaret / taddānamabhayaṃ puṇyaṃ sarvadānottamottamam

Sanskrit only: no published translation is held for this verse.

तस्मात्तु परिहर्तव्या हिंसा सर्वत्र सर्वदा । मनसा कर्मणा वाचा सर्वदाहिंसकं नरम्

tasmāttu parihartavyā hiṃsā sarvatra sarvadā / manasā karmaṇā vācā sarvadāhiṃsakaṃ naram

Sanskrit only: no published translation is held for this verse.

रक्षन्ति जन्तवः सर्वे हिंसकं बाधयन्ति च । त्रैलोक्यमखिलं दत्त्वा यत्फलं वेदपारगे

rakṣanti jantavaḥ sarve hiṃsakaṃ bādhayanti ca / trailokyamakhilaṃ dattvā yatphalaṃ vedapārage

Sanskrit only: no published translation is held for this verse.

तत्फलं कोटिगुणितं लभते ऽहिंसको नरः । मनसा कर्मणा वाचा सर्वभूतहिते रताः

tatphalaṃ koṭiguṇitaṃ labhate 'hiṃsako naraḥ / manasā karmaṇā vācā sarvabhūtahite ratāḥ

Sanskrit only: no published translation is held for this verse.

दयादर्शितपन्थानो रुद्रलोकं व्रजन्ति च । स्वामिवत्परिरक्षन्ति बहूनि विविधानि च

dayādarśitapanthāno rudralokaṃ vrajanti ca / svāmivatparirakṣanti bahūni vividhāni ca

Sanskrit only: no published translation is held for this verse.

ये पुत्रपौत्रवत्स्नेहाद् रुद्रलोकं व्रजन्ति ते । तस्मात्सर्वप्रयत्नेन वस्त्रपूतेन वारिणा

ye putrapautravatsnehād rudralokaṃ vrajanti te / tasmātsarvaprayatnena vastrapūtena vāriṇā

Sanskrit only: no published translation is held for this verse.

कार्यमभ्युक्षणं नित्यं स्नपनं च विशेषतः । त्रैलोक्यमखिलं हत्वा यत्फलं परिकीर्त्यते

kāryamabhyukṣaṇaṃ nityaṃ snapanaṃ ca viśeṣataḥ / trailokyamakhilaṃ hatvā yatphalaṃ parikīrtyate

Sanskrit only: no published translation is held for this verse.

शिवालये निहत्यैकम् अपि तत्सकलं लभेत् । शिवार्थं सर्वदा कार्या पुष्पहिंसा द्विजोत्तमाः

śivālaye nihatyaikam api tatsakalaṃ labhet / śivārthaṃ sarvadā kāryā puṣpahiṃsā dvijottamāḥ

Sanskrit only: no published translation is held for this verse.

यज्ञार्थं पशुहिंसा च क्षत्रियैर्दुष्टशासनम् । विहिताविहितं नास्ति योगिनां ब्रह्मवादिनाम्

yajñārthaṃ paśuhiṃsā ca kṣatriyairduṣṭaśāsanam / vihitāvihitaṃ nāsti yogināṃ brahmavādinām

Sanskrit only: no published translation is held for this verse.

यतस्तस्मान्न हन्तव्या निषिद्धानां निषेवणात् । सर्वकर्माणि विन्यस्य संन्यस्ता ब्रह्मवादिनः

yatastasmānna hantavyā niṣiddhānāṃ niṣevaṇāt / sarvakarmāṇi vinyasya saṃnyastā brahmavādinaḥ

Sanskrit only: no published translation is held for this verse.

न हन्तव्याः सदा पूज्याः पापकर्मरता अपि । पवित्रास्तु स्त्रियः सर्वा अत्रेश् च कुलसंभवाः

na hantavyāḥ sadā pūjyāḥ pāpakarmaratā api / pavitrāstu striyaḥ sarvā atreś ca kulasaṃbhavāḥ

Sanskrit only: no published translation is held for this verse.

ब्रह्महत्यासमं पापम् आत्रेयीं विनिहत्य च । स्त्रियः सर्वा न हन्तव्याः पापकर्मरता अपि

brahmahatyāsamaṃ pāpam ātreyīṃ vinihatya ca / striyaḥ sarvā na hantavyāḥ pāpakarmaratā api

Sanskrit only: no published translation is held for this verse.

न यज्ञार्थं स्त्रियो ग्राह्याः सर्वैः सर्वत्र सर्वदा । सर्ववर्णेषु विप्रेन्द्राः पापकर्मरता अपि

na yajñārthaṃ striyo grāhyāḥ sarvaiḥ sarvatra sarvadā / sarvavarṇeṣu viprendrāḥ pāpakarmaratā api

Sanskrit only: no published translation is held for this verse.

मलिना रूपवत्यश् च विरूपा मलिनांबराः । न हन्तव्याः सदा मर्त्यैः शिववच्छङ्कया तथा

malinā rūpavatyaś ca virūpā malināṃbarāḥ / na hantavyāḥ sadā martyaiḥ śivavacchaṅkayā tathā

Sanskrit only: no published translation is held for this verse.

वेदबाह्यव्रताचाराः श्रौतस्मार्तबहिष्कृताः । पाषण्डिन इति ख्याता न संभाष्या द्विजातिभिः

vedabāhyavratācārāḥ śrautasmārtabahiṣkṛtāḥ / pāṣaṇḍina iti khyātā na saṃbhāṣyā dvijātibhiḥ

Sanskrit only: no published translation is held for this verse.

न स्पृष्टव्या न द्रष्टव्या दृष्ट्वा भानुं समीक्षते । तथापि तेन वध्याश् च नृपैरन्यैश् च जन्तुभिः

na spṛṣṭavyā na draṣṭavyā dṛṣṭvā bhānuṃ samīkṣate / tathāpi tena vadhyāś ca nṛpairanyaiś ca jantubhiḥ

Sanskrit only: no published translation is held for this verse.

प्रसंगाद्वापि यो मर्त्यः सतां सकृदहो द्विजाः । रुद्रलोकमवाप्नोति समभ्यर्च्य महेश्वरम्

prasaṃgādvāpi yo martyaḥ satāṃ sakṛdaho dvijāḥ / rudralokamavāpnoti samabhyarcya maheśvaram

Sanskrit only: no published translation is held for this verse.

भवन्ति दुःखिताः सर्वे निर्दया मुनिसत्तमाः । भक्तिहीना नराः सर्वे भवे परमकारणे

bhavanti duḥkhitāḥ sarve nirdayā munisattamāḥ / bhaktihīnā narāḥ sarve bhave paramakāraṇe

Sanskrit only: no published translation is held for this verse.

ये भक्ता देवदेवस्य शिवस्य परमेष्ठिनः । भाग्यवन्तो विमुच्यन्ते भुक्त्वा भोगानिहैव ते

ye bhaktā devadevasya śivasya parameṣṭhinaḥ / bhāgyavanto vimucyante bhuktvā bhogānihaiva te

Sanskrit only: no published translation is held for this verse.

पुत्रेषु दारेषु गृहेषु नॄणां भक्तं यथा चित्तमथादिदेवे । सकृत्प्रसंगाद्यतितापसानां तेषां न दूरः परमेशलोकः

putreṣu dāreṣu gṛheṣu nṝṇāṃ bhaktaṃ yathā cittamathādideve / sakṛtprasaṃgādyatitāpasānāṃ teṣāṃ na dūraḥ parameśalokaḥ

Sanskrit only: no published translation is held for this verse.