Liṅga Purāṇa 1.84

सूत उवाच उमामहेश्वरं वक्ष्ये व्रतमीश्वरभाषितम् । नरनार्यादिजन्तूनां हिताय मुनिसत्तमाः

sūta uvāca umāmaheśvaraṃ vakṣye vratamīśvarabhāṣitam / naranāryādijantūnāṃ hitāya munisattamāḥ

Sanskrit only: no published translation is held for this verse.

पौर्णमास्याममावास्यां चतुर्दश्यष्टमीषु च । नक्तमब्दं प्रकुर्वीत हविष्यं पूजयेद्भवम्

paurṇamāsyāmamāvāsyāṃ caturdaśyaṣṭamīṣu ca / naktamabdaṃ prakurvīta haviṣyaṃ pūjayedbhavam

Sanskrit only: no published translation is held for this verse.

उमामहेशप्रतिमां हेम्ना कृत्वा सुशोभनाम् । राजतीं वाथ वर्षान्ते प्रतिष्ठाप्य यथाविधि

umāmaheśapratimāṃ hemnā kṛtvā suśobhanām / rājatīṃ vātha varṣānte pratiṣṭhāpya yathāvidhi

Sanskrit only: no published translation is held for this verse.

ब्राह्मणान् भोजयित्वा च दत्त्वा शक्त्या च दक्षिणाम् । रथाद्यैर्वापि देवेशं नीत्वा रुद्रालयं प्रति

brāhmaṇān bhojayitvā ca dattvā śaktyā ca dakṣiṇām / rathādyairvāpi deveśaṃ nītvā rudrālayaṃ prati

Sanskrit only: no published translation is held for this verse.

सर्वातिशयसंयुक्तैश् छत्रचामरभूषणैः । निवेदयेद्व्रतं चैव शिवाय परमेष्ठिने

sarvātiśayasaṃyuktaiś chatracāmarabhūṣaṇaiḥ / nivedayedvrataṃ caiva śivāya parameṣṭhine

Sanskrit only: no published translation is held for this verse.

स याति शिवसायुज्यं नारी देव्या यदि प्रभो । अष्टम्यां च चतुर्दश्यां नियता ब्रह्मचारिणी

sa yāti śivasāyujyaṃ nārī devyā yadi prabho / aṣṭamyāṃ ca caturdaśyāṃ niyatā brahmacāriṇī

Sanskrit only: no published translation is held for this verse.

वर्षमेकं न भुञ्जति कन्या वा विधवापि वा । वर्षान्ते प्रतिमां कृत्वा पूर्वोक्तविधिना ततः

varṣamekaṃ na bhuñjati kanyā vā vidhavāpi vā / varṣānte pratimāṃ kṛtvā pūrvoktavidhinā tataḥ

Sanskrit only: no published translation is held for this verse.

प्रतिष्ठाप्य यथान्यायं दत्त्वा रुद्रालये पुनः । ब्राह्मणान् भोजयित्वा च भवान्या सह मोदते

pratiṣṭhāpya yathānyāyaṃ dattvā rudrālaye punaḥ / brāhmaṇān bhojayitvā ca bhavānyā saha modate

Sanskrit only: no published translation is held for this verse.

या नार्येवं चरेदब्दं कृष्णामेकां चतुर्दशीम् । वर्षान्ते प्रतिमां कृत्वा येन केनापि वा द्विजाः

yā nāryevaṃ caredabdaṃ kṛṣṇāmekāṃ caturdaśīm / varṣānte pratimāṃ kṛtvā yena kenāpi vā dvijāḥ

Sanskrit only: no published translation is held for this verse.

पूर्वोक्तमखिलं कृत्वा भवान्या सह मोदते । अमावास्यां निराहारा भवेदब्दं सुयन्त्रिता

pūrvoktamakhilaṃ kṛtvā bhavānyā saha modate / amāvāsyāṃ nirāhārā bhavedabdaṃ suyantritā

Sanskrit only: no published translation is held for this verse.

शूलं च विधिना कृत्वा वर्षान्ते विनिवेदयेत् । स्नाप्येशानं यजेद्भक्त्या सहस्रैः कमलैः सितैः

śūlaṃ ca vidhinā kṛtvā varṣānte vinivedayet / snāpyeśānaṃ yajedbhaktyā sahasraiḥ kamalaiḥ sitaiḥ

Sanskrit only: no published translation is held for this verse.

राजतं कमलं चैव जांबूनदसुकर्णिकम् । दत्त्वा भवाय विप्रेभ्यः प्रदद्याद् दक्षिणाम् अपि

rājataṃ kamalaṃ caiva jāṃbūnadasukarṇikam / dattvā bhavāya viprebhyaḥ pradadyād dakṣiṇām api

Sanskrit only: no published translation is held for this verse.

कामतो ऽपि कृतं पापं भ्रूणहत्यादिकं च यत् । तत्सर्वं शूलदानेन भिन्द्यान्नारी न संशयः

kāmato 'pi kṛtaṃ pāpaṃ bhrūṇahatyādikaṃ ca yat / tatsarvaṃ śūladānena bhindyānnārī na saṃśayaḥ

Sanskrit only: no published translation is held for this verse.

सायुज्यं चैवमाप्नोति भवान्या द्विजसत्तमाः । कुर्याद्यद्वा नरः सो ऽपि रुद्रसायुज्यमाप्नुयात्

sāyujyaṃ caivamāpnoti bhavānyā dvijasattamāḥ / kuryādyadvā naraḥ so 'pi rudrasāyujyamāpnuyāt

Sanskrit only: no published translation is held for this verse.

पौर्णमास्याममावास्यां वर्षमेकमतन्द्रिता । उपवासरता नारी नरो ऽपि द्विजसत्तमाः

paurṇamāsyāmamāvāsyāṃ varṣamekamatandritā / upavāsaratā nārī naro 'pi dvijasattamāḥ

Sanskrit only: no published translation is held for this verse.

नियोगादेव तत्कार्यं भर्तॄणां द्विजसत्तमाः । जपं दानं तपः सर्वम् अस्वतन्त्रा यतः स्त्रियः

niyogādeva tatkāryaṃ bhartṝṇāṃ dvijasattamāḥ / japaṃ dānaṃ tapaḥ sarvam asvatantrā yataḥ striyaḥ

Sanskrit only: no published translation is held for this verse.

वर्षान्ते सर्वगन्धाढ्यां प्रतिमां संनिवेदयेत् । सा भवान्याश् च सायुज्यं सारूप्यं चापि सुव्रता

varṣānte sarvagandhāḍhyāṃ pratimāṃ saṃnivedayet / sā bhavānyāś ca sāyujyaṃ sārūpyaṃ cāpi suvratā

Sanskrit only: no published translation is held for this verse.

लभते नात्र संदेहः सत्यं सत्यं वदाम्यहम् । कार्तिक्यां वा तु या नारी एकभक्तेन वर्तते

labhate nātra saṃdehaḥ satyaṃ satyaṃ vadāmyaham / kārtikyāṃ vā tu yā nārī ekabhaktena vartate

Sanskrit only: no published translation is held for this verse.

क्षमाहिंसादिनियमैः संयुक्ता ब्रह्मचारिणी । दद्यात्कृष्णतिलानां च भारमेकम् अतन्द्रिता

kṣamāhiṃsādiniyamaiḥ saṃyuktā brahmacāriṇī / dadyātkṛṣṇatilānāṃ ca bhāramekam atandritā

Sanskrit only: no published translation is held for this verse.

सघृतं सगुडं चैव ओदनं परमेष्ठिने । दत्त्वा च ब्राह्मणेभ्यश् च यथा विभवविस्तरम्

saghṛtaṃ saguḍaṃ caiva odanaṃ parameṣṭhine / dattvā ca brāhmaṇebhyaś ca yathā vibhavavistaram

Sanskrit only: no published translation is held for this verse.

अष्टम्यां च चतुर्दश्याम् उपवासरता च सा । भवान्या मोदते सार्धं सारूप्यं प्राप्य सुव्रता

aṣṭamyāṃ ca caturdaśyām upavāsaratā ca sā / bhavānyā modate sārdhaṃ sārūpyaṃ prāpya suvratā

Sanskrit only: no published translation is held for this verse.

क्षमा सत्यं दया दानं शौचमिन्द्रियनिग्रहः । सर्वव्रतेष्वयं धर्मः सामान्यो रुद्रपूजनम्

kṣamā satyaṃ dayā dānaṃ śaucamindriyanigrahaḥ / sarvavrateṣvayaṃ dharmaḥ sāmānyo rudrapūjanam

Sanskrit only: no published translation is held for this verse.

समासाद्वः प्रवक्ष्यामि प्रतिमासमनुक्रमात् । मार्गशीर्षकमासादि- कार्त्तिकान्तं यथाक्रमम्

samāsādvaḥ pravakṣyāmi pratimāsamanukramāt / mārgaśīrṣakamāsādi- kārttikāntaṃ yathākramam

Sanskrit only: no published translation is held for this verse.

व्रतं सुविपुलं पुण्यं नन्दिना परिभाषितम् । मार्गशीर्षकमासे ऽथ वृषं पूर्णाङ्गमुत्तमम्

vrataṃ suvipulaṃ puṇyaṃ nandinā paribhāṣitam / mārgaśīrṣakamāse 'tha vṛṣaṃ pūrṇāṅgamuttamam

Sanskrit only: no published translation is held for this verse.

अलंकृत्य यथान्यायं शिवाय विनिवेदयेत् । सा च सार्धं भवान्या वै मोदते नात्र संशयः

alaṃkṛtya yathānyāyaṃ śivāya vinivedayet / sā ca sārdhaṃ bhavānyā vai modate nātra saṃśayaḥ

Sanskrit only: no published translation is held for this verse.

पुष्यमासे तु वै शूलं प्रतिष्ठाप्य निवेदयेत् । पूर्वोक्तमखिलं कृत्वा भवान्या सह मोदते

puṣyamāse tu vai śūlaṃ pratiṣṭhāpya nivedayet / pūrvoktamakhilaṃ kṛtvā bhavānyā saha modate

Sanskrit only: no published translation is held for this verse.

माघमासे रथं कृत्वा सर्वलक्षणलक्षितम् । दद्यात् सम्पूज्य देवेशं ब्राह्मणांश्चैव भोजयेत्

māghamāse rathaṃ kṛtvā sarvalakṣaṇalakṣitam / dadyāt sampūjya deveśaṃ brāhmaṇāṃścaiva bhojayet

Sanskrit only: no published translation is held for this verse.

सा च देव्या महाभागा मोदते नात्र संशयः । फाल्गुने प्रतिमां कृत्वा हिरण्येन यथाविधि

sā ca devyā mahābhāgā modate nātra saṃśayaḥ / phālgune pratimāṃ kṛtvā hiraṇyena yathāvidhi

Sanskrit only: no published translation is held for this verse.

राजतेनापि ताम्रेण यथाविभवविस्तरम् । प्रतिष्ठाप्य समभ्यर्च्य स्थापयेच्छङ्करालये

rājatenāpi tāmreṇa yathāvibhavavistaram / pratiṣṭhāpya samabhyarcya sthāpayecchaṅkarālaye

Sanskrit only: no published translation is held for this verse.

सा च सार्धं महादेव्या मोदते नात्र संशयः । चैत्रे भवं कुमारं च भवानीं च यथाविधि

sā ca sārdhaṃ mahādevyā modate nātra saṃśayaḥ / caitre bhavaṃ kumāraṃ ca bhavānīṃ ca yathāvidhi

Sanskrit only: no published translation is held for this verse.

ताम्राद्यैर्विधिवत्कृत्वा प्रतिष्ठाप्य यथाविधि । भवान्या मोदते सार्धं दत्त्वा रुद्राय शंभवे

tāmrādyairvidhivatkṛtvā pratiṣṭhāpya yathāvidhi / bhavānyā modate sārdhaṃ dattvā rudrāya śaṃbhave

Sanskrit only: no published translation is held for this verse.

कृत्वालयं हि कौबेरं राजतं रजतेन वै । ईश्वरोमासमायुक्तं गणेशैश् च समन्ततः

kṛtvālayaṃ hi kauberaṃ rājataṃ rajatena vai / īśvaromāsamāyuktaṃ gaṇeśaiś ca samantataḥ

Sanskrit only: no published translation is held for this verse.

सर्वरत्नसमायुक्तं प्रतिष्ठाप्य यथाविधि । स्थापयेत्परमेशस्य भवस्यायतने शुभे

sarvaratnasamāyuktaṃ pratiṣṭhāpya yathāvidhi / sthāpayetparameśasya bhavasyāyatane śubhe

Sanskrit only: no published translation is held for this verse.

वैशाखे वै चरेद् एवं कैलासाख्यं व्रतोत्तमम् । कैलासपर्वतं प्राप्य भवान्या सह मोदते

vaiśākhe vai cared evaṃ kailāsākhyaṃ vratottamam / kailāsaparvataṃ prāpya bhavānyā saha modate

Sanskrit only: no published translation is held for this verse.

ज्येष्ठे मासि महादेवं लिङ्गमूर्तिमुमापतिम् । कृताञ्जलिपुटेनैव ब्रह्मणा विष्णुना तथा

jyeṣṭhe māsi mahādevaṃ liṅgamūrtimumāpatim / kṛtāñjalipuṭenaiva brahmaṇā viṣṇunā tathā

Sanskrit only: no published translation is held for this verse.

मध्ये भवेन संयुक्तं लिङ्गमूर्ति द्विजोत्तमाः । हंसेन च वराहेण कृत्वा ताम्रादिभिः शुभाम्

madhye bhavena saṃyuktaṃ liṅgamūrti dvijottamāḥ / haṃsena ca varāheṇa kṛtvā tāmrādibhiḥ śubhām

Sanskrit only: no published translation is held for this verse.

प्रतिष्ठाप्य यथान्यायं ब्राह्मणान् भोजयेत्ततः । शिवाय शिवमासाद्य शिवस्थाने यथाविधि

pratiṣṭhāpya yathānyāyaṃ brāhmaṇān bhojayettataḥ / śivāya śivamāsādya śivasthāne yathāvidhi

Sanskrit only: no published translation is held for this verse.

ब्राह्मणैः सहितां स्थाप्य देव्याः सायुज्यमाप्नुयात् । आषाढे च शुभे मासे गृहं कृत्वा सुशोभनम्

brāhmaṇaiḥ sahitāṃ sthāpya devyāḥ sāyujyamāpnuyāt / āṣāḍhe ca śubhe māse gṛhaṃ kṛtvā suśobhanam

Sanskrit only: no published translation is held for this verse.

पक्वेष्टकाभिर् विधिवद् यथाविभवविस्तरम् । सर्वबीजरसैश्चापि सम्पूर्णं सर्वशोभनैः

pakveṣṭakābhir vidhivad yathāvibhavavistaram / sarvabījarasaiścāpi sampūrṇaṃ sarvaśobhanaiḥ

Sanskrit only: no published translation is held for this verse.

गृहोपकरणैश्चैव मुसलोलूखलादिभिः । दासीदासादिभिश्चैव शयनैरशनादिभिः

gṛhopakaraṇaiścaiva musalolūkhalādibhiḥ / dāsīdāsādibhiścaiva śayanairaśanādibhiḥ

Sanskrit only: no published translation is held for this verse.

सम्पूर्णैश् च गृहं वस्त्रैर् आच्छाद्य च समन्ततः । देवं घृतादिभिः स्नाप्य महादेवमुमापतिम्

sampūrṇaiś ca gṛhaṃ vastrair ācchādya ca samantataḥ / devaṃ ghṛtādibhiḥ snāpya mahādevamumāpatim

Sanskrit only: no published translation is held for this verse.

ब्राह्मणानां सहस्रं च भोजयित्वा यथाविधि । विद्याविनयसम्पन्नं ब्राह्मणं वेदपारगम्

brāhmaṇānāṃ sahasraṃ ca bhojayitvā yathāvidhi / vidyāvinayasampannaṃ brāhmaṇaṃ vedapāragam

Sanskrit only: no published translation is held for this verse.

प्रथमाश्रमिणं भक्त्या सम्पूज्य च यथाविधि । कन्यां सुमध्यमां यावत् कालजीवनसंयुताम्

prathamāśramiṇaṃ bhaktyā sampūjya ca yathāvidhi / kanyāṃ sumadhyamāṃ yāvat kālajīvanasaṃyutām

Sanskrit only: no published translation is held for this verse.

क्षेत्रं गोमिथुनं चैव तद्गृहे च निवेदयेत् । सायनैर् विविधैर् दिव्यैर् मेरुपर्वतसन्निभैः

kṣetraṃ gomithunaṃ caiva tadgṛhe ca nivedayet / sāyanair vividhair divyair meruparvatasannibhaiḥ

Sanskrit only: no published translation is held for this verse.

गोलोकं समनुप्राप्य भवान्या सह मोदते । भवान्या सदृशीभूत्वा सर्वकल्पेषु साव्यया

golokaṃ samanuprāpya bhavānyā saha modate / bhavānyā sadṛśībhūtvā sarvakalpeṣu sāvyayā

Sanskrit only: no published translation is held for this verse.

भवान्याश्चैव सायुज्यं लभते नात्र संशयः । सर्वधातुसमाकीर्णं विचित्रध्वजशोभितम्

bhavānyāścaiva sāyujyaṃ labhate nātra saṃśayaḥ / sarvadhātusamākīrṇaṃ vicitradhvajaśobhitam

Sanskrit only: no published translation is held for this verse.

निवेदयीत शर्वाय श्रावणे तिलपर्वतम् । वितानध्वजवस्त्राद्यैर् धातुभिश् च निवेदयेत्

nivedayīta śarvāya śrāvaṇe tilaparvatam / vitānadhvajavastrādyair dhātubhiś ca nivedayet

Sanskrit only: no published translation is held for this verse.

ब्राह्मणान् भोजयित्वा च पूर्वोक्तमखिलं भवेत् । कृत्वा भाद्रपदे मासि शोभनं शालिपर्वतम्

brāhmaṇān bhojayitvā ca pūrvoktamakhilaṃ bhavet / kṛtvā bhādrapade māsi śobhanaṃ śāliparvatam

Sanskrit only: no published translation is held for this verse.

वितानध्वजवस्त्राद्यैर् धातुभिश् च निवेदयेत् । ब्राह्मणान् भोजयित्वा च दापयेच्च यथाविधि

vitānadhvajavastrādyair dhātubhiś ca nivedayet / brāhmaṇān bhojayitvā ca dāpayecca yathāvidhi

Sanskrit only: no published translation is held for this verse.

सा च सूर्यांशुसंकाशा भवान्या सह मोदते । कृत्वा चाश्वयुजे मासि विपुलं धान्यपर्वतम्

sā ca sūryāṃśusaṃkāśā bhavānyā saha modate / kṛtvā cāśvayuje māsi vipulaṃ dhānyaparvatam

Sanskrit only: no published translation is held for this verse.

सुवर्णवस्त्रसंयुक्तं दत्त्वा सम्पूज्य शङ्करम् । ब्राह्मणान् भोजयित्वा च पूर्वोक्तमखिलं भवेत्

suvarṇavastrasaṃyuktaṃ dattvā sampūjya śaṅkaram / brāhmaṇān bhojayitvā ca pūrvoktamakhilaṃ bhavet

Sanskrit only: no published translation is held for this verse.

सर्वधान्यसमायुक्तं सर्वबीजरसादिभिः । सर्वधातुसमायुक्तं सर्वरत्नोपशोभितम्

sarvadhānyasamāyuktaṃ sarvabījarasādibhiḥ / sarvadhātusamāyuktaṃ sarvaratnopaśobhitam

Sanskrit only: no published translation is held for this verse.

शृङ्गैश्चतुर्भिः संयुक्तं वितानच्छत्रशोभितम् । गन्धमाल्यैस् तथा धूपैश् चित्रैश्चापि सुशोभितम्

śṛṅgaiścaturbhiḥ saṃyuktaṃ vitānacchatraśobhitam / gandhamālyais tathā dhūpaiś citraiścāpi suśobhitam

Sanskrit only: no published translation is held for this verse.

विचित्रैर्नृत्यगेयैश् च शङ्खवीणादिभिस् तथा । ब्रह्मघोषैर्महापुण्यं मङ्गलैश् च विशेषतः

vicitrairnṛtyageyaiś ca śaṅkhavīṇādibhis tathā / brahmaghoṣairmahāpuṇyaṃ maṅgalaiś ca viśeṣataḥ

Sanskrit only: no published translation is held for this verse.

महाध्वजाष्टसंयुक्तं विचित्रकुसुमोज्ज्वलम् । नगेन्द्रं मेरुनामानं त्रैलोक्याधारमुत्तमम्

mahādhvajāṣṭasaṃyuktaṃ vicitrakusumojjvalam / nagendraṃ merunāmānaṃ trailokyādhāramuttamam

Sanskrit only: no published translation is held for this verse.

तस्य मूर्ध्नि शिवं कुर्यान् मध्यतो धातुनैव तु । दक्षिणे च यथान्यायं ब्रह्माणं च चतुर्मुखम्

tasya mūrdhni śivaṃ kuryān madhyato dhātunaiva tu / dakṣiṇe ca yathānyāyaṃ brahmāṇaṃ ca caturmukham

Sanskrit only: no published translation is held for this verse.

उत्तरे देवदेवेशं नारायणमनामयम् । इन्द्रादिलोकपालांश् च कृत्वा भक्त्या यथाविधि

uttare devadeveśaṃ nārāyaṇamanāmayam / indrādilokapālāṃś ca kṛtvā bhaktyā yathāvidhi

Sanskrit only: no published translation is held for this verse.

प्रतिष्ठाप्य ततः स्नाप्य समभ्यर्च्य महेश्वरम् । देवस्य दक्षिणे हस्ते शूलं त्रिदशपूजितम्

pratiṣṭhāpya tataḥ snāpya samabhyarcya maheśvaram / devasya dakṣiṇe haste śūlaṃ tridaśapūjitam

Sanskrit only: no published translation is held for this verse.

वामे पाशं भवान्याश् च कमलं हेमभूषितम् । विष्णोश् च शङ्खं चक्रं च गदामब्जं प्रयत्नतः

vāme pāśaṃ bhavānyāś ca kamalaṃ hemabhūṣitam / viṣṇoś ca śaṅkhaṃ cakraṃ ca gadāmabjaṃ prayatnataḥ

Sanskrit only: no published translation is held for this verse.

ब्रह्मणश्चाक्षसूत्रं च कमण्डलुमनुत्तमम् । इन्द्रस्य वज्रम् अग्नेश् च शक्त्याख्यं परमायुधम्

brahmaṇaścākṣasūtraṃ ca kamaṇḍalumanuttamam / indrasya vajram agneś ca śaktyākhyaṃ paramāyudham

Sanskrit only: no published translation is held for this verse.

यमस्य दण्डं निरृतेः खड्गं निशिचरस्य तु । वरुणस्य महापाशं नागाख्यं रुद्रमद्भुतम्

yamasya daṇḍaṃ nirṛteḥ khaḍgaṃ niśicarasya tu / varuṇasya mahāpāśaṃ nāgākhyaṃ rudramadbhutam

Sanskrit only: no published translation is held for this verse.

वायोर् यष्टिं कुबेरस्य गदां लोकप्रपूजिताम् । टङ्कं चेशानदेवस्य निवेद्यैवं क्रमेण च

vāyor yaṣṭiṃ kuberasya gadāṃ lokaprapūjitām / ṭaṅkaṃ ceśānadevasya nivedyaivaṃ krameṇa ca

Sanskrit only: no published translation is held for this verse.

शिवस्य महतीं पूजां कृत्वा चरुसमन्विताम् । पूजयेत्सर्वदेवांश् च यथाविभवविस्तरम्

śivasya mahatīṃ pūjāṃ kṛtvā carusamanvitām / pūjayetsarvadevāṃś ca yathāvibhavavistaram

Sanskrit only: no published translation is held for this verse.

ब्राह्मणान्भोजयित्वा च पूजां कृत्वा प्रयत्नतः । महामेरुव्रतं कृत्वा महादेवाय दापयेत्

brāhmaṇānbhojayitvā ca pūjāṃ kṛtvā prayatnataḥ / mahāmeruvrataṃ kṛtvā mahādevāya dāpayet

Sanskrit only: no published translation is held for this verse.

महामेरुमनुप्राप्य महादेव्या प्रमोदते । चिरं सायुज्यम् आप्नोति महादेव्या न संशयः

mahāmerumanuprāpya mahādevyā pramodate / ciraṃ sāyujyam āpnoti mahādevyā na saṃśayaḥ

Sanskrit only: no published translation is held for this verse.

कार्तिक्यामपि या नारी कृत्वा देवीमुमां शुभाम् । सर्वाभरणसम्पूर्णां सर्वलक्षणलक्षिताम्

kārtikyāmapi yā nārī kṛtvā devīmumāṃ śubhām / sarvābharaṇasampūrṇāṃ sarvalakṣaṇalakṣitām

Sanskrit only: no published translation is held for this verse.

हेमताम्रादिभिश्चैव प्रतिष्ठाप्य विधानतः । देवं च कृत्वा देवेशं सर्वलक्षणसंयुतम्

hematāmrādibhiścaiva pratiṣṭhāpya vidhānataḥ / devaṃ ca kṛtvā deveśaṃ sarvalakṣaṇasaṃyutam

Sanskrit only: no published translation is held for this verse.

तयोरग्रे हुताशं च स्रुवहस्तं पितामहम् । नारायणं च दातारं सर्वाभरणभूषितम्

tayoragre hutāśaṃ ca sruvahastaṃ pitāmaham / nārāyaṇaṃ ca dātāraṃ sarvābharaṇabhūṣitam

Sanskrit only: no published translation is held for this verse.

लोकपालैस् तथा सिद्धैः संवृतं स्थाप्य यत्नतः । रुद्रालये व्रतं तस्मै दापयेद्भक्तिपूर्वकम्

lokapālais tathā siddhaiḥ saṃvṛtaṃ sthāpya yatnataḥ / rudrālaye vrataṃ tasmai dāpayedbhaktipūrvakam

Sanskrit only: no published translation is held for this verse.

सा भवान्यास्तनुं गत्वा भवेन सह मोदते । एकभक्तव्रतं पुण्यं प्रतिमासमनुक्रमात्

sā bhavānyāstanuṃ gatvā bhavena saha modate / ekabhaktavrataṃ puṇyaṃ pratimāsamanukramāt

Sanskrit only: no published translation is held for this verse.

मार्गशीर्षकमासादि- कार्तिकान्तं प्रवर्तितम् । नरनार्यादिजन्तूनां हिताय मुनिसत्तमाः

mārgaśīrṣakamāsādi- kārtikāntaṃ pravartitam / naranāryādijantūnāṃ hitāya munisattamāḥ

Sanskrit only: no published translation is held for this verse.

नरः कृत्वा व्रतं चैव शिवसायुज्यमाप्नुयात् । नारी देव्या न संदेहः शिवेन परिभाषितम्

naraḥ kṛtvā vrataṃ caiva śivasāyujyamāpnuyāt / nārī devyā na saṃdehaḥ śivena paribhāṣitam

Sanskrit only: no published translation is held for this verse.