Nagarjuna: M 1

अनिरोधमनुत्पादमनुच्छेदमशाश्वतम् । अनेकार्थमनानार्थमनागममनिर्गमम्

anirodhamanutpādamanucchedamaśāśvatam / anekārthamanānārthamanāgamamanirgamam

Sanskrit only: no published translation is held for this verse.

यः प्रतीत्यसमुत्पादं प्रपञ्चोपशमं शिवम् । देशयामास संबुद्धस्तं वन्दे वदतां वरम्

yaḥ pratītyasamutpādaṃ prapañcopaśamaṃ śivam / deśayāmāsa saṃbuddhastaṃ vande vadatāṃ varam

Sanskrit only: no published translation is held for this verse.

न स्वतो नापि परतो न द्वाभ्यां नाप्यहेतुतः । उत्पन्ना जातु विद्यन्ते भावाः क्कचन केचन

na svato nāpi parato na dvābhyāṃ nāpyahetutaḥ / utpannā jātu vidyante bhāvāḥ kkacana kecana

Sanskrit only: no published translation is held for this verse.

चत्वारः प्रत्यया हेतुश्चालम्बनमनन्तरम् । तथैवाधिपतेयं च प्रत्ययो नास्ति पञ्चमः

catvāraḥ pratyayā hetuścālambanamanantaram / tathaivādhipateyaṃ ca pratyayo nāsti pañcamaḥ

Sanskrit only: no published translation is held for this verse.

न हि स्वभावो भावानां प्रत्ययादिषु विद्यते । अविद्यमाने स्वभावे परभावो न विद्यते

na hi svabhāvo bhāvānāṃ pratyayādiṣu vidyate / avidyamāne svabhāve parabhāvo na vidyate

Sanskrit only: no published translation is held for this verse.

क्रिया न प्रत्ययवती नाप्रत्ययवती क्रिया । प्रत्यया नाक्रियावन्तः क्रियावन्तश्च सन्त्युत

kriyā na pratyayavatī nāpratyayavatī kriyā / pratyayā nākriyāvantaḥ kriyāvantaśca santyuta

Sanskrit only: no published translation is held for this verse.

उत्पद्यते प्रतीत्येमानितीमे प्रत्ययाः किल । यावन्नोत्पद्यत इमे तावन्नाप्रत्ययाः कथम्

utpadyate pratītyemānitīme pratyayāḥ kila / yāvannotpadyata ime tāvannāpratyayāḥ katham

Sanskrit only: no published translation is held for this verse.

नैवासतो नैव सतः प्रत्ययो ऽर्थस्य युज्यते । असतः प्रत्ययः कस्य सतश्च प्रत्ययेन किम्

naivāsato naiva sataḥ pratyayo 'rthasya yujyate / asataḥ pratyayaḥ kasya sataśca pratyayena kim

Sanskrit only: no published translation is held for this verse.

न सन्नासन्न सदसन् धर्मो निर्वर्तते यदा । कथं निर्वर्तको हेतुरेवं सति हि युज्यते

na sannāsanna sadasan dharmo nirvartate yadā / kathaṃ nirvartako heturevaṃ sati hi yujyate

Sanskrit only: no published translation is held for this verse.

अनालम्बन एवायं सन् धर्म उपदिश्यते । अथानालम्बने धर्मे कुत आलम्बनं पुनः

anālambana evāyaṃ san dharma upadiśyate / athānālambane dharme kuta ālambanaṃ punaḥ

Sanskrit only: no published translation is held for this verse.

अनुत्पन्नेषु धर्मेषु निरोधो नोपपद्यते । नानन्तरमतो युक्तं निरुद्धे प्रत्ययश्च कः

anutpanneṣu dharmeṣu nirodho nopapadyate / nānantaramato yuktaṃ niruddhe pratyayaśca kaḥ

Sanskrit only: no published translation is held for this verse.

भावानां निःस्वभावानां न सत्ता विद्यते यतः । सतीदमस्मिन् भवतीत्येतन्नैवोपपद्यते

bhāvānāṃ niḥsvabhāvānāṃ na sattā vidyate yataḥ / satīdamasmin bhavatītyetannaivopapadyate

Sanskrit only: no published translation is held for this verse.

न च व्यस्तसमस्तेषु प्रत्ययेष्वस्ति तत्फलम् । प्रत्ययेभ्यः कथं तच्च भवेन्न प्रत्ययेषु यत्

na ca vyastasamasteṣu pratyayeṣvasti tatphalam / pratyayebhyaḥ kathaṃ tacca bhavenna pratyayeṣu yat

Sanskrit only: no published translation is held for this verse.

अथासदपि तत्तेभ्यः प्रत्ययेभ्यः प्रवर्तते । अप्रत्ययेभ्यो ऽपि कस्मात्फलं नाभिप्रवर्तते

athāsadapi tattebhyaḥ pratyayebhyaḥ pravartate / apratyayebhyo 'pi kasmātphalaṃ nābhipravartate

Sanskrit only: no published translation is held for this verse.

फलं च प्रत्ययमयं प्रत्ययाश्चास्वयंमयाः । फलमस्वमयेभ्यो यत्तत्प्रत्ययमयं कथम्

phalaṃ ca pratyayamayaṃ pratyayāścāsvayaṃmayāḥ / phalamasvamayebhyo yattatpratyayamayaṃ katham

Sanskrit only: no published translation is held for this verse.

तस्मान्न प्रत्ययमयं नाप्रत्ययमयं फलम् । संविद्यते फलाभावात्प्रत्ययाप्रत्ययाः कुतः

tasmānna pratyayamayaṃ nāpratyayamayaṃ phalam / saṃvidyate phalābhāvātpratyayāpratyayāḥ kutaḥ

Sanskrit only: no published translation is held for this verse.