Nagarjuna: M 11

पूर्वा प्रज्ञायते कोटिर्नेत्युवाच महामुनिः । संसारो ऽनवराग्रो हि नास्यादिर्नापि पश्चिमम्

pūrvā prajñāyate koṭirnetyuvāca mahāmuniḥ / saṃsāro 'navarāgro hi nāsyādirnāpi paścimam

Sanskrit only: no published translation is held for this verse.

नैवाग्रं नावरं यस्य तस्य मध्यं कुतो भवेत् । तस्मान्नात्रोपपद्यन्ते पूर्वापरसहक्रमाः

naivāgraṃ nāvaraṃ yasya tasya madhyaṃ kuto bhavet / tasmānnātropapadyante pūrvāparasahakramāḥ

Sanskrit only: no published translation is held for this verse.

पूर्वं जातिर्यदि भवेज्जरामरणमुत्तरम् । निर्जरामरणा जातिर्भवेज्जायेत चामृतः

pūrvaṃ jātiryadi bhavejjarāmaraṇamuttaram / nirjarāmaraṇā jātirbhavejjāyeta cāmṛtaḥ

Sanskrit only: no published translation is held for this verse.

पश्चाज्जातिर्यदि भवेज्जरामरणमादितः । अहेतुकमजातस्य स्याज्जरामरणं कथम्

paścājjātiryadi bhavejjarāmaraṇamāditaḥ / ahetukamajātasya syājjarāmaraṇaṃ katham

Sanskrit only: no published translation is held for this verse.

न जरामरणेनैव जातिश्च सह युज्यते । म्रियेत जायमानश्च स्याच्चाहेतुकतोभयोः

na jarāmaraṇenaiva jātiśca saha yujyate / mriyeta jāyamānaśca syāccāhetukatobhayoḥ

Sanskrit only: no published translation is held for this verse.

यत्र न प्रभवन्त्येते पूर्वापरसहक्रमाः । प्रपञ्चयन्ति तां जातिं तज्जरामरणं च किम्

yatra na prabhavantyete pūrvāparasahakramāḥ / prapañcayanti tāṃ jātiṃ tajjarāmaraṇaṃ ca kim

Sanskrit only: no published translation is held for this verse.

कार्यं च कारणं चैव लक्ष्यं लक्षणमेव च । वेदना वेदकश्चैव सन्त्यर्था ये च केचन

kāryaṃ ca kāraṇaṃ caiva lakṣyaṃ lakṣaṇameva ca / vedanā vedakaścaiva santyarthā ye ca kecana

Sanskrit only: no published translation is held for this verse.

पूर्वा न विद्यते कोटिः संसारस्य न केवलम् । सर्वेषामपि भावानां पूर्वा कोटिर्न विद्यते

pūrvā na vidyate koṭiḥ saṃsārasya na kevalam / sarveṣāmapi bhāvānāṃ pūrvā koṭirna vidyate

Sanskrit only: no published translation is held for this verse.