न संभवः स्वभावस्य युक्तः प्रत्ययहेतुभिः । हेतुप्रत्ययसंभूतः स्वभावः कृतको भवेत्
na saṃbhavaḥ svabhāvasya yuktaḥ pratyayahetubhiḥ / hetupratyayasaṃbhūtaḥ svabhāvaḥ kṛtako bhavet
Sanskrit only: no published translation is held for this verse.
Nagarjuna: M 15
स्वभावः कृतको नाम भविष्यति पुनः कथम् । अकृत्रिमः स्वभावो हि निरपेक्षः परत्र च
svabhāvaḥ kṛtako nāma bhaviṣyati punaḥ katham / akṛtrimaḥ svabhāvo hi nirapekṣaḥ paratra ca
Sanskrit only: no published translation is held for this verse.
कुतः स्वभावस्याभावे परभावो भविष्यति । स्वभावः परभावस्य परभावो हि कथ्यते
kutaḥ svabhāvasyābhāve parabhāvo bhaviṣyati / svabhāvaḥ parabhāvasya parabhāvo hi kathyate
Sanskrit only: no published translation is held for this verse.
स्वभावपरभावाभ्यामृते भावः कुतः पुनः । स्वभावे परभावे वा सति भावो हि सिध्यति
svabhāvaparabhāvābhyāmṛte bhāvaḥ kutaḥ punaḥ / svabhāve parabhāve vā sati bhāvo hi sidhyati
Sanskrit only: no published translation is held for this verse.
भावस्य चेदप्रसिद्धिरभावो नैव सिध्यति । भावस्य ह्यन्यथाभावमभावं ब्रुवते जनाः
bhāvasya cedaprasiddhirabhāvo naiva sidhyati / bhāvasya hyanyathābhāvamabhāvaṃ bruvate janāḥ
Sanskrit only: no published translation is held for this verse.
स्वभावं परभावं च भावं चाभावमेव च । ये पश्यन्ति न पश्यन्ति ते तत्त्वं बुद्धशासने
svabhāvaṃ parabhāvaṃ ca bhāvaṃ cābhāvameva ca / ye paśyanti na paśyanti te tattvaṃ buddhaśāsane
Sanskrit only: no published translation is held for this verse.
कात्यायनाववादे चास्तीति नास्तीति चोभयम् । प्रतिषिद्धं भगवता भावाभावविभाविना
kātyāyanāvavāde cāstīti nāstīti cobhayam / pratiṣiddhaṃ bhagavatā bhāvābhāvavibhāvinā
Sanskrit only: no published translation is held for this verse.
यद्यस्तित्वं प्रकृत्या स्यान्न भवेदस्य नास्तिता । प्रकृतेरन्यथाभावो न हि जातूपपद्यते
yadyastitvaṃ prakṛtyā syānna bhavedasya nāstitā / prakṛteranyathābhāvo na hi jātūpapadyate
Sanskrit only: no published translation is held for this verse.
प्रकृतौ कस्य चासत्यामन्यथात्वं भविष्यति । प्रकृतौ कस्य च सत्यामन्यथात्वं भविष्यति
prakṛtau kasya cāsatyāmanyathātvaṃ bhaviṣyati / prakṛtau kasya ca satyāmanyathātvaṃ bhaviṣyati
Sanskrit only: no published translation is held for this verse.
अस्तीति शाश्वतग्राहो नास्तीत्युच्छेददर्शनम् । तस्मादस्तित्वनास्तित्वे नाश्रीयेत विचक्षणः
astīti śāśvatagrāho nāstītyucchedadarśanam / tasmādastitvanāstitve nāśrīyeta vicakṣaṇaḥ
Sanskrit only: no published translation is held for this verse.
अस्ति यद्धि स्वभावेन न तन्नास्तीति शाश्वतम् । नास्तीदानीमभूत्पूर्वमित्युच्छेदः प्रसज्यते
asti yaddhi svabhāvena na tannāstīti śāśvatam / nāstīdānīmabhūtpūrvamityucchedaḥ prasajyate
Sanskrit only: no published translation is held for this verse.