Nagarjuna: M 18

आत्मा स्कन्धा यदि भवेदुदयव्ययभाग्भवेत् । स्कन्धेभ्यो ऽन्यो यदि भवेद्भवेदस्कन्धलक्षणः

ātmā skandhā yadi bhavedudayavyayabhāgbhavet / skandhebhyo 'nyo yadi bhavedbhavedaskandhalakṣaṇaḥ

Sanskrit only: no published translation is held for this verse.

आत्मन्यसति चात्मीयं कुत एव भविष्यति । निर्ममो निरहंकारः शमादात्मात्मनीनयोः

ātmanyasati cātmīyaṃ kuta eva bhaviṣyati / nirmamo nirahaṃkāraḥ śamādātmātmanīnayoḥ

Sanskrit only: no published translation is held for this verse.

निर्ममो निरहंकारो यश्च सो ऽपि न विद्यते । निर्ममं निरहंकारं यः पश्यति न पश्यति

nirmamo nirahaṃkāro yaśca so 'pi na vidyate / nirmamaṃ nirahaṃkāraṃ yaḥ paśyati na paśyati

Sanskrit only: no published translation is held for this verse.

ममेत्यहमिति क्षीणे बहिर्धाध्यात्ममेव च । निरुध्यत उपादानं तत्क्षयाज्जन्मनः क्षयः

mametyahamiti kṣīṇe bahirdhādhyātmameva ca / nirudhyata upādānaṃ tatkṣayājjanmanaḥ kṣayaḥ

Sanskrit only: no published translation is held for this verse.

कर्मक्लेशक्षयान्मोक्षः कर्मक्लेशा विकल्पतः । ते प्रपञ्चात्प्रपञ्चस्तु शून्यतायां निरुध्यते

karmakleśakṣayānmokṣaḥ karmakleśā vikalpataḥ / te prapañcātprapañcastu śūnyatāyāṃ nirudhyate

Sanskrit only: no published translation is held for this verse.

आत्मेत्यपि प्रज्ञपितमनात्मेत्यपि देशितम् । बुद्धैर्नात्मा न चानात्मा कश्चिदित्यपि देशितम्

ātmetyapi prajñapitamanātmetyapi deśitam / buddhairnātmā na cānātmā kaścidityapi deśitam

Sanskrit only: no published translation is held for this verse.

निवृत्तमभिधातव्यं निवृत्ते चित्तगोचरे । अनुत्पन्नानिरुद्धा हि निर्वाणमिव धर्मता

nivṛttamabhidhātavyaṃ nivṛtte cittagocare / anutpannāniruddhā hi nirvāṇamiva dharmatā

Sanskrit only: no published translation is held for this verse.

सर्वं तथ्यं न वा तथ्यं तथ्यं चातथ्यमेव च । नैवातथ्यं नैव तथ्यमेतद्बुद्धानुशासनम्

sarvaṃ tathyaṃ na vā tathyaṃ tathyaṃ cātathyameva ca / naivātathyaṃ naiva tathyametadbuddhānuśāsanam

Sanskrit only: no published translation is held for this verse.

अपरप्रत्ययं शान्तं प्रपञ्चैरप्रपञ्चितम् । निर्विकल्पमनानार्थमेतत्तत्त्वस्य लक्षणम्

aparapratyayaṃ śāntaṃ prapañcairaprapañcitam / nirvikalpamanānārthametattattvasya lakṣaṇam

Sanskrit only: no published translation is held for this verse.

प्रतीत्य यद्यद्भवति न हि तावत्तदेव तत् । न चान्यदपि तत्तस्मान्नोच्छिन्नं नापि शाश्वतम्

pratītya yadyadbhavati na hi tāvattadeva tat / na cānyadapi tattasmānnocchinnaṃ nāpi śāśvatam

Sanskrit only: no published translation is held for this verse.

अनेकार्थमनानार्थमनुच्छेदमशाश्वतम् । एतत्तल्लोकनाथानां बुद्धानां शासनामृतम्

anekārthamanānārthamanucchedamaśāśvatam / etattallokanāthānāṃ buddhānāṃ śāsanāmṛtam

Sanskrit only: no published translation is held for this verse.

संबुद्धानामनुत्पादे श्रावकाणां पुनः क्षये । ज्ञानं प्रत्येकबुद्धानामसंसर्गात्प्रवर्तते

saṃbuddhānāmanutpāde śrāvakāṇāṃ punaḥ kṣaye / jñānaṃ pratyekabuddhānāmasaṃsargātpravartate

Sanskrit only: no published translation is held for this verse.