Nagarjuna: M 27

अभूमतीतमध्वानं नाभूमिति च दृष्टयः । यास्ताः शाश्वतलोकाद्याः पूर्वान्तं समुपाश्रिताः

abhūmatītamadhvānaṃ nābhūmiti ca dṛṣṭayaḥ / yāstāḥ śāśvatalokādyāḥ pūrvāntaṃ samupāśritāḥ

Sanskrit only: no published translation is held for this verse.

दृष्टयो न भविष्यामि किमन्यो ऽनागते ऽध्वनि । भविष्यामीति चान्ताद्या अपरान्तं समाश्रिताः

dṛṣṭayo na bhaviṣyāmi kimanyo 'nāgate 'dhvani / bhaviṣyāmīti cāntādyā aparāntaṃ samāśritāḥ

Sanskrit only: no published translation is held for this verse.

अभूमतीतमध्वानमित्येतन्नोपपद्यते । यो हि जन्मसु पूर्वेषु स एव न भवत्ययम्

abhūmatītamadhvānamityetannopapadyate / yo hi janmasu pūrveṣu sa eva na bhavatyayam

Sanskrit only: no published translation is held for this verse.

स एवात्मेति तु भवेदुपादानं विशिष्यते । उपादानविनिर्मुक्त आत्मा ते कतमः पुनः

sa evātmeti tu bhavedupādānaṃ viśiṣyate / upādānavinirmukta ātmā te katamaḥ punaḥ

Sanskrit only: no published translation is held for this verse.

उपादानविनिर्मुक्तो नास्त्यात्मेति कृते सति । स्यादुपादानमेवात्मा नास्ति चात्मेति वः पुनः

upādānavinirmukto nāstyātmeti kṛte sati / syādupādānamevātmā nāsti cātmeti vaḥ punaḥ

Sanskrit only: no published translation is held for this verse.

न चोपादानमेवात्मा व्येति तत्समुदेति च । कथं हि नामोपादानमुपादाता भविष्यति

na copādānamevātmā vyeti tatsamudeti ca / kathaṃ hi nāmopādānamupādātā bhaviṣyati

Sanskrit only: no published translation is held for this verse.

अन्यः पुनरुपादानादात्मा नैवोपपद्यते । गृह्यते ह्यनुपादानो यद्यन्यो न च गृह्यते

anyaḥ punarupādānādātmā naivopapadyate / gṛhyate hyanupādāno yadyanyo na ca gṛhyate

Sanskrit only: no published translation is held for this verse.

एवं नान्य उपादानान्न चोपादानमेव सः । आत्मा नास्त्यनुपादानः नापि नास्त्येष निश्चयः

evaṃ nānya upādānānna copādānameva saḥ / ātmā nāstyanupādānaḥ nāpi nāstyeṣa niścayaḥ

Sanskrit only: no published translation is held for this verse.

नाभूमतीतमध्वानमित्येतन्नोपपद्यते । यो हि जन्मसु पूर्वेषु ततो ऽन्यो न भवत्ययम्

nābhūmatītamadhvānamityetannopapadyate / yo hi janmasu pūrveṣu tato 'nyo na bhavatyayam

Sanskrit only: no published translation is held for this verse.

यदि ह्ययं भवेदन्यः प्रत्याख्यायापि तं भवेत् । तथैव च स संतिष्ठेत्तत्र जायेत वामृतः

yadi hyayaṃ bhavedanyaḥ pratyākhyāyāpi taṃ bhavet / tathaiva ca sa saṃtiṣṭhettatra jāyeta vāmṛtaḥ

Sanskrit only: no published translation is held for this verse.

उच्छेदः कर्मणां नाशस्तथान्यकृतकर्मणाम् । अन्येन परिभोगः स्यादेवमादि प्रसज्यते

ucchedaḥ karmaṇāṃ nāśastathānyakṛtakarmaṇām / anyena paribhogaḥ syādevamādi prasajyate

Sanskrit only: no published translation is held for this verse.

नाप्यभूत्वा समुद्भूतो दोषो ह्यत्र प्रसज्यते । कृतको वा भवेदात्मा संभूतो वाप्यहेतुकः

nāpyabhūtvā samudbhūto doṣo hyatra prasajyate / kṛtako vā bhavedātmā saṃbhūto vāpyahetukaḥ

Sanskrit only: no published translation is held for this verse.

एवं दृष्टिरतीते या नाभूमहमभूमहम् । उभयं नोभयं चेति नैषा समुपपद्यते

evaṃ dṛṣṭiratīte yā nābhūmahamabhūmaham / ubhayaṃ nobhayaṃ ceti naiṣā samupapadyate

Sanskrit only: no published translation is held for this verse.

अध्वन्यनागते किं नु भविष्यामीति दर्शनम् । न भविष्यामि चेत्येतदतीतेनाध्वना समम्

adhvanyanāgate kiṃ nu bhaviṣyāmīti darśanam / na bhaviṣyāmi cetyetadatītenādhvanā samam

Sanskrit only: no published translation is held for this verse.

स देवः स मनुष्यश्चेदेवं भवति शाश्वतम् । अनुत्पन्नश्च देवः स्याज्जायते न हि शाश्वतम्

sa devaḥ sa manuṣyaścedevaṃ bhavati śāśvatam / anutpannaśca devaḥ syājjāyate na hi śāśvatam

Sanskrit only: no published translation is held for this verse.

देवादन्यो मनुष्यश्चेदशाश्वतमतो भवेत् । देवादन्यो मनुष्यश्चेत्संततिर्नोपपद्यते

devādanyo manuṣyaścedaśāśvatamato bhavet / devādanyo manuṣyaścetsaṃtatirnopapadyate

Sanskrit only: no published translation is held for this verse.

दिव्यो यद्येकदेशः स्यादेकदेशश्च मानुषः । अशाश्वतं शाश्वतं च भवेतच्च न युज्यते

divyo yadyekadeśaḥ syādekadeśaśca mānuṣaḥ / aśāśvataṃ śāśvataṃ ca bhavetacca na yujyate

Sanskrit only: no published translation is held for this verse.

अशाश्वतं शाश्वतं च प्रसिद्धमुभयं यदि । सिद्धे न शाश्वतं कामं नैवाशाश्वतमित्यपि

aśāśvataṃ śāśvataṃ ca prasiddhamubhayaṃ yadi / siddhe na śāśvataṃ kāmaṃ naivāśāśvatamityapi

Sanskrit only: no published translation is held for this verse.

कुतश्चिदागतः कश्चित्किंचिद्नच्छेत्पुनः क्वचित् । यदि तस्मादनादिस्तु संसारः स्यान्न चास्ति सः

kutaścidāgataḥ kaścitkiṃcidnacchetpunaḥ kvacit / yadi tasmādanādistu saṃsāraḥ syānna cāsti saḥ

Sanskrit only: no published translation is held for this verse.

नास्ति चेच्छाश्वतः कश्चित् को भविष्यत्यशाश्वतः । शाश्वतो ऽशाश्वतश्चापि द्वाभ्यामाभ्यां तिरस्कृतः

nāsti cecchāśvataḥ kaścit ko bhaviṣyatyaśāśvataḥ / śāśvato 'śāśvataścāpi dvābhyāmābhyāṃ tiraskṛtaḥ

Sanskrit only: no published translation is held for this verse.

अन्तवान् यदि लोकः स्यात्परलोकः कथं भवेत् । अथाप्यनन्तवांल्लोकः परलोकः कथं भवेत्

antavān yadi lokaḥ syātparalokaḥ kathaṃ bhavet / athāpyanantavāṃllokaḥ paralokaḥ kathaṃ bhavet

Sanskrit only: no published translation is held for this verse.

स्कन्धानामेष संतानो यस्माद्दीपार्चिषामिव । प्रवर्तते तस्मान्नान्तानन्तवत्त्वं च युज्यते

skandhānāmeṣa saṃtāno yasmāddīpārciṣāmiva / pravartate tasmānnāntānantavattvaṃ ca yujyate

Sanskrit only: no published translation is held for this verse.

पूर्वे यदि च भज्येरन्नुत्पद्येरन्न चाप्यमी । स्कन्धाः स्कन्धान् प्रतीत्येमानथ लोको ऽन्तवान् भवेत्

pūrve yadi ca bhajyerannutpadyeranna cāpyamī / skandhāḥ skandhān pratītyemānatha loko 'ntavān bhavet

Sanskrit only: no published translation is held for this verse.

पूर्वे यदि न भज्येरन्नुत्पद्येरन्न चाप्यमी । स्कन्धाः स्कन्धान् प्रतीत्येमांल्लोको ऽनन्तो भवेदथ

pūrve yadi na bhajyerannutpadyeranna cāpyamī / skandhāḥ skandhān pratītyemāṃlloko 'nanto bhavedatha

Sanskrit only: no published translation is held for this verse.

अन्तवानेकदेशश्चेदेकदेशस्त्वनन्तवान् । स्यादन्तवाननन्तश्च लोकस्तच्च न युज्यते

antavānekadeśaścedekadeśastvanantavān / syādantavānanantaśca lokastacca na yujyate

Sanskrit only: no published translation is held for this verse.

कथं तावदुपादातुरेकदेशो विनङ्क्ष्यते । न नङ्क्ष्यते चैकदेश एवं चैतन्न युज्यते

kathaṃ tāvadupādāturekadeśo vinaṅkṣyate / na naṅkṣyate caikadeśa evaṃ caitanna yujyate

Sanskrit only: no published translation is held for this verse.

उपादानैकदेशश्च कथं नाम विनङ्क्ष्यते । न नङ्क्ष्यते चैकदेशो नैतदप्युपपद्यते

upādānaikadeśaśca kathaṃ nāma vinaṅkṣyate / na naṅkṣyate caikadeśo naitadapyupapadyate

Sanskrit only: no published translation is held for this verse.

अन्तवच्चाप्यनन्तं च प्रसिद्धमुभयं यदि । सिद्धे नैवान्तवत्कामं नैवानन्तवदित्यपि

antavaccāpyanantaṃ ca prasiddhamubhayaṃ yadi / siddhe naivāntavatkāmaṃ naivānantavadityapi

Sanskrit only: no published translation is held for this verse.

अथवा सर्वभावानां शून्यत्वाच्छाश्वतादयः । क्व कस्य कतमाः कस्मात्संभविष्यन्ति दृष्टयः

athavā sarvabhāvānāṃ śūnyatvācchāśvatādayaḥ / kva kasya katamāḥ kasmātsaṃbhaviṣyanti dṛṣṭayaḥ

Sanskrit only: no published translation is held for this verse.

सर्वदृष्टिप्रहाणाय यः सद्धर्ममदेशयत् । अनुकम्पामुपादाय तं नमस्यामि गौतमम्

sarvadṛṣṭiprahāṇāya yaḥ saddharmamadeśayat / anukampāmupādāya taṃ namasyāmi gautamam

Sanskrit only: no published translation is held for this verse.