Nagarjuna: M 8

सद्भूतः कारकः कर्म सद्भूतं न करोत्ययम् । कारको नाप्यसद्भूतः कर्मासद्भूतमीहते

sadbhūtaḥ kārakaḥ karma sadbhūtaṃ na karotyayam / kārako nāpyasadbhūtaḥ karmāsadbhūtamīhate

Sanskrit only: no published translation is held for this verse.

सद्भूतस्य क्रिया नास्ति कर्म च स्यादकर्तृकम् । सद्भूतस्य क्रिया नास्ति कर्ता च स्यादकर्मकः

sadbhūtasya kriyā nāsti karma ca syādakartṛkam / sadbhūtasya kriyā nāsti kartā ca syādakarmakaḥ

Sanskrit only: no published translation is held for this verse.

करोति यद्यसद्भूतो ऽसद्भूतं कर्म कारकः । अहेतुकं भवेत्कर्म कर्ता चाहेतुको भवेत्

karoti yadyasadbhūto 'sadbhūtaṃ karma kārakaḥ / ahetukaṃ bhavetkarma kartā cāhetuko bhavet

Sanskrit only: no published translation is held for this verse.

हेतावसति कार्यं च कारणं च न विद्यते । तदभावे क्रिया कर्ता करणं च न विद्यते

hetāvasati kāryaṃ ca kāraṇaṃ ca na vidyate / tadabhāve kriyā kartā karaṇaṃ ca na vidyate

Sanskrit only: no published translation is held for this verse.

धर्माधर्मौ न विद्येते क्रियादीनामसंभवे । धर्मे चासत्यधर्मे च फलं तज्जं न विद्यते

dharmādharmau na vidyete kriyādīnāmasaṃbhave / dharme cāsatyadharme ca phalaṃ tajjaṃ na vidyate

Sanskrit only: no published translation is held for this verse.

फले ऽसति न मोक्षाय न स्वर्गायोपपद्यते । मार्गः सर्वक्रियाणां च नैरर्थक्यं प्रसज्यते

phale 'sati na mokṣāya na svargāyopapadyate / mārgaḥ sarvakriyāṇāṃ ca nairarthakyaṃ prasajyate

Sanskrit only: no published translation is held for this verse.

कारकः सदसद्भूतः सदसत्कुरुते न तत् । परस्परविरुद्धं हि सच्चासच्चैकतः कुतः

kārakaḥ sadasadbhūtaḥ sadasatkurute na tat / parasparaviruddhaṃ hi saccāsaccaikataḥ kutaḥ

Sanskrit only: no published translation is held for this verse.

सता च क्रियते नासन्नासता क्रियते च सत् । कर्त्रा सर्वे प्रसज्यन्ते दोषास्तत्र त एव हि

satā ca kriyate nāsannāsatā kriyate ca sat / kartrā sarve prasajyante doṣāstatra ta eva hi

Sanskrit only: no published translation is held for this verse.

नासद्भूतं न सद्भूतः सदसद्भूतमेव वा । करोति कारकः कर्म पूर्वोक्तैरेव हेतुभिः

nāsadbhūtaṃ na sadbhūtaḥ sadasadbhūtameva vā / karoti kārakaḥ karma pūrvoktaireva hetubhiḥ

Sanskrit only: no published translation is held for this verse.

नासद्भूतो ऽपि सद्भूतं सदसद्भूतमेव वा । करोति कारकः कर्म पुर्वोक्तैरेव हेतुभिः

nāsadbhūto 'pi sadbhūtaṃ sadasadbhūtameva vā / karoti kārakaḥ karma purvoktaireva hetubhiḥ

Sanskrit only: no published translation is held for this verse.

करोति सदसद्भूतो न सन्नासच्च कारकः । कर्म तत्तु विजानीयात्पूर्वोक्तैरेव हेतुभिः

karoti sadasadbhūto na sannāsacca kārakaḥ / karma tattu vijānīyātpūrvoktaireva hetubhiḥ

Sanskrit only: no published translation is held for this verse.

प्रतीत्य कारकः कर्म तं प्रतीत्य च कारकम् । कर्म प्रवर्तते, नान्यत्पश्यामः सिद्धिकारणम्

pratītya kārakaḥ karma taṃ pratītya ca kārakam / karma pravartate, nānyatpaśyāmaḥ siddhikāraṇam

Sanskrit only: no published translation is held for this verse.

एवं विद्यादुपादानं व्युत्सर्गादिति कर्मणः । कर्तुश्च कर्मकर्तृभ्यां शेषान् भावान् विभावयेत्

evaṃ vidyādupādānaṃ vyutsargāditi karmaṇaḥ / kartuśca karmakartṛbhyāṃ śeṣān bhāvān vibhāvayet

Sanskrit only: no published translation is held for this verse.