Mahābhārata (critical edition) 1.144

वैशंपायन उवाच ते वनेन वनं वीरा घ्नन्तो मृगगणान् बहून् अपक्रम्य ययू राजंस् त्वरमाणा महारथाः

vaiśaṃpāyana uvāca te vanena vanaṃ vīrā ghnanto mṛgagaṇān bahūn apakramya yayū rājaṃs tvaramāṇā mahārathāḥ

Sanskrit only: no published translation is held for this verse.

मत्स्यांस् त्रिगर्तान् पाञ्चालान् कीचकान् अन्तरेण च रमणीयान् वनोद्देशान् प्रेक्षमाणाः सरांसि च

matsyāṃs trigartān pāñcālān kīcakān antareṇa ca ramaṇīyān vanoddeśān prekṣamāṇāḥ sarāṃsi ca

Sanskrit only: no published translation is held for this verse.

जटाः कृत्वात्मनः सर्वे वल्कलाजिनवाससः सह कुन्त्या महात्मानो बिभ्रतस् तापसं वपुः

jaṭāḥ kṛtvātmanaḥ sarve valkalājinavāsasaḥ saha kuntyā mahātmāno bibhratas tāpasaṃ vapuḥ

Sanskrit only: no published translation is held for this verse.

क्व चिद् वहन्तो जननीं त्वरमाणा महारथाः क्व चिच् छन्देन गच्छन्तस् ते जग्मुः प्रसभं पुनः

kva cid vahanto jananīṃ tvaramāṇā mahārathāḥ kva cic chandena gacchantas te jagmuḥ prasabhaṃ punaḥ

Sanskrit only: no published translation is held for this verse.

ब्राह्मं वेदम् अधीयाना वेदाङ्गानि च सर्वशः नीतिशास्त्रं च धर्मज्ञा ददृशुस् ते पितामहम्

brāhmaṃ vedam adhīyānā vedāṅgāni ca sarvaśaḥ nītiśāstraṃ ca dharmajñā dadṛśus te pitāmaham

Sanskrit only: no published translation is held for this verse.

ते ऽभिवाद्य महात्मानं कृष्णद्वैपायनं तदा तस्थुः प्राञ्जलयः सर्वे सह मात्रा परंतपाः

te 'bhivādya mahātmānaṃ kṛṣṇadvaipāyanaṃ tadā tasthuḥ prāñjalayaḥ sarve saha mātrā paraṃtapāḥ

Sanskrit only: no published translation is held for this verse.

व्यास उवाच मयेदं मनसा पूर्वं विदितं भरतर्षभाः यथा स्थितैर् अधर्मेण धार्तराष्ट्रैर् विवासिताः

vyāsa uvāca mayedaṃ manasā pūrvaṃ viditaṃ bharatarṣabhāḥ yathā sthitair adharmeṇa dhārtarāṣṭrair vivāsitāḥ

Sanskrit only: no published translation is held for this verse.

तद् विदित्वास्मि संप्राप्तश् चिकीर्षुः परमं हितम् न विषादो ऽत्र कर्तव्यः सर्वम् एतत् सुखाय वः

tad viditvāsmi saṃprāptaś cikīrṣuḥ paramaṃ hitam na viṣādo 'tra kartavyaḥ sarvam etat sukhāya vaḥ

Sanskrit only: no published translation is held for this verse.

समास् ते चैव मे सर्वे यूयं चैव न संशयः दीनतो बालतश् चैव स्नेहं कुर्वन्ति बान्धवाः

samās te caiva me sarve yūyaṃ caiva na saṃśayaḥ dīnato bālataś caiva snehaṃ kurvanti bāndhavāḥ

Sanskrit only: no published translation is held for this verse.

तस्माद् अभ्यधिकः स्नेहो युष्मासु मम सांप्रतम् स्नेहपूर्वं चिकीर्षामि हितं वस् तन् निबोधत

tasmād abhyadhikaḥ sneho yuṣmāsu mama sāṃpratam snehapūrvaṃ cikīrṣāmi hitaṃ vas tan nibodhata

Sanskrit only: no published translation is held for this verse.

इदं नगरम् अभ्याशे रमणीयं निरामयम् वसतेह प्रतिच्छन्ना ममागमनकाङ्क्षिणः

idaṃ nagaram abhyāśe ramaṇīyaṃ nirāmayam vasateha praticchannā mamāgamanakāṅkṣiṇaḥ

Sanskrit only: no published translation is held for this verse.

वैशंपायन उवाच एवं स तान् समाश्वास्य व्यासः पार्थान् अरिंदमान् एकचक्राम् अभिगतः कुन्तीम् आश्वासयत् प्रभुः

vaiśaṃpāyana uvāca evaṃ sa tān samāśvāsya vyāsaḥ pārthān ariṃdamān ekacakrām abhigataḥ kuntīm āśvāsayat prabhuḥ

Sanskrit only: no published translation is held for this verse.

जीवपुत्रि सुतस् ते ऽयं धर्मपुत्रो युधिष्ठिरः पृथिव्यां पार्थिवान् सर्वान् प्रशासिष्यति धर्मराट्

jīvaputri sutas te 'yaṃ dharmaputro yudhiṣṭhiraḥ pṛthivyāṃ pārthivān sarvān praśāsiṣyati dharmarāṭ

Sanskrit only: no published translation is held for this verse.

धर्मेण जित्वा पृथिवीम् अखिलां धर्मविद् वशी भीमसेनार्जुनबलाद् भोक्ष्यत्य् अयम् असंशयः

dharmeṇa jitvā pṛthivīm akhilāṃ dharmavid vaśī bhīmasenārjunabalād bhokṣyaty ayam asaṃśayaḥ

Sanskrit only: no published translation is held for this verse.

पुत्रास् तव च माद्र्याश् च सर्व एव महारथाः स्वराष्ट्रे विहरिष्यन्ति सुखं सुमनसस् तदा

putrās tava ca mādryāś ca sarva eva mahārathāḥ svarāṣṭre vihariṣyanti sukhaṃ sumanasas tadā

Sanskrit only: no published translation is held for this verse.

यक्ष्यन्ति च नरव्याघ्रा विजित्य पृथिवीम् इमाम् राजसूयाश्वमेधाद्यैः क्रतुभिर् भूरिदक्षिणैः

yakṣyanti ca naravyāghrā vijitya pṛthivīm imām rājasūyāśvamedhādyaiḥ kratubhir bhūridakṣiṇaiḥ

Sanskrit only: no published translation is held for this verse.

अनुगृह्य सुहृद्वर्गं धनेन च सुखेन च पितृपैतामहं राज्यम् इह भोक्ष्यन्ति ते सुताः

anugṛhya suhṛdvargaṃ dhanena ca sukhena ca pitṛpaitāmahaṃ rājyam iha bhokṣyanti te sutāḥ

Sanskrit only: no published translation is held for this verse.

एवम् उक्त्वा निवेश्यैनान् ब्राह्मणस्य निवेशने अब्रवीत् पार्थिवश्रेष्ठम् ऋषिर् द्वैपायनस् तदा

evam uktvā niveśyainān brāhmaṇasya niveśane abravīt pārthivaśreṣṭham ṛṣir dvaipāyanas tadā

Sanskrit only: no published translation is held for this verse.

इह मां संप्रतीक्षध्वम् आगमिष्याम्य् अहं पुनः देशकालौ विदित्वैव वेत्स्यध्वं परमां मुदम्

iha māṃ saṃpratīkṣadhvam āgamiṣyāmy ahaṃ punaḥ deśakālau viditvaiva vetsyadhvaṃ paramāṃ mudam

Sanskrit only: no published translation is held for this verse.

स तैः प्राञ्जलिभिः सर्वैस् तथेत्य् उक्तो नराधिप जगाम भगवान् व्यासो यथाकामम् ऋषिः प्रभुः

sa taiḥ prāñjalibhiḥ sarvais tathety ukto narādhipa jagāma bhagavān vyāso yathākāmam ṛṣiḥ prabhuḥ

Sanskrit only: no published translation is held for this verse.