Mahābhārata (critical edition) 1.15

सूत उवाच एतस्मिन्न् एव काले तु भगिन्यौ ते तपोधन अपश्यतां समायान्तम् उच्चैःश्रवसम् अन्तिकात्

sūta uvāca etasminn eva kāle tu bhaginyau te tapodhana apaśyatāṃ samāyāntam uccaiḥśravasam antikāt

Sanskrit only: no published translation is held for this verse.

यं तं देवगणाः सर्वे हृष्टरूपा अपूजयन् मथ्यमाने ऽमृते जातम् अश्वरत्नम् अनुत्तमम्

yaṃ taṃ devagaṇāḥ sarve hṛṣṭarūpā apūjayan mathyamāne 'mṛte jātam aśvaratnam anuttamam

Sanskrit only: no published translation is held for this verse.

महौघबलम् अश्वानाम् उत्तमं जवतां वरम् श्रीमन्तम् अजरं दिव्यं सर्वलक्षणलक्षितम्

mahaughabalam aśvānām uttamaṃ javatāṃ varam śrīmantam ajaraṃ divyaṃ sarvalakṣaṇalakṣitam

Sanskrit only: no published translation is held for this verse.

शौनक उवाच कथं तद् अमृतं देवैर् मथितं क्व च शंस मे यत्र जज्ञे महावीर्यः सो ऽश्वराजो महाद्युतिः

śaunaka uvāca kathaṃ tad amṛtaṃ devair mathitaṃ kva ca śaṃsa me yatra jajñe mahāvīryaḥ so 'śvarājo mahādyutiḥ

Sanskrit only: no published translation is held for this verse.

सूत उवाच ज्वलन्तम् अचलं मेरुं तेजोराशिम् अनुत्तमम् आक्षिपन्तं प्रभां भानोः स्वशृङ्गैः काञ्चनोज्ज्वलैः

sūta uvāca jvalantam acalaṃ meruṃ tejorāśim anuttamam ākṣipantaṃ prabhāṃ bhānoḥ svaśṛṅgaiḥ kāñcanojjvalaiḥ

Sanskrit only: no published translation is held for this verse.

काञ्चनाभरणं चित्रं देवगन्धर्वसेवितम् अप्रमेयम् अनाधृष्यम् अधर्मबहुलैर् जनैः

kāñcanābharaṇaṃ citraṃ devagandharvasevitam aprameyam anādhṛṣyam adharmabahulair janaiḥ

Sanskrit only: no published translation is held for this verse.

व्यालैर् आचरितं घोरैर् दिव्यौषधिविदीपितम् नाकम् आवृत्य तिष्ठन्तम् उच्छ्रयेण महागिरिम्

vyālair ācaritaṃ ghorair divyauṣadhividīpitam nākam āvṛtya tiṣṭhantam ucchrayeṇa mahāgirim

Sanskrit only: no published translation is held for this verse.

अगम्यं मनसाप्य् अन्यैर् नदीवृक्षसमन्वितम् नानापतगसंघैश् च नादितं सुमनोहरैः

agamyaṃ manasāpy anyair nadīvṛkṣasamanvitam nānāpatagasaṃghaiś ca nāditaṃ sumanoharaiḥ

Sanskrit only: no published translation is held for this verse.

तस्य पृष्ठम् उपारुह्य बहुरत्नाचितं शुभम् अनन्तकल्पम् उद्विद्धं सुराः सर्वे महौजसः

tasya pṛṣṭham upāruhya bahuratnācitaṃ śubham anantakalpam udviddhaṃ surāḥ sarve mahaujasaḥ

Sanskrit only: no published translation is held for this verse.

ते मन्त्रयितुम् आरब्धास् तत्रासीना दिवौकसः अमृतार्थे समागम्य तपोनियमसंस्थिताः

te mantrayitum ārabdhās tatrāsīnā divaukasaḥ amṛtārthe samāgamya taponiyamasaṃsthitāḥ

Sanskrit only: no published translation is held for this verse.

तत्र नारायणो देवो ब्रह्माणम् इदम् अब्रवीत् चिन्तयत्सु सुरेष्व् एवं मन्त्रयत्सु च सर्वशः

tatra nārāyaṇo devo brahmāṇam idam abravīt cintayatsu sureṣv evaṃ mantrayatsu ca sarvaśaḥ

Sanskrit only: no published translation is held for this verse.

देवैर् असुरसंघैश् च मथ्यतां कलशोदधिः भविष्यत्य् अमृतं तत्र मथ्यमाने महोदधौ

devair asurasaṃghaiś ca mathyatāṃ kalaśodadhiḥ bhaviṣyaty amṛtaṃ tatra mathyamāne mahodadhau

Sanskrit only: no published translation is held for this verse.

सर्वौषधीः समावाप्य सर्वरत्नानि चैव हि मन्थध्वम् उदधिं देवा वेत्स्यध्वम् अमृतं ततः

sarvauṣadhīḥ samāvāpya sarvaratnāni caiva hi manthadhvam udadhiṃ devā vetsyadhvam amṛtaṃ tataḥ

Sanskrit only: no published translation is held for this verse.