Library·Mahābhārata (critical edition)·1·1.151
वैशंपायन उवाच ततो रात्र्यां व्यतीतायाम् अन्नम् आदाय पाण्डवः भीमसेनो ययौ तत्र यत्रासौ पुरुषादकः
vaiśaṃpāyana uvāca tato rātryāṃ vyatītāyām annam ādāya pāṇḍavaḥ bhīmaseno yayau tatra yatrāsau puruṣādakaḥ
Sanskrit only: no published translation is held for this verse.
आसाद्य तु वनं तस्य रक्षसः पाण्डवो बली आजुहाव ततो नाम्ना तदन्नम् उपयोजयन्
āsādya tu vanaṃ tasya rakṣasaḥ pāṇḍavo balī ājuhāva tato nāmnā tadannam upayojayan
Sanskrit only: no published translation is held for this verse.
ततः स राक्षसः श्रुत्वा भीमसेनस्य तद् वचः आजगाम सुसंक्रुद्धो यत्र भीमो व्यवस्थितः
tataḥ sa rākṣasaḥ śrutvā bhīmasenasya tad vacaḥ ājagāma susaṃkruddho yatra bhīmo vyavasthitaḥ
Sanskrit only: no published translation is held for this verse.
महाकायो महावेगो दारयन्न् इव मेदिनीम् त्रिशिखां भृकुटिं कृत्वा संदश्य दशनच्छदम्
mahākāyo mahāvego dārayann iva medinīm triśikhāṃ bhṛkuṭiṃ kṛtvā saṃdaśya daśanacchadam
Sanskrit only: no published translation is held for this verse.
भुञ्जानम् अन्नं तं दृष्ट्वा भीमसेनं स राक्षसः विवृत्य नयने क्रुद्ध इदं वचनम् अब्रवीत्
bhuñjānam annaṃ taṃ dṛṣṭvā bhīmasenaṃ sa rākṣasaḥ vivṛtya nayane kruddha idaṃ vacanam abravīt
Sanskrit only: no published translation is held for this verse.
को ऽयम् अन्नम् इदं भुङ्क्ते मदर्थम् उपकल्पितम् पश्यतो मम दुर्बुद्धिर् यियासुर् यमसादनम्
ko 'yam annam idaṃ bhuṅkte madartham upakalpitam paśyato mama durbuddhir yiyāsur yamasādanam
Sanskrit only: no published translation is held for this verse.
भीमसेनस् तु तच् छ्रुत्वा प्रहसन्न् इव भारत राक्षसं तम् अनादृत्य भुङ्क्त एव पराङ्मुखः
bhīmasenas tu tac chrutvā prahasann iva bhārata rākṣasaṃ tam anādṛtya bhuṅkta eva parāṅmukhaḥ
Sanskrit only: no published translation is held for this verse.
ततः स भैरवं कृत्वा समुद्यम्य कराव् उभौ अभ्यद्रवद् भीमसेनं जिघांसुः पुरुषादकः
tataḥ sa bhairavaṃ kṛtvā samudyamya karāv ubhau abhyadravad bhīmasenaṃ jighāṃsuḥ puruṣādakaḥ
Sanskrit only: no published translation is held for this verse.
तथापि परिभूयैनं नेक्षमाणो वृकोदरः राक्षसं भुङ्क्त एवान्नं पाण्डवः परवीरहा
tathāpi paribhūyainaṃ nekṣamāṇo vṛkodaraḥ rākṣasaṃ bhuṅkta evānnaṃ pāṇḍavaḥ paravīrahā
Sanskrit only: no published translation is held for this verse.
अमर्षेण तु संपूर्णः कुन्तीपुत्रस्य राक्षसः जघान पृष्ठं पाणिभ्याम् उभाभ्यां पृष्ठतः स्थितः
amarṣeṇa tu saṃpūrṇaḥ kuntīputrasya rākṣasaḥ jaghāna pṛṣṭhaṃ pāṇibhyām ubhābhyāṃ pṛṣṭhataḥ sthitaḥ
Sanskrit only: no published translation is held for this verse.
तथा बलवता भीमः पाणिभ्यां भृशम् आहतः नैवावलोकयाम् आस राक्षसं भुङ्क्त एव सः
tathā balavatā bhīmaḥ pāṇibhyāṃ bhṛśam āhataḥ naivāvalokayām āsa rākṣasaṃ bhuṅkta eva saḥ
Sanskrit only: no published translation is held for this verse.
ततः स भूयः संक्रुद्धो वृक्षम् आदाय राक्षसः ताडयिष्यंस् तदा भीमं पुनर् अभ्यद्रवद् बली
tataḥ sa bhūyaḥ saṃkruddho vṛkṣam ādāya rākṣasaḥ tāḍayiṣyaṃs tadā bhīmaṃ punar abhyadravad balī
Sanskrit only: no published translation is held for this verse.
ततो भीमः शनैर् भुक्त्वा तदन्नं पुरुषर्षभः वार्य् उपस्पृश्य संहृष्टस् तस्थौ युधि महाबलः
tato bhīmaḥ śanair bhuktvā tadannaṃ puruṣarṣabhaḥ vāry upaspṛśya saṃhṛṣṭas tasthau yudhi mahābalaḥ
Sanskrit only: no published translation is held for this verse.
क्षिप्तं क्रुद्धेन तं वृक्षं प्रतिजग्राह वीर्यवान् सव्येन पाणिना भीमः प्रहसन्न् इव भारत
kṣiptaṃ kruddhena taṃ vṛkṣaṃ pratijagrāha vīryavān savyena pāṇinā bhīmaḥ prahasann iva bhārata
Sanskrit only: no published translation is held for this verse.
ततः स पुनर् उद्यम्य वृक्षान् बहुविधान् बली प्राहिणोद् भीमसेनाय तस्मै भीमश् च पाण्डवः
tataḥ sa punar udyamya vṛkṣān bahuvidhān balī prāhiṇod bhīmasenāya tasmai bhīmaś ca pāṇḍavaḥ
Sanskrit only: no published translation is held for this verse.
तद् वृक्षयुद्धम् अभवन् महीरुहविनाशनम् घोररूपं महाराज बकपाण्डवयोर् महत्
tad vṛkṣayuddham abhavan mahīruhavināśanam ghorarūpaṃ mahārāja bakapāṇḍavayor mahat
Sanskrit only: no published translation is held for this verse.
नाम विश्राव्य तु बकः समभिद्रुत्य पाण्डवम् भुजाभ्यां परिजग्राह भीमसेनं महाबलम्
nāma viśrāvya tu bakaḥ samabhidrutya pāṇḍavam bhujābhyāṃ parijagrāha bhīmasenaṃ mahābalam
Sanskrit only: no published translation is held for this verse.
भीमसेनो ऽपि तद् रक्षः परिरभ्य महाभुजः विस्फुरन्तं महावेगं विचकर्ष बलाद् बली
bhīmaseno 'pi tad rakṣaḥ parirabhya mahābhujaḥ visphurantaṃ mahāvegaṃ vicakarṣa balād balī
Sanskrit only: no published translation is held for this verse.
स कृष्यमाणो भीमेन कर्षमाणश् च पाण्डवम् समयुज्यत तीव्रेण श्रमेण पुरुषादकः
sa kṛṣyamāṇo bhīmena karṣamāṇaś ca pāṇḍavam samayujyata tīvreṇa śrameṇa puruṣādakaḥ
Sanskrit only: no published translation is held for this verse.
तयोर् वेगेन महता पृथिवी समकम्पत पादपांश् च महाकायांश् चूर्णयाम् आसतुस् तदा
tayor vegena mahatā pṛthivī samakampata pādapāṃś ca mahākāyāṃś cūrṇayām āsatus tadā
Sanskrit only: no published translation is held for this verse.
हीयमानं तु तद् रक्षः समीक्ष्य भरतर्षभ निष्पिष्य भूमौ पाणिभ्यां समाजघ्ने वृकोदरः
hīyamānaṃ tu tad rakṣaḥ samīkṣya bharatarṣabha niṣpiṣya bhūmau pāṇibhyāṃ samājaghne vṛkodaraḥ
Sanskrit only: no published translation is held for this verse.
ततो ऽस्य जानुना पृष्ठम् अवपीड्य बलाद् इव बाहुना परिजग्राह दक्षिणेन शिरोधराम्
tato 'sya jānunā pṛṣṭham avapīḍya balād iva bāhunā parijagrāha dakṣiṇena śirodharām
Sanskrit only: no published translation is held for this verse.
सव्येन च कटीदेशे गृह्य वाससि पाण्डवः तद् रक्षो द्विगुणं चक्रे नदन्तं भैरवान् रवान्
savyena ca kaṭīdeśe gṛhya vāsasi pāṇḍavaḥ tad rakṣo dviguṇaṃ cakre nadantaṃ bhairavān ravān
Sanskrit only: no published translation is held for this verse.
ततो ऽस्य रुधिरं वक्त्रात् प्रादुरासीद् विशां पते भज्यमानस्य भीमेन तस्य घोरस्य रक्षसः
tato 'sya rudhiraṃ vaktrāt prādurāsīd viśāṃ pate bhajyamānasya bhīmena tasya ghorasya rakṣasaḥ
Sanskrit only: no published translation is held for this verse.