Library·Mahābhārata (critical edition)·1·1.156
वैशंपायन उवाच एतच् छ्रुत्वा तु कौन्तेयाः शल्यविद्धा इवाभवन् सर्वे चास्वस्थमनसो बभूवुस् ते महारथाः
vaiśaṃpāyana uvāca etac chrutvā tu kaunteyāḥ śalyaviddhā ivābhavan sarve cāsvasthamanaso babhūvus te mahārathāḥ
Sanskrit only: no published translation is held for this verse.
ततः कुन्ती सुतान् दृष्ट्वा विभ्रान्तान् गतचेतसः युधिष्ठिरम् उवाचेदं वचनं सत्यवादिनी
tataḥ kuntī sutān dṛṣṭvā vibhrāntān gatacetasaḥ yudhiṣṭhiram uvācedaṃ vacanaṃ satyavādinī
Sanskrit only: no published translation is held for this verse.
चिररात्रोषिताः स्मेह ब्राह्मणस्य निवेशने रममाणाः पुरे रम्ये लब्धभैक्षा युधिष्ठिर
cirarātroṣitāḥ smeha brāhmaṇasya niveśane ramamāṇāḥ pure ramye labdhabhaikṣā yudhiṣṭhira
Sanskrit only: no published translation is held for this verse.
यानीह रमणीयानि वनान्य् उपवनानि च सर्वाणि तानि दृष्टानि पुनः पुनर् अरिंदम
yānīha ramaṇīyāni vanāny upavanāni ca sarvāṇi tāni dṛṣṭāni punaḥ punar ariṃdama
Sanskrit only: no published translation is held for this verse.
पुनर् दृष्टानि तान्य् एव प्रीणयन्ति न नस् तथा भैक्षं च न तथा वीर लभ्यते कुरुनन्दन
punar dṛṣṭāni tāny eva prīṇayanti na nas tathā bhaikṣaṃ ca na tathā vīra labhyate kurunandana
Sanskrit only: no published translation is held for this verse.
ते वयं साधु पाञ्चालान् गच्छाम यदि मन्यसे अपूर्वदर्शनं तात रमणीयं भविष्यति
te vayaṃ sādhu pāñcālān gacchāma yadi manyase apūrvadarśanaṃ tāta ramaṇīyaṃ bhaviṣyati
Sanskrit only: no published translation is held for this verse.
सुभिक्षाश् चैव पाञ्चालाः श्रूयन्ते शत्रुकर्शन यज्ञसेनश् च राजासौ ब्रह्मण्य इति शुश्रुमः
subhikṣāś caiva pāñcālāḥ śrūyante śatrukarśana yajñasenaś ca rājāsau brahmaṇya iti śuśrumaḥ
Sanskrit only: no published translation is held for this verse.
एकत्र चिरवासो हि क्षमो न च मतो मम ते तत्र साधु गच्छामो यदि त्वं पुत्र मन्यसे
ekatra ciravāso hi kṣamo na ca mato mama te tatra sādhu gacchāmo yadi tvaṃ putra manyase
Sanskrit only: no published translation is held for this verse.
युधिष्ठिर उवाच भवत्या यन् मतं कार्यं तद् अस्माकं परं हितम् अनुजांस् तु न जानामि गच्छेयुर् नेति वा पुनः
yudhiṣṭhira uvāca bhavatyā yan mataṃ kāryaṃ tad asmākaṃ paraṃ hitam anujāṃs tu na jānāmi gaccheyur neti vā punaḥ
Sanskrit only: no published translation is held for this verse.
वैशंपायन उवाच ततः कुन्ती भीमसेनम् अर्जुनं यमजौ तथा उवाच गमनं ते च तथेत्य् एवाब्रुवंस् तदा
vaiśaṃpāyana uvāca tataḥ kuntī bhīmasenam arjunaṃ yamajau tathā uvāca gamanaṃ te ca tathety evābruvaṃs tadā
Sanskrit only: no published translation is held for this verse.
तत आमन्त्र्य तं विप्रं कुन्ती राजन् सुतैः सह प्रतस्थे नगरीं रम्यां द्रुपदस्य महात्मनः
tata āmantrya taṃ vipraṃ kuntī rājan sutaiḥ saha pratasthe nagarīṃ ramyāṃ drupadasya mahātmanaḥ
Sanskrit only: no published translation is held for this verse.