Library·Mahābhārata (critical edition)·1·1.174
अर्जुन उवाच अस्माकम् अनुरूपो वै यः स्याद् गन्धर्व वेदवित् पुरोहितस् तम् आचक्ष्व सर्वं हि विदितं तव
arjuna uvāca asmākam anurūpo vai yaḥ syād gandharva vedavit purohitas tam ācakṣva sarvaṃ hi viditaṃ tava
Sanskrit only: no published translation is held for this verse.
गन्धर्व उवाच यवीयान् देवलस्यैष वने भ्राता तपस्यति धौम्य उत्कोचके तीर्थे तं वृणुध्वं यदीच्छथ
gandharva uvāca yavīyān devalasyaiṣa vane bhrātā tapasyati dhaumya utkocake tīrthe taṃ vṛṇudhvaṃ yadīcchatha
Sanskrit only: no published translation is held for this verse.
वैशंपायन उवाच ततो ऽर्जुनो ऽस्त्रम् आग्नेयं प्रददौ तद् यथाविधि गन्धर्वाय तदा प्रीतो वचनं चेदम् अब्रवीत्
vaiśaṃpāyana uvāca tato 'rjuno 'stram āgneyaṃ pradadau tad yathāvidhi gandharvāya tadā prīto vacanaṃ cedam abravīt
Sanskrit only: no published translation is held for this verse.
त्वय्य् एव तावत् तिष्ठन्तु हया गन्धर्वसत्तम कर्मकाले ग्रहीष्यामि स्वस्ति ते ऽस्त्व् इति चाब्रवीत्
tvayy eva tāvat tiṣṭhantu hayā gandharvasattama karmakāle grahīṣyāmi svasti te 'stv iti cābravīt
Sanskrit only: no published translation is held for this verse.
ते ऽन्योन्यम् अभिसंपूज्य गन्धर्वः पाण्डवाश् च ह रम्याद् भागीरथीकच्छाद् यथाकामं प्रतस्थिरे
te 'nyonyam abhisaṃpūjya gandharvaḥ pāṇḍavāś ca ha ramyād bhāgīrathīkacchād yathākāmaṃ pratasthire
Sanskrit only: no published translation is held for this verse.
तत उत्कोचकं तीर्थं गत्वा धौम्याश्रमं तु ते तं वव्रुः पाण्डवा धौम्यं पौरोहित्याय भारत
tata utkocakaṃ tīrthaṃ gatvā dhaumyāśramaṃ tu te taṃ vavruḥ pāṇḍavā dhaumyaṃ paurohityāya bhārata
Sanskrit only: no published translation is held for this verse.
तान् धौम्यः प्रतिजग्राह सर्ववेदविदां वरः पाद्येन फलमूलेन पौरोहित्येन चैव ह
tān dhaumyaḥ pratijagrāha sarvavedavidāṃ varaḥ pādyena phalamūlena paurohityena caiva ha
Sanskrit only: no published translation is held for this verse.
ते तदाशंसिरे लब्धां श्रियं राज्यं च पाण्डवाः तं ब्राह्मणं पुरस्कृत्य पाञ्चाल्याश् च स्वयंवरम्
te tadāśaṃsire labdhāṃ śriyaṃ rājyaṃ ca pāṇḍavāḥ taṃ brāhmaṇaṃ puraskṛtya pāñcālyāś ca svayaṃvaram
Sanskrit only: no published translation is held for this verse.
मातृषष्ठास् तु ते तेन गुरुणा संगतास् तदा नाथवन्तम् इवात्मानं मेनिरे भरतर्षभाः
mātṛṣaṣṭhās tu te tena guruṇā saṃgatās tadā nāthavantam ivātmānaṃ menire bharatarṣabhāḥ
Sanskrit only: no published translation is held for this verse.
स हि वेदार्थतत्त्वज्ञस् तेषां गुरुर् उदारधीः तेन धर्मविदा पार्था याज्याः सर्वविदा कृताः
sa hi vedārthatattvajñas teṣāṃ gurur udāradhīḥ tena dharmavidā pārthā yājyāḥ sarvavidā kṛtāḥ
Sanskrit only: no published translation is held for this verse.
वीरांस् तु स हि तान् मेने प्राप्तराज्यान् स्वधर्मतः बुद्धिवीर्यबलोत्साहैर् युक्तान् देवान् इवापरान्
vīrāṃs tu sa hi tān mene prāptarājyān svadharmataḥ buddhivīryabalotsāhair yuktān devān ivāparān
Sanskrit only: no published translation is held for this verse.
कृतस्वस्त्ययनास् तेन ततस् ते मनुजाधिपाः मेनिरे सहिता गन्तुं पाञ्चाल्यास् तं स्वयंवरम्
kṛtasvastyayanās tena tatas te manujādhipāḥ menire sahitā gantuṃ pāñcālyās taṃ svayaṃvaram
Sanskrit only: no published translation is held for this verse.