Mahābhārata (critical edition) 1.183

वैशंपायन उवाच भ्रातुर् वचस् तत् प्रसमीक्ष्य सर्वे; ज्येष्ठस्य पाण्डोस् तनयास् तदानीम् तम् एवार्थं ध्यायमाना मनोभिर्; आसां चक्रुर् अथ तत्रामितौजाः

vaiśaṃpāyana uvāca bhrātur vacas tat prasamīkṣya sarve; jyeṣṭhasya pāṇḍos tanayās tadānīm tam evārthaṃ dhyāyamānā manobhir; āsāṃ cakrur atha tatrāmitaujāḥ

Sanskrit only: no published translation is held for this verse.

वृष्णिप्रवीरस् तु कुरुप्रवीरान्; आशङ्कमानः सहरौहिणेयः जगाम तां भार्गवकर्मशालां; यत्रासते ते पुरुषप्रवीराः

vṛṣṇipravīras tu kurupravīrān; āśaṅkamānaḥ saharauhiṇeyaḥ jagāma tāṃ bhārgavakarmaśālāṃ; yatrāsate te puruṣapravīrāḥ

Sanskrit only: no published translation is held for this verse.

तत्रोपविष्टं पृथुदीर्घबाहुं; ददर्श कृष्णः सहरौहिणेयः अजातशत्रुं परिवार्य तांश् च; उपोपविष्टाञ् ज्वलनप्रकाशान्

tatropaviṣṭaṃ pṛthudīrghabāhuṃ; dadarśa kṛṣṇaḥ saharauhiṇeyaḥ ajātaśatruṃ parivārya tāṃś ca; upopaviṣṭāñ jvalanaprakāśān

Sanskrit only: no published translation is held for this verse.

ततो ऽब्रवीद् वासुदेवो ऽभिगम्य; कुन्तीसुतं धर्मभृतां वरिष्ठम् कृष्णो ऽहम् अस्मीति निपीड्य पादौ; युधिष्ठिरस्याजमीढस्य राज्ञः

tato 'bravīd vāsudevo 'bhigamya; kuntīsutaṃ dharmabhṛtāṃ variṣṭham kṛṣṇo 'ham asmīti nipīḍya pādau; yudhiṣṭhirasyājamīḍhasya rājñaḥ

Sanskrit only: no published translation is held for this verse.

तथैव तस्याप्य् अनु रौहिणेयस्; तौ चापि हृष्टाः कुरवो ऽभ्यनन्दन् पितृष्वसुश् चापि यदुप्रवीराव्; अगृह्णतां भारतमुख्य पादौ

tathaiva tasyāpy anu rauhiṇeyas; tau cāpi hṛṣṭāḥ kuravo 'bhyanandan pitṛṣvasuś cāpi yadupravīrāv; agṛhṇatāṃ bhāratamukhya pādau

Sanskrit only: no published translation is held for this verse.

अजातशत्रुश् च कुरुप्रवीरः; पप्रच्छ कृष्णं कुशलं निवेद्य कथं वयं वासुदेव त्वयेह; गूढा वसन्तो विदिताः स्म सर्वे

ajātaśatruś ca kurupravīraḥ; papraccha kṛṣṇaṃ kuśalaṃ nivedya kathaṃ vayaṃ vāsudeva tvayeha; gūḍhā vasanto viditāḥ sma sarve

Sanskrit only: no published translation is held for this verse.

तम् अब्रवीद् वासुदेवः प्रहस्य; गूढो ऽप्य् अग्निर् ज्ञायत एव राजन् तं विक्रमं पाण्डवेयानतीत्य; को ऽन्यः कर्ता विद्यते मानुषेषु

tam abravīd vāsudevaḥ prahasya; gūḍho 'py agnir jñāyata eva rājan taṃ vikramaṃ pāṇḍaveyānatītya; ko 'nyaḥ kartā vidyate mānuṣeṣu

Sanskrit only: no published translation is held for this verse.

दिष्ट्या तस्मात् पावकात् संप्रमुक्ता; यूयं सर्वे पाण्डवाः शत्रुसाहाः दिष्ट्या पापो धृतराष्ट्रस्य पुत्रः; सहामात्यो न सकामो ऽभविष्यत्

diṣṭyā tasmāt pāvakāt saṃpramuktā; yūyaṃ sarve pāṇḍavāḥ śatrusāhāḥ diṣṭyā pāpo dhṛtarāṣṭrasya putraḥ; sahāmātyo na sakāmo 'bhaviṣyat

Sanskrit only: no published translation is held for this verse.

भद्रं वो ऽस्तु निहितं यद् गुहायां; विवर्धध्वं ज्वलन इवेध्यमानः मा वो विद्युः पार्थिवाः के चनेह; यास्यावहे शिबिरायैव तावत् सो ऽनुज्ञातः पाण्डवेनाव्ययश्रीः; प्रायाच् छीघ्रं बलदेवेन सार्धम्

bhadraṃ vo 'stu nihitaṃ yad guhāyāṃ; vivardhadhvaṃ jvalana ivedhyamānaḥ mā vo vidyuḥ pārthivāḥ ke caneha; yāsyāvahe śibirāyaiva tāvat so 'nujñātaḥ pāṇḍavenāvyayaśrīḥ; prāyāc chīghraṃ baladevena sārdham

Sanskrit only: no published translation is held for this verse.