Mahābhārata (critical edition) 1.186

दूत उवाच जन्यार्थम् अन्नं द्रुपदेन राज्ञा; विवाहहेतोर् उपसंस्कृतं च तद् आप्नुवध्वं कृतसर्वकार्याः; कृष्णा च तत्रैव चिरं न कार्यम्

dūta uvāca janyārtham annaṃ drupadena rājñā; vivāhahetor upasaṃskṛtaṃ ca tad āpnuvadhvaṃ kṛtasarvakāryāḥ; kṛṣṇā ca tatraiva ciraṃ na kāryam

Sanskrit only: no published translation is held for this verse.

इमे रथाः काञ्चनपद्मचित्राः; सदश्वयुक्ता वसुधाधिपार्हाः एतान् समारुह्य परैत सर्वे; पाञ्चालराजस्य निवेशनं तत्

ime rathāḥ kāñcanapadmacitrāḥ; sadaśvayuktā vasudhādhipārhāḥ etān samāruhya paraita sarve; pāñcālarājasya niveśanaṃ tat

Sanskrit only: no published translation is held for this verse.

वैशंपायन उवाच ततः प्रयाताः कुरुपुंगवास् ते; पुरोहितं तं प्रथमं प्रयाप्य आस्थाय यानानि महान्ति तानि; कुन्ती च कृष्णा च सहैव याते

vaiśaṃpāyana uvāca tataḥ prayātāḥ kurupuṃgavās te; purohitaṃ taṃ prathamaṃ prayāpya āsthāya yānāni mahānti tāni; kuntī ca kṛṣṇā ca sahaiva yāte

Sanskrit only: no published translation is held for this verse.

श्रुत्वा तु वाक्यानि पुरोहितस्य; यान्य् उक्तवान् भारत धर्मराजः जिज्ञासयैवाथ कुरूत्तमानां; द्रव्याण्य् अनेकान्य् उपसंजहार

śrutvā tu vākyāni purohitasya; yāny uktavān bhārata dharmarājaḥ jijñāsayaivātha kurūttamānāṃ; dravyāṇy anekāny upasaṃjahāra

Sanskrit only: no published translation is held for this verse.

फलानि माल्यानि सुसंस्कृतानि; चर्माणि वर्माणि तथासनानि गाश् चैव राजन्न् अथ चैव रज्जूर्; द्रव्याणि चान्यानि कृषीनिमित्तम्

phalāni mālyāni susaṃskṛtāni; carmāṇi varmāṇi tathāsanāni gāś caiva rājann atha caiva rajjūr; dravyāṇi cānyāni kṛṣīnimittam

Sanskrit only: no published translation is held for this verse.

अन्येषु शिल्पेषु च यान्य् अपि स्युः; सर्वाणि कॢप्तान्य् अखिलेन तत्र क्रीडानिमित्तानि च यानि तानि; सर्वाणि तत्रोपजहार राजा

anyeṣu śilpeṣu ca yāny api syuḥ; sarvāṇi kḷptāny akhilena tatra krīḍānimittāni ca yāni tāni; sarvāṇi tatropajahāra rājā

Sanskrit only: no published translation is held for this verse.

रथाश्ववर्माणि च भानुमन्ति; खड्गा महान्तो ऽश्वरथाश् च चित्राः धनूंषि चाग्र्याणि शराश् च मुख्याः; शक्त्यृष्टयः काञ्चनभूषिताश् च

rathāśvavarmāṇi ca bhānumanti; khaḍgā mahānto 'śvarathāś ca citrāḥ dhanūṃṣi cāgryāṇi śarāś ca mukhyāḥ; śaktyṛṣṭayaḥ kāñcanabhūṣitāś ca

Sanskrit only: no published translation is held for this verse.

प्रासा भुशुण्ड्यश् च परश्वधाश् च; सांग्रामिकं चैव तथैव सर्वम् शय्यासनान्य् उत्तमसंस्कृतानि; तथैव चासन् विविधानि तत्र

prāsā bhuśuṇḍyaś ca paraśvadhāś ca; sāṃgrāmikaṃ caiva tathaiva sarvam śayyāsanāny uttamasaṃskṛtāni; tathaiva cāsan vividhāni tatra

Sanskrit only: no published translation is held for this verse.

कुन्ती तु कृष्णां परिगृह्य साध्वीम्; अन्तःपुरं द्रुपदस्याविवेष स्त्रियश् च तां कौरवराजपत्नीं; प्रत्यर्चयां चक्रुर् अदीनसत्त्वाः

kuntī tu kṛṣṇāṃ parigṛhya sādhvīm; antaḥpuraṃ drupadasyāviveṣa striyaś ca tāṃ kauravarājapatnīṃ; pratyarcayāṃ cakrur adīnasattvāḥ

Sanskrit only: no published translation is held for this verse.

तान् सिंहविक्रान्तगतीन् अवेक्ष्य; महर्षभाक्षान् अजिनोत्तरीयान् गूढोत्तरांसान् भुजगेन्द्रभोग;प्रलम्बबाहून् पुरुषप्रवीरान्

tān siṃhavikrāntagatīn avekṣya; maharṣabhākṣān ajinottarīyān gūḍhottarāṃsān bhujagendrabhoga;pralambabāhūn puruṣapravīrān

Sanskrit only: no published translation is held for this verse.

राजा च राज्ञः सचिवाश् च सर्वे; पुत्राश् च राज्ञः सुहृदस् तथैव प्रेष्याश् च सर्वे निखिलेन राजन्; हर्षं समापेतुर् अतीव तत्र

rājā ca rājñaḥ sacivāś ca sarve; putrāś ca rājñaḥ suhṛdas tathaiva preṣyāś ca sarve nikhilena rājan; harṣaṃ samāpetur atīva tatra

Sanskrit only: no published translation is held for this verse.

ते तत्र वीराः परमासनेषु; सपादपीठेष्व् अविशङ्कमानाः यथानुपूर्व्या विविशुर् नराग्र्यास्; तदा महार्हेषु न विस्मयन्तः

te tatra vīrāḥ paramāsaneṣu; sapādapīṭheṣv aviśaṅkamānāḥ yathānupūrvyā viviśur narāgryās; tadā mahārheṣu na vismayantaḥ

Sanskrit only: no published translation is held for this verse.

उच्चावचं पार्थिवभोजनीयं; पात्रीषु जाम्बूनदराजतीषु दासाश् च दास्यश् च सुमृष्टवेषाः; भोजापकाश् चाप्य् उपजह्रुर् अन्नम्

uccāvacaṃ pārthivabhojanīyaṃ; pātrīṣu jāmbūnadarājatīṣu dāsāś ca dāsyaś ca sumṛṣṭaveṣāḥ; bhojāpakāś cāpy upajahrur annam

Sanskrit only: no published translation is held for this verse.

ते तत्र भुक्त्वा पुरुषप्रवीरा; यथानुकामं सुभृशं प्रतीताः उत्क्रम्य सर्वाणि वसूनि तत्र; सांग्रामिकान्य् आविविशुर् नृवीराः

te tatra bhuktvā puruṣapravīrā; yathānukāmaṃ subhṛśaṃ pratītāḥ utkramya sarvāṇi vasūni tatra; sāṃgrāmikāny āviviśur nṛvīrāḥ

Sanskrit only: no published translation is held for this verse.

तल् लक्षयित्वा द्रुपदस्य पुत्रो; राजा च सर्वैः सह मन्त्रिमुख्यैः समर्चयाम् आसुर् उपेत्य हृष्टाः; कुन्तीसुतान् पार्थिवपुत्रपौत्रान्

tal lakṣayitvā drupadasya putro; rājā ca sarvaiḥ saha mantrimukhyaiḥ samarcayām āsur upetya hṛṣṭāḥ; kuntīsutān pārthivaputrapautrān

Sanskrit only: no published translation is held for this verse.