Mahābhārata (critical edition) 1.19

सूत उवाच ततो रजन्यां व्युष्टायां प्रभात उदिते रवौ कद्रूश् च विनता चैव भगिन्यौ ते तपोधन

sūta uvāca tato rajanyāṃ vyuṣṭāyāṃ prabhāta udite ravau kadrūś ca vinatā caiva bhaginyau te tapodhana

Sanskrit only: no published translation is held for this verse.

अमर्षिते सुसंरब्धे दास्ये कृतपणे तदा जग्मतुस् तुरगं द्रष्टुम् उच्छैःश्रवसम् अन्तिकात्

amarṣite susaṃrabdhe dāsye kṛtapaṇe tadā jagmatus turagaṃ draṣṭum ucchaiḥśravasam antikāt

Sanskrit only: no published translation is held for this verse.

ददृशाते तदा तत्र समुद्रं निधिम् अम्भसाम् तिमिंगिलझषाकीर्णं मकरैर् आवृतं तथा

dadṛśāte tadā tatra samudraṃ nidhim ambhasām timiṃgilajhaṣākīrṇaṃ makarair āvṛtaṃ tathā

Sanskrit only: no published translation is held for this verse.

सत्त्वैश् च बहुसाहस्रैर् नानारूपैः समावृतम् उग्रैर् नित्यम् अनाधृष्यं कूर्मग्राहसमाकुलम्

sattvaiś ca bahusāhasrair nānārūpaiḥ samāvṛtam ugrair nityam anādhṛṣyaṃ kūrmagrāhasamākulam

Sanskrit only: no published translation is held for this verse.

आकरं सर्वरत्नानाम् आलयं वरुणस्य च नागानाम् आलयं रम्यम् उत्तमं सरितां पतिम्

ākaraṃ sarvaratnānām ālayaṃ varuṇasya ca nāgānām ālayaṃ ramyam uttamaṃ saritāṃ patim

Sanskrit only: no published translation is held for this verse.

पातालज्वलनावासम् असुराणां च बन्धनम् भयंकरं च सत्त्वानां पयसां निधिम् अर्णवम्

pātālajvalanāvāsam asurāṇāṃ ca bandhanam bhayaṃkaraṃ ca sattvānāṃ payasāṃ nidhim arṇavam

Sanskrit only: no published translation is held for this verse.

शुभं दिव्यम् अमर्त्यानाम् अमृतस्याकरं परम् अप्रमेयम् अचिन्त्यं च सुपुण्यजलम् अद्भुतम्

śubhaṃ divyam amartyānām amṛtasyākaraṃ param aprameyam acintyaṃ ca supuṇyajalam adbhutam

Sanskrit only: no published translation is held for this verse.

घोरं जलचरारावरौद्रं भैरवनिस्वनम् गम्भीरावर्तकलिलं सर्वभूतभयंकरम्

ghoraṃ jalacarārāvaraudraṃ bhairavanisvanam gambhīrāvartakalilaṃ sarvabhūtabhayaṃkaram

Sanskrit only: no published translation is held for this verse.

वेलादोलानिलचलं क्षोभोद्वेगसमुत्थितम् वीचीहस्तैः प्रचलितैर् नृत्यन्तम् इव सर्वशः

velādolānilacalaṃ kṣobhodvegasamutthitam vīcīhastaiḥ pracalitair nṛtyantam iva sarvaśaḥ

Sanskrit only: no published translation is held for this verse.

चन्द्रवृद्धिक्षयवशाद् उद्वृत्तोर्मिदुरासदम् पाञ्चजन्यस्य जननं रत्नाकरम् अनुत्तमम्

candravṛddhikṣayavaśād udvṛttormidurāsadam pāñcajanyasya jananaṃ ratnākaram anuttamam

Sanskrit only: no published translation is held for this verse.

गां विन्दता भगवता गोविन्देनामितौजसा वराहरूपिणा चान्तर्विक्षोभितजलाविलम्

gāṃ vindatā bhagavatā govindenāmitaujasā varāharūpiṇā cāntarvikṣobhitajalāvilam

Sanskrit only: no published translation is held for this verse.

ब्रह्मर्षिणा च तपता वर्षाणां शतम् अत्रिणा अनासादितगाधं च पातालतलम् अव्ययम्

brahmarṣiṇā ca tapatā varṣāṇāṃ śatam atriṇā anāsāditagādhaṃ ca pātālatalam avyayam

Sanskrit only: no published translation is held for this verse.

अध्यात्मयोगनिद्रां च पद्मनाभस्य सेवतः युगादिकालशयनं विष्णोर् अमिततेजसः

adhyātmayoganidrāṃ ca padmanābhasya sevataḥ yugādikālaśayanaṃ viṣṇor amitatejasaḥ

Sanskrit only: no published translation is held for this verse.

वडवामुखदीप्ताग्नेस् तोयहव्यप्रदं शुभम् अगाधपारं विस्तीर्णम् अप्रमेयं सरित्पतिम्

vaḍavāmukhadīptāgnes toyahavyapradaṃ śubham agādhapāraṃ vistīrṇam aprameyaṃ saritpatim

Sanskrit only: no published translation is held for this verse.

महानदीभिर् बह्वीभिः स्पर्धयेव सहस्रशः अभिसार्यमाणम् अनिशं ददृशाते महार्णवम्

mahānadībhir bahvībhiḥ spardhayeva sahasraśaḥ abhisāryamāṇam aniśaṃ dadṛśāte mahārṇavam

Sanskrit only: no published translation is held for this verse.

गम्भीरं तिमिमकरोग्रसंकुलं तं; गर्जन्तं जलचररावरौद्रनादैः विस्तीर्णं ददृशतुर् अम्बरप्रकाशं; ते ऽगाधं निधिम् उरुम् अम्भसाम् अनन्तम्

gambhīraṃ timimakarograsaṃkulaṃ taṃ; garjantaṃ jalacararāvaraudranādaiḥ vistīrṇaṃ dadṛśatur ambaraprakāśaṃ; te 'gādhaṃ nidhim urum ambhasām anantam

Sanskrit only: no published translation is held for this verse.

इत्य् एवं झषमकरोर्मिसंकुलं तं; गम्भीरं विकसितम् अम्बरप्रकाशम् पातालज्वलनशिखाविदीपितं तं; पश्यन्त्यौ द्रुतम् अभिपेततुस् तदानीम्

ity evaṃ jhaṣamakarormisaṃkulaṃ taṃ; gambhīraṃ vikasitam ambaraprakāśam pātālajvalanaśikhāvidīpitaṃ taṃ; paśyantyau drutam abhipetatus tadānīm

Sanskrit only: no published translation is held for this verse.