Library·Mahābhārata (critical edition)·1·1.193
धृतराष्ट्र उवाच अहम् अप्य् एवम् एवैतच् चिन्तयामि यथा युवाम् विवेक्तुं नाहम् इच्छामि त्व् आकारं विदुरं प्रति
dhṛtarāṣṭra uvāca aham apy evam evaitac cintayāmi yathā yuvām vivektuṃ nāham icchāmi tv ākāraṃ viduraṃ prati
Sanskrit only: no published translation is held for this verse.
अतस् तेषां गुणान् एव कीर्तयामि विशेषतः नावबुध्येत विदुरो ममाभिप्रायम् इङ्गितैः
atas teṣāṃ guṇān eva kīrtayāmi viśeṣataḥ nāvabudhyeta viduro mamābhiprāyam iṅgitaiḥ
Sanskrit only: no published translation is held for this verse.
यच् च त्वं मन्यसे प्राप्तं तद् ब्रूहि त्वं सुयोधन राधेय मन्यसे त्वं च यत् प्राप्तं तद् ब्रवीहि मे
yac ca tvaṃ manyase prāptaṃ tad brūhi tvaṃ suyodhana rādheya manyase tvaṃ ca yat prāptaṃ tad bravīhi me
Sanskrit only: no published translation is held for this verse.
दुर्योधन उवाच अद्य तान् कुशलैर् विप्रैः सुकृतैर् आप्तकारिभिः कुन्तीपुत्रान् भेदयामो माद्रीपुत्रौ च पाण्डवौ
duryodhana uvāca adya tān kuśalair vipraiḥ sukṛtair āptakāribhiḥ kuntīputrān bhedayāmo mādrīputrau ca pāṇḍavau
Sanskrit only: no published translation is held for this verse.
अथ वा द्रुपदो राजा महद्भिर् वित्तसंचयैः पुत्राश् चास्य प्रलोभ्यन्ताम् अमात्याश् चैव सर्वशः
atha vā drupado rājā mahadbhir vittasaṃcayaiḥ putrāś cāsya pralobhyantām amātyāś caiva sarvaśaḥ
Sanskrit only: no published translation is held for this verse.
परित्यजध्वं राजानं कुन्तीपुत्रं युधिष्ठिरम् अथ तत्रैव वा तेषां निवासं रोचयन्तु ते
parityajadhvaṃ rājānaṃ kuntīputraṃ yudhiṣṭhiram atha tatraiva vā teṣāṃ nivāsaṃ rocayantu te
Sanskrit only: no published translation is held for this verse.
इहैषां दोषवद् वासं वर्णयन्तु पृथक् पृथक् ते भिद्यमानास् तत्रैव मनः कुर्वन्तु पाण्डवाः
ihaiṣāṃ doṣavad vāsaṃ varṇayantu pṛthak pṛthak te bhidyamānās tatraiva manaḥ kurvantu pāṇḍavāḥ
Sanskrit only: no published translation is held for this verse.
अथवा कुशलाः के चिद् उपायनिपुणा नराः इतरेतरतः पार्थान् भेदयन्त्व् अनुरागतः
athavā kuśalāḥ ke cid upāyanipuṇā narāḥ itaretarataḥ pārthān bhedayantv anurāgataḥ
Sanskrit only: no published translation is held for this verse.
व्युत्थापयन्तु वा कृष्णां बहुत्वात् सुकरं हि तत् अथवा पाण्डवांस् तस्यां भेदयन्तु ततश् च ताम्
vyutthāpayantu vā kṛṣṇāṃ bahutvāt sukaraṃ hi tat athavā pāṇḍavāṃs tasyāṃ bhedayantu tataś ca tām
Sanskrit only: no published translation is held for this verse.
भीमसेनस्य वा राजन्न् उपायकुशलैर् नरैः मृत्युर् विधीयतां छन्नैः स हि तेषां बलाधिकः
bhīmasenasya vā rājann upāyakuśalair naraiḥ mṛtyur vidhīyatāṃ channaiḥ sa hi teṣāṃ balādhikaḥ
Sanskrit only: no published translation is held for this verse.
तस्मिंस् तु निहते राजन् हतोत्साहा हतौजसः यतिष्यन्ते न राज्याय स हि तेषां व्यपाश्रयः
tasmiṃs tu nihate rājan hatotsāhā hataujasaḥ yatiṣyante na rājyāya sa hi teṣāṃ vyapāśrayaḥ
Sanskrit only: no published translation is held for this verse.
अजेयो ह्य् अर्जुनः संख्ये पृष्ठगोपे वृकोदरे तम् ऋते फल्गुनो युद्धे राधेयस्य न पादभाक्
ajeyo hy arjunaḥ saṃkhye pṛṣṭhagope vṛkodare tam ṛte phalguno yuddhe rādheyasya na pādabhāk
Sanskrit only: no published translation is held for this verse.
ते जानमाना दौर्बल्यं भीमसेनम् ऋते महत् अस्मान् बलवतो ज्ञात्वा नशिष्यन्त्य् अबलीयसः
te jānamānā daurbalyaṃ bhīmasenam ṛte mahat asmān balavato jñātvā naśiṣyanty abalīyasaḥ
Sanskrit only: no published translation is held for this verse.
इहागतेषु पार्थेषु निदेशवशवर्तिषु प्रवर्तिष्यामहे राजन् यथाश्रद्धं निबर्हणे
ihāgateṣu pārtheṣu nideśavaśavartiṣu pravartiṣyāmahe rājan yathāśraddhaṃ nibarhaṇe
Sanskrit only: no published translation is held for this verse.
अथवा दर्शनीयाभिः प्रमदाभिर् विलोभ्यताम् एकैकस् तत्र कौन्तेयस् ततः कृष्णा विरज्यताम्
athavā darśanīyābhiḥ pramadābhir vilobhyatām ekaikas tatra kaunteyas tataḥ kṛṣṇā virajyatām
Sanskrit only: no published translation is held for this verse.
प्रेष्यतां वापि राधेयस् तेषाम् आगमनाय वै ते लोप्त्रहारैः संधाय वध्यन्ताम् आप्तकारिभिः
preṣyatāṃ vāpi rādheyas teṣām āgamanāya vai te loptrahāraiḥ saṃdhāya vadhyantām āptakāribhiḥ
Sanskrit only: no published translation is held for this verse.
एतेषाम् अभ्युपायानां यस् ते निर्दोषवान् मतः तस्य प्रयोगम् आतिष्ठ पुरा कालो ऽतिवर्तते
eteṣām abhyupāyānāṃ yas te nirdoṣavān mataḥ tasya prayogam ātiṣṭha purā kālo 'tivartate
Sanskrit only: no published translation is held for this verse.
यावच् चाकृतविश्वासा द्रुपदे पार्थिवर्षभे तावद् एवाद्य ते शक्या न शक्यास् तु ततः परम्
yāvac cākṛtaviśvāsā drupade pārthivarṣabhe tāvad evādya te śakyā na śakyās tu tataḥ param
Sanskrit only: no published translation is held for this verse.
एषा मम मतिस् तात निग्रहाय प्रवर्तते साधु वा यदि वासाधु किं वा राधेय मन्यसे
eṣā mama matis tāta nigrahāya pravartate sādhu vā yadi vāsādhu kiṃ vā rādheya manyase
Sanskrit only: no published translation is held for this verse.