Mahābhārata (critical edition) 1.20

सूत उवाच तं समुद्रम् अतिक्रम्य कद्रूर् विनतया सह न्यपतत् तुरगाभ्याशे नचिराद् इव शीघ्रगा

sūta uvāca taṃ samudram atikramya kadrūr vinatayā saha nyapatat turagābhyāśe nacirād iva śīghragā

Sanskrit only: no published translation is held for this verse.

निशाम्य च बहून् वालान् कृष्णान् पुच्छं समाश्रितान् विनतां विषण्णवदनां कद्रूर् दास्ये न्ययोजयत्

niśāmya ca bahūn vālān kṛṣṇān pucchaṃ samāśritān vinatāṃ viṣaṇṇavadanāṃ kadrūr dāsye nyayojayat

Sanskrit only: no published translation is held for this verse.

ततः सा विनता तस्मिन् पणितेन पराजिता अभवद् दुःखसंतप्ता दासीभावं समास्थिता

tataḥ sā vinatā tasmin paṇitena parājitā abhavad duḥkhasaṃtaptā dāsībhāvaṃ samāsthitā

Sanskrit only: no published translation is held for this verse.

एतस्मिन्न् अन्तरे चैव गरुडः काल आगते विना मात्रा महातेजा विदार्याण्डम् अजायत

etasminn antare caiva garuḍaḥ kāla āgate vinā mātrā mahātejā vidāryāṇḍam ajāyata

Sanskrit only: no published translation is held for this verse.

अग्निराशिर् इवोद्भासन् समिद्धो ऽतिभयंकरः प्रवृद्धः सहसा पक्षी महाकायो नभोगतः

agnirāśir ivodbhāsan samiddho 'tibhayaṃkaraḥ pravṛddhaḥ sahasā pakṣī mahākāyo nabhogataḥ

Sanskrit only: no published translation is held for this verse.

तं दृष्ट्वा शरणं जग्मुः प्रजाः सर्वा विभावसुम् प्रणिपत्याब्रुवंश् चैनम् आसीनं विश्वरूपिणम्

taṃ dṛṣṭvā śaraṇaṃ jagmuḥ prajāḥ sarvā vibhāvasum praṇipatyābruvaṃś cainam āsīnaṃ viśvarūpiṇam

Sanskrit only: no published translation is held for this verse.

अग्ने मा त्वं प्रवर्धिष्ठाः कच्चिन् नो न दिधक्षसि असौ हि राशिः सुमहान् समिद्धस् तव सर्पति

agne mā tvaṃ pravardhiṣṭhāḥ kaccin no na didhakṣasi asau hi rāśiḥ sumahān samiddhas tava sarpati

Sanskrit only: no published translation is held for this verse.

अग्निर् उवाच नैतद् एवं यथा यूयं मन्यध्वम् असुरार्दनाः गरुडो बलवान् एष मम तुल्यः स्वतेजसा

agnir uvāca naitad evaṃ yathā yūyaṃ manyadhvam asurārdanāḥ garuḍo balavān eṣa mama tulyaḥ svatejasā

Sanskrit only: no published translation is held for this verse.

सूत उवाच एवम् उक्तास् ततो गत्वा गरुडं वाग्भिर् अस्तुवन् अदूराद् अभ्युपेत्यैनं देवाः सर्षिगणास् तदा

sūta uvāca evam uktās tato gatvā garuḍaṃ vāgbhir astuvan adūrād abhyupetyainaṃ devāḥ sarṣigaṇās tadā

Sanskrit only: no published translation is held for this verse.

त्वम् ऋषिस् त्वं महाभागस् त्वं देवः पतगेश्वरः त्वं प्रभुस् तपनप्रख्यस् त्वं नस् त्राणम् अनुत्तमम्

tvam ṛṣis tvaṃ mahābhāgas tvaṃ devaḥ patageśvaraḥ tvaṃ prabhus tapanaprakhyas tvaṃ nas trāṇam anuttamam

Sanskrit only: no published translation is held for this verse.

बलोर्मिमान् साधुर् अदीनसत्त्वः; समृद्धिमान् दुष्प्रसहस् त्वम् एव तपः श्रुतं सर्वम् अहीनकीर्ते; अनागतं चोपगतं च सर्वम्

balormimān sādhur adīnasattvaḥ; samṛddhimān duṣprasahas tvam eva tapaḥ śrutaṃ sarvam ahīnakīrte; anāgataṃ copagataṃ ca sarvam

Sanskrit only: no published translation is held for this verse.

त्वम् उत्तमः सर्वम् इदं चराचरं; गभस्तिभिर् भानुर् इवावभाससे समाक्षिपन् भानुमतः प्रभां मुहुस्; त्वम् अन्तकः सर्वम् इदं ध्रुवाध्रुवम्

tvam uttamaḥ sarvam idaṃ carācaraṃ; gabhastibhir bhānur ivāvabhāsase samākṣipan bhānumataḥ prabhāṃ muhus; tvam antakaḥ sarvam idaṃ dhruvādhruvam

Sanskrit only: no published translation is held for this verse.

दिवाकरः परिकुपितो यथा दहेत्; प्रजास् तथा दहसि हुताशनप्रभ भयंकरः प्रलय इवाग्निर् उत्थितो; विनाशयन् युगपरिवर्तनान्तकृत्

divākaraḥ parikupito yathā dahet; prajās tathā dahasi hutāśanaprabha bhayaṃkaraḥ pralaya ivāgnir utthito; vināśayan yugaparivartanāntakṛt

Sanskrit only: no published translation is held for this verse.

खगेश्वरं शरणम् उपस्थिता वयं; महौजसं वितिमिरम् अभ्रगोचरम् महाबलं गरुडम् उपेत्य खेचरं; परावरं वरदम् अजय्यविक्रमम्

khageśvaraṃ śaraṇam upasthitā vayaṃ; mahaujasaṃ vitimiram abhragocaram mahābalaṃ garuḍam upetya khecaraṃ; parāvaraṃ varadam ajayyavikramam

Sanskrit only: no published translation is held for this verse.

एवं स्तुतः सुपर्णस् तु देवैः सर्षिगणैस् तदा तेजसः प्रतिसंहारम् आत्मनः स चकार ह

evaṃ stutaḥ suparṇas tu devaiḥ sarṣigaṇais tadā tejasaḥ pratisaṃhāram ātmanaḥ sa cakāra ha

Sanskrit only: no published translation is held for this verse.