Library·Mahābhārata (critical edition)·1·1.225
मन्दपाल उवाच युष्माकं परिरक्षार्थं विज्ञप्तो ज्वलनो मया अग्निना च तथेत्य् एवं पूर्वम् एव प्रतिश्रुतम्
mandapāla uvāca yuṣmākaṃ parirakṣārthaṃ vijñapto jvalano mayā agninā ca tathety evaṃ pūrvam eva pratiśrutam
Sanskrit only: no published translation is held for this verse.
अग्नेर् वचनम् आज्ञाय मातुर् धर्मज्ञतां च वः युष्माकं च परं वीर्यं नाहं पूर्वम् इहागतः
agner vacanam ājñāya mātur dharmajñatāṃ ca vaḥ yuṣmākaṃ ca paraṃ vīryaṃ nāhaṃ pūrvam ihāgataḥ
Sanskrit only: no published translation is held for this verse.
न संतापो हि वः कार्यः पुत्रका मरणं प्रति ऋषीन् वेद हुताशो ऽपि ब्रह्म तद् विदितं च वः
na saṃtāpo hi vaḥ kāryaḥ putrakā maraṇaṃ prati ṛṣīn veda hutāśo 'pi brahma tad viditaṃ ca vaḥ
Sanskrit only: no published translation is held for this verse.
वैशंपायन उवाच एवम् आश्वास्य पुत्रान् स भार्यां चादाय भारत मन्दपालस् ततो देशाद् अन्यं देशं जगाम ह
vaiśaṃpāyana uvāca evam āśvāsya putrān sa bhāryāṃ cādāya bhārata mandapālas tato deśād anyaṃ deśaṃ jagāma ha
Sanskrit only: no published translation is held for this verse.
भगवान् अपि तिग्मांशुः समिद्धं खाण्डवं वनम् ददाह सह कृष्णाभ्यां जनयञ् जगतो ऽभयम्
bhagavān api tigmāṃśuḥ samiddhaṃ khāṇḍavaṃ vanam dadāha saha kṛṣṇābhyāṃ janayañ jagato 'bhayam
Sanskrit only: no published translation is held for this verse.
वसामेदोवहाः कुल्यास् तत्र पीत्वा च पावकः अगच्छत् परमां तृप्तिं दर्शयाम् आस चार्जुनम्
vasāmedovahāḥ kulyās tatra pītvā ca pāvakaḥ agacchat paramāṃ tṛptiṃ darśayām āsa cārjunam
Sanskrit only: no published translation is held for this verse.
ततो ऽन्तरिक्षाद् भगवान् अवतीर्य सुरेश्वरः मरुद्गणवृतः पार्थं माधवं चाब्रवीद् इदम्
tato 'ntarikṣād bhagavān avatīrya sureśvaraḥ marudgaṇavṛtaḥ pārthaṃ mādhavaṃ cābravīd idam
Sanskrit only: no published translation is held for this verse.
कृतं युवाभ्यां कर्मेदम् अमरैर् अपि दुष्करम् वरान् वृणीतं तुष्टो ऽस्मि दुर्लभान् अप्य् अमानुषान्
kṛtaṃ yuvābhyāṃ karmedam amarair api duṣkaram varān vṛṇītaṃ tuṣṭo 'smi durlabhān apy amānuṣān
Sanskrit only: no published translation is held for this verse.
पार्थस् तु वरयाम् आस शक्राद् अस्त्राणि सर्वशः ग्रहीतुं तच् च शक्रो ऽस्य तदा कालं चकार ह
pārthas tu varayām āsa śakrād astrāṇi sarvaśaḥ grahītuṃ tac ca śakro 'sya tadā kālaṃ cakāra ha
Sanskrit only: no published translation is held for this verse.
यदा प्रसन्नो भगवान् महादेवो भविष्यति तुभ्यं तदा प्रदास्यामि पाण्डवास्त्राणि सर्वशः
yadā prasanno bhagavān mahādevo bhaviṣyati tubhyaṃ tadā pradāsyāmi pāṇḍavāstrāṇi sarvaśaḥ
Sanskrit only: no published translation is held for this verse.
अहम् एव च तं कालं वेत्स्यामि कुरुनन्दन तपसा महता चापि दास्यामि तव तान्य् अहम्
aham eva ca taṃ kālaṃ vetsyāmi kurunandana tapasā mahatā cāpi dāsyāmi tava tāny aham
Sanskrit only: no published translation is held for this verse.
आग्नेयानि च सर्वाणि वायव्यानि तथैव च मदीयानि च सर्वाणि ग्रहीष्यसि धनंजय
āgneyāni ca sarvāṇi vāyavyāni tathaiva ca madīyāni ca sarvāṇi grahīṣyasi dhanaṃjaya
Sanskrit only: no published translation is held for this verse.
वासुदेवो ऽपि जग्राह प्रीतिं पार्थेन शाश्वतीम् ददौ च तस्मै देवेन्द्रस् तं वरं प्रीतिमांस् तदा
vāsudevo 'pi jagrāha prītiṃ pārthena śāśvatīm dadau ca tasmai devendras taṃ varaṃ prītimāṃs tadā
Sanskrit only: no published translation is held for this verse.
दत्त्वा ताभ्यां वरं प्रीतः सह देवैर् मरुत्पतिः हुताशनम् अनुज्ञाप्य जगाम त्रिदिवं पुनः
dattvā tābhyāṃ varaṃ prītaḥ saha devair marutpatiḥ hutāśanam anujñāpya jagāma tridivaṃ punaḥ
Sanskrit only: no published translation is held for this verse.
पावकश् चापि तं दावं दग्ध्वा समृगपक्षिणम् अहानि पञ्च चैकं च विरराम सुतर्पितः
pāvakaś cāpi taṃ dāvaṃ dagdhvā samṛgapakṣiṇam ahāni pañca caikaṃ ca virarāma sutarpitaḥ
Sanskrit only: no published translation is held for this verse.
जग्ध्वा मांसानि पीत्वा च मेदांसि रुधिराणि च युक्तः परमया प्रीत्या ताव् उवाच विशां पते
jagdhvā māṃsāni pītvā ca medāṃsi rudhirāṇi ca yuktaḥ paramayā prītyā tāv uvāca viśāṃ pate
Sanskrit only: no published translation is held for this verse.
युवाभ्यां पुरुषाग्र्याभ्यां तर्पितो ऽस्मि यथासुखम् अनुजानामि वां वीरौ चरतं यत्र वाञ्छितम्
yuvābhyāṃ puruṣāgryābhyāṃ tarpito 'smi yathāsukham anujānāmi vāṃ vīrau carataṃ yatra vāñchitam
Sanskrit only: no published translation is held for this verse.
एवं तौ समनुज्ञातौ पावकेन महात्मना अर्जुनो वासुदेवश् च दानवश् च मयस् तथा
evaṃ tau samanujñātau pāvakena mahātmanā arjuno vāsudevaś ca dānavaś ca mayas tathā
Sanskrit only: no published translation is held for this verse.
परिक्रम्य ततः सर्वे त्रयो ऽपि भरतर्षभ रमणीये नदीकूले सहिताः समुपाविशन्
parikramya tataḥ sarve trayo 'pi bharatarṣabha ramaṇīye nadīkūle sahitāḥ samupāviśan
Sanskrit only: no published translation is held for this verse.