Library·Mahābhārata (critical edition)·1·1.24
सूत उवाच इत्य् उक्तो गरुडः सर्पैस् ततो मातरम् अब्रवीत् गच्छाम्य् अमृतम् आहर्तुं भक्ष्यम् इच्छामि वेदितुम्
sūta uvāca ity ukto garuḍaḥ sarpais tato mātaram abravīt gacchāmy amṛtam āhartuṃ bhakṣyam icchāmi veditum
Sanskrit only: no published translation is held for this verse.
विनतोवाच समुद्रकुक्षाव् एकान्ते निषादालयम् उत्तमम् सहस्राणाम् अनेकानां तान् भुक्त्वामृतम् आनय
vinatovāca samudrakukṣāv ekānte niṣādālayam uttamam sahasrāṇām anekānāṃ tān bhuktvāmṛtam ānaya
Sanskrit only: no published translation is held for this verse.
न तु ते ब्राह्मणं हन्तुं कार्या बुद्धिः कथं चन अवध्यः सर्वभूतानां ब्राह्मणो ह्य् अनलोपमः
na tu te brāhmaṇaṃ hantuṃ kāryā buddhiḥ kathaṃ cana avadhyaḥ sarvabhūtānāṃ brāhmaṇo hy analopamaḥ
Sanskrit only: no published translation is held for this verse.
अग्निर् अर्को विषं शस्त्रं विप्रो भवति कोपितः भूतानाम् अग्रभुग् विप्रो वर्णश्रेष्ठः पिता गुरुः
agnir arko viṣaṃ śastraṃ vipro bhavati kopitaḥ bhūtānām agrabhug vipro varṇaśreṣṭhaḥ pitā guruḥ
Sanskrit only: no published translation is held for this verse.
गरुड उवाच यथाहम् अभिजानीयां ब्राह्मणं लक्षणैः शुभैः तन् मे कारणतो मातः पृच्छतो वक्तुम् अर्हसि
garuḍa uvāca yathāham abhijānīyāṃ brāhmaṇaṃ lakṣaṇaiḥ śubhaiḥ tan me kāraṇato mātaḥ pṛcchato vaktum arhasi
Sanskrit only: no published translation is held for this verse.
विनतोवाच यस् ते कण्ठम् अनुप्राप्तो निगीर्णं बडिशं यथा दहेद् अङ्गारवत् पुत्र तं विद्याद् ब्राह्मणर्षभम्
vinatovāca yas te kaṇṭham anuprāpto nigīrṇaṃ baḍiśaṃ yathā dahed aṅgāravat putra taṃ vidyād brāhmaṇarṣabham
Sanskrit only: no published translation is held for this verse.
सूत उवाच प्रोवाच चैनं विनता पुत्रहार्दाद् इदं वचः जानन्त्य् अप्य् अतुलं वीर्यम् आशीर्वादसमन्वितम्
sūta uvāca provāca cainaṃ vinatā putrahārdād idaṃ vacaḥ jānanty apy atulaṃ vīryam āśīrvādasamanvitam
Sanskrit only: no published translation is held for this verse.
पक्षौ ते मारुतः पातु चन्द्रः पृष्ठं तु पुत्रक शिरस् तु पातु ते वह्निर् भास्करः सर्वम् एव तु
pakṣau te mārutaḥ pātu candraḥ pṛṣṭhaṃ tu putraka śiras tu pātu te vahnir bhāskaraḥ sarvam eva tu
Sanskrit only: no published translation is held for this verse.
अहं च ते सदा पुत्र शान्तिस्वस्तिपरायणा अरिष्टं व्रज पन्थानं वत्स कार्यार्थसिद्धये
ahaṃ ca te sadā putra śāntisvastiparāyaṇā ariṣṭaṃ vraja panthānaṃ vatsa kāryārthasiddhaye
Sanskrit only: no published translation is held for this verse.
ततः स मातुर् वचनं निशम्य; वितत्य पक्षौ नभ उत्पपात ततो निषादान् बलवान् उपागमद्; बुभुक्षितः काल इवान्तको महान्
tataḥ sa mātur vacanaṃ niśamya; vitatya pakṣau nabha utpapāta tato niṣādān balavān upāgamad; bubhukṣitaḥ kāla ivāntako mahān
Sanskrit only: no published translation is held for this verse.
स तान् निषादान् उपसंहरंस् तदा; रजः समुद्धूय नभःस्पृशं महत् समुद्रकुक्षौ च विशोषयन् पयः; समीपगान् भूमिधरान् विचालयन्
sa tān niṣādān upasaṃharaṃs tadā; rajaḥ samuddhūya nabhaḥspṛśaṃ mahat samudrakukṣau ca viśoṣayan payaḥ; samīpagān bhūmidharān vicālayan
Sanskrit only: no published translation is held for this verse.
ततः स चक्रे महद् आननं तदा; निषादमार्गं प्रतिरुध्य पक्षिराट् ततो निषादास् त्वरिताः प्रवव्रजुर्; यतो मुखं तस्य भुजंगभोजिनः
tataḥ sa cakre mahad ānanaṃ tadā; niṣādamārgaṃ pratirudhya pakṣirāṭ tato niṣādās tvaritāḥ pravavrajur; yato mukhaṃ tasya bhujaṃgabhojinaḥ
Sanskrit only: no published translation is held for this verse.
तदाननं विवृतम् अतिप्रमाणवत्; समभ्ययुर् गगनम् इवार्दिताः खगाः सहस्रशः पवनरजोभ्रमोहिता; महानिलप्रचलितपादपे वने
tadānanaṃ vivṛtam atipramāṇavat; samabhyayur gaganam ivārditāḥ khagāḥ sahasraśaḥ pavanarajobhramohitā; mahānilapracalitapādape vane
Sanskrit only: no published translation is held for this verse.
ततः खगो वदनम् अमित्रतापनः; समाहरत् परिचपलो महाबलः निषूदयन् बहुविधमत्स्यभक्षिणो; बुभुक्षितो गगनचरेश्वरस् तदा
tataḥ khago vadanam amitratāpanaḥ; samāharat paricapalo mahābalaḥ niṣūdayan bahuvidhamatsyabhakṣiṇo; bubhukṣito gaganacareśvaras tadā
Sanskrit only: no published translation is held for this verse.