Mahābhārata (critical edition) 1.35

सूत उवाच एलापत्रस्य तु वचः श्रुत्वा नागा द्विजोत्तम सर्वे प्रहृष्टमनसः साधु साध्व् इत्य् अपूजयन्

sūta uvāca elāpatrasya tu vacaḥ śrutvā nāgā dvijottama sarve prahṛṣṭamanasaḥ sādhu sādhv ity apūjayan

Sanskrit only: no published translation is held for this verse.

ततः प्रभृति तां कन्यां वासुकिः पर्यरक्षत जरत्कारुं स्वसारं वै परं हर्षम् अवाप च

tataḥ prabhṛti tāṃ kanyāṃ vāsukiḥ paryarakṣata jaratkāruṃ svasāraṃ vai paraṃ harṣam avāpa ca

Sanskrit only: no published translation is held for this verse.

ततो नातिमहान् कालः समतीत इवाभवत् अथ देवासुराः सर्वे ममन्थुर् वरुणालयम्

tato nātimahān kālaḥ samatīta ivābhavat atha devāsurāḥ sarve mamanthur varuṇālayam

Sanskrit only: no published translation is held for this verse.

तत्र नेत्रम् अभून् नागो वासुकिर् बलिनां वरः समाप्यैव च तत् कर्म पितामहम् उपागमन्

tatra netram abhūn nāgo vāsukir balināṃ varaḥ samāpyaiva ca tat karma pitāmaham upāgaman

Sanskrit only: no published translation is held for this verse.

देवा वासुकिना सार्धं पितामहम् अथाब्रुवन् भगवञ् शापभीतो ऽयं वासुकिस् तप्यते भृशम्

devā vāsukinā sārdhaṃ pitāmaham athābruvan bhagavañ śāpabhīto 'yaṃ vāsukis tapyate bhṛśam

Sanskrit only: no published translation is held for this verse.

तस्येदं मानसं शल्यं समुद्धर्तुं त्वम् अर्हसि जनन्याः शापजं देव ज्ञातीनां हितकाङ्क्षिणः

tasyedaṃ mānasaṃ śalyaṃ samuddhartuṃ tvam arhasi jananyāḥ śāpajaṃ deva jñātīnāṃ hitakāṅkṣiṇaḥ

Sanskrit only: no published translation is held for this verse.

हितो ह्य् अयं सदास्माकं प्रियकारी च नागराट् कुरु प्रसादं देवेश शमयास्य मनोज्वरम्

hito hy ayaṃ sadāsmākaṃ priyakārī ca nāgarāṭ kuru prasādaṃ deveśa śamayāsya manojvaram

Sanskrit only: no published translation is held for this verse.

ब्रह्मोवाच मयैवैतद् वितीर्णं वै वचनं मनसामराः एलापत्रेण नागेन यद् अस्याभिहितं पुरा

brahmovāca mayaivaitad vitīrṇaṃ vai vacanaṃ manasāmarāḥ elāpatreṇa nāgena yad asyābhihitaṃ purā

Sanskrit only: no published translation is held for this verse.

तत् करोत्व् एष नागेन्द्रः प्राप्तकालं वचस् तथा विनशिष्यन्ति ये पापा न तु ये धर्मचारिणः

tat karotv eṣa nāgendraḥ prāptakālaṃ vacas tathā vinaśiṣyanti ye pāpā na tu ye dharmacāriṇaḥ

Sanskrit only: no published translation is held for this verse.

उत्पन्नः स जरत्कारुस् तपस्य् उग्रे रतो द्विजः तस्यैष भगिनीं काले जरत्कारुं प्रयच्छतु

utpannaḥ sa jaratkārus tapasy ugre rato dvijaḥ tasyaiṣa bhaginīṃ kāle jaratkāruṃ prayacchatu

Sanskrit only: no published translation is held for this verse.

यद् एलापत्रेण वचस् तदोक्तं भुजगेन ह पन्नगानां हितं देवास् तत् तथा न तद् अन्यथा

yad elāpatreṇa vacas tadoktaṃ bhujagena ha pannagānāṃ hitaṃ devās tat tathā na tad anyathā

Sanskrit only: no published translation is held for this verse.

सूत उवाच एतच् छ्रुत्वा स नागेन्द्रः पितामहवचस् तदा सर्पान् बहूञ् जरत्कारौ नित्ययुक्तान् समादधत्

sūta uvāca etac chrutvā sa nāgendraḥ pitāmahavacas tadā sarpān bahūñ jaratkārau nityayuktān samādadhat

Sanskrit only: no published translation is held for this verse.

जरत्कारुर् यदा भार्याम् इच्छेद् वरयितुं प्रभुः शीघ्रम् एत्य ममाख्येयं तन् नः श्रेयो भविष्यति

jaratkārur yadā bhāryām icched varayituṃ prabhuḥ śīghram etya mamākhyeyaṃ tan naḥ śreyo bhaviṣyati

Sanskrit only: no published translation is held for this verse.