Mahābhārata (critical edition) 1.4

लोमहर्षणपुत्र उग्रश्रवाः सूतः पौराणिको नैमिषारण्ये शौनकस्य कुलपतेर् द्वादशवार्षिके सत्रे ऋषीन् अभ्यागतान् उपतस्थे

lomaharṣaṇaputra ugraśravāḥ sūtaḥ paurāṇiko naimiṣāraṇye śaunakasya kulapater dvādaśavārṣike satre ṛṣīn abhyāgatān upatasthe

Sanskrit only: no published translation is held for this verse.

पौराणिकः पुराणे कृतश्रमः स तान् कृताञ्जलिर् उवाच किं भवन्तः श्रोतुम् इच्छन्ति किम् अहं ब्रुवाणीति

paurāṇikaḥ purāṇe kṛtaśramaḥ sa tān kṛtāñjalir uvāca kiṃ bhavantaḥ śrotum icchanti kim ahaṃ bruvāṇīti

Sanskrit only: no published translation is held for this verse.

तम् ऋषय ऊचुः परमं लोमहर्षणे प्रक्ष्यामस् त्वां वक्ष्यसि च नः शुश्रूषतां कथायोगम् तद् भगवांस् तु तावच् छौनको ऽग्निशरणम् अध्यास्ते

tam ṛṣaya ūcuḥ paramaṃ lomaharṣaṇe prakṣyāmas tvāṃ vakṣyasi ca naḥ śuśrūṣatāṃ kathāyogam tad bhagavāṃs tu tāvac chaunako 'gniśaraṇam adhyāste

Sanskrit only: no published translation is held for this verse.

यो ऽसौ दिव्याः कथा वेद देवतासुरसंकथाः मनुष्योरगगन्धर्वकथा वेद च सर्वशः

yo 'sau divyāḥ kathā veda devatāsurasaṃkathāḥ manuṣyoragagandharvakathā veda ca sarvaśaḥ

Sanskrit only: no published translation is held for this verse.

स चाप्य् अस्मिन् मखे सौते विद्वान् कुलपतिर् द्विजः दक्षो धृतव्रतो धीमाञ् शास्त्रे चारण्यके गुरुः

sa cāpy asmin makhe saute vidvān kulapatir dvijaḥ dakṣo dhṛtavrato dhīmāñ śāstre cāraṇyake guruḥ

Sanskrit only: no published translation is held for this verse.

सत्यवादी शमपरस् तपस्वी नियतव्रतः सर्वेषाम् एव नो मान्यः स तावत् प्रतिपाल्यताम्

satyavādī śamaparas tapasvī niyatavrataḥ sarveṣām eva no mānyaḥ sa tāvat pratipālyatām

Sanskrit only: no published translation is held for this verse.

तस्मिन्न् अध्यासति गुराव् आसनं परमार्चितम् ततो वक्ष्यसि यत् त्वां स प्रक्ष्यति द्विजसत्तमः

tasminn adhyāsati gurāv āsanaṃ paramārcitam tato vakṣyasi yat tvāṃ sa prakṣyati dvijasattamaḥ

Sanskrit only: no published translation is held for this verse.

सूत उवाच एवम् अस्तु गुरौ तस्मिन्न् उपविष्टे महात्मनि तेन पृष्टः कथाः पुण्या वक्ष्यामि विविधाश्रयाः

sūta uvāca evam astu gurau tasminn upaviṣṭe mahātmani tena pṛṣṭaḥ kathāḥ puṇyā vakṣyāmi vividhāśrayāḥ

Sanskrit only: no published translation is held for this verse.

सो ऽथ विप्रर्षभः कार्यं कृत्वा सर्वं यथाक्रमम् देवान् वाग्भिः पितॄन् अद्भिस् तर्पयित्वाजगाम ह

so 'tha viprarṣabhaḥ kāryaṃ kṛtvā sarvaṃ yathākramam devān vāgbhiḥ pitṝn adbhis tarpayitvājagāma ha

Sanskrit only: no published translation is held for this verse.

यत्र ब्रह्मर्षयः सिद्धास् त आसीना यतव्रताः यज्ञायतनम् आश्रित्य सूतपुत्रपुरःसराः

yatra brahmarṣayaḥ siddhās ta āsīnā yatavratāḥ yajñāyatanam āśritya sūtaputrapuraḥsarāḥ

Sanskrit only: no published translation is held for this verse.

ऋत्विक्ष्व् अथ सदस्येषु स वै गृहपतिस् ततः उपविष्टेषूपविष्टः शौनको ऽथाब्रवीद् इदम्

ṛtvikṣv atha sadasyeṣu sa vai gṛhapatis tataḥ upaviṣṭeṣūpaviṣṭaḥ śaunako 'thābravīd idam

Sanskrit only: no published translation is held for this verse.