Mahābhārata (critical edition) 1.50

आस्तीक उवाच सोमस्य यज्ञो वरुणस्य यज्ञः; प्रजापतेर् यज्ञ आसीत् प्रयागे तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

āstīka uvāca somasya yajño varuṇasya yajñaḥ; prajāpater yajña āsīt prayāge tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

शक्रस्य यज्ञः शतसंख्य उक्तस्; तथापरस् तुल्यसंख्यः शतं वै तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

śakrasya yajñaḥ śatasaṃkhya uktas; tathāparas tulyasaṃkhyaḥ śataṃ vai tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

यमस्य यज्ञो हरिमेधसश् च; यथा यज्ञो रन्तिदेवस्य राज्ञः तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

yamasya yajño harimedhasaś ca; yathā yajño rantidevasya rājñaḥ tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

गयस्य यज्ञः शशबिन्दोश् च राज्ञो; यज्ञस् तथा वैश्रवणस्य राज्ञः तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

gayasya yajñaḥ śaśabindoś ca rājño; yajñas tathā vaiśravaṇasya rājñaḥ tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

नृगस्य यज्ञस् त्व् अजमीढस्य चासीद्; यथा यज्ञो दाशरथेश् च राज्ञः तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

nṛgasya yajñas tv ajamīḍhasya cāsīd; yathā yajño dāśaratheś ca rājñaḥ tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

यज्ञः श्रुतो नो दिवि देवसूनोर्; युधिष्ठिरस्याजमीढस्य राज्ञः तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

yajñaḥ śruto no divi devasūnor; yudhiṣṭhirasyājamīḍhasya rājñaḥ tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

कृष्णस्य यज्ञः सत्यवत्याः सुतस्य; स्वयं च कर्म प्रचकार यत्र तथा यज्ञो ऽयं तव भारताग्र्य; पारिक्षित स्वस्ति नो ऽस्तु प्रियेभ्यः

kṛṣṇasya yajñaḥ satyavatyāḥ sutasya; svayaṃ ca karma pracakāra yatra tathā yajño 'yaṃ tava bhāratāgrya; pārikṣita svasti no 'stu priyebhyaḥ

Sanskrit only: no published translation is held for this verse.

इमे हि ते सूर्यहुताशवर्चसः; समासते वृत्रहणः क्रतुं यथा नैषां ज्ञानं विद्यते ज्ञातुम् अद्य; दत्तं येभ्यो न प्रणश्येत् कथं चित्

ime hi te sūryahutāśavarcasaḥ; samāsate vṛtrahaṇaḥ kratuṃ yathā naiṣāṃ jñānaṃ vidyate jñātum adya; dattaṃ yebhyo na praṇaśyet kathaṃ cit

Sanskrit only: no published translation is held for this verse.

ऋत्विक्समो नास्ति लोकेषु चैव; द्वैपायनेनेति विनिश्चितं मे एतस्य शिष्या हि क्षितिं चरन्ति; सर्वर्त्विजः कर्मसु स्वेषु दक्षाः

ṛtviksamo nāsti lokeṣu caiva; dvaipāyaneneti viniścitaṃ me etasya śiṣyā hi kṣitiṃ caranti; sarvartvijaḥ karmasu sveṣu dakṣāḥ

Sanskrit only: no published translation is held for this verse.

विभावसुश् चित्रभानुर् महात्मा; हिरण्यरेता विश्वभुक् कृष्णवर्त्मा प्रदक्षिणावर्तशिखः प्रदीप्तो; हव्यं तवेदं हुतभुग् वष्टि देवः

vibhāvasuś citrabhānur mahātmā; hiraṇyaretā viśvabhuk kṛṣṇavartmā pradakṣiṇāvartaśikhaḥ pradīpto; havyaṃ tavedaṃ hutabhug vaṣṭi devaḥ

Sanskrit only: no published translation is held for this verse.

नेह त्वद् अन्यो विद्यते जीवलोके; समो नृपः पालयिता प्रजानाम् धृत्या च ते प्रीतमनाः सदाहं; त्वं वा राजा धर्मराजो यमो वा

neha tvad anyo vidyate jīvaloke; samo nṛpaḥ pālayitā prajānām dhṛtyā ca te prītamanāḥ sadāhaṃ; tvaṃ vā rājā dharmarājo yamo vā

Sanskrit only: no published translation is held for this verse.

शक्रः साक्षाद् वज्रपाणिर् यथेह; त्राता लोके ऽस्मिंस् त्वं तथेह प्रजानाम् मतस् त्वं नः पुरुषेन्द्रेह लोके; न च त्वद् अन्यो गृहपतिर् अस्ति यज्ञे

śakraḥ sākṣād vajrapāṇir yatheha; trātā loke 'smiṃs tvaṃ tatheha prajānām matas tvaṃ naḥ puruṣendreha loke; na ca tvad anyo gṛhapatir asti yajñe

Sanskrit only: no published translation is held for this verse.

खट्वाङ्गनाभागदिलीपकल्पो; ययातिमान्धातृसमप्रभावः आदित्यतेजःप्रतिमानतेजा; भीष्मो यथा भ्राजसि सुव्रतस् त्वम्

khaṭvāṅganābhāgadilīpakalpo; yayātimāndhātṛsamaprabhāvaḥ ādityatejaḥpratimānatejā; bhīṣmo yathā bhrājasi suvratas tvam

Sanskrit only: no published translation is held for this verse.

वाल्मीकिवत् ते निभृतं सुधैर्यं; वसिष्ठवत् ते नियतश् च कोपः प्रभुत्वम् इन्द्रेण समं मतं मे; द्युतिश् च नारायणवद् विभाति

vālmīkivat te nibhṛtaṃ sudhairyaṃ; vasiṣṭhavat te niyataś ca kopaḥ prabhutvam indreṇa samaṃ mataṃ me; dyutiś ca nārāyaṇavad vibhāti

Sanskrit only: no published translation is held for this verse.

यमो यथा धर्मविनिश्चयज्ञः; कृष्णो यथा सर्वगुणोपपन्नः श्रियां निवासो ऽसि यथा वसूनां; निधानभूतो ऽसि तथा क्रतूनाम्

yamo yathā dharmaviniścayajñaḥ; kṛṣṇo yathā sarvaguṇopapannaḥ śriyāṃ nivāso 'si yathā vasūnāṃ; nidhānabhūto 'si tathā kratūnām

Sanskrit only: no published translation is held for this verse.

दम्भोद्भवेनासि समो बलेन; रामो यथा शस्त्रविद् अस्त्रविच् च और्वत्रिताभ्याम् असि तुल्यतेजा; दुष्प्रेक्षणीयो ऽसि भगीरथो वा

dambhodbhavenāsi samo balena; rāmo yathā śastravid astravic ca aurvatritābhyām asi tulyatejā; duṣprekṣaṇīyo 'si bhagīratho vā

Sanskrit only: no published translation is held for this verse.

सूत उवाच एवं स्तुताः सर्व एव प्रसन्ना; राजा सदस्या ऋत्विजो हव्यवाहः तेषां दृष्ट्वा भावितानीङ्गितानि; प्रोवाच राजा जनमेजयो ऽथ

sūta uvāca evaṃ stutāḥ sarva eva prasannā; rājā sadasyā ṛtvijo havyavāhaḥ teṣāṃ dṛṣṭvā bhāvitānīṅgitāni; provāca rājā janamejayo 'tha

Sanskrit only: no published translation is held for this verse.